مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة دودو محمد علي موقعنا قصص 26 و موعدنا اليوم مع الفصل الرابع من رواية تمرد صحفية بقلم دودو محمد.
رواية تمرد صحفية بقلم دودو محمد - الفصل الرابع
اقرأ أيضا: رواية عشق الزين (الجزء الأول) بقلم زيزي محمد
 |
| رواية تمرد صحفية بقلم دودو محمد |
رواية تمرد صحفية بقلم دودو محمد - الفصل الرابع
بعد ما قال أكرم اقواله وحاول يخرج مسك فيه حمزه ومنعه من الخروج بس خلصه تامر من ايد حمزه ولسه بيفتح الباب اتفاجئ بوجود أدهم قال
أكرم :- بصدمه أدهم
أدهم :- بصلو ومردش عليه ولسه هيدخل
العسكرى :- رايح فين كده هى وكاله من غير بواب
أدهم :- داخل اقابل الرائد تامر بخصوص قضية سرقة الساعه الدهب
العسكرى :- ثوانى اديله خبر
أكرم :- طيب ممكن اعرف انت جاي تعمل ايه دلوقتى ممكن ترد عليا
أدهم :- شئ ميخصكش
أكرم :- بترجى خرجها من هنا يا ادهم البنت منهاره حرام عليك
وفى الوقت ده خرج العسكرى وقال لادهم يدخل
ادهم:- بص لأكرم وقال مش انت اللى هتقولى اعمل ايه وسابه ومشى
أكرم :- اتنهد وبص على ادهم وهو داخل المكتب ومشى
دخل أدهم المكتب بتكبر وبص لداليا من فوق لتحت وقعد على الكرسى وقال
أدهم :- ممكن اعرف ايه الاخبار
تامر :- ساعة حضرتك معانا اهى بس متحفظين عليها لحد ما تنتهى القضيه
داليا :- منك لله علشان انت وشريكك اللى عملتو فيا كده
أدهم :- بتكبر وانا هعمل كده ليه وانا عندى وقت علشان اشغل بالى بواحده زيك انتى اصغر من أن انا اديكى اهتمام وافكر انتقم منك
حمزه :- قام مره واحده ومسكه من هدومه وقال حسابك كبر معايا اوى يا ادهم يا حناوى انا هعرفك مين داليا سعيد وازاى تعمل فى اختى كده
أدهم :- زق حمزه ومسكه من رقبته وقال بقى انت يا حشره هتنتقم منى انا انت متعرفش انا مين ولا ايه انا ممكن اوديك وراه الشمس واخسرك وظفتك اللى فرحان بيها وعامل نفسك راجل اوى
حمزه :- زقه ومسكه من هدومه وقال انا ارجل من عشره زيك
داليا :- بخوف ودموع أبعدهم عن بعض ارجوك
تامر :- ادخل وبعدهم عن بعض ومسك حمزه وقال اتفضل اقعد يا ادهم باشا نتكلم بهدوء ارجوك وقرب من ودن حمزه وقال اهدا يا حمزه يمكن نقدر نقنعه أن هو يتنازل عن القضيه
حمزه :- هيتنازل عن القضيه غصب عنه احسن اضربه رصاصه واريح الناس من واحد وسخ زيه
أدهم :- مش هتنازل وورينى هتضربنى بالرصاص ازاى
حمزه :- طلع مسدسه ووجه فى وش أدهم وقال هوريك يا ادهم
داليا :- طلعت تجرى وقفت قصاد المسدس وقالت بدموع علشان خاطرى بلاش يا حمزه بلاش تضيع مستقبلك علشان واحد زى ده ابوس ايدك فكر فى ابوك لو عرف ايه هيحصله بلاش يا حمزه بلاش
تامر :- اهدا يا حمزه وبلاش تهورك ده كل شئ هيتحل والله بس نزل المسدس بقى
أدهم :- بأستفزاز اضرب انا قصادك اهو
داليا :- بدموع انت ايه يا شيخ شيطان مستحيل تكون بنأدم زينا ابدآ
حمزه :- اوعى من قدام المسدس يا داليا
داليا :- هزت راسها بمعنى لاء وقالت مش هتحرك غير لما تنزل المسدس ده وتديه لتامر
حمزه :- بعصبيه قولتلك اوعى يا داليا
داليا :- بدموع لاء يا حمزه
تامر :- هات المسدس ده يا حمزه
حمزه :- مش هسيب المسدس ده غير لما اخلص منه
أدهم :- وانا مستنى
حمزه :- كده ماشى وحط صوبعه على الزناد ولسه هيدوس
داليا :- اغمى عليها من الخوف
حمزه :- حدف المسدس فى الارض و طلع يجرى عليها شالها وحطها على الكنبه وقعد يخبط على وشها ويقول داليا ردى عليا يا داليا
تامر :- خد ازازه البرفان اللى فى شنتطها وفوقها بيها
حمزه :- فتح الشنطه بتاعة داليا وطلع ازازة البرفان وراح عندها ورش على أيده وفوقها
داليا :- امممم انا فين
حمزه :- فوقى يا داليا انا جنبك
داليا :- فتحت عينيها وشافت اخوها جنبها اترمت فى حضنه وقعدت تعيط
حمزه :- اهدا يا حبيبتى متخفيش كل حاجه هتكون تمام
أدهم :- ها خلصتو المسلسل الهندى بتاعكم ده
حمزه :- داس على سنانه وقال اللهم طولك يا روح اقسم بالله شكلى هصور قتيل دلوقتى
تامر :- اهدا بس وراح عند ادهم وقال تمام يا باشا هنبلغك اول ما نوصل لحاجه جديده فى القضيه
أدهم :- انا جاى لسبب واحد بس ممكن اقعد مع الانسه داليا على انفراد
حمزه :- مستحيل ده يحصل
تامر :- وحضرتك عايز تقعد معاها على انفراد ليه
أدهم :- ممكن أتنازل عن القضيه بعد القعده دى
حمزه :- مش هيحصل
داليا :- وقفت وهى حاسه بدوخه وقالت بدموع انا موافقه اقعد معاه على انفراد
حمزه :- وانا قولت مش هيحصل
داليا :- علشان خاطرى سبنى معاه
تامر :- علشان مصلحتها يا حمزه ولو فيه حاجه احنا جنب المكتب
حمزه :- انا قولت لاء يعنى لاء انا مش هسيب اختى تقعد مع واحد زى ده
أدهم :- وقف وقال براحتكم ونتقابل فى المحكمه بقى
داليا :- استنا وبصت لحمزه وقالت علشان خاطر بابا يا حمزه وافق
تامر :- راح مسك ايد حمزه وقال تعال معايا بس واخده وخرج من المكتب وساب داليا مع ادهم
داليا :- وادينا قعدنا اهو على انفراد ممكن اعرف بقى عايز ايه
أدهم :- طلع سيجار وولعه وشرب نفس وطلعه فى الهوا وقال انا مستعد اخرجك من هنا بس بشرط
داليا :- شرط ايه ده
أدهم :- طلع ورقه وقال تمضى على العقد ده
داليا :- بتاع ايه ده
أدهم :- ده عقد جواز عرفى هيفضل معايا لو فكرتى تقفى قصادى تانى ولا تتحدينى هيطلع علطول
داليا :- وانا مش موافقه مش علشان اطلع من مصيبه احط نفسى فى مصيبه اكبر
أدهم :- براحتك بس خليكى عارفه أن انا لو متنزلتش عن القضيه دى هتترفضى من شغلك وهتتشطبى من نقابة الصحفيين وهتقضى كام سنه فى السجن مع المجرمين ومستقبلك هيضيع
داليا :- مش مهم كل ده مش انا البنت اللى تحط رأس اهلها فى التراب وتروح تمضى على عقد جواز عرفى اعمل اللى تعملو اتفضل من غير مطرود وراحت عند الباب ولسه هتمد ايديها وتفتحه
أدهم :- وشغل اخوكى اللى فرحان بيه ده انسوه بمكلمه واحده منى هيترفض من وظيفته علطول واخوكى مؤمن من بكره هيسيب مدرسته والشقه اللى انتو فيها دى من بكره هتبقى بتاعتى وقعد وحط رجل على رجل واخد نفس من السيجار بتاعه ونفخ الدخان فى الهوا وقال فى ايدك تمنعى كل ده بأمضه واحده منك
داليا :- وقفت مصدومه مكانها لما سمعت كده ودموعها نزلت منها وقالت ليه كل ده عملت ليك ايه علشان تنتقم منى بالطريقه دى كل ده علشان غلط فيك انا اسفه يا اخى بس بلاش الشر اللى عندك ده احنا ناس غلابه مش بتوع مشاكل سبنا فى حالنا ارجوك
أدهم :- قام وقف وراح عندها وقرب وشه من وشها وقال الكلام ده كان الأول قبل ما تتحدينى انا ادهم الحناوى تيجى واحده زيك تحط راسها براسى كلامك ده فات أوانه ها هتمضى ولا انفذ اللى قولتلك عليه
داليا :- بدموع حرام عليك بلاش تعمل كده
أدهم :- شكلك هتتكلمى كتير براحتك بقى انتى السبب فى اللى هيحصل لأهلك سلام ومشى لحد الباب ولسه هيخرج
داليا :- بدموع انا موافقه
أدهم :- ضحك ضحكة شر ولف ليها وقال شطوره وراح عندها وحط الورقه على الترابيزه وقال اتفضلى أمضى
داليا :- بصت لورقه بدموع وبعدين بصت لادهم ومسكت القلم وهى ايديها بتترعش ومدتها ببطئ وبدأت تمضى على العقد العرفى وهى دموعها بتنزل وراه بعضها مضت ورمت القلم وحطت راسها على الترابيزه وقعدت تعيط
أدهم :- ضحك بأنتصار وقال ادينى بطاقتك بقى يا حلوه
داليا :- بصت ليه بدموع وقالت ليه
أدهم :- علشان العقد ده هيتوثق عند محامى
داليا :-بخوف ليه محامى طيب
أدهم :- اصل انا بحب امشى قانونى يا قمر وقرصها براحه فى خدها
داليا :- سحبت وشها بعيد عنه بقرف ومسحت مكان أيده وقامت وهى مكسوره واخدت البطاقه بتاعتها من الشنطه ومدت ايديها لادهم وقالت اتفضل
أدهم :- اخد البطاقه وشد داليا من ايديها قعدها على حجره وقال من يد ما نعدمها يا زوجتى العزيزه
داليا :- زقته وقامت وقفت وقعدت تمسح جسمها بأيديها بقرف وقالت اياك تمد ايدك عليا تانى فاهم مش نقصه قرف من واحد زيك
أدهم :- ههههههههههه ماشى بس براحه عليا علشان بخاف هههههههههه
داليا :- يخربيت ابو تقل دمك يا شيخ
وفى الوقت ده دخل تامر ومعاه حمزه
تامر :- وصلتو لايه
أدهم :- هتنازل خلاص اتفقنا انا والانسه داليا على كل حاجه خلاص
حمزه :- اللى هو ايه الاتفاق أن شاءالله
أدهم :- عندك اختك لو حابه تقولك على الاتفاق انا معنديش اى مشكله
داليا :- بصت بخوف وقالت ها م.م.مفيش اعتذرت ليه وطلبت منه السماح
حمزه :- بشك بس
داليا :- ها ا.ا.اه طبعآ مفيش اى حاجه تانيه
تامر :- عمومآ يا جماعه حصل خير اتفضل حضرتك يا باشا أمضى على التنازل
أدهم :- وهو بيبص لداليا راح مضى على التنازل
داليا :- كانت متوتره وعماله تدعك ايديها فى بعض
ادهم:- مبروك يا عروسه اقصد مبروك على الإفراج
داليا :- بلعت ريقها بصعوبه وتوتر وقالت ا.ا الله يبارك فيك
تامر :- ساعة حضرتك اهى
أدهم :- هديه منى للانسه داليا
داليا :- ها ش.ش.شكرآ اتفضل ساعة حضرتك مش بقبل هدايا من حد غريب
أدهم :- بس انا مش حد غريب
داليا :- ها
حمزه :- تقصد ايه بكلامك ده
أدهم :- يعنى خلاص احنا بقينا احباب مش كده يا انسه يا داليا
داليا :- وهى فاتحه بؤقها ها
حمزه:- هو فيه ايه انتو الاتنين مخبين ايه بالظبط
داليا :- بخوف م.م.مفيش ه.ه.هو يقصد يعنى اننا اتصالحنا مش اكتر
أدهم :- هههههه حاجه زى كده
داليا:- بصت بترجى لادهم علشان ميتكلمش
ادهم:- كان فرحان بأنتصاره وهو بيلعب بأعصابها وقال يلا انا ماشى اشوف وشك على خير يا انسه داليا وقرب من حمزه وقال اما انت لسه ليك عندى عقاب على اللى حصل منك هعرفك مقامك وازاى تقف قصاد أدهم الحناوى يا جربوع وعمل أن هو بينضف حاجه على كتف حمزه وقال اجمد يا بطل للى جاى ومشى وسابهم
داليا :- قعدت على الكرسى بتوتر وقالت اقدر امشى بقى
تامر :- ماشى امشى وتعالى الصبح نخلص إجراءات التنازل
حمزه :- على فكره انا مش مقتنع بالاسباب اللى اتقالت بسهوله كده يتنازل
داليا :- ها ت ت.تقصد ايه
حمزه :- ولا حاجه يا داليا امشى يلا قدامى
داليا :- مشيت قدام حمزه بتوتر وروحت معاه على البيت ودخلت اوضتها وحدفت نفسها على سريرها وقعدت تعيط
~•~•~•~•~•~•~•~•~•~•~•~•
اشرقت شمس صباح يوم جديد بنورها الساطع فى سماء عروس البحر لتبدء داليا بفتح عيونها بصعوبه قامت قعدت على السرير وافتكرت اللى حصل ما بينها وبين أدهم قعدت تعيط وتقول
داليا :- يارب حلها من عندك انا طول عمرى بخاف اعصيك وانت اعلم باللى حصل انا خايفه اوى يارب ابعد عنى شر أدهم وأعوانه يارب انا وليه ضعيفة ومكسورة الجناح يارب وفى الوقت ده حست بالباب بيتفتح مسحت دموعها بسرعه
سعيد :- صباح الخير يا حبيبتى
داليا :- صباح النور يا بابا
سعيد :- صاحيه من بدرى
داليا :- لاء لسه صاحيه
سعيد :- قعد جنبها وقال مالك يا حبيبتى باين عليكى انك معيطه ومتقوليش داخل فيهم حاجه لان واضح انك معيطه طول الليل
داليا :- شوية مشاكل فى الشغل متقلقش عليا انت بس
سعيد :- مشاكل بسبب أدهم الحناوى
داليا :- ها ح.ح.حاجه زى كده متشغلش بالك انت بس
سعيد :- ازاى مشغلش بالى وبنتى ونور عيوني حزينه بالشكل ده
داليا :- هبقى كويسه بدعواتك ليا يا بابا
سعيد :- ربنا يريح قلبك ويروق بالك ويسعد ايامك وينورك طريقك يا بنتى يارب
داليا :- يااااااه اللهم امين ادعيلى علطول كده يا بابا
سعيد:- بدعيلك فى كل صلاتى انتى واخواتك يا حبيبتى
داليا :- ربنا يتقبل منك يا بابا
سعيد :- طيب يلا قومى خدى شاور وفوقى كده واجهزى علشان تصحى اخوكى حمزه
داليا :- معلش يا بابا حاول تصحيه انت.
سعيد :- ماشى يا حبيبتى جهزى نفسك وبسها فى راسها وخرج من الاوضه
داليا :- بصت عليه وهو خارج ودموعها نزلت منها وقالت يارب انت بس اللى حاسس باللى جوايا وقامت دخلت الحمام اخدت شاور واتوضت وخرجت لبست هدومها وأدت فرضها وخرجت من اوضتها وكان سعيد حضر الفطار قعدت داليا من غير ما تنطق ولا كلمه
مؤمن :- ده على اساس انك مش قاعده مع بنأدمين طيب صبحى قولى اى حاجه
داليا :- مؤمن مش نقصاك على الصبح سبنى فى حالى
مؤمن :- وانا كلمتك انا بقولك صبحى علينا بس
داليا :- حاضر صباح الخير حلو كده اسكت بقى
سعيد :- مؤمن اسكت بقى متغلسش على اختك
مؤمن :- سكتنا اهو
حمزه :- كلى ويلا بينا
سعيد :- على فين
حمزه :- ها ه.ه.هوصلها معايا على السكه
سعيد :- ربنا يحميك ويحرسك يا حبيبى
مؤمن :- مدام فيه دور جدعنه يبقى وصلنى معاك على السكه
حمزه :- واوصلك ليه يا اخويه انت راجل إنما دى بنت
مؤمن :- مفيش مره تنصفنى ابدآ خلاص هروح لوحدى بس ايدك على خمس حتة احسن اخوك مأشفر على الاخر
حمزه :- وانا مالى هو انا كنت خلفتك ونسيتك
مؤمن :- كده مكانش العشم احموزه
داليا :- هات الشنطه يا مؤمن انا هديك
مؤمن :- ايوه بقى اشوفك مجبورة الخاطر يا داليا يا بنت ام داليا يارب
داليا :- اخلص بقى يا مؤمن
مؤمن :- حاضر هوا وراح جاب الشنطه واديته خمسين جنيه ووقفت وقالت
داليا:- انا اكلت يلا بينا
سعيد :- يا بنتى كلى انتى مأكلتيش حاجه
داليا :- الحمدالله يا بابا شبعت
حمزه :- وقف وقال يلا ونزلو الاتنين مع بعض خلصو إجراءات التنازل وراحت على الجريده
~•~•~•~•~•~•~•~•~•~•~•~•
فى فيلا خالد الحناوى
فى اوضت أدهم
دخلت دينا الاوضه عند ادهم وقعدت على حرف السرير وخبطت على ضهر أدهم العريان وقالت
دينا :- أدهم يا ادهم اصحه بقى اتأخرت على شغلك
أدهم :- اممممم
دينا :- قوم يلا
أدهم:- اطلعى بره وبلاش صداع يا داليا
دينا :- داليا مين دى يا ادهم انا اختك دينا تلاقيها واحده من اللى بتسهر معاهم لصبح
أدهم :- يا دين النبى على الصداع اطلعى بره يا دينا
دينا :- مش طالعه غير لما تقوم
أدهم :- يخربيت الرزاله بتاعتك على الصبح عامله شبه اللى اسمه أكرم
دينا :- وقفت وقالت رزله علشان عايزه مصلحتك
أدهم :- يخربيت كده انتى ايه يا بنتى مش بتفصلى ليه كده خلاص اتنيلت وصحيت وقام قعد على السرير وقال اطلعى بره بقى
دينا :- هو اللى نازل عليك اطلعى بره اطلعى بره ما تصبر يا اخى عايزاك فى موضوع
أدهم :- امممم ما انا قولت كده برضه مستحيل تيجى تصحينى غير لما تكونى عايزه مصلحه
دينا :- اخص عليك يا ادهم انا كده برضه
أدهم :- امممم قولى عايزه كام
دينا :- احم مش كتير الفين جنيه
أدهم :- ليه هتعملى بيهم ايه
دينا :- ها عايزه اشترى شوية حاجات ليا
أدهم.:- ما انتى لسه واخده زيهم من اسبوع وقولتى برضه هتشترى شوية حاجات
دينا :- ا.ا.اصل احنا كبنات بنشترى حاجات كتير لينا وانا بستعملهم علطول وبيخلصو بسرعه
أدهم :- قام وقف وراح عند الدولاب وفتحه وطلع الفين جنيه وقال خدى اهم
دينا :- اخدتهم منه بفرحه وقالت ربنا يخليك ليا يا احن اخ فى الدنيا وبسته فى خده وطلعت تجرى من الاوضه
أدهم :- بصلها وابتسم ودخل الحمام اخد شاور وخرج لبس هدومه ونزل وقال صباح الخير
الكل :- صباح النور
خالد :- لسه فاكر
أدهم :- وايه مضيقك فى كده
خالد :- ما سهرك لصبح فى الكباريهات هو اللى مضيعك
ادهم:- وانتو شاغلين بالكم بيا ليه انا حر اعمل اللى اعملو محدش ليه عندى حاجه
إنعام :- اتكلم مع ابوك كويس صحيح ولد مش متربى
أدهم :- ما هو فى الاول وفى الاخر تربيتك يا مدام انعام
إنعام:- وانت عملت بيها
أدهم :- اعمل بيها لو تربية كويسه إنما تربيتك فاشله
خالد :- صحيح انك واحد واطى طالع لامك ناكر الجميل
أدهم :- بعصبيه مليون مره قولتلك انا مش شبه حد متخلنيش ارتكب غلطه اندم عليها
علاء :- اهدا يا ادهم واقعد
خالد :- مهما تعمل هتفضل فضيحة امك ملازمك يا ابن الخاينه سامع امك كانت بتخونى وانت عارف هيفضل عارها ملازمك وهفضل محملك الذنب طول ما انا عايش
أدهم :- بعصبيه شد مفرش السفره وقع الاطباق كلها فى الارض وقال عااااااااا كفايه انتو الاتنين ازبل من بعض انتو الاتنين خاينين انا بكرهكم بكرهكم
فادى :- اهدا يا ادهم اهدا
أدهم :- زقه وقال بعصبيه محدش ليه دعوه بيا انا بكرهكم كلكم كلكم وطلع يجرى وركب عربيته ومشى بيها
دينا :- ليه بتعملو فيه كده حرام عليكم بقى ارحمو تملى تعملو اى حاجه تزعلو
إنعام :- اسكتى انتى يا اختى بلاش الحنيه الزياده دى
فادى :- دينا عندها حق ليه تملى تقصدو تعملو الحاجه اللى تزعلو
سندس :- بدموع انا بكرهكم علشان تملى مزعلين ابيه أدهم وطلعت تجرى على اوضتها
إنعام :- انا مش عارفه بتحبوه على ايه ده واحد مش بيهمه غير مصلحته احنا اللى بنحبكم وبنعمل كل ده علشان نحافظ على فلوسكم منه
دينا :- أدهم عمره ما بص لفلوس بالعكس هو اللى تملى يدينا وقت ما نحتاج ولسه من شويه لما احتاجت روحت طلبت منه ومرفضش انتو اللى بتحقدو عليه تملى بس هو ليه حق وربنا قادر يجيبو منكم عن اذنكم وسابتهم ومشيت
فادى :- معنديش كلام اقولو ليكم دينا قالت كل الكلام بس هقولكم كلمه واحده بس العين مش بتكره غير اللى احسن منها وعلشان كده انتو بتكرهو أدهم عن اذنكم وسابهم ومشى
إنعام :- عجبك اللى ولادك بيعملوا ده يا خالد
خالد :- سبيهم بكره هيجو يبوسو ايدينا علشان نسامحهم على كلامهم ده بعد ما أدهم يظهر ليهم على حقيقته
علاء :- ما اعتقدش أن ده هيحصل يا بابا أدهم فعلا طيب وانتو اللى ظلمينه بس انا بعمل معاكم بالمعروف اللى ربنا امرنى بيه بس مش معنى سكوتى أن انا موافق على كل اللى بتعملو ده انا رافض افعالكم ومفيش فى ايدى حاجه غير أن انا ادعى ليكم فى صلاتى أن ربنا يهديكم عن اذنكم وخرج وسابهم
إنعام :- بغيظ اموت واعرف اللى اسمه أدهم ده عامل ليهم ايه علشان يقفو قصدنا علشانه
خالد :- اصبرى بس كل ده هيتغير قريب اوى
إنعام :- تقصد ايه
خالد :- يعنى خلاص لاقيت اللى هيساعدنا على خطتنا
إنعام :- بفرحه بجد
خالد :- اه والله بالصدفه امبارح شوفته ووعدنى أن هيتقابل معايا قريب اوى واقوله زى ما اتفقنا
إنعام :- يلا فى داهية تاخدو وتاخد امه
خالد :- بشر بكره كل أملاكه دى هتكون ملكى انا والساحه هتبقى ليا لوحدى
إنعام :- ايوه بقى اموت فيك يا قلبى
~•~•~•~•~•~•~•~•~•~•~•~•
فى الجريده
وصلت داليا وهى منكسره دخلت على مكتبها وقعدت من غير ما تقول ولا كلمه
منتهى :- ايه يا بنتى ما ترمى السلام على اللى قاعدين دول
داليا :- بالله عليكى يا منتهى سبينى فى حالى
فاطمه :- وده من ايه هو كل من قابل رجل اعمال شاب ووسيم يتكبر على الناس كده
داليا :- لنفسها كانت ساعه سوده ساعة ما قابلته
منتهى :- ما تردى علينا يا بنتى
داليا :- اللهم طولك يا روح عايزين ايه منى بس
فاطمه :- عايزينك تقولى لينا كل حاجه حصلت مع ادهم الحناوى بالتفاصيل وتقولى شكله عامل ازاى
داليا :- اتنهدت بكسره وقالت ولا حاجه عملت معاه الحوار ومشيت
منتهى :- يا سلام ما تحكى بذمه يا بت
داليا :- احكى ايه هو ده كل اللى حصل
فاطمه :- طيب شكله ايه وسيم بقى وجسم رياضى وشعر ناعم على الخدود بيهفهف وعيون صقر
داليا :- بصت ليهم وسكتت
منتهى :- ردى علينا ردت المايه فى زورك
داليا :- ايوه حلو وجسم رياضى طول بعرض وعيون صقر وشعر ناعم خلاص ارتحتو اسكتو بقى
فاطمه :- هييييح طيب كان بيتكلم معاكى ازاى جرئ ولا محترم
داليا :- جرئ
منتهى :- محاولش يمسك ايديكى
داليا :- افتكرت اللى حصلها ومسكت دموعها بالعافيه
فاطمه :- ها ردى سكتى ليه
داليا :- محصلش حاجه وياريت بقى تشوفو شغلكم وبطلو كلام كتير
منتهى :- لاء طبعآ احنا عايزين نعرف كل حاجه عن أدهم الحناوى انتى عارفه يعنى ايه أدهم الحناوى يعنى الجمال والوسامه والتقل كله
داليا :- ده على اساس انك تعرفيه وشوفتيه قبل كده
منتهى :- عمرى ما شوفته بس بسمع عنه ونفسى ربنا يوعدنى بمقابلته
داليا :- ربنا ما يكتبها ليكى ابدآ ولا تقعى فى سكته يارب
فاطمه :- بغمزه ايه الحكايه غيرانه عليه ولا ايه شكلك كده وقعتى
داليا :- انا فعلا وقعت وربنا ما يوقعكم وقعتى يارب واتنهدت وقالت حسبى الله ونعمه الوكيل
منتهى :- انتى مال كلامك النهارده بالالغاز كده مش واخدين على داليا الحزينه احنا واخدين على داليا الفرفوشه
داليا :- بدموع خلاص الضحكه خصمتنى معدتش هتزورنى تانى يا توته
فاطمه :- بتعيطى كمان ايه اللى حصل لكل ده يا داليا
داليا :- مسحت دموعها وقالت ولا حاجه انا بس تعبانه شويه
منتهى :- ومن امته لما بتتعبى بتعيطى
داليا :- ابوس ايديكم كفايه أسأله بقى وسبونى فى حالى
فاطمه :- مش هاين علينا نشوفك زعلانه بالشكل ده ونسيبك
داليا :- انا ههداه وهكون كويسه بس سبونى مع نفسى شويه
منتهى :- خلاص يا دودى براحتك وقت ما تحبى تحكى هتلاقينا جنبك وبنسمعك
داليا :- ربنا يخليكم ليا وسابتهم ودخلت الحمام وقعدت تعيط
~•~•~•~•~•~•~•~•~•~•~•~•
فى شركة أدهم الحناوى
دخل أدهم مكتبه وقعد على الكرسى وهو متعصب ومسك تليفون المكتب وطلب السكرتيره
ميرفت :- أمر يا فندم
ادهم:- اتصلى بالمحامى وخليه يجى ليا حالا
ميرفت :- حاضر يا فندم
أدهم :- واتصلى على أكرم وخليه هو كمان يجى
ميرفت :- تمام يا فندم
أدهم :- قفل التليفون من غير ولا كلمه وطلع بطاقة داليا وبص فيها وقال
أدهم :- بكره هعرفك انتى واخوكى اللى فرحان بنفسه ده مين أدهم الحناوى
وفى الوقت ده الباب خبط واذن أدهم ليهم بدخول
المحامى :- السلام عليكم
أدهم :- وعليكم السلام تعال عايزك
المحامى واكرم دخلو قعدو
المحامى :- خير يا ادهم باشا
أدهم :- مد أيده بالبطاقه بتاعة داليا والعقد العرفى وقال عايزك توثق ده
المحامى :- اخد البطاقه والعقد وقال عقد عرفى
أدهم :- ايوه عندك اعتراض
المحامى :- بخوف لاء يا باشا براحتك
أدهم :- اتفضل شوف شغلك
المحامى :- وقف وقال عن اذن حضرتك وخرج من المكتب
أدهم :- بص لأكرم وقال هتفضل ساكت كتير كده
أكرم :- لو اتكلمت مش بيعجب ولو سكت برضه مش بيعجب
أدهم :- لاء اتكلم بس فى اللى يخصك انت
أكرم :- وانا وانت ايه يا ادهم ما واحد واللى يخصك يخصنى طول عمرنا مع بعض على الحلوه والمره بس من يوم اللى حصل وانت بقيت واحد تانى خالص غير أدهم بتاعنا ضيعت طفولتك فى حاجات اكبر منك بكتير ولما كبرت بضيع عمرك فى شخصيه مش بتاعتك ارجوك يا ادهم فوق بقى وبلاش افترا على الناس خاف ربنا ابعد عن اللى بتعملو ده
أدهم :- داس على سنانه وقال بعصبيه متتكلمش كتير يا اكرم انت عارف ان انا ممكن اخسر صداقة عمرنا لو فتحت الموضوع ده فاهم
أكرم :- طول ما انت رافض تتكلم فيه هتفضل كده اتكلم طلع كل اللى فى قلبك اضربنى زعقلى اعمل كل اللى انت عايزه بس خرج كل اللى جواك علشان تقدر تعيش طبيعى زينا بعيد عن الكره والانتقام
أدهم :- اكررررررررررم اسكت بقولك
أكرم :- لاء مش هسكت يا ادهم مش هسكت كفايه بقى العمر اللى راح منك بلاش تخسر كمان اللى جاى
أدهم :- وقف وراح عنده وقعد يضرب فى اكرم وقال اسكت قولتلك اسكت
أكرم :- زق أدهم وبعده عنه وقال انا مش بالضعف اللى انت مفكره ده يا ادهم بس عمرى ما هستقوى على صديق عمرى اللى بعتبره اكتر من اخ ليا وبتمنى ليه الخير
أدهم :- بعصبيه انا كده وهفضل كده يا اكرم عجبك تكمل صدقتنا على كده كمل مش عجبك فى ستين داهيه هتروح زى اللى راحو وبعد كده متدخلش فى اللى ملكش فيه فاهم وزقه واخد تليفونه ومفاتيح عربيته ونزل وسابه
أكرم :- خرج من المكتب وهو بينده على ادهم بس مشى وسابه من غير ما يرد عليه
ميرفت :- هو فيه ايه
أكرم :- بعصبيه وانتى مالك خليكى فى حالك
ميرفت :- احم اسفه وقعدت تشوف شغلها
أكرم :- ربنا يهديك يا أدهم وكلامى يكون اثر فيك وراح على مكتبه
~•~•~•~•~•~•~•~•~•~•~•~•~•
عند ادهم
نزل ركب عربيته وهو متعصب ومشى بسرعه وبدء يزود السرعه بطريقه جنونيه وكذا مره كان هيعمل حادثه ومره واحده وقف ونزل من العربيه فى حته خاليه مفيهاش حد وقعد يصرخ يصرخ لحد ما حس أنه مش قادر يقف على رجله قعد فى الارض وقال
أدهم :- كله بيلوم عليا وعلى اللى بعملو محدش فيهم حاسس باللى جوايا محدش فيهم شايف الوجع اللى عايشه انا بكرهم كلهم بكره اللحظه اللى بقيت ابن ليهم بكره اللحظه اللى أسمى اتكتب على اسمهم ووقف بكل شموخ وقال لاء مش أدهم الحناوى اللى يتكسر مش أدهم الحناوى اللى ينحنى فى الارض انا هفضل رافع راسى لفوق وهفضل انا زى ما انا واللى مش عجبه فى ستين داهيه واخد نفس عميق ورجع ركب عربيته ومشى بيها
~•~•~•~•~•~•~•~•~•~•~•~•~•
فى الجريده
طلعت داليا تليفونها علشان تسمع الحوار اللى عملته مع ادهم وتنقله على الورق وقعدت تسمع الحوار والدموع نازله منها لحد ما وصل التسجيل لاخره واتفاجئت باللى حصل فى مكتب ادهم كله متسجل فى تليفونها فرحت بدليل برأتها واخدت شنطتها وتليفونها ونزلت تجرى وقفت تاكسى وراحت على القسم عند تامر وحمزه ودخلت مكتب حمزه ملقتهوش موجود خرجت من المكتب وراحت مكتب تامر ودخلت عنده وقالت بفرحه انا لاقيت دليل البراءه بتاعتى
تامر :- بجد فين هو
داليا :- طلعت تليفونها وقالت اهو وادته لتامر
تامر :- اخده منها وقال كان فين ده من امبارح
داليا :- مكنتش اعرف انه مسجل كل حاجه صحيح فين حمزه
تامر :- حمزه ملاقاش السلاح بتاعه راح يشوفه فى البيت عندكم
داليا :- تلاقيه ناسيه فى الدولاب زى كل مره المهم اسمع ده بقى واعمل ليه محضر معتبر بالتعدى عليا
تامر :- عنيا وعمل المحضر لادهم وبعت يجيبه وبعد وقت طويل وصل حمزه وعرف كل حاجه وقعد ينتظر وصول أدهم ووصل أدهم الحناوى القسم بكل فخر وتكبر ودخل المكتب عند تامر وبص لداليا نظره هى مفهمتش معناها وبص بتحدى لحمزه وقعد وقال
أدهم :- خير
تامر :- الانسه داليا مقدمه بلاغ فيك بتقول انك حاولت تعتدى عليها
أدهم :- محصلش
تامر :- بس الدليل موجود وطلع تليفون داليا وسمع التسجيل لادهم
أدهم :- قعد يضحك
الكل بص ليه بأستغراب
تامر :- ممكن اعرف حضرتك بتضحك على ايه
أدهم :- ههههههههههه اصل النكته دى حلوه اوى
تامر :- نكته
أدهم :- اه نكته لما تجيبو تسجيل لراجل بيحاول يقرب لمراته يبقى دى نكته ودمها بايخ اوى
الكل اتصدم من كلام أدهم
تامر :- بصدمه مراتك
أدهم :- ..............
*********************
إلي هنا ينتهي الفصل الرابع من رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابع أيضاً: جميع فصول رواية انتقام ثم عشق بقلم لولو الصياد
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
أو أرسل لنا رسالة مباشرة عبر الماسنجر باسم القصة التي تريدها
اقرأ أيضا: رواية من أجلك فقط بقلم لولو الصياد
إرسال تعليق
يسعدنا تلقي اقتراحاتك أو تعليقك هنا