مرحباً بكم أصدقائي وأحبابي عاشقي القراءة والقصص الرومانسية مع روايات حب جديدة للكاتبة زيزي محمد علي موقعنا قصص 26 و موعدنا اليوم مع الفصل الأول من الجزء الثاني من رواية عشق الزين بقلم زيزي محمد.
رواية عشق الزين بقلم زيزي محمد - الجزء الثاني (الفصل الأول)
اقرأ أيضا: رواية عشق الزين (الجزء الأول) بقلم زيزي محمد
 |
| رواية عشق الزين بقلم زيزي محمد (ج2) |
رواية عشق الزين بقلم زيزي محمد - الجزء الثاني | الفصل الأول
مراد بحزن : كل سنه وانتى طيبه يا سوسو ... انهاردة عيد ميلادك .... زين وليليان عزمانى على الغدا انا عارف ليه .. علشان مفكركش فيكى .... بس ميعرفوش ان مفيش ليله مفكرتش فيكى .. مفيش ثانيه مجتيش على بالى ... وحشتينى اوى يا حبيبتى ... كسرتى قلبى وراكى ... سارة انا مش عارف انا مش موت ليه لغايه دلوقتى .. كل يوم بستنى الموت ومبيجيش انا تعباااااان اوى .. كل ليله بقول خلاص هاتموت يا مراد وتروح وتشوفها ومبموتش ...انا ملحقتش اشبع منك يا سارة ولا لحقت اشبع من بنتى .... انا عارف انى رغاى كل يوم اجاى واقعد اقول نفس الكلام ... اكيد زهقتى منى ... تعرفى انا كنت سمعت ان الميت بيجى للناس اللى بيحبهم فى الحلم ... هو انتى مبتجيش ليه ؟.... انتى مش بتحبينى ...طبعا ليكى حق هو انتى شوفتى منى ايه غير كسرة قلبك ... بس غصب عنى ياحبيبتى والله غصب .. سامحينى .
(تليفون مراد رن وفاق على صوت رنه المستمر ) .
مراد بحزن : ايوا يا زين .
زين : ايه يامراد مخلصتش دة كله .
مراد : هو انت يا زين مش هاتبطل تراقبينى انا مش عيل علشان يجرالى حاجة ومش اعرف اتصرف.
زين بهدوء : انا برة ... اطلع.
مراد بضيق : طيب
(مراد قفل مع زين وبص تانى للقبر اللى قدامه وحط عليه ورد احمر ).
مراد : ورد احمر اهو يا حبيبتى ....هاطلع لزين بقى مش هايسبنى ... تعرفى ممشى ورايا ناس تراقبينى وفاكرنى مش هاعرف اخلع منهم بس انا بسيبهم عارفه ليه علشان مش عاوزو يتوجع عليا ... زى ما اتوجعت عليكى .... انا اتعلمت الدرس يا سارة واتعلمته اوى كمان .
**********************
فى شركه الجارحى
: اسر بيه قاعه الميتينج بقت جاهزة .
اسر : زين باشا وصل يا دينا ولا لسه .
دينا سكرتيرة اسر : لا يا بشمهندس موصلش ... اتصل وقال هايتأخر عشر دقايق ... ومراد بيه وادهم بيه على وصول .
اسر : طيب روحى انتى .
( اسر طلع تليفونه ولقى اتصالات كتير من خطبيته ريهام بنت دكتور فى كليه الهندسه .. اسر بيدرسلها شافها وحبها وخطبها رغم اعتراض ليليان الشديد عليها لكن اسر اصر انه يخطبها ).
اسر: الو .
ريهام : ايوة يا بيبى .. انا زعلانه منك .
اسر بضيق: فى ايه تانى يا ريهام .
ريهام : بقى يا اسر اتصل فوق تلات مرات متردش عليا .
اسر : انا قايلك ومفهمك لما بكون فى الشركه مبعرفش اهلى ... فبلاش اسطوانه كل يوم دى ....وبعدين انا مش قايلك اجتماع الشركه السنوى انهاردة .
ريهام بتسرع : ومراد هايجى .
اسر بشك : مراد مين .. مراد اخويا ولا مراد الالفى .
ريهام اتوترت : مراد الالفى طبعا هايجى ... اصله بقاله فترة مبيجيش الشركه وكدة .
اسر حس بتوترها لكن فضل السكوت لغايه ما يفهم : اه هايجى ...يالا هاقفل معاكى علشان احضر للاجتماع .
( اسر قفل معاها وسرح وافتكر امه ورفضها لريهام ).
فلاش باااك
اسر بهدوء: انا مش عارف بس رفضك ليها بناءا علي ايه ؟.
ليليان : هو انا لازم اقدم مبررات ولا ايه يا اسر .. انا اقول رأيى براحتى .
اسر : مقصدش .. بس يا ماما فيها ايه ياعنى مش عاجبك .
ليليان بعصبيه : كلها على بعضها مش عاجبنى اسلوبها وكلامها وطريقه لبسها وتربيتها وكلها على بعضها كدة
مش عاجبنى .
زين بهدوء : اهدى يا لي لي .. انتى قولتى رأيك وهو حر يتجوزها ولا لأ هو حر .
ليليان : ازاى ياعنى يا زين هو حر ... ومين هايعيش معاها ويعاشرها مش احنا واخواته كلهم مش طايقنها ولا انا حتى يبقا ايه يتجوزها ازاى.
زين باصلها بعتاب : اسر يتجوز اللى هو اختارها انا مربى اولادى على انهم رجاله يتحملوا نتيجه قرارتهم .. ودة قراره ومش علشانك ولا علشان عيالك هاكسر قلبه .... انتهى الكلام لغايه كدة .
اسر بهدوء قام وقعد جنب امه : حبيبتى ادينى فرصه اشوف عيوبها .. انا اعجبت بيها وعاوز اخاد الموضوع جد.
ليليان بضيق : طيب يا اسر... مانشوف اخرتها .
(باااااااااااك )
اسر بتنهيدة : يارب اللى اكون شاكك فيه مش صح.
*********************
فى بيت الجارحى .
( لياان دخلت على امها المطبخ لقتها مندمجه فى تجهيز الغدا انهاردة سنويه الشركه وكله هايبقا موجود وهايرجعوا على معاد الغدا وليليان بتحضر وليمه زى كل سنه ... ليان اتسحبت على رجليها وراحت تخض امها).
ليان : بخخخخخخخ.ص
ليليان بخضه : يالهوى ... ربنا يسامحك قلبى وقع فى رجلى من الخوف .
ليان : ههههههه وربنا انتى طيبه اوى يا مامى كل مرة بتتخضى كدة .
ليليان مسكتها من ودانها : امتى هاتكبرى وتعقلى .. ها امتى ؟.
ليان : وانا اكبر واعقل ليه ماتخلينى بهبلى كدة .
ليليان : طب وسعى من طريقى خلينى اكمل الاكل .
( ليان بصت للاكل لقته كتير جدا )..
ليان: ايه ياماما دة كله ... هو مين جاى بالظبط ؟.
ليليان : ولا كتير ولا حاجة انهاردة سنويه الشركه ... وبابكى وانكل مراد واسر ومراد اخوكى وادهم والزفت عز كلهم جايين .
ليان : امممم والزفت عز فين ؟!.
ليليان : هايموتنى ناقصه عمر راح بعد المدرسه على الشركه فاكر نفسه كبير حضرته يالا زين هايظبطه.
ليان : مين دة بابا يظبط عز ...مظنش دة بابا روحه في عز .
ليليان بضحك : لا ماهو عامل مصيبه امبارح وزين حالف ليربيه من جديد...احسن يستاهل .
****************
فى الشركه الجارحى
( زين قاعد على رأس الترابيزة الاجتماع وعلى يمينه مراد الالفى وشماله مراد الجارحى ابنه الكبير وجنب مراد ابنه ادهم وجنب مراد الالفى اسر ).
زين بضيق : كان لازم التأخير دة يا مراد.
مراد الجارحى: معلش يابابا لغايه ما وصلت ليان البيت .
زين : طيب ابدء يا اسر وقول المشاريع الجديدة .
(اسر لسه هايتكلم قطعه دخول عز المرح ابنه زين الصغير طالب فى الثانوى الكل بيحبه فكاهه العيله وعز الوحيد اللى له معزة خاصه فى قلب زين ).
زين بصله بغضب : ايه دة يا عز مفيش باب تخبط عليه .
عز : وانت ازاى يا بشمهندس زين تبدأ الاجتماع من غيرى .
زين رفع حاجبه : هو انا اصلا كنت قولتلك تيجى وتحضره .
عز : ثوانى بس ...حد يرد عليا هو انا اسمى ايه يا جدعان.
مراد الالفى بضحك : هههههه عز الدين زين الجارحى .
عز : الله ينور عليك يا معلم ... ودة اجتماع الشركه السنوى وانا فرد من افراد الجارحى يبقا احضرة وانا حاطط رجل على رجل .
ادهم : يابنى ابوك لقيك عند باب المعبد اليهودى اصلا واحنا بنضحك عليك... ومخلينك تعيش وسطنا رأفه بيك مش اكتر .
عز بسخريه : كدب طبعا ... انا دمى الجارحى وابن الراجل الكبرة اللى هناك دة ... وبعدين انا شبه امك المزة ليليان الجارحى انا نسخه منها... امال ابوك بيحبنى على ايه .
زين بصدمه : مزة !!!!!!
مراد الجارحى ': بتقول على امك مزة يا حيوان وقدمنا عادى ... ابوك هايقوم يولع فيك .
اسر بضيق : يووووة يا بابا قولتلك هاته معانا علشان دة عيل رخم وهاتلاقيه ناطط حاضر معانا وبيأخرنا وبس .
زين بص لعز بتوعد : ماشى احضر.. انا عمال اعد فى غلطاتك وانهاردة غلطه جديدة .. ابدأ يا أسر .
عز عقد حواجبه وميل على ادهم وهمس : هو انا عملت ايه غلط انهاردة .
ادهم بهمس : قولت على امك مزة وعاكستها قدامنا وقدام مراد الالفى ابوك هايوديك وراة مصنع الكراسى .
عز بهمس : يالهوى كله الا مصنع الكراسى .
( الاجتماع خلص وكله اتنهد باريحيه مراد وادهم اللى ملهمش فى الهندسه والمعمار وقاعدين مخصوبين علشان خاطر زين ومراد الالفى اللى مغصوب وزين مش سايبله فرصه يختلى بنفسه لدرجه انه مسك اسر ادارة الشركات علشان يتفرغل لمراد وعز اللى عامل نفسه انه فاهم وهو قاعد بيلعب على الفون و وزين اللى مبسوط بلمتهم حواليه واسر اللى بيشرح شغله بمنتهى التفانى والاخلاص ونسخه من زين الجارحى ).
زين : يالا خلينا ننزل نروح علشان الغدا .
مراد الالفى : انا اعذرنى من الغدا دة .
مراد الجارحى لف ايدة حواليه : انت بتهزر يا مراد ولا ايه انت عاوز ليليان الجارحى تتقمص من زين باشا وتعاتبه انه مجبكش معاه وطبعا زين باشا هايقعد يصالح ويحايل فيها .
زين : ايه زين وايه مراد ما تحترم نفسك انا ابوك ودة يبقا صاحب ابوك .
مراد الجارحى : اعذرنى انت ابويا اوك بس دة هايفضل مراد وبس .
زين : حاسبنا هناك يا مراد فى البيت ... يالا قدامى كلكوا على البيت ومفيش اعذار يا مراد .
(كلهم نزلوا مع بعض والبنات اللى بتشتغل هايتهبلوا من اولاد زين اللى يعتبروا نجوم مجتمع من شياكتهم ومراكزهم طالعين جبارين لابوهم فى وساتهم وشخصيتهم القويه ) .
زين : يالا يا مراد انا وانت هانروح مع بعض ... كل واحد يروح زى ماجه ومش عاوز تأخير.
عز : خدنى معاك يا حج.
زين : فين عربيه الحراسه بتاعتك .
عز : مشتهم انا قولتلهم روحوا علشان هاروح معاك .
زين بغضب : وانا قولت ميه مرة متتحركش من غيرهم.
مراد الالفى مسك عز من رقبته وكتفه : انت ياض مبتسمعش كلام ابوك ليه ... تاعب قلبه ليه.
ادهم : اه مش كفايه عليه عمك مراد يبقا انت وهو .
مراد الالفى : مالكش دعوة يا ظريف .
***********
(على الجانب التانى من شركه الجارحى
قدام الشركه بمسافه كبيرة نلاقى راجل وبنت بيتناقشوا بعصبيه ......).
مجهول ١: يابنتى اتحركى ابوس ايدك مبقاش فيه وقت .
مجهول ٢: اتحرك فين يا اونكل انت حضرتك بتتكلم جد انت عاوزنى اروح ارمى نفسى على حد واقوله لو سمحت انقذنى ... اقف جنبى .
مجهول ١: ايوا اسمعى كلامى انا عاوز مصلحتك .
مجهول ٢: انت عاوز ترمينى فى النار وابقا فى الاخر بسمع كلامك .
مجهول ١ بتنهيدة : يابنتى نار زين الجارحى ولا جنه الزفت التانى دة .
مجهول ٢: ولا نار ولاجنه انا مش هاتحرك من مكانى ...فى قانون فى البلد .... الدنيا مش سايبه .
مجهول ١ بسخريه : قانون !!! هو القانون كان رجع الحق لاصحابه زمان ..يابنتى القوى عاوزله الاقوى منه .
مجهول ٢: انت ليه محسسنى انى عايشه فى غابه مع وحوش.
مجهول ١: لا انتى لسه معشتيش ... لكن لو مصرة هاتعيشى وتندمى انك مش سمعتى كلامى .
مجهول ٢ : يارب دلنى على الصح انا مبقتش عارفه الصح فين والغلط فين .
مجهول ١ بفرحه: اهو بصى ربنا استجابلك شوفتى وانتى بتدعى زين الجارحى خرج اهو من الشركه .
مجهول ٢ باستغراب: هو فين زين دة ؟
مجهولة١: اهو اللى واقف مع الرجاله دى وحواليهم الحراسه .
مجهول ٢: انت مش قولتلى انه راجل كبير .
مجهول ١: ههههه اه هو كبير بس مبيبنش عليه ... بصى ياستى اللى فى نص هناك دة ....دة زين الجارحى .
مجهول ٢ بصدمه : ابو شعر طاير دة ... معقول مشاء الله علييه دة زى مايكون ابن امبارح.
مجهول ١: امال لو عرفتى ان اللى واقف جنبه على يمينه دة مراد الجارحى ظابط فى المخابرات دة ابنه الكبير واللى واقف جنب مراد دة ياستى ادهم الجارحى ابن زين التانى ظابط فى العمليات الخاصه اما بقا اللى واقف ولابس قميص ازرق وماسك جاكت البدله فى ايدة دة اسر الجارحى ابنه الوسطانى بس دكتور فى كليه الهندسه وماسك شغل ابوة كله واللى واقف جنب زين الجارحى دة مراد الالفى صاحب زين اللى اعرفه انه صاحب عمرة .
مجهول ٢: مين اللى صاحب زين .. هما الناس دول ايه مصاصين دماء مبيكبروش ... طيب مين اللى صاحب زين ماسكه من رقبته دة وبيهزر معاه .
مجهول ١: دة عز الدين ابن زين الصغير معرفش بس باين عليه صغير لسه فى مدرسه .
مجهول ٢: مشاء الله عيله تخض اى حد ... انا لايمكن اسمع كلامك دة .
مجهول ١: طيب ليه ؟.
مجهول ٢: راجل زى زين دة انت قولتلى ان شهرته انه غول فى السوق وله وضعه ... وبعدين انت مش شايف عياله عاملين ازاى واحد فى مخابرات وتانى عمليات خاصه وتالت معرفش دكتور فى كليه هندسه دول مناظرهم بس تخض اى حد ... لا لا وانت عاوز تقنعنى ان لما ادخل عليه هايصدقونى دة احتمال يحبسونى .
مجهول ١: لا هايصدقك....زين الوحيد اللى هايعرفك... فيكى حاجة هايعرفك على طول منها .. وبعدين انا اهو هايعرفنى ويصدقنى .
مجهول ٢: اه لو اللى فى دماغك دة لا طبعا يا اونكل مش اوى كدة الموضوع .. لكن يصدقك مظنش الدنيا مش سهله اوى كدة انت بس اللى طيب ... عن اذنك انا هاخد قرارى الصح واروح ابلغ.. وانا مصرة القانون هايجبلى حقى .
مجهول ١: القانون لا يحمى المغفلين وانتى كنتى مغفله ... وهاتسمعى كلامى ويالا بقا قبل ما يتحركوا لو اتحركوا ومشيوا والله ما نعرف نوصل لزين الجارحى تانى .
مجهول ٢: لا لا يا اونكل ... عند اذنك ... انا هانفذ اللى انا شايفه صح .
مجهول ١ شدها : ورحمه ابوكى لتسمعى كلامى ويالا بينا .
(مجهول ١ شدها بسرعه وعدى بيها الطريق قبل ما تعترض وجرى بيها وراح وقف وحاول يوصل لزين للحراسه مناعته ... ملقاش حل غير انه يعلى صوته )
مجهول ١ بصوت عالى : زين باشا .
( زين سمع صوت ومكنش غريب عليه ابدا وافتكرة بسرعه أمر للحراسه يوسعوله ... وجه عليه راجل) .
زين بدهشه : احمد ازيك ... لسه فاكر تيجى يا راجل ..دورت عليك كتير .
احمد بإحراج : معلش اعذرنى على الطريقه اللى دخلت بيها بس انا عاوزك ضرورى .
زين : أمرنى دة انت من ريحه الغالى .
احمد : انا كنت عاوز بس اقدملك ....
( احمد حس ان مفيش حاجة فى ايدة بص حواليه بسرعه)
احمد بصوت عالى : ميييييييرا .
زين : مين ميرا !.
احمد بخوف : ميرا البنت اللى كانت معايا ... هى فين .
واحد من الحراسه : سابتك قبل ما تكلم زين باشا ودخلت فى الشارع الجانبى لشركه .
( احمد جرى وراح الشارع وكلهم وراة زين واولادة اللى مش فاهمين فى ايه ومين دة ومين ميرا ومراد والحراسه وراة ... احمد لقاها ماشيه بسرعه ).
احمد بغضب : ميررررررا .
(ميرا وقفت ولفت اتفاجئت بيهم كلهم ... ونظراتهم المصدومه خافت من نظراتهم ورجعت خطوة لورا).
زين بصدمه : ميرا !.... انتى بنت عبد الرحمن .
احمد بفخر : مش قولتلك هايعرفك على طول .
ادهم بصدمه : مين دى يا بابا دى نسخه من ماما .
مراد الالفى بذهول : سبحانك يارب ... ليليان واقفه قصادى .
زين بفرحه : تعالى هنا قربى .
ميرا بلعت ريقها بخوف وقربت : حاضر .
(احمد حس بخوفها واخدها فى حضنه)
احمد : اقدملك يا بشمهندس زين ..ميرا عبد الرحمن شاكر القاسم .
زين بابتسامه : عرفتها على طول .
احمد: بشمهندس زين احنا واقعين فى مشكله .
ميرا بتسرع وصوتها خرج مهزوز: لا مفيش مشكله ولا حاجة يالا علشان الحق اسافر.
احمد بضيق : لا فى مشكله .. وبعدين تسافرى ازاى انتى ناسيه انك ممنوعه من السفر .
مراد الالفى : ليه ممنوعه من السفر ؟.
ميرا برجاء : ارجوك يا انكل كفايه اسكت .
احمد اتجاهلها وبص لمراد : ممنوعه من السفر علشان متجوزة .
زين : متجوزة !!!! متجوزة مين ؟!. وليه مانعها من السفر ؟! وفين عبد الرحمن ابوها وفين ايمان امها ؟.
احمد : احم عبد الرحمن وايمان توفاهم الله يا بشمهندس وميرا متجوزة ابن عم ابوها اظن انت عرفوا كويس يوسف عاصم القاسم .
زين بصدمه : ايه ؟!......
*********************
إلي هنا ينتهي الفصل الأول من الجزء الثاني من رواية عشق الزين بقلم زيزي محمد
تابع جميع فصول الجزء الثاني من هنا: جميع فصول رواية عشق الزين الجزء الثاني
تابع جميع فصول الجزء الأول من هنا: جميع فصول رواية عشق الزين الجزء الأول
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا