مرحبا بكم مرة أخرى في موقع قصص26 ورواية جديدة من روايات رومانسية وكما عودناكم علي الابداع والتميز دائما, موعدنا اليوم مع الفصل الرابع عشر من رواية كبريائي يتحدى غرورك وهي رواية رومانسية تعتمد كثيرا علي الحوار والأحداث الكوميدية .
اقرأ ايضًا: رواية قيود بلون الدماء بقلم رحمة سيد
رواية كبريائي يتحدى غرورك - الفصل الرابع عشر
 |
| رواية كبريائي يتحدى غرورك |
رواية كبريائي يتحدى غرورك - الفصل الرابع عشر
نظر وكيل النيابة ل " على " بغضب و قال بحدة : تعال هنا يا روح امك .. يعنى تحرقله الشركة .. و تبعتله رسايل تهديد .. و تحاول الأعتداء على خطيبته .. ﻻ و كمان من بجاحتك تقول انها متفقة معاك .. غير دا كله المخدرات اللى معاكنظر له " على " و قال بسخرية : ايه يا باشا هى البت خيشت فى دماغك وﻻ ايه ؟!
نهض وكيل النيابة بغضب و قال بحدة : و كمان ظريف بروح امك .. خده يا عسكرى .. روقه
بعد مرور خمس ساعات
دخل " على " و اثار الضرب المبرح تظهر عليه .. و قال بتعب : انا اسف يا باشا .. ارحمنى ابوس ايدك
وكيل النيابة بحدة : اعترف يلة بكل حاجة .. بدل ما تتروق تانى
" على " بسرعة : ﻻ يا بيه .. انا هعترف .. هعترف .. انا اللى عملت كل حاجة بس بتحريض من يارا
نظر له وكيل النيابة و قال بجدية : معاك دليل على الكلام دا
" على " برتباك : دليل على ايه يا باشا !!
وكيل النيابة بجدية : دليل يثبت انها متورطة معاك
مرت اربعة ايام دون ان يتحدث جاسر معها .. او العكس
كانت حبيسة غرفتها .. ﻻ تفعل شئ غير الصلاة و التضرع لله ..لم تنشف دموعها منذ ذلك الوقت .. ان جاسر ﻻ يثق بها .. كانت ترى نظرات الشك و الاتهام واضحة فى عينه .. لم يتصل بها حتى ليعبر عن اسفه .. لو اتصل بها بالتأكيد كانت ستقبل اسفه .. انها تفتقد وجوده بجانبها بشدة .. لقد اشتاقت له .. و لكنه ﻻ يهمه امرها بدليل انه لم يتصل بها .. وجدت سامية تدخل و تقول بحنان : يارا حبيبتى
نظرت لها يارا و مسحت دموعها و قالت : نعم يا ماما
سامية بجدية : كفاية عياط يا حبيبتى .. جاسر ميستهلش ضفرك
نظرت لها يارا و بكت
نظرت لها سامية و قالت بجدية : قومى البسى عشان عيزاكى تيجى معايا مشوار
مسحت يارا دموعها و قالت بجدية : انا فعلا محتاجة انزل .. انا كنت عارفة انه عايز يتجوزنى شفقة و عطف عشان يحمينى من " على " .. بس دلوقتى خلاص
سامية بجدية : طب قومى البسى طيب
يارا بجدية : بس مش شايفة ان لسة بدرى .. الساعة لسة 11 الصبح
سامية بجدية : ﻻ مش بدرى .. يلا قومى البسى
قامت يارا و غيرت ثيابها و نزلت هى و سامية
يارا بعدم اهتمام : ماما هو احنا هنروح فين ؟؟
سامية بجدية : تعرفى تمشى و انتى ساكتة
يارا بستسلام : حاضر
ركبت سامية تاكسى هى و يارا .. كانت يارا طول الطريق شارده تفكر به و الدموع فى عينيها و لكنها ترفض النزول من مقلتيها امام سائق التاكسى .. وقف التاكسى أمام أحد مراكز التجميل الشهيرة و الراقية .. نزلت يارا و اخذتها سامية من يدها .. لتقول لها يارا بستغراب : ماما احنا هنا ليه ؟!
سامية بجدية : يا بنتى اقعدى ساكتة شوية
دخلوا الى المركز لترحب بها صاحبة المركز بحبور .. كأنها تعرفها من مئة عام .. تنظر لها يارا بستغراب ثم تنظر لسامية بتساؤل
تنظر السيدة لوجه يارا بتفحص و تحركه يمينا و يسارا لتقول بجدية : ايه يا بنتى اللى عامل فى وشك كدا .. وشك اسود طين و عليه اثر العياط .. ثم تقول بابتسامة : بس متقلقيش كل حاجة هتبقى تمام
ابتسمت يارا لها و قالت بعدم فهم : صدقينى انا مش قلقانة .. انا بس مش فاهمة ايه اللى بيحصل .. او انا هنا ليه ؟!
السيدة بابتسامة : دى احلى حاجة .. انك متبقيش فاهمة حاجة .. بس ممكن اقولك اسمى ... اسمى بوسى
نظرت لها يارا بابتسامة فقد كانت السيدة بشوشة للغاية : اوك بس انا عايزة افهم انا بعمل ايه هنا !!
بوسى بابتسامة : شششش انا عايزكى تسبيلى نفسك خالص
نظرت يارا لسامية بستفهام فقالت لها سامية : اسمعى الكلام
استسلمت يارا لهم رغم انها ﻻ تفهم اى شئ .. اخذتها بوسى و بدأت بالعمل بها كأنها ترسم لوحة .. بداية من الماسكات نهاية بالمكياج .. بعد عدة ساعات انتهت بوسى اخيرا من تجميل يارا .
نظرت لها بوسى و قالت بابتسامة : ها ايه رأيك ؟؟
افاقت يارا من شرودها و نظرت يارا للمرأه بنبهار شديد .. فقد كانت بوسى بارعة فى اظهار الجمال .. و كان الميك اب رقيق للغاية
نظرت لها يارا بابتسامة و قالت : تسلم ايدكى حلو اووى .. بس ارجوكى عايزة افهم .. انا بيتعمل فيا كدا ليه ؟!
نظرت لها بوسى و قالت بابتسامة : مش احنا بقينا صحاب
ارتسمت الابتسامة على وجه يارا و قالت : اكيد
بوسى برجاء : بنت اختى خطوبتها بعد بكرة و انا جيبلها الفستان هدية .. هى نفس جسمك كدا .. فممكن اشوفه عليكى
نظرت لها يارا بتردد شديد .. فقالت بوسى برجاء : لو سمحتى يا يارا .. لم تتعود يارا ان تكسف احد فقالت بابتسامة : حاضر .. فين الفستان ؟!
اوصلتها بوسى لغرفة تغير الملابس و تركتها
دخلت يارا للغرفة .. وجدت فستان
ظلت تنظر له بنبهار شديد .. لقد كان فى غاية الروعة .. انها تعشق هذا اللون .. ارتدته و نظرت فى المرأه .. لترى نفسها اصبحت مثل الملكات و لكن ينقصها الملك التى تتوج ملكة على عرش قلبه .. نزلت دمعة من عينها فى هذه اللحظة .. كم تمنت ان ترتدى هذا الفستان و يأتى جاسر ليصتحبها .. و لكن هذا الكلام يحدث فى الروايات و القصص فقط .. مسحت دموعها .. ثم شمت رائحة بيرفيوم تعرفها جيدا .. ضحكت بسخرية فخيلها يوهمها بوجود جاسر .. وضعت طرحة على شعرها و خرجت .. لتنصدم بوجود جاسر و نيره بالفعل
نظر لها جاسر بنبهار شديد .. لم يستطع ان يحرك عينه من عليها .. كان فى عالم اخر .. عالم الأحلام .. عالم الأوهام .. لم يرى مثل هذا الجمال من قبل .. كانت تشبة الأميرات فى عالم الحكايات .. هل سيصبح هذا الجمال ملكه وحده
نظرت نيره لها و قال باعجاب شديد : حلو اووى ما شاء الله موزة ... ثم ﻻحظت جاسر الشبة غائب عن الوعى .. فحركت يدها امام وجه و قالت : جاسر .. انت يا عم .. انت يا سيدى .. طب يا حج ؟!
احست برعشة بقلبها عندما رأته ثم افاقت من صدمتها و قالت بحدة : انا كدا فهمت كل حاجة .. فهمت كل حاجة .. بس انا مش هسمح بكدا ثم التفتت لتدخل لتغير الفستان .. و لكن امسكها جاسر من معصمها و قال بجدية : انتى راحة فين ؟!
شدت يدها من يده بغضب و قالت بحدة : ايدك متلمسنيش تانى
جاسر بجدية : مش انا قولت قبل كدا صوتك ميعلاش عليا ثم تحولت نبرة صوته للحدة و قال : وﻻ انا ﻻزم اقرر كلامى كتير
نظرت له بغضب و قالت بتحدى : و انا قولتلك مبحبش حد يزعقلى او يلمسنى و ﻻ انا ﻻزم اقرر كلامى كتير
حاول تهدئه اعصابه و قال و هو يتغط على اسنانه بغضب : اهدى كدا و خلى ليلتك تعدى على خير
يارا بتحدى : و لو مهدتش هتعمل ايه ؟!
تنهد جاسر بضيق و قال بعتاب : تعرفى انك بتضيعى احلى لحظات حياتنا فى الزعيق و الخناق و القرف دا
ظلت تنظر له لبعض الوقت بتفكير و قالت بجدية : انت مش تشك فيا و تسبنى 4 ايام اضرب دماغى فى الحيط و بعدين تجى تقولى بتضيعى اجمل لحظات حياتنا
ظل جاسر ينظر لها لبعض الوقت بتمعن مما اربكها .. فقالت برتباك : ايه فى ايه ؟! بتبصلى كدا ليه ؟!
جاسر بابتسامة حالمة : اصلك حلوة اوووى
يارا برتباك : عن اذنك يا بشمهندس
جاسر بنفعال : بشمهندس !! بشمهندس مين ياختى ؟!
يارا بجدية : ايوة انا اختك .. و اختك مينفعش تتجوزك .. ارتاح بقى
جاسر بصرامة : مش بمزاجك على فكرة .. ثم نظر لنيره و قال بجدية : انا هستنا بره خلصوا و اخرجوا و ابقى البسى الشال على الفستان عشان منكدش عليكى .. كفاية انه كدا
فستان نيره
نيره بابتسامة : حاضر
نظرت له يارا بحنق .. نظر لها و اشار لها بيده و قال بتحذير : اسمعى الكلام يا يارا احسنلك
يارا بضيق : استغفر الله العظيم يا رب .. ربنا يهديك
نظر لها بابتسامة و قال بدعاء : يا رب .. و يهديكى ليا ثم تركها و خرج
نظرت يارا لنيره و قالت بتساؤل : اخوكى دا مجنون مش كدا !!
ابتسمت نيره و قالت : اخويا مفيش اطيب وﻻ احن منه .. بس هو مبيحبش حد يعارضه .. انتى محسسانى انك اول مرة تشوفيه او تعرفيه .. اسمعى كلامه .. هتكسبيه و هيعملك كل اللى انتى عيزاه .. عارفة الأطفال .. هو زيهم بيجى بالمسايسة
نظرت لها يارا و قالت بدموع : يعنى يرضيكى 4 ايام ميكلمنيش و كمان يشك فيا
نيره بابتسامة : انتى هتقلبيها نكد بقى .. انا هجيب حازم عشان يشوفك و انتى بتعيطى عشان يعرف انى مش لوحدى اللى بقلبها مناحة
اتت سامية فى هذه اللحظة و قالت بابتسامة : ما شاء الله يا حبيبتى زى القمر
نظرت لها يارا و قالت بضيق : ماما انا مش موافقة
سامية بابتسامة : عادى يا حبيبتى مش ﻻزم توفقى .. ثم قالت بجدية : شوفى انا عمرى ما فرضت عليكى حاجة .. لكن المردى هفرض .. و الأربع ايام اللى فاتت تثبت انك بتموتى فى التراب اللى بيمشى عليه جاسر
نظرت لها يارا برتباك و قالت بكبرياء : ماما دا سابنى أربع ايام من غير ما يكلمنى و غير دا كله شك فيا و صدق " على " انا كنت شايفة نظرات الأتهام و الشك فى عنيه
سامية بجدية : انا هبقى مطمئنة عليكى مع جاسر
يارا بضيق شديد : ماما
اتت بوسى فى هذا الوقت و نظرت ليارا و قالت بابتسامة : يلا عشان الفلك الطرحة .. ثم قالت بضيق : يالهووى يا يارا عيطى ليه ؟؟ الميك اب باظ .. بس مش مشكلة انا هصلحه .. ثم نظرت لنيره و قالت : و انتى روحى كملى الميك اب .. وﻻ هتبقى بنص و نص
نيره بابتسامة : تصدقى فكرة و ابقى عملت موضة جديدة
بوسى بابتسامة : مجنونة و تعمليها ثم شدت يارا من يدها لتلف لها الطرحة
انتهوا من التزين و خرجوا لينظر لها جاسر بابتسامة عاشقة و يمد يده اليها و لكنها تنظر ليده بضيق شديد و مشيت بعض الخطوات للأمام .. ذهب و فتح لها باب السيارة بضيق .. و قال : اركبى
ركبت يارا بضيق و جلست بالمنتصف و فردت الفستان بجانبها عن قصد
نظر لها و قال بجدية : لمى الفستان انا هقعد فين ؟!
يارا بضيق : اقعد جمب السواق
جاسر بضيق : ما ابقى السواق بتاعك احسن
يارا بجدية : خلاص هنزل انا و اركب انت فى العربية كلها
جاسر بضيق : شغل عيال هو مش كدا .. ثم نظر للفستان و قال : انا اللى غلطان انى جبت فستان منفوش
يارا بضيق : فعلا انت غلطان
جاسر بجدية : هتلمى الفستان وﻻ المه انا
نظرت له بضيق و لمت الفستان .. ركب جاسر بجانبها .. نظرت له و قالت بجدية : فين ماما ؟!
جاسر بجدية : هتجى مع نيره و حازم .. فنظرت له بضيق و صمتت .. فقال لها بضيق : هتفضلى مبوزة كدا
يارا بجدية : اه .. انا مولودة كدا .. مش عاجبك متتجوزنيش
جاسر بضيق : يا ربــــــــــنا .. يا رب صبرنى .. فوكى بوزك دا .. اللى يشوفك هيفتكر انى هخطبك غصب
نظرت له يارا و قالت بسخرية : دا على اساس انى موافقة يعنى .. مهو غصب فعلا
نظر لها جاسر بضيق و قال بجدية : انتى مش حاسة انك بقيتى اوفر اوووى و انا شكلى هغير معملتى معاكى و هتشوفى وش زى الزفت و هتنكدى على نفسك بعميلك السودة دى
نظرت له و قالت بجدية : انت عايز تتجوزنى ليه ؟! انا بالنسبالك ايه ؟! اظن ان دا انسب وقت تقولى السبب
جاسر بنافذ صبر : هتعرفى و الله العظيم هتعرفى .. الصبر حلو ثم نظر لها و قال بصرامة : اضحكى
يارا بعند : مش هضحك
نظر لها جاسر و ضغط على اسنانه بضيق و قال : عارفة لو مضحكتيش انا هعمل ايه ؟!
يارا بتحدى : هتعمل ايه يعنى ؟!
جاسر بتهديد : هبوسك
نظرت له بدهشة لجرائته و قالت بجدية : انت قليل الادب .. ثم قالت بتحدى : و بعدين متقدرش
جاسر بجدية : يا بنتى متتحدنيش
يارا بتحدى : قولتلك متقدرش
جاسر بنافذ صبر : يا بنتى قولتلك متتحدنيش انتى اللى هتندمى .. و انتى عارفة انى لو عايز اعمل حاجة هعملها
ابتعدت يارا و التزقت بباب السيارة و نظرت له بضيق و قالت بتحدى : ما انت مش هتقدر عشان هتلقى رد فعل مش هيعجبك
نظر لها جاسر بضيق و قال بنافذ صبر : هتضحكى وﻻ ؟!
يارا برتباك : قولتلك متقدرش
نظر لها جاسر و قال : خلاص انتى اللى اخترتى .. انا حظرتك .. افتكرى انى حظرتك .. انا قولتك اهو و اصتنع انه سيقترب منها
نظرت له و قالت بسرعة : خلاص خلاص .. هضحك و الله .. و رسمت ابتسامة واسعة على وجهها ثم قالت : اهو
نظر لها و قال و هو يصتنع الجدية : ناس مبتجيش غير بالعين الحمرة ثم قال بجدية : و ان شاء الله ايه رد الفعل اللى مش هيعجبنى
نظرت له و قالت برتباك : ﻻ مفيش
جاسر بجدية : ايه كنتى ناوية تمدى ايدك عليا
ظلت تنظر له بتفكير من ان تقول رد يغضبه .. ثم قالت بتردد : اه ما انت كنت هتعمل حاجة هضيقنى .. و لكل فعل رد فعل
نظر لها و قال بجدية : اوﻻ انا مكنتش هعملك حاجة .. كان تهديد بس .. ثانيا بقى و دى اهم من اوﻻ .. انك تفكرى ان ايدك تتمد عليا دى عايزك تنسيها خالص .. تشليها من قاموسك .. حتى لو فى حلم مش عايزك تحلمية
توقفت السيارة امام احد النوادى الفخمة .. نظر لها و قال بجدية : اظن كلامى مفهوم .. يلا افردى وشك عشان هننزل .. رسمت ابتسامة صغيرة على وجهها و نزلت معه لترى الكثير من الناس .. دخلوا الى احد القاعات الصيفية المفتوحة التى انبهرت بجمالها و تصميمها ثم ذهبوا و جلسوا
اتى الكثير من الناس و سلموا عليهم فى هذا الوقت .. نظر لها وجد الأبتسامة اختفت من وجهها .. فقال بصرامة : شكل التهديد هيبقى حقيقة و مش هيهمنى الناس دى كلها .. اضحكى
نظرت له و ابتسمت ابتسامة صغيرة
قام جاسر من جانبها .. نظرت له بخضة و ظنت انه سيرحل او سيضربها من الذى تفعله فقد تمادت كثيرا ... لكنه ذهب و امسك المايك .. انتبه له جميع الحضور .. نظر لها جاسر و قال بحب : فاكرة .. فاكرة يوم ما قولتلك .. ان فى نجمة من ساعة ما طلعت و هى شاغله بالى ... نجمة غريبة عن النجوم اللى حوليها .. تقدرى تقولى نادرة ... او الاحسن اننا نقول انها استثنائية .. النجمة دى مطلعش نجمة .. دى طلعت القمر .. عشان كدا كانت حاجة استثنائية .. القمر دا هو انتى يا يارا .. غيرتى فيا حاجات كتيرة .. كسرتى غرورى .. دايما كنتى بتسألينى عايز اتجوزك ليه ؟! .. انا مكنتش عايز اقولك .. و صدقنى انا لحد دلوقتى مش عايز عشان خايف اقول حاجة تطلع قليلة اوووى على اللى جويا .. بس انا هقول عشان اريحك بس متأكد مية فى المية انها حاجة ضئيلة جدا عن الحاجات اللى جويا .. عايز اتجوزك عشان بحبك .. ﻻ بعشقك .. حتى بعشقك كلمة صغيرة اوووى عن الحب اللى جويا اتجاهك .. عايزك تبقى حبيبتى و مراتى و ام عيالى فى الحلال .. عايز ربنا يرضى عنا .. عايز نقفل المصحف مع بعض .. عايز نروح حج و عمره مع بعض .. عايز نصلى و اكون انا الأمام .. عايز نساعد بعض على التقرب من ربنا .. عايزك تعرفى انى بثق فيكى اكتر من نفسى .. عايز ابقى ضهرك .. ابقى سندك .. عايزك تبقى معايا .. تبقى ليا ..تبقى بتعتى .. عايزك تفضلى طول العمر قدامى .. شايف ضحكة عنيكى .. ابتسامتك .. خجلك .. جنونك .. عصبيتك .. حتى عندك.. عايز ابقى معاكى فى حزنك قبل فرحك .. اشاركك كل حاجة .. حتى لو بسيطة .. عايز ابقى حبيبك و ابوكى و اخوكى و مامتك و كل عيلتك .. عايز احسسك بالأمان و ان محدش يقدر يقربلك طول ما انا جمبك ... يارا انا بعشقك .. مش عارف ليه ؟؟ .. بس الشعور دا استحوذ عليها فجاءه .. اتملكنى .. عايز ابقى جمبك و اشوفك و انتى بتعجزى .. اراقب ملامحك و هى بتكبر و احبك اكتر و اكتر .. ثم طرقع اصابعه .. لتبدأ الموسيقى .. ليبدأ هو بالغناء .. بصوته العذب الرائع
في كلام لما بيتقال بيغير كل حياتنا معاه
عنه بيستاهل اندور طول العمر ونستناه
انا من اللحظات بقولك اني بحبك اكتر مني
انتي اللي عشانك بكتب شعري انتي اللي عشنها بغني
تتجوزيني
تتجوزيني
مش عايز غيرك بالحياة اوعى تسبيني
من غير متكلم انتي بتسمعيني
عشانك اطول السما لو حبتيني
انا حاسس ان الكون وياك بشوفو بشكل جديد
الدنيا بتضحك وانت معايا تكشر وانت بعيد
انا شايف فيك اولدنا ومستقبلنا ودنيا أمان
مهما هنكبر ونعجز هفضل احبك زي زماااااااااان
تتجوزيني مش عايز غيرك بالحياة
اوعى تسبيني من غير متكلم انتي بتفهميني
عشانك اطول السما لو حبتيني
انا من اللحظات بقولك اني بحبك اكتر مني
انتي اللي عشانك بكتب شعري انتي اللي عشنها بغني
تتجوزيني مش عايز غيرك بالحياة
اوعى تسبيني من غير متكلم انتي بتسمعيني
عشانك اطول السما لو حبتيني
تتجوزيني
مش عايز غيرك بالحياة
اوعى تسبيني من غير متكلم انتي بتسمعيني
عشانك اطول السما لو حبتيني ... ظل جاسر يغنى الى ان اقترب منها و نزل على ركبته و اخرج علبة حمراء بها الدبلتين و قال بحب : تتجوزينى !!
نظرت له و الدموع تستقر فى عينيها .. دموع الفرحة .. كانت السعادة تغمرها .. هل يحبها كل هذا الحب .. انه يبادلها نفس الشعور .. انها تحبه .. تعشقه .. احست بكل شئ قاله لأنه كان بداخلها .. ﻻ تجد كلمات مناسبة للتعبير عما بداخلها .. لقد قال هو كل شئ .. قامت و نظرت له و عينها تنطق باسم الحب و العشق و قالت بسعادة شديدة : موافقة .. موافقة اعيش حياتى كلها معاك و جمبك
نظر لها بحب و امسك الدبلة و قال بحب : هاتى ايدك
نظرت له بتردد .. ثم نظرت للحشد الذى يتابعهم .. لم تشأ ان تكسفه امام الحاضرين
تفهم نظراتها المتنقلة بينه و بين الحاضرين
فأعطها الدبلة و قال بابتسامة : ميهمكيش كلام حد طول ما انا معاكى
نظرت له بحب و ارتدت الدبلة و اخذ هو دبلته و ارتدها
ليصقف الحاضرين جميعا .. و لكن منهم من يصقف بفرحة و منهم من يصفق بحقد و منهم من يصفق بحسد و منهم من يشعر بالضيق .. لم تشارك كوثر فى التصفيق .. فقد كانت تشعر بالضيق الشديد لدرجة الأختناق بسبب غيرتها الشديدة على ابنها
نظر جاسر ليارا بحب .. ثم نظر للدبلة التى بيده و يدها و قال : عقبال ما تبقى فى الشمال
نظرت له و ابتسمت بحب و هى تدعى بداخلها
فقال بابتسامة عاشقة : بتحبينى زى ما بحبك !!
نظرت له و هزت رأسها نافية و قالت بابتسامة واسعة ممزوجة بالخجل : مش هقولك دلوقتى
جاسر بنصف عين : ااااااه بقى هى كدا
نظرت له و ابتسمت بحب و هزت رأسها
نظر لها و قال بابتسامة : بعد كدا لما احبك تضحكى .. مش ههددك .. هبقى اقولك بحبك عشان اشوف الضحكة اللى فى عنيكى دى
نظرت له و قال بابتسامة خجل : جاسر
جاسر بحب : تعرفى انى اسعد واحد فى الكون دلوقتى
نظرت له يارا بحب دفين و قالت بابتسامة : يا رب دايما
جاسر بابتسامة : تعرفى كمان اننا لو فضلنا ساعة كمان كويسين مع بعض يبقى نحمد ربنا و نبوس ادينا وش و ضهر .. عشان احنا زمانا خدنا عين .. تفلق الهرم
ضحكت يارا بشدة و قالت : اسمه الحجر
جاسر بابتسامة : مش فارقة .. بس اهم حاجة انك استريحتى
نظرت له يارا برتياح و قالت بابتسامة : بس انت صوتك حلو و بتعرف تغنى .. غير صوتك و انت بتزعق بتبقى استغفر الله العظيم
ضحك جاسر و قال بابتسامة : دى اقل حاجة اعملها عشانك .. عارفة مكنتش بكلمك ليه الأربع ايام اللى فاتوا
نظرت له و قالت بعتاب : ليه ؟!
نظر لها و قال بابتسامة : عشان كنت عايز اعملهالك مفاجاءه .. كل يوم كنت بكلم طنط سامية و اسألها عليكى و على قد ما كنت بزعﻻن انك بتعيطى على قد ما كنت فرحان انى كنت فارق معاكى
نظرت له و ابتسمت ابتسامة صغيرة
جاسر بجدية : يارا انا بثق فيكى اكتر من نفسى
يارا بجدية : جاسر مش وقته عتاب .. ثم تابعت بابتسامة : قولى عملت ايه فى الأربع ايام دول
نظر لها جاسر بابتسامة و قال : حفظت الأغنية و جبت الفستان و حضرت الخطوبة و اتفقت مع مامتك و كنت بتابع العمال اللى فى الشركة
نظرت له يارا بابتسامة حب : ربنا يقويك
جاسر بحب : يا رب و يخليكى ليا .. ثم نظر لها و قال بجدية : بقولك ما تجى نكتب الكتاب و نتجوز دلوقتى
نظرت له يارا و قالت بجدية : ﻻ استنى شهرين او شهر ونص عشان ابقى خلصت الدراسة
جاسر بابتسامة : ماشى زى ما تحبى ثم نظر لها بحب و قال بصوت منخفض : تعرفى ان كل البنات اللى فى الفرح .. كانت عنيهم منى
نظرت له و قالت بابتسامة واسعة ممزوجة بالثقة : و انا واثقة فيك و عارفة انك مغرور .. فمش هتبصلهم .. و بعدين انت لسة قايل .. انا القمر و هما النجوم
ضحك جاسر و قال بابتسامة عريضة : يا واد يا خطير يا واثق انت .. ثم قال بنصف عين : و بعدين بقتى تحبى غرورى دلوقتى
نظرت له بابتسامة واسعة و ضحكت
نظر حازم لنيره و قال : اداءهم Fake اوووى على فكرة و اوفر .. اوفر يعنى مفيش كلام
نظرت له نيره و قالت بابتسامة : ربنا يسعدهم .. الأتنين يستهلوا .. ثم قالت بسخرية : و بعدين دى حجة البليد .. كتك خيبة روح خد عند اخويا البرنس دا دروس تقوية .. مش فالح غير تغظنى بزفتة و نيلة
نظر لها و قال بجدية : ﻻ بعد اللى حصل اخر مرة دى .. انا حرمت .. ثم تابع بحب : عقبلنا كدا لما البسك دبلتى و بعدين دا انتى اللى فى الحتة الشمال يا بت .. الحب كله .. الحلاوة كلها .. دا انا بحـــــــ....
اقترب منهم جاسر و يارا .. ضرب جاسر حازم على كتفه و قال بابتسامة : منور يا زفت و الله
نظر لها حازم بضيق و قال بقرف : ما هو طول ما اخوكى عامل زى عفريت العلبة و بيطلع فجاءه كدا .. انا هفضل طول عمرى بليد
ضحكوا جميعم .. ثم نظر جاسر ليارا و قال بابتسامة : تعالى نروح لمامتك و نازلى .. ثم ذهبوا
نظر حازم لنيره و قال بابتسامة حب : كنا بنقول ايه بقى
نيره برتباك : هاه مش فاكرة
حازم بخبث : بس انا فاكر ..ثم تابع قائلا : كنت بقولك انى بحبك و ان نفسى دبلتى تبقى فى اديك
نيره بابتسامة ثقة ممزوجة بالخجل : طب ما انا عارفة
حازم بنصف عين : يا بت
نيره بنصف عين : يا واد
حازم و هو يغمز لها : انتى طالعة حلوة كدا لمين ؟!
نيره بجدية : انا حاسة انك ابتديت تظيت .. اتلم شوية
حازم : بقى فى واحدة تقول لأبن خالتها و حبيبها و خطيبها قريبا .. تظيت !!
ضحكت نيره و قالت بابتسامة : تربيتك يعنى هجيبوا من بره ثم نظرت له و قالت بحذر : حازم انت هتفضل مش بتكلم انكل شريف كدا
تحولت معالم وجه الى الضيق و الغضب و عقد حاجبيه و قال بضيق شديد : انتى عايزة تنكدى عليا ليه ؟!
نيره بجدية : انا مش قصدى بس
حازم بضيق شديد : مبسيش .. انتى اول واحدة المفروض متتكلميش فى الموضوع دا
نيره بضيق : انا عارفة ان عندك حق و انه غلط اوووى .. و كان السبب فى بعدك عنى و انى ادخل المستشفى .. بس برده هو باباك يا حازم
حازم بعصبية : ما تهدى بقى قولتلك متتكلميش فى الموضوع دا .. اقولك على حاجة انا هسبلك المكان كله و اغور فى 60 داهية عشان تستريحى
نظرت له بدهشة من رد فعله و قالت بهدوء : حازم اهدى .. انت بقيت عصبى اوى
تنهد حازم تنهيدة عميقة اخرجت كل الغضب و العصبية التى بداخله و قال بجدية : انا اسف يا نيره .. طلعت عصبيتى عليكى و انتى ملكيش زنب .. بس انا بجد اعصابى تعبانة .. لحد دلوقتى مش قادر اقتنع ان ممكن اب يعمل فى ابنه كدا
نظرت له نيره بحزن و قالت بجدية : انا مش زعلانة يا حازم .. انا عايزاك تبقى كويس
نظر لها بحب و قال : ربنا يخليكى ليا .. لمح حبيبة تاتى من بعيد و يظهر عليها علامات الغضب .. اقتربت منهم و نظرت له و قالت بضيق شديد : مش انت اخويا .. تعالا خد حقى بقى
-----------------------
نظر لها بستغراب و قال بجدية : فى ايه ؟! انا مش فاهم حاجة
نظرت لها نيره و قالت بجدية : حبيبة روحى قولى لانكل شريف او لخالتوا .. و سيبى حازم فى حاله
نظر حازم لنيره و قال بجدية : استنى يا نيره اما اشوف فى ايه ؟! ثم نظر لحبيبة و قال : هاه سمعك
نظرت له و بدأت بقص عليه ما حدث
Falsh Back
كانت تجلس مع كوثر .. احست بالملل الشديد .. فقررت الذهاب للوقوف مع حازم و نيره .. و لكنها وقفت فى مكانها عندما قام جاسر و تحدث فى المايك .. كانت تسمع لكلمات جاسر .. اغمضت عينها و تخيلت فارس احلامها و هو يقول لها هذا الكلام .. تنهدت و الأبتسامة على وجهها .. تمنت ان يأتى فارس احلامها قريبا
جاء شاب من خلفها و قال بابتسامة : ممكن اعدى
التفت له و فتحت عينها ببطئ .. لينظر لعينها العسلية بأعجاب شديد و يسرح بهما .. نظرت له بضيق فقد اخرجها من خيالها .. ثم قالت بغيظ ممزوج بالضيق : افندم عايز ايه ؟!
ظل سارح فى جمال عيونها الساحرة .. نظرت له و قالت بضيق شديد : بقولك عايز ايه ؟!
افاق من شروده بسرعة و نظر لها و قال بجدية : بقولك عايز اعدى .. يعنى هعوز منك ايه !!
نظرت له و قالت بغيظ : ما تعدى هو انا مسكاك
نظر لها بضيق و قال : انتى وافقة فى السكة هعدى ازاى ؟!
نظرت له بغيظ و قالت : متعدى من اى حتة تانية .. وﻻ ﻻزم من هنا
نظر فى الأتجاه الأخر و قال بضيق : البعيدة غبية
نظرت له بغيظ و قالت بحدة : انت بتقول ايه ؟!
نظر لها و قال بحدة : بت انتى .. انتى فاكرة نفسك مين عشان تعلى صوتك و
تزعقى كدا .. هو انا جرمت .. دا انا بقولك عايز اعدى
نظرت له و قالت بغيظ ممزوج بالتفاخر : اذا مكنتش عارف انا مين .. انا اعرفك
نظر لها بسخرية و قال ببرود : مش عايز اعرف ..ثم قال بسخرية : لوﻻ الفستان اللى انتى ﻻبساه دا كنت افتكرك واحد صاحبى .. اصلك شبه اوووى .. ثم ابعدها بيده و ذهب .. ليجعلها تشتعل غضبا من بروده و كلامه
Back
نظر لها حازم و قال ببرود : و انتى عايزنى اروح اقوله ايه ؟! اقوله اختى حلوة .. متقولش عليها واحد صاحبك .. روحى يا حبيبة ربنا يسهلك
نظرت له حبيبة بغيظ و قالت : يا حازم بقى
نظرت لها نيره و قالت بجدية : و انتى قاعدة تجدلى معاه ليه .. ما كنتى خلتيه يعدى
ضغطت على اسنانها بغيظ و قالت بضيق : انتى عندك حق .. انا اللى غلطانة انى اتكلمت من عيل زى دا ميسواش اصلا ثم غادرت
نظرت نيره لحازم و قالت بجدية : ما صدقنا خلصنا من غرور جاسر .. طلعت حبيبة
تنهد حازم بضيق و نظر لها و قال بجدية : كبرى دماغك .. ثم نظر لها و قال بضيق : انتى شكلك عايزة تنكدى على نفسك انهارده مش كدا
نيره بستغراب : ليه !! هو انا عملت ايه !!
نظر لها و قال بضيق : بالنسة للشال اللى كل شوية يقع دا
عدلت الشال و قالت بجدية : طب اعمل ايه .. هو اللى بيقع
نظر لها و قال بضيق ممزوج بالسخرية : اقلعيه خالص يا ست هانم عشان ميقعش
نيره بابتسامة : تصدق فكرة .. ازاى تاهت عن بالى
نظر لها و قال بنفعال : نعم يا اختى .. انتى صدقتى
نيره بابتسامة : خلاص يا عم متنفعلش اووى كدا .. كنت بهزر
نظر لها و قال بضيق : بحسب
نيره بابتسامة : فك بقى .. انت بقيت نكدى اووى
ابتسم لها و قال : ماشى يا اختى
ذهب جاسر و يارا لسامية و نازلى
امسك جاسر يد نازلى و قبلها .. لتربت على شعره الغزير الأسود بحنان و قالت بابتسامة : ربنا يسعدك جاسر
نظر جاسر ليارا بمعنى افعلى مثلما فعلت
اقترب يارا من نازلى و امسكت يدها و قبلتها .. ربتت نازلى على كتفاها و قالت بابتسامة : جاسر أمانة فى رقبك يارا .. خلى بالك من جاسر و اسمعى كلام و حفظى عليه .. و مش تزعلى جاسر ابدا .. مش هتلاقى قلب نقى زى بتاع جاسر .. قلب بيحبك بجد
نظرت لها يارا بابتسامة واسعة و هزت رأسها
نظرت نازلى لجاسر و قالت بابتسامة ممزوجة بالتحذير : و انتى جاسر خلى بالك من يارا و حفظى عليها .. يارا بنت كويسة جدا .. عينها بتقول كلام كتير لجاسر .. عندها نفس نقاء قلب جاسر .. لو زعلت يارا اعرف انك زعلت نازلى
نظر لها جاسر و قال بابتسامة حب : و انا مقدرش على زعلكوا انتو الأثنين
نظرت له سامية و قالت بابتسامة : ربنا يسعدكوا يا وﻻد
امسك جاسر يد سامية و قبلها و قال بابتسامة : ربنا يخليكى لينا يا ماما
نظرت له سامية و قالت بابتسامة : و يخليكوا ليا يا رب .. ربنا يحميك يا ابنى
نزلت يارا و اخذت سامية فى حضنها .. فضمتها لها بشدة و قالت : ربنا يسعدك يا بنتى يا رب
اتى شادى و هو يتمتم ببعض الكلمات .. ثم نظر ليارا و جاسر و قال بابتسامة : مبروك ربنا يسعدكوا
جاسر بابتسامة : الله يبارك فيك عقبالك
نظر له شادى بابتسامة و قال : ﻻ يا عم يتوب علينا ربنا من السيرة دى .. دا انا لسة شايف بت دلوقتى سدت نفسى عن كل البنات
ضحك جاسر اما يارا فنظرت له و قالت بجدية : عملت ايه يا فالح !!
شادى بابتسامة بريئة : معملتش .. واقفة زى ابو الهول فى نص الطريق بقولها عدينى .. تقولى هو انا مسكاك .. بت غبية و الله
يارا بنصف عين : هى اللى غبية وﻻ انت اللى بتستعبط
شادى بابتسامة حرج : الصراحة انا كنت بستعبط بس لقتها شايفة نفسها .. بس على مين .. سيبتها تاكل و تهرى فى نفسها كدا و مشيت برنس
نظرت له سامية و قالت بجدية : اتلم مش عايزين مشاكل .. ثم نظرت ليارا و قالت بابتسامة : روحى سلمى على حماتك يا حبيبتى
يارا بتردد : حاضر .. ثم نظرت لجاسر و قالت بابتسامة : يلا يا جاسر
ذهب جاسر معها و وصلوا لطاولة كوثر .. امسك جاسر يدها و قبلها و قال : ربنا يخليكى لينا يا ماما
كوثر و هى تحاول رسم الأبتسامة كى ﻻ تغضب ابنها : و يخليك ليا يا جاسر
نظر لها جاسر بضيق لكلامها .. اقتربت منها يارا و قبلت يدها .. نظرت لها كوثر بابتسامة صفراء و قالت : ربنا يسعدكوا يا حبيبتى ثم نظرت لجاسر و قالت : جاسر روح شوف عز فين ؟! .. و قوله كوثر عيزاك ضرورى
جاسر بستغراب : حاضر يا ماما .. يلا يا يارا
نظرت له كوثر و قالت بابتسامة : ﻻ روح انت و سيب يارا معايا
جاسر باصرار : يلا يا يارا .. هجيب بابا و نجيلك
نظرت له كوثر و قالت بابتسامة : ﻻ روح انت .. انا عايزة اوصيها عليك .. بس متبقاش وصية لو قدامك
نظر لها جاسر بعدم ارتياح ثم قال بستسلام : ماشى .. غادر جاسر و ذهب ليحضر والده
اما يارا فجلست على كرسى مقابل كوثر و نظرت لها بابتسامة ممزوجة بالتوتر .. تحولت معالم كوثر الى الصرامة و قالت بضيق شديد : اوعى تكونى فاكرة عشان الكلمتين الفارغين اللى جاسر قالهم فى المايك دول .. انك كدا خدتى ابنى منى .. جاسر هيفضل ابنى و تحت طوعى .. اما انتى بقى فهتفضلى يارا البنت العادية .. انا مش عارفة ايه المميز فيكى .. عشان جاسر يحبك كدا .. بس احب اؤكدلك انك هتبقى نزوة فى حياه ابنى .. و نزوة عابرة كمان مش هتطول .. انتى بتحلمى حلم كبير اوووى مش قدك .. يا ريت تصحى و تفوقى نفسك منه قبل ما تتصدمى صدمة عمرك .. مش معنى انك لبستى فساتين زينا و عملتى ميك اب زي بتاعنا .. انك كدا بقتى واحدة مننا .. كل دا بفلوس ابنى .. انتى من غير ابنى و فلوسه متسويش
تجمعت الدموع بعيون يارا و حاولت التمساك و قالت بكبرياء : انا مش عايزة اخد ابنك منك .. ابنك هيفضل ابنك .. و انا معنديش اى مانع انى افضل يارا العادية عشان انا بتفخر بيها .. اما بقى عن انى ابقى واحدة منكوا .. فانا مش عايزة .. انا اهم حاجة عندى جاسر مش مهم عندى هو ابن مين ؟! .. او فلوسه ايه ؟! .. او بيلبس ايه ؟! كل دا مش مهم عندى .. و انا مش مستعدة اتخلى عنه بالسهولة دى .. حتى لو اضطريت انى احارب العالم كله عشان افضل جمبه .. هحـــــــــــارب
نظرت لها كوثر و قالت بسخرية : احب أهنئكى بالخسارة مقدماً .. جاسر عايز يجرب الحاجة العادية اللى زيك .. عشان يتأكد انها عادية و بعدين يزهق منها .. و يلقى واحدة زيه فى مستواة و تليق بيه و هتبقى انتى اللى خسرانة ... عارفة ابنى عامل زى العيال الصغيرة .. لما بيشوف حاجة جديدة و غريبة عنه يبقى هيموت عليها لحد ما تبقى فى ايده .. يلعب بيها شوية بعدين يزهق منها و يرميها .. انا بنصحك و انتى حرة .. بس ابقى افتكرى كﻻمى لما يسيبك
كانت دموعها تحاول التماسك و عدم النزول و لكنها خذلتها و نزلت
نظرت لها كوثر و مدت يدها لها بمنديل و قالت بجدية : كفاية عياط جاسر جاى
أخدت منها يارا المنديل و قال بكبرياء : دى حاجة دخلت فى عينى
نظرت لها كوثر بسخرية و صمتت
مسحت يارا دموعها بسرعة و حاولت بصعوبة رسم أبتسامة على شفتيها .. كانت تشعر بسكاكين تخترق قلبها
اتى جاسر و نظر لكوثر و قال بجدية : بابا كان بيتكلم فى التليفون و جاى .. ثم نظر ليارا وجدها تنظر للأرض نظر لها و قال بقلق : يارا مالك ؟!
نظرت له و حاولت رسم الأبتسامة و قالت : مفيش حاجة انا كويسة
نظر لها بعدم اقتناع و قال بحنان : طب يلا .. نروح نقعد مكانا
قامت يارا معه .. و جلسوا فنظر لها و قال بقلق : يارا مالك ؟! و متقوليش كويسة .. عشان انا بفهمك من نظرة عنيكى .. ثم قال بتساؤل : هى ماما قالتلك حاجة ضيقتك ؟!
نظرت له برتباك و قالت بابتسامة : ﻻ دى كانت بتوصينى عليك
نظر لها و قال بجدية : يارا انتى مبتعرفيش تكدبى
ظلت تنظر له بتمعن و قالت بابتسامة : انا كويسة طول ما انت جمبى
نظر لها و قال بجدية : ﻻ دى قالت و قالت كلام كبير كمان .. لدرجة انك تقولى كدا
نزلت الدموع من عينها .. نظر لها بقلق و قال بجدية : فى ايه يا يارا لدرجة انك تعيطى ؟؟
مسحت دموعها و نظرت له بابتسامة و قالت : دى دموع الفرحة .. انا فرحانة اوى
نظر لها بعدم اقتناع و قال : مع انى مش مقتنع بس هحاول اعمل نفسى مصدق
نظرت فى الأتجاه الاخر برتباك ثم نظرت له بابتسامة و حاولت اخفاء ارتباكها و قالت : بس انت شكلك حلو انهارده
جاسر بنصف عين : انهارده بس ؟!
يارا بابتسامة خجل : احم احم
جاسر بحب : لما بتتكسفى بتبقى قمر
كانت جالسة ببيتها و دموعها لم تتوقف عن النزول .. كانت تمسك الهاتف فى يدها و تنتظر مكالمته بلهفة .. نظرت للدبلتين المستقرين فى يدها بألم .. اخرجت دبلة يوسف من يدها و قبلتها و قالت بعتاب و هى تنظر لها : ليه يا يوسف .. ليه تعمل فيا كدا .. دا انا حبيتك بجد .. يعنى انا كنت فى نظرك لعبة .. تلعب بيها شوية و بعدين ترميها .. ليه يا يوسف ؟؟ .. ثم قالت بأمل : انا عارفة انك بتعقبنى عشان مسمعتش كلامك و بعدين هترجعلى و تقولى انا جمبك و مش هسيبك ابدا
قامت ووقفت امام المرآه ثم نظرت لبطنها و تحسستها و قال بضيق : انت السبب .. انت اللى خليت يوسف يبعد عنى .. لو مكنتش حملت مكنش يوسف سبنى .. كان ﻻزم اسمع كلامه
صعدت على السرير و قررت ان تقفز .. لتتخلص من هذا الشئ الذى بأحشائها .. الذى كان السبب الرئيسى لأبعاد يوسف عنها .. ظلت تنظر للأرض بتفكير عميق .. قررت ان تقفز و لكنها تراجعت فى اخر ﻻحظة .. فهذا اخر شئ بقى لها من يوسف .. تنهدت بحزن شديد و استلقت على السرير
انفتح الباب ليدخل زوج امها .. انتفضت بخضة .. و سحبت طرحة جانبها و وضعتها على شعرها بسرعة
نظر لها بابتسامة سخيفة و قال : مالك اتخضيتى كدا ليه ؟! شوفتى عفريت
نظرت له و بعلت ريقها بصعوبة و قالت برتباك : ﻻ عادى .. حضرتك عايز حاجة
نظر لها و قال بابتسامته السخيفة : كنت بطمئن عليكى اصلك بقالك كتير مخرجتش بره الأوضة
نظرت له بضيق شديد و قالت بجدية : ﻻ انا كويسة الحمد لله
دخلت امها و قالت بضيق ممزوج بالحدة : بتعمل ايه هنا يا راجل ؟!
نظر لها و قال برتباك : مبعملش .. ثم خرج من الغرفة
نظرت لها امها و قالت بحده : انتى هتفضلى مرزوعة كدا .. مش كفاية اخوكى فى السجن
نظرت لها بحزن و قالت بدموع : طب اعمل ايه ؟!
امها بحدة : غورى فى اى داهية
*********************
إلي هنا ينتهي الفصل الرابع عشر من رواية كبريائي يتحدى غرورك
تابعوا صفحتنا على الفيس بوك للمزيد من الروايات الأخري
أو أرسل لنا رسالة مباشرة عبر الماسنجر باسم القصة التي تريدها
تابعوا صفحتنا على الفيس بوك للمزيد من الروايات الأخري
أو أرسل لنا رسالة مباشرة عبر الماسنجر باسم القصة التي تريدها
اقرأ أيضا: رواية ملاذى بقلم دينا إبراهيم (روكا)
إرسال تعليق
يسعدنا تلقي اقتراحاتك أو تعليقك هنا