قصص رومانسية جريئة ممنوع دخول الأطفال

نعود اليكم من جديد والجزء الثانى من مجموعة قصصية كوميدية من القصص القصيرة بعنوان ( الفانوس السحرى ) والتى نقدمها لكم من خلال موقعنا قصص 26 , نستعرض لكم الجزء السادس والذى تدور احداثه من وحى الخيال حيث تدور احداثها داخل مصر فى اطار من الكوميديا , من الشخصيات الطبيعية التى نقابلها يوميا فى حياتنا .

لقراءة الجزء الاول - الجزء الثانى - الجزء الثالث - الجزء الرابع  الجزء الخامس

الفانوس السحرى .. مكتب تنسيق الجواز

يقف نُصحى أمام باب الوكاله وفى يده جرس وهو ينادى على العروسه الصينى ..

- قرب قرررب قرب تعال شوف العروسه الصينى من غير مقدم من غير مؤخر ولا شبكه ولا جهاز ولا ثلاجة ولا بوتاجاز ولا شقة فى التجمعات ولا حماتك تقولك هات ..

أتجوز أتنين وخد الثالثة هديه مين قال يانصحى هات

قررب قررررررب وسع طريييق للى داخل ياله ياشباب أللى ما تأهلش هيتأهل وأللى معاه مره يبدل ..

فرصة بدل من قاعده ..

الشات والبحث فى المنتديات وآلاطة البنات عندنا أحلى بنات من الصين بلد المعجزات مين قال يانصحى هات ..ألفين دولار وتخلى لياليك السوده تبقى نهار بالبطاقة وبدون ضمان ولا وصولات أمانه ولا حجوزات أملء بياناتك فى أستمارة بعشرة جنيهات مين قال يانصحى هات قررررب

وبعد أسبوع من الأعلان يدخل نصحى على زيزو وهو منفعل : أيه ياعم زيزو أحنا بعنا لحد دلوقتى 2 مليون أستماره والبضاعة قصدى البنات لسه ماوصلتش أنا مش حمل المرمطه أوعى تكون نصبايه ونروح فى الكازوزه ده فيه ناس كبيره قوى ومراكز جامده أنا بايع أستمارات لوزراء ومديرين أمن ومحافظين ورتب فى الشرطه والجيش ..الأستمارة بتتباع دلوقتى فى السوق السوداء بخمسين جنيه

- أهدء يانصحى أتفضل أنت على مكتبك وحبعت لك لما أتصل بالجماعة بتوعنا فى الصين ( يخرج نصحى وهو غير مطمئن ويكلم نفسه : عروسه صينى آل ربنا يستر)

يدعك زيزو الفانوس فتظهر توكى وهى تقول : شبيكو لبيكو توكى بين أيديكو مسيو زيزو..- أيه ياتوكى مفيش ولا حس ولا خبر فين العرايس أحنا بعنا 2مليون أستمارة جواز ولا شوفنا عرايس ولا حاجة أوعى تكون نصباية كبيره زى مانصحى ما بيقول ونروح فى الكازوزه ما تعرفيش الشباب المصرى المتشوق ده ممكن يعمل فينا أيه؟؟ قليل لو ولعوا فينا أو قطعونا ورمونا للكلاب

- ما تخافيش مسيو زيزو اللجنه العليا فى الصين عملتوا مكتب تنسيق للطلبات المصريه والباخره فى البحر شايله أول دفعة حيوصلوا بكره السويس والسفارة بترتب نفسها لأستقبالهم وتسليمهم للحاجزين

- أفهم من كده أن السفارة هى أللى حتقوم بتسليمهم

- أيوه حتسلمهم بعد كتب كتاب .. أقرأ الشروط كويس يازيزو

- ماشى ياتوكى أتكلى على الله أنت .. يضرب الجرس ويطلب نصحى

- خلاص ياعم نصحى البضاعة قصدى البنات حيوصلوا بكره السويس والتسليم بسفارة الصين فى الزمالك

- حالا يازيزو حعلق أعلان بالكلام ده على باب الوكاله خلى الزحمة دى تتفض

*************

تصل العرايس الصينى لمقر السفاره فى الزمالك ويعلم الحاجزين بوصول الدفعة الأولى فتتسابق جماهير شباب الحاجزين بأعداد غفيره لتعطل المرور والكل يحاول أن يدخل السفاره ليستفسر عن وصول عروسته يضطر السفير أن يغلق أبواب السفاره ليمنع الجماهير المتعطشه من الدخول ويتصل بالبوليس لحمايتهم فينزل الأمن المركزى ويحيط بالسفارة ويقف الضابط المسؤل وهو يخاطب الجماهيربمكبر صوت بالأنصراف وأن نتيجة التنسيق ستنشر باكر فى جميع الصحف ولن يدخل ألا الذين وردت أسمائهم فى المرحلة الأولى تبدأ الجماهير فى الأنصراف وفى المساء تشاهد مصر البرامج الأخبارية على الفضائيات والأحاديث التى تم تسجيلها من أمام السفارة الصينيه وأعضاء من البرلمان ورؤساء الجمعيات النسائيه وأعضاء المجلس الأعلى لحقوق الأنسان والكل يقول رأيه بين مؤيد ومعارض وتصبح العروسه الصينى محور الحديث والشغل الشاغل للشارع المصرى وأصبحت فى صدر الصفحات بالجرائد ومحل أستجوابات من أعضاء مجلس الشعب للحكومه وفى اليوم التالى خرجت مظاهرات نسائيه فى جميع محافظات مصر وهى تهتف ( ياصينيه عودى لبلدك ضفر المصريه ده برقبتك ) ( ياصينيه نوحى نوحى مع المصريه فين حتروحى ) وتعددت الوقفات الأحتجاجيه والأعتصامات النسائيه أمام معظم وزارات مصر والحكومه كعادتها دائما ودن من طين وودن من عجين وهى تطلب من المتظاهرات بضبط النفس وأنها فى أنتظار عودة رئيس الوزراء من الخارج لعقد أجتماع عاجل بالحكومه لبحث هذه الأزمه الشعبيه ..

انتظروا الجزء السابع

نرجو ان تنال قصة الفانوس السحرى من مجموعة قصص قصيرة كوميدية اعجابكم ويسعدنا تلقى ارائكم وتعليقاتكم من خلال التعليقات اسفل القصة او من خلال صفحتنا على الفيس بوك .. دمتم بخير :)