مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة أسماء سليمان علي موقعنا قصص 26 و موعدنا اليوم مع الفصل السادس من رواية قسمتي بقلم اسماء سليمان.
رواية قسمتي بقلم اسماء سليمان - (الفصل السادس)
اقرأ أيضا: رواية عشق الزين (الجزء الأول) بقلم زيزي محمد
 |
| رواية قسمتي بقلم اسماء سليمان |
رواية قسمتي بقلم اسماء سليمان - (الفصل السادس)
فوزية قاعدة بتسبح وتستغفر ربها وبتقول يارب كملها بالستر
صوت من الخلف : يارب عملتي ايه يا فوفا
فوزية بضحكة : اهلا يا قلبي جيت بدري يعني
مروان بضحكة قصيرة وسريعة : هقعد في الشغل اعمل ايه
فوزية باستغراب : مفيش مهمة تطلعها ولا مأموريه
مروان بحسرة : البركة في ابنك
فوزية بتعجب : انت قلت الكلمة دي قبل كدا – هو في ايه – وبعدين بقالكم كتير مش بشوفكم بتتكلموا مع بعض ولا بتروحوا التدريب سوا ولا بترحوا تركبوا خيل في النادي كل يوم جمعة زي ما اتعودتم
مروان بحزن ظاهر علي وجه : مفيش يا ماما وبعدين متهربيش من سؤالي ربنا يكمل ايه بالستر
فوزية : لما بتقول يا ماما مش فوفا بعرف انك بتهرب من الاجابة – مالك يا حبيبي متوجعش قلبي عليك
مروان باس ايديها : متقلقيش انا كويس المهم عملتي ايه يا فوفا - ارتحتي كدا
فوزية حكت لمروان علي كل حاجة من ساعة ما طلبت منه يعرف اخر اخبار سوسن لحد ما راحت طلبت ايديها
مروان : انت بلغتيها علي شرط حسام
فوزية وهيا بتحط ايدها علي قلبها : ودا كلام يتقال – طبعا لا
مروان وهو بيبرق عيونه : بس كدا حرام علينا
فوزية بهدوء : انا زيك كنت قلقانه وبقول حرام - وكنت خلاص هكبر دماغي وانسي الموضوع – بس حلمت اني في الكعبة ومعايا ادم - وبعد شويه لقيت حسام لابس لبس الاحرام وشايل سوسن علي ايده وهيا متعلقة في كتفة وبتضحك وبيطوف بيها – ولما سالته انت شايها ليه يا حسام قالي حامل يا ماما وخايف عليها – وصحيت من النوم بقول الله اكبر ما شاء الله - وقمت علي صوت الاذان وقلت دي اشارة من ربنا
مروان : الله - الحلم حلو قوي يا فوفا – بس من حقها تعرف بردوا
فوزية وهيا بتهز راسها : معاك حق يا ميرو – بس انا حاسة وربنا يسامحني اني دي اشارة من ربنا اني اكمل وأخبي عليها – يمكن لما يعيشوا مع بعض يقربوا ويحبوا بعض - وربنا يسهل الحال – وبعدين خايفة اقول ليها ترفض هو فيه حد عاقل يقبل شرط زي كدا
مروان بتردد : مش عارف– بس لما حسام يسالك هتقولي ايه
فوزية : زي ما خبيت علي سوسن هخبي علي حسام - هقوله اني قلت ليها علي الشرط وافقت عليها كمان - انا عايزة الجوازة تتم باي حال – هو في مهمة ولما يرجع بالسلامه ان شاء الله هقوله
مروان بهمس : يعني هو يطلع مهمة وانا يشيل اسمي منها – انا داخل انام
فوزيه : تصبح علي خير يا قلبي
فوزيه بعد ما مروان دخل اوضته - يا تري في ايه يا مروان شكلك مش عجبني بقالك فترة – سامحني يا قلبي حسام شغلني عنك – اول ما اخلص من حسام هفوق ليك
@@@@@@@@@
في شركة الزهرة عند سوسن
بعد اسبوع من زيارة فوزية لزهرة وطلب سوسن للزواج – سوسن علي وعدها امامتها ومحدش عرف بموضوع حسام
سحر بعد ما قعدت علي مكتب سوسن : عايزة اجازة اسبوعين
سحر وهيا بتطرقع في صوابعها : سوسن سوسن انت فين - سرحانه في ايه
سوسن بسرحان : بتقولي ايه
سحر : عايزة اجازة اسبوعين - وسرحانه في ايه اعترفي حالا
سوسن بضحكة : ليه هتتجوزي
سحر بعد ما نزلت من علي المكتب وهيا بتلف حلوين نفسها : وانا لما اتجوز هاخد اجازة اسبوعين بس
سوسن : هههه هتموتي وتتجوزي انا عارفة – عايزة الاجازة ليه
سحر : هموت واتجوز علي وبس مش اي حد تاني – المهم ابيه ياسر هيناقش الدكتوراه بعد كام يوم – والمناقشة في لندن زي ما انت عارفة - وبعت لينا كلنا دعوة واقامة لمدة اسبوعين حتي بعت لعلي كمان
سوسن : انتم الاتنين – عامة مبروك – ماشي يا سيتي احنا كدا الحمد لله معندناش شغل في الفترة اللي جايه والباقي تخليص شغل ما بعد المناقصة والاوراق المالية انا هخلصها– هتسافري من امتي
سحر : احنا النهاردة الاربعاء والسفر الجمعة الصبح
سوسن : سلمي علي ابيه ياسر وصوري المناقشة فيديو عايزة احس اني كنت معاكم
سحر : عيوني – انا دخله مكتبي ارتب كل الاوراق اللي عندي علشان متتعبيش في التدوير عليها – مش هتقولي كنت سرحانه في ايه
سوسن : اه والنبي اعملي فيلات لكل حاجة – انا مش عارفة انت بتعرفي تشتغلي ازاي في كوم الورق اللي مش منظم دا
سحر بثقة : دي قدرات يا بنتي مش موجودة عند حد – وهسيبك لحد ما تيجي تقولي لوحدك زي الشطورة كنت سرحانه في ايه
سوسن : هههههه
وهنا رن تليفون سوسن اللي انقذها من الرد علي سحر وكان المتصل زهرة
سوسن : ايوه يا ماما خير
زهرة : فوزية كلمتني وقالت ان حسام وصل امبارح وجايين النهاردة علي الساعة 7 مساءا
سوسن : ماشي يا ماما – بس كلمي عمي جمال وطارق يكونوا موجودين مع محمد
زهرة : عملت كدا من غير ما تقولي سلام
@@@@@@@
في بيت فوزية
بعد ما حسام صحي من النوم علي بعد العصر فوزيه قالت ليه
فوزية : انا رايحين نشوف العروسه النهاردة – انا كلمتهم زي ما قلت لك امبارح
حسام : انت شوفتيها
فوزية : ايوه وما شاء الله عسوله ووو
حسام : خلاص موافق طالما عجبتك خلصنا – بس لزمته ايه الشوف – هي واقفت علي شرطي
فوزية في سرها يارب سامحني : ايوه وافقت
حسام : نكتب الكتاب النهاردة بالمرة
فوزية : يا ابني مش تشوف الاول هتبقي مقبوله بالنسبة ليك او مش مقبوله
حسام ببرود : مش فارق يا ماما – المهم تعرف انها موجوده علشان خاطر ادم
فوزية بتردد : هيا كمان عندها شرط
حسام : شرط ايه
فوزية وهيا بتبلع ريقها : بتقول ان محدش يعرف من اهلها ان الجوازة مشروطة – يعني تعاملها ادام اهلها كويس زي اي زوج وزوجة
حسام : ليه - ممكن اعرف السبب
فوزية : بتقول اتعقدت من الرجاله واهلها بيضغطوا عليها علشان تتجوز تاني – فكدا هتبقي ضربت عصفورين بحجر واحد الاول تطمن اهلها عليها والتاني ان الجوازة هتبقي علي الورق وبس
حسام : اوك - اتفقنا
فوريه : 7 مساءا نكون هناك– انا داخله اجهز والبس
فوزية في سرها يارب سامحني واغفر ليا
@@@@@
في فيلا زهرة
الكل متواجد في الميعاد - زهرة ومحمد وسوسن وعمهم جمال – اما عمها طارق اعتذر عن الحضور – رن جرس الباب ودخلت فوزية ومعاها حسام ومروان وأماني
وبعد السلام والتعارف
جمال بضحكة بسيطة : شرفتنا يا حسام بيه
حسام وهو مكشر : الشرف لينا
مروان وهو بيخبط علي رجل محمد : انت في كليه ايه يا محمد
محمد : هندسة
مروان : كويس انا كدا تمام بقي عندي اخ صغير واختين سوسن وأماني
في نفس الوقت دخلت الدادة سامية شايله العصير ووراها سوسن اللي علي الرغم من ارتدائها بدله الا انها كانت في غاية الجمال بدله زرقاء وتحتها قميص روز مع حجاب روز في زهري وطالعة بتاخد العقل والقلب
مروان لحسام : ايه الجمال دا يا بختك يا حسام
حسام اصلا مبصش علي سوسن اولا لانه مش مهتم وثانيا لانه سال عليها امبارح اول ما فوزيه كلمته عنها - وصدق كل الكلام التي اتقال عليها ونسي انه ظابط ولازم يتاكد من كل حرف سمعة سواء صوق او كدب
ودار حوار مختلف بين كل الأطراف وفي النهاية حسام علشان يدخل في الموضوع وكمان علشان يخلص قال
حسام : جمال بيه انا يسعدني اني اطلب ايد بنتكم الكريمه لنفسي
جمال : والله يا ابني الشرف لينا
حسام : لو حصل قبول يبقي خير البر عاجله وكله يتم في اسرع وقت ممكن
زهرة باستغراب : ازاي يا ابني احنا لازم نفرح بيكم علي مهلنا - ولا ايه يا فوزية
فوزيه كانت هترد ولكن حسام سبقها وقال : فيه اكتر من سبب لكلامي دا - الاول اني ظروف شغلي صعبة جدا ومش بعرف اخد اجازات كتير – ثانيا انا والعروسه اتجوزنا قبل كدا وعملنا فرح وهيصه – ثالثا كبرنا علي موضوع القاعة والرقص والمزيكا والكلام دا قصدي يعني جربناه مرة– ورابعا ماديا انا جاهز والشقة جاهزة يبقي نتأخر ليه
جمال : كلامك يا ابني عين العقل – بس لازم نسيب سوسن تقرر وتفكر
حسام : طيب نستاذن واحنا في انتظار تليفونكم – وخرج حسام ومروان وأماني وفوزية
@@@@@@@@@
بعد انصراف عائلة العاصي
جمال : ايه رائك يا سوسن فكري كويس – وان كان عليا انا ليا زمايل بيشتغلوا في الشرطة هسال عليه واعرف كل حاجة عندة في اقرب وقت
سوسن : حاضر يا عمو ربنا يسهل
@@@@@@
في بيت فوزية بعد ما رجعوا من عند سوسن
مروان : سوسن حلوة قوي يا ماما تسلم عيونك يا قلبي اللي اختارتها
فوزية : واهلها ناس كويسين - وسوسن تتحب وتدخل القلب علي طول – صح يا حسام
حسام بمد شفايفة للامام : اممم
فوزية : انت ليه قلبت القعدة وقمت بسرعة كدا ومختش واديت في الكلام
حسام : عايزين نخلص يا ماما – طالما هيا موافقة علي شرطي دي كلها شكليات
مروان : طيب كنت قعدت تتكلم معاها – دا انت حتي مبصتش عليها
حسام : بقولك شكليات – علي فكرة انا موافق علي الزواج علشان خاطر ادم – وموافق علي البنت دي علشان انت اللي اخترتيها رغم الكلام اللي زي الزفت اللي سمعته عنها
فوزيه : ك--
حسام قاطعها : انت كنت مش موافقة علي صافي واكتشفت انك معاكي حق – ودلوقتي انا مش موافق علي البنت دي بس علشان خاطرك هكمل معاها – بس نبهيها اي حركة غدر او خيانه وربي ما هرحمها
مروان : وانت صدقت كل الكلام اللي اتقال عليها – لازم تتأكد الاول
حسام : انتهي الكلام في الموضوع دا - انا رايح امهد الموضوع لادم
مروان بعد ما خرج حسام : هنعمل ايه يا فوفا
فوزيه بحيرة : والله منا عارفة – ربك يدبرها من عنده
@@@@@@
في فيلا زهرة
في نفس يوم الزيارة ليلا وبعد نوم زهرة محمد عمل قهوة لاخته ودخل اوضتها لقاها صاحية وبتفكر
محمد : سونونو احلي قهوة يا قمر
سوسن : جت في وقتها
محمد : الجميل بيفكر في ايه
سوسن : في اللي حصل – انت ايه رائك
محمد : مش عارف - حاسس كدا انه اتم وسئيل وواخد في نفسه مقلب وتنك – انما مروان لذيد وفرفوش
سوسن : ههه - المفروض بعد كلامك دا اقول ايه يعني
محمد : تقولي رائك في حسام
سوسن بعد ما قامت من سريرها وبتتمشي في الاوضة : هو قام بسرعة ومطلبش نقعد مع بعض نتكلم شويه – وبعدين معاك حق هو اتم وسئيل علي الاخر- بس احساسي بيقولي انه دي مش شخصيته الحقيقية ودا اطار حاطط نفسه فيه
ولسه مخلصتش كلامها - لقت تليفونها بيرن وكانت فوزية (سجلت رقمها اثناء المقابله ) وفتحت الاسبيكر علشان محمد يسمع
سوسن : ازيك يا طنط عامله ايه
فوزية : الله يسلمك يا سوسن – معلش يا بنتي كنت عايزة ابلغك حاجة
سوسن : خير يا طنط
فوزية : خير ان شاء الله –انت طبعا شوفتي حسام واكيد قلتي انه كشري ومش بيضحك وبيهزر ودمه بارد – عايزة اقولك والله مش هتلاقي احسن من حسام في الدنيا بحالها بس يا ابنتي صدمه حسام في جوازته الاولي غيرت ملامحة وصورته علشان كدا انا حاطة امل كبير عليكي انك ترجعي ابني تاني ومش هتندمي
@@@@@@@@
في بيت فوزية
مروان كان موجود وفوزيه بتكلم سوسن
مروان : فوفا انت بتحاولي تقنعيها بحسام
فوزية بتاكيد : مش دي الحقيقه – هو فيه زي حسام في الدنيا بحالها
مروان بنفي : لا مفيش بس
فوزية : مبسش وربنا يسامحني بقه – انا خفت انها ترفض نتيجة اللي عمله اخوك النهاردة
مروان : طيب لما يتقابلوا ويتكلموا هتعرف كل حاجة وهو هيعرف انك مقولتيش ليها علي شرطه
فوزية : علي الرغم اني زعلانه من اللي عمله حسام – بس رجعت وفكرت تاني وقلت ان دا كويس هيكونوا كتبوا الكتاب
مروان : هنقول كل دا هيعدي – طيب يوم الفرح هيحصل ايه انت فاهمني طبعا
فوزية وهيا حاطة ايدها علي قلبها : ربنا يدبرها – متخوفنيش يا وله
@@@@@@@
في فيلا زهرة
محمد وسوسن لسه بيكملوا كلامهم بعد مكالمة فوزية
محمد : سونونو طنط فوزية دي شكلها زكيه جدا
سوسن : بس تصدق انا حسيت الصدق بكل كلمه في كلامها
محمد قرب من اخته : علشان كمان جوزتك لاولي غيرت كل ملامحك وبقيتي واحدة تانية
سوسن : مش يمكن ربنا بيجمعنا مع بعض علشان كل واحد يعوض التاني – ويجبر بخاطرنا
محمد : صلي استخارة ونستني لحد عمو جمال ما يرد علينا وربنا يعمل الخير
سوسن : ماشي هعمل كدا - يله تصبح علي خير
محمد : وانت من اهله
@@@@@@@
في الشركة عند سوسن
بعد يومان من سفر سحر وعلي - جمال اتصل علي زهرة وقال ليها انه حسام سمعته لا غبار عليها وانهم ناسين كويسين وعايله محترمة جدا – فاتصلت علي سوسن تبلغها
زهرة : الو – ازيك يا سوسن
سوسن : الله يسلمك - خير يا ماما
زهرة : عمك جمال بيقول ان الولد زي الفل وتمام واهله ناس كويسين - ايه رائك
سوسن : انت شايفة ايه يا ماما
زهرة : انا صليت استخارة وقايمه مرتاحة
سوسن بمكر : مش كنت في الاول متضايقة لانه عنده ولد
زهرة بضحكة : انا كنت بمثل عليكي – علشان توافقي
سوسن : هههه - خلاص يا ماما انا موافقة – اتصلي بطنط فوزية
زهرة بفرحة : حاضر مبروك يا قلب ماما
سوسن رمت التليفون ودخلت الحمام بصت علي نفسها في المراية – مش فرحانة ومش مسبوطة حتي انها مقررة الموافقة من ساعة ما فوزية زارتهم في الفيلا وعرفت طلبها حتي لو كان عمها قال ان حسام مش كويس بروا كانت هتوافق
سوسن كل تفكيرها في زهرة امها وازاي تطمنها عليها اللي حاولت تبين انها مش موافقة بس فشلت - والسبب التاني ان حسام ظابط وهيقدر يحميها من عائلة جوزها المفترية
زهرة اتصلت علي فوزية وبلغتها موافقة سوسن علي الزواج وقالت ليها انهم هيزورهم علي الساعة 8 مساءا علشان يتفقوا علي التفاصيل
@@@@
في فيلا زهرة
الكل متواجد فوزية وحسام ومروان واماني وزهرة وجمال وطارق ومحمد وسوسن وبعد التهاني والسلامات
حسام بتناكة : طلباتكم ايه
جمال : طلبات ايه يا ابني
مروان بسرعة قبل ما يرد حسام : حسام يقصد حق العروسه يا عم جمال في المهر والشبكة والذي منه
حسام بعد ما بص لمروان بيلومة علي تدخله : 100000 الف شبكة وزيهم مهر
سوسن اضايقت منه قوي وقالت هو بيشتري جاموسه ولا ايه – ماله بيتكلم كدا ليه
جمال : ماشي يا يا ابني احنا متفركش معانا الحاجات دي – المهم سعادة سوسن
حسام لسه هيرد سبقته فوزية وقالت : في عيونا وهتبقي زي أماني بنتي
زهرة : هتسكن فين يا حسام
حسام : احنا العمارة بتاعتنا خاصة بينا شقه ماما وشقة لأماني فوقها واخر 4 شقق كل شقتين مفتوحين علي بعض واحدة ليا والتانية لمروان لما يتجوز
اماني : بس يا سوسن انا ساكنة في شقة جوزي علشان الشقة تبقي مفتوحة وكدا – لكل معظم الوقت انا والولاد مع ماما في شقتها – وشقتي في بيت بابا نادرا ما بدخلها
مروان بضحكة : اما انا لحد دلوقتي قاعد علي قلب فوفا ومش هسبها - وبنام في شقتنا ومش ناوي اطلع شقتي الا لما اتجوز ولما اتجوز بردوا علي قلبها
فضحك الجميع من هزار مروان وخفه دمه
فوزية : وجهازهم جديد ومحدش لمسهم ولا قعد عليهم ولو عايزة تغيرهم براحتك احنا عنينا لسوسن
سوسن : طالما جديد ملوش لزوم نغير ونرمي فلوس علي الارض وخلاض
حسام : يبقي اتفاقنا نقرا الفاتحة
جمال : نقرا الفاتحة
وقرا الجميع الفاتحة وانهالت التهاني والأحضان علي العروسه من اخوها وفوزية وزهرة واماني وكذلك علي حسام من اخواته وفوزية ومحمد وجمال وطارق
حسام بتناكة وببرود : بكرة نكتب الكتاب ان شاء الله
زهرة : يا ابني اصبر – حتي سوسن تشتري شويه حاجات وتجهز نفسها
حسام : انا عندي مهمة بعد ثلات ايام لمده اسبوعين تبقي تعمل اللي هيا عايزاه في الاسبوعين دول وتشتري اللي فاضل ليها
محمد : يعني مش هنعمل فرح او حتي حفله صغيرة ليكم
مروان : بعد اذنك يا حسام نكتب الكتاب بكرة ونعمل حفلة صغيرة هنا ونعزم شويه من اهلنا
حسام بذكاء وله غرض اخر في نفسه : بس لو عزمنا شويه من العائله وسبنا شويه هيزعلوا علشان كدا نعمل الحفلة مع بعضنا هنا بكرة وتبقي حجة اننا نقول اننا معزمناش حد والموضوع كان علي الضيق
جمال لانه عارف انه زهرة هتموت وتجوز سوسن قال : علي خيره الله
@@@@@@@@
في بيت فوزية
يوم كتب الكتاب صباحا
حسام : ماما انا كلمت ادم وحسيت انه مش مبسوط بجوازي
فوزية بتاكيد : بكرة لما يشوف سوسن يحبها وهيبقي مبسوط
حسام : وانا مسافر بعد 3 ايام عايزك تحطيها تحت الميكرسكوب وتشوفي هيا بتعامل ادم ازاي – ولما اسافر تنزل تقعد معاكي لحد ما اتاكد بنفسي انها كويسه
فوزية : حاضر
@@@@@
في فيلا زهرة
يوم كتب الكتاب ظهرا - رن جرس الباب ولقت عامل بيسلم الدادة فستان فرح معاه كارت باسم سوسن
الدادة لسوسن : اتفضلي يا بنتي دا ليكي
سوسن لقت فستان فرح ومكتوب علي الكارت يارب يكون عجبك وفيه وحده هتيجي تساعدك في اللبس والمكياج علشان تبقي احلي عروسة
سوسن في سرها : اظاهر يا حسام انك حتطلع رقيق وحساس وملك الاحساس
الدادة : كويس ان الفرح هيبقي في البيت
سوسن باستغراب : ليه يا دادة
الدادة : علشان الفستان اللي مش بتعرفي تلبيسه بلا نيله – فاكرة يوم فرحك من سامر لما لبستي بنطلون تحت الفستان علشان تحسي انك مش لبسه فستان
سوسن : -------
الدادة بكسوف : يوه انا اسفة يا سوسن حقك عليا – اصل انت مش بتلبسي فساتين خالص وشكلك كان مسخرة وانت بتلبسي البنطلون الجينز تحت الفستان يوم فرحك الاول
سوسن ببسمة هادية : ولا يهمك
الدادة : انا ماشية من هنا – انا جيت اصلحها كحلتها
سوسن بحزن بصت علي الفستان وقالت يا تري اللي بتعمليه دا صح يا سوسن ولا غلط فكري كويس انت لسه علي البر – بلاش تضحكي علي نفسك – انت العريس مش نازل لك من زور واتم وسئيل خالص – عارفة انه غصب عنك بس لسه بدري ممكن تراجعي نفسك
سوسن انت عمرك ما ضعفتي ولا استسلمتي للظروف – حتي مع عيله سامر عملت العجايب واتطلقت غصب عنهم وادتيهم قلم مش نسينوه ليكي لحد دلوقتي – ولما تعبت زهرة اخر مرة صحيح ضعفتي روحتي سجلتي في مواقع للزواج علي النت
بس انت سجلتي رقم موبايل قديم مش شغال ودا اللي عمله عقلك الباطن فيكي واكتشفتي لما دخلتي علي الموقع بعدها بكام يوم علشان تعرفي ليه محدش اتصل عليكي مع العلم ان المواصفات اللي انت كتبتيها عن نفسك تطمع اي راجل فيكي كفايا انك كتبتي انك غنية وعندك شركة واملاك – ارجعي يا سوسن انت لسه علي البر طلعي تليفونك بسرعة وكلمي فوزية وقولي ليها كل شيء نصيب
@@@@@@
في بيت فوزية
فوزية دخلت علي حسام وكان بيلبس بدله سوداء فيها لمعة علي قميص ابيض وببيون – والبدله زادت جماله مع مواصفات جسمه الطويل وقوامه الرائع وكان في نفس الوقت معاه تليفون وانهي المكالمة بان الفستان وصل وقالت
فوزية وعيونها فيها حب كبير لابنها : بسم الله ما شاء الله – ايه الحلاوة دي – عريس بجد
حسام بتاكة : انت عارفة ان من يومي بلبس حلو مش موضوع عريس خالص
فوزية : يارب يهدي حالك يا حبيبي
وفي اللحظة دي دخل مروان اللي كان لابس بدله كحلي علي قميص زهري وكان لا يقل جمالا عن حسام العاصي
مروان بجدية وهوبينظر لاخوة اللي نفسي يكون زيه : انا طول عمري بشوف نفسي قمر – بس لما بقف قصاد حسام العاصي بحس اني ولا شيء
حسام ربط علي كتف اخوة وقال : حسام عمره وحياته ليك يا مروان
مروان اتاثر بكلام اخوه وعيونه هتتملي دموع – فحبب يهرب من مقابله عيونه وقال
مروان : ايه الجمال دا يا فوفا
فوزية بضحك : بس يا اونطجي انت اللي قمر انت وهو – ويله أماني بترن ومنتظرة في شقتها لسه هنعدي عليها – يله علشان منتاخرش علي الناس
@@@@@@@@
كفايا عليكم كدا
الله علي حلمك يا فوفا - يارب اوعدنا بزيارة قريبة لبيتك
ايه الدماغ دي يا فوفا – بس يا تري زي ما خططتي لكل حاجة عملت حساب رد فعل سوسن وحسام لما يعرفوا كذبتك
ايه التناكة دي يا عم حسام – علشان ظابط يعني حصل لينا الرعب
مش عايز تعزم وتعمل فرح ليه يا حسام – انت ايه اللي في دماغك بالظبط – مش كفايا علينا امك
حوس ما انت حلو اهو وبعت فستان فرح وكارت عليه كلام حلو
يا تري سوسن هتراجع نفسها ولا – وانتم لو مكانها هتعملوا ايه
يا تري ايه اللي هيحصل بعد كدا - محدش يسالني انا معرفش
كل هذا وما خفي كان اعظم واكثر في قسمتي
*********************
إلي هنا ينتهي الفصل السادس من رواية قسمتي بقلم اسماء سليمان
تابع من هنا: جميع فصول رواية قسمتي بقلم اسماء سليمان
تابع أيضا من هنا: جميع فصول رواية عشق الزين الجزء الأول
تابع صفحتنا على الفيس بوك للمزيد من روايات رومانسية
أو أرسل لنا رسالة مباشرة عبر الماسنجر باسم القصة التي تريدها
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا