قصص رومانسية جريئة ممنوع دخول الأطفال

يوميا تتوالى الرسائل تحمل العديد من المشكلات والصعاب ..الصح اننا نتعلم من المشكلة  مش تكسرنا..

ارسلت لي زوجه شابه هذه الرسالة..

انا عمري 26 سنة اخترت زوجي بإرادتي واختارته من بين ناس كثير كانوا بيتقدمولى رغم انه كان طالب ومش مستعد ومن الارياف بس الحقيقة انا كنت بحبه اوى وما زلت بحبه من كل قلبي المهم اتخطبنا واهلي وافقوا بعد ما اقنعتهم واستمرت الخطوبة تلات سنين لما خلص الجامعة والجيش واشتغل ووفرنا فلوس كانت معانا وقتها واتجوزنا بالموجد ودا بمزاجي مش غصب عنى بس قلتله على ما ربنا يفرجها عليك اول ما اتجوزنا احتاج فلوس باقي تمن العفش بعت جزء من الدهب وسديت عنه وفضلت ادفع ايجار البيت من مرتبي الشخصي لغاية ما ربنا اكرمني وولدت ابنى الكبير الكلام دا كله استغرق سنه وكام شهر لانى حملت اول ما اتجوزت طول السنة دي كان بيعاملنى وحش جدا اكتر من الخدامة لازم اروح الشغل الصبح قبله واكون محضره الافطار وكويا هدومه وألمع جزمته وانزل افضل اشتغل 12 ساعة ولما ارجع اعمل الاكل بسرعة قبل ما يكون رجع من شغله التاني اللي هو عبارة عن مكتب كمبيوتر عمره مادخل للبيت قرش وكان مشروع وفشل ولو صدفة لاقانى تعبانة من الحمل ومغسلتش الاطباق مثلا يبعت يجيب اهلى لو فى نص الليل وكل دا وعيشت وولدت واقعدت من الشغل وربنا اكرمه فى شغله ومرتبه زاد اكتر من اربع مرات ومفيش ديون ولا حاجة ومتيسر لكن كان مضيع وقت وفلوسه فى المكتب ولا بيخرجنى ولا يتكلم معايا ولا اعرف عنه حاجه ولو جيت اعاتبه او اكلمه اقوله انا بحبك ومبستحملش عليك حاجه ودايما واقفة جنبك انت ليه مبتحبنيش يقولى انتى بتعايرينى بس والله انا مش بعايره انا بستعطفه المهم اتقفل المكتب وخسر كل الفلوس .

مش يرجعلى يعوضنى عن الايام اللى مكنتش بشوفه فيها غير دقايق لا خالص بدأ لما بنطلب حاجة جديدة للبيت اول ليا انا يقول مش معايا هو للامانة بيشترى احسن اكل ولبس لنفسه وممكن طقم واحد او اتنين لي يعنى مش بخيل فى الحاجات دي لكن لو سجادة لا سرير للاولاد لاء..نكمل العفش اللى محتاجة البيت لا نحوش للاولاد لاء مصروف لايدى انا خاص بيا لاء مصروف البيت هو اللي ماسكه لكن المفاجأة لما جت اخته تتجوز مع العلم ان والدتها موظفة ومرتبها كويس ووالده موجود وكمان له معاش كويس وقاعدين فى ملك ومبيصرفوش اوى ومتيسرين ساعد فى جهاز اخته بمبلغ عشرين الاف جنيه عمل جمعية كبيرة وجهزها مش الاساسيات لا دا المكنسة والخلاط وترابيزة المكوة و الكتشن ماشين والتلفزيون غير الاساسيات طريقة كلامه معاها اصلا بيقولها قولي على اللي انت عاوزة انتي بتوفري وعاوزة تشترى الرخيص ليه انا اهم حاجة عندي راحتك جاب لها حاجات مش فى بيته كلمها بطريقه عمره ما كلمني بيه ابدا ولما حبيت ادافع عن حق اولادي قالي ولا انتي ولا عشرة زيك يقدروا يكرهوني فى اهلي انا معنديش مانع يساعد على قد ما يقدر لكن مش بالطريقة دي .

 لما ولدت ابنى التانى بقا يقصر فى البيت لدرجة انه اخد باقي دهبى وبقيت اطلب من ماما حاجات للبيت من وراه علشان مش اجرحه لانى فعلا بحبه اوى وفى المقابل انا مش لاقيه منه كلمة حلوة تحسسني بتعبي معاه عمره ما راح معايا عند دكتور ليا او لاولاده الا فى النادر جدا عمري ما عملت شعري ولبست حلو واستنيته وقالى الله انتى حلوة اوى عمره ما مسك ايدي ولا ضمني وقالى انا بحبك اوى

 الحمد لله انك نصيبي عمره ما فكر فى راحتي ولا اد ايه بتعب ولا تعب نفسه يفكر ازاى ممكن يسعدني عمري ما احتاجته ولاقيته سند ليا انا دايما حاسة بعدم الامان وانه فى اي لحظة ممكن يسبني او يعرف غيرى دايما يقولى انتى مالكيش اى لازمة فى حياتى ولا تفرقى معايا مع العلم انا جميلة واللى بيشوفنى مش بيصدق انى عندى ولدين.

 بيتى نظيف ومش بغلط فى جوزى لا من وراه ولا فى وجودة وبحترمه واراعى ربنا فيه وفى غيبته لو غاب انا مشكلتى انى بحبه وعندى منه اولاد نفسى يبقوا احسن الناس ازاى اغير جوزى واخليه يحبنى و يسعدنى زى ما انا بعمل معاه ؟ 

ارجوكى ياماما نونا ردى عليا بسرعه انا بتعذب.

راى ماما نونا ؛-

ابنتى العزيزه اتعلمي تحطي اللي انت عوزاه في عبارات غير

 ماخوذه عليكي يعني مثلا 

بدل ماتقوليله ليه مابتحبنيش قوليله انك بتحبيه وبس

بلاش مقارنه انه مش بيحبك بانك بتحبيه (ماتحطيش الكلمتين قصاد بعض)

او مثلا قوليله انا ببقي سعيده لما بتبقي موجود حاول تلاقي وقت نقعد مع بعض 
بدل ماتقوليله انت مش بتقعد معايا ليه ومش بنخرج ليه ابعدي عن عبارات اللوم 

لو قال كلمه حلوه غير المعتاده فهميه بطريقه شيك انك اخدتي بالك منها واد ايه كنت سعيده بيها .

صدقي او لا تصدقي 99% من الرجاله مش في دماغها حاجات البيت سجاده وطقم ومش عارفه ايه معظمهم كده وحتي اللي بتشوفيه انه مش كده اما مراته بتبقي بتظهره بمظهر غير مظهره او بتبقي ماتعرفيش بواطن الامور الراجال كلها ملهاش في مواضيع المصاريف علي السجاد والستاير والذى منه .


اقولك علي نصيحه بجد ابعدي خالص عن الخوض في مواضيع اهله

لسبب الرجالة بتاعند اوي ويمكن كلامك يزيده استفزاز يحب يغيظك اكتر 
ولا كلامك حيقدم ولا يااخر في اللي هو ناوي يعمله 
يبقي العايط في الفايت نقصان عقل حاولي بقدر الامكان تتجنبي الخوض في موضوع الاهل ده عندك كلمه حلوه قوليها مافيش اسكتي خالص حتي لو انت حسه بغير كده انسي انه يسمع كلامك في النقطه دي يبقي بلاش تبقي نقطه خلاف بينك وبينه طالما هو من النوع ده 


حاولي تعيشي في بيتك بامكانياته ولازم يعرف ان مافيش غير كده

لكن تتصرفي من غير ماتقوليله لا ماتعملهاش هو بيبقي عارف بس عامل نفسه مش عارف

خليه يواجه امكانياته ماتحليش مشاكله وتسهلهالوا وبعدين تحسي بالاضطهاد.

لو فيه حاجه من ماما يبقي دي ليكي انت لمصروفك انت لحاجه علي جانب انت بدل ماتصرفيها في البيت وبعد كده تطلبي منه مصروفك .

علي فكره معظم الرجالة كده ماتحسيش انك لوحدك في النقطه دي وطالما المشكله طايله الجميع حاولي انت بس تلاقي حل توصلي للتعامل السهل معاه

اتجملى لنفسك ولما يدخل مش تستنى انه يعلق علي لبسك علق كان بها ماعلقش اعملي نفسك مشغوله في حاجه .


بصي انا حاسه انه بدأ بخليكي معندكيش ثقه في نفسك واكتر حاجه ممكن تأثر سلبي في العلاقه عدم الثقه في النفس 

حسي فعلا انك جميله 

وهو لازم يوصله الاحساس ده انك حاسه فعلا انك جميله مش بتعالي ولا بغرور ولكن بثقه

لو عاوز يمشي هايمشي سواء انت جميله او دميمه

المهم انك تعملي اللي عليكي وتراعي بيتك بدون قلق ولا عدم امان

اعملي اللي انت تقدري عليه بلا ضغط ولا خوف من انه يسيبك 

حاولي تشغلي نفسك ماتقعديش تستنيه ماتخلهوش شاغلك الشاغل
مايبقاش هو وبس 
خدي بالك من نفسك ومن مظهرك ومن اولادك وكل ده حيأثر عليه
بجد صدقيني الراجل مابيحبش الست الملهوفه عليه اللي قاعده فاضيه بتراقب كل حركاته 

وان شاء الله ربنا يوفقك

يسعدنا تواصلكم معانا ونرحب باي تعليقات على مشكلة اليوم.

ممكن تتواصلوا معانا دايما هنـــــــــــــــــا

او على صفحتنا فى الفيس بوك