مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة دودو محمد علي موقعنا قصص 26 و موعدنا اليوم مع الفصل الثالث عشر من رواية تمرد صحفية بقلم دودو محمد.
رواية تمرد صحفية بقلم دودو محمد - الفصل الثالث عشر
اقرأ أيضا: رواية عشق الزين (الجزء الأول) بقلم زيزي محمد
 |
| رواية تمرد صحفية بقلم دودو محمد |
رواية تمرد صحفية بقلم دودو محمد - الفصل الثالث عشر
داليا :- يا قوووووووم يا هووووووو يا ناس روحتو فين حد يرد عليا جعااااااااانه وربنا حرام عليكم بتعذبونى كده ليه
مؤمن :- شششششش ايه أهدى شويه ايه الدوشه اللى انت عملها دى فيه ناس عندنا
داليا :- ناس ناس مين دى
مؤمن :- ادخلى الصالون وانتى تعرفى
داليا :- طيب ما تقول انت اسهل ليه التعب ده بس
مؤمن :- لاء روحى شوفى بنفسك
داليا:- منك للى اكلت دراع جوزها يا بعيد وراحت عند الباب وخبطت عليه ودخلت واتصدمت وقالت انت
سعيد:- تعالى يا حبيبتى ادخلى
داليا :- دخلت قعدت جنب ابوها وقالت انت جاى ليه
ادهم :- جاى لخطيبتى ده شئ طبيعى
داليا :- والله هو انا لحقت اكون خطيبتك وبعدين ما انت كنت عندى امبارح مش سيره هى
سعيد :- داليا عيب كده الراجل فى بيتنا وبعدين هو اتصل بيا قبل ما يجى واستأذن
داليا :- والله لاء شهم اوى الصراحه وبيعرف فى الأصول
سعيد :- انا قولتلك ايه عيب يا داليا كده
داليا :- حاضر يا بابا
ادهم :- ممكن اقعد معاها شويه
سعيد :- وقف وقال اه طبعآ عن اذنكم
داليا :- استنا هنا يا عم الحاج رايح فين
سعيد :- هروح اشوف الاكل اللى انتى داخله الشقه وفضحه الدنيا عليه
داليا :- احم هو حضرتك سمعت
سعيد :- اه حضرتى سمعت اقعدى مع خطيبك شويه على ما اروح اشوف الاكل واجى وخرج وسابهم
داليا :- غمضت عينيها وقالت اللهى تجيلك خبطه فى نفوخك يا ادهم الكلب
ادهم :- هتفضلى واقفه عندك كتير
داليا :- ها ع.ع.عايز ايه
ادهم :- اتفضلى اقعدى هنا عايزك
داليا :- بصت على المكان اللى شاور عليه أدهم بأيده علشان تقعد عليه وراحت قعدت فى مكان تانى
ادهم :- قولتلك اقعدى هنا
داليا :- وانا مش هقعد غير هنا
ادهم:- داس على سنانه بغيظ وقفل أيده بعصبيه وقال انتى هتخلينى اعمل معاكى حاجه مش هتستظرفيها
داليا :- اتنهدت وقالت لا تصدق خوفت براحه عليا علشان بخاف
ادهم:- ماشى يا داليا اعملى ما بدالك دلوقتى كلها كام يوم وهتبقى تحت ايدى وسعتها هعرفك أن الله حق
داليا :- بقولك ايه بلاش كلام عبيط وقول كنت جاى عايز ايه
ادهم :- اللهم طولك يا روح بلاش طولة لسان احسنلك
داليا :- اخلص وقول
ادهم :- ماشى يا داليا هقول ومد أيده فى جيبه وطلع علبه حمرا قطيفه وفتحها وقال اتفضلى اتنيلى والبسى دى فى ايدك
داليا :- ايه دى
ادهم :- دبله هتكون ايه يعنى
داليا :- والله انت شكلك عايش الدور كويس اوى وعايز نبقى شبه الناس المخطوبين بجد
ادهم :- ليه هو احنا مش مخطوبين وفرحنا كمان اسبوعين
داليا :- اممممم بيقولو ما علينا هات يا اخويه هات واخدت منه الدبله لبستها فى صوبعها وقالت البس بتاعتك مع نفسك ووقفت وقالت مش خلصت مهمتك اتفضل بقى من غير مطرود
ادهم :- رجع لواره وحط رجل على رجل وقال اقعدى
داليا :- يخربيت البرود مشوفتش فى حياتى واحد بارد كده
ادهم :- بصوت عالى اقعدى
داليا :- خافت وقعدت وقالت ع.ع.عايز ايه
ادهم :- لما اقولك كلمه تتسمع من مره واحده مفهوم
داليا :- بقولك ايه بلاش تعيش دور سى السيد بس
ادهم :- بصلها بغيظ ومردش عليها
داليا :- شعرت بالخوف اول ما بصلها كده وقالت احم ا.ا.اخلص شوف كنت عايز تقول ايه
ادهم :- انتى هتعيشى فى الفيلا بتاعتى هى جاهزه من كل حاجه حابه تروحى امته تشوفيها ولو محتاجه تغيرى اى حاجه من الفرش مفيش اى مشكله
داليا :- بص انا مش شاغله بالى بالكلام ده لان انا مش معتبره دى جوازه من اساسه ده أمر واقع واتحطيت فيه وان شاءالله هخلص منه قريب اوى فكبر وفكك منى
ادهم :- اتعصب من كلامها وقال ده مليون واحده بتتمنى تبقى مكانك وكلهم اجمل واحلى منك الف مره
داليا :- ولما مليون واحده بتتمناك مروحتش ليهم ليه وريحتنى انا وبالنسبه للجمال فأنا يزيدنى شرف أن انا مش من المليون بنت دول وأقل منهم فى الجمال فعلا بس احسن مليون مره بأدبى وبأخلاقى وده اللى كان سبب تبعد عن المليون وتجرى ورايا انا
وفى الوقت ده دخل سعيد وقال خلصتو كلامكم يا ولاد
داليا :- انا عن نفسى خلصت كلام عن اذنكم وسابتهم ومشيت
سعيد :- بص على بنته وهى ماشيه وبص على ادهم لاقه متعصب قال اهدا يا ابنى الكلام اخد وعطا والستات محتاجين بال طويل لازم نسايسهم علشان نكسب رضاهم وداليا بنتى مندفعه شويه فى الكلام بس قلبها طيب وعقلها عقل طفله بأقل كلمه بتفرح تحب اللى يهتم بيها ويحسسها انها مهمه فى حياته لو جبت ليها شيكولاته بتفرح بيه اكتر من اى حاجه شبه الطفله الصغيره لما بتزعل بتحاول تدارى ده بضحكها المستمر علشان متشيلش حد فينا هم طول عمرها تحب تساعد الغير حتى لو على حساب نفسها ومش بتحب تشوف غلط وتسكت عليه من الاخر انت هتتجوز طفله بجسم كبير بس وقت الجد تلاقيها راجل واقف فى ضهرك وتسد بجد
ادهم :- احم مع احترامى لكلامك بس كل ده ميخصنيش أنا واخدها لهدف معين وبس
سعيد :- ههههه وانت بتقولى كده علشان ارفض اديها ليك ولا علشان تقلقنى وهى معاك
ادهم :- لا ده ولا ده
سعيد :- بص يا ابنى انا لو مكنتش متأكد منك وشايف انت ايه مكنتش هديك بنتى فى نفس الوقت عارف بنت ايه ومتأكد انها هتقدر تكون معاك وتعدى الصعوبات من الاخر انتو الاتنين اتخلقتو لبعض
ادهم :- بصله بأستغراب وقال انت ازاى كده
سعيد :- هههههههه كده ازاى
ادهم :- بتتكلم بكل ثقه عندك حكمه غريبه كلامك فيه حاجه بتشدنى ليك حاجه بتمنع لسانى من أنه يرد عليك رغم انا فى الطبيعى عمرى ما بقبل حد يتكلم معايا بالطريقه دى نفسى اعرف ليه معاك ببقى شخص تانى
سعيد :- طبطب على رجل أدهم وقال ربك اذا حب شخص حببه خلقه فيه وربى يشهد أن كلامى معاك طالع من القلب علشان كده بيدخل على قلبك علطول انا من ساعة ما شوفتك رغم كلامك معايا واللى حصل بينك وبين ابنى بس مقدرتش اكرهك حبيتك شوفتك زى ابنى بالظبط علشان كده لما بقولك نصيحه بتكلم معاك بلغة الاب
ادهم :- بحسره لغة الاب ههه عمرى ما عرفتها دى
سعيد :- من هنا ورايح هتعرفها معايا يا ابنى
ادهم:- حس نفسه هيظهر ضعفه قال انا لا عايز اعرفها معاك ولا مع غيرك
سعيد :- هههههههههه
ادهم.:- بأستغراب بتضحك على ايه
سعيد :- على طريقتك اللى تملى تستعملها لما يبدء يظهر عليك ضعفك
ادهم :- بعصبيه انت ايه عايز منى ايه ابعد عنى وسيبنى فى حالى بلاش طريقتك دى معايا ووقف وقال بنتك تجهز بكره علشان تيجى تشوف الفيلا مفهوم وسابه ومشى
سعيد :- هههههههههه داليا هتتعب معاك كتير بس هتشوف واحد طيب جدآ وراه القسوه دى وقام خرج من الصالون وراح يحضر الاكل
~•~•~•~•~•~•~•~•~•~•~•~•~•
فى شقة ميرفت
وصل العريس ابن خالها ودخلت ميرفت والدموع فى عينيها وحاولت تظهر ضحكه بسيطه على وشها بأمر من امها وبدء حسن يتكلم ولسه هيقرو الفاتحه قاطعهم احمد العريس وقال
احمد :- ثوانى بس فيه حاجه هتتغير فى الاتفاق
حسن :- تغير ايه ده
أحمد :- هخطبها النهارده وتجهزو تنزلو معايا البلد ونكتب الكتاب بكره علشان كلام أهل البلد وعلى اخر الاسبوع نعمل الفرح
ابو ميرفت :- بسرعه كده
احمد :- هتفرق ايه اذا كان دلوقتى ولا بكره يا عمى خير البر عاجله وانا الصراحه مستعجل اوى
ميرفت :- دموعها نزلت منها غمضت عينيها ووقفلت ايديها علشان تتحكم فى اعصابها
احمد :- ها ايه رأيكم نقراه الفاتحه ونكتب الكتاب بكره أن شاءالله
ابو ميرفت :- انا مش مو
ام ميرفت :- قطعته وقالت طبعآ موافقين وعلى رأيك مش هتفرق كتير
حسن :- طيب يلا نقراه الفاتحه وتلبسها الشبكه
احمد :- لاء الشبكه هلبسها ليها بكره بعد كتب الكتاب
ابو ميرفت :- بص على بنته وشاف دموعها وهى نازله منها مقدرش يستحمل قام علشان يخرج من المكان ده علشان ميشوفش دموع بنته بس وقع على الأرض
ميرفت :- قامت تجرى وسندته وقالت بخوف بابا خد بالك يا حبيبى
ابو ميرفت :- بص فى عينيها ودموعه نزلت منه على ضعفه
ميرفت :- مسحت دموع ابوها وبسته فى دماغه وقالت اياك تعيط تانى يا بابا انت سندى وقوتى ولو ضعفت هضعف انا كمان ارجوك خليك ساند ضهرى علشانى
ابو ميرفت :- بدموع انا خلاص يا بنتى مبقاش فيه منى رجا
ميرفت :- ارجوك متقولش كده انت هتفضل قدوتى مهما طال الزمان انتى فى نظرى اقوى راجل فى الدنيا دى كلها قوم يا بابا اقف علشان لو يوم وقعت هقع انا كمان وسندته وقفته
ابو ميرفت :- طبطب على ايديها وقال ربنا يبعد عنك ولاد الحرام يا بنتى ويفرح قلبك تملى
ميرفت :- ويخليك ليا اقعد وقعدته على الكرسى ورجعت قعدت تانى مكانها
حسن :- الحمدالله أن المسلسل الهندي خلص وبص لأحمد وقال بص يا ابن خالى دى اختى ولازم نضمن حقها لبسها الشبكه دلوقتى وبكره كتب الكتاب
احمد :- اشمعنا
حسن :- ها وبص لأمه وقال كده دى الاصول هى هتسافر معاك بصفتها ايه مش بنت خالك هتبقى خطيبتك ولازم الدهب علشان نثبت ده قدام اهل البلد
احمد :- بص لابوه وقال وانا موافق هات الدهب يا ابا
حسن :- ما هو معاك اهو امال كنت عايز تخليه ليه
احمد:- قولت كان هيبقى احسن لو لبسته ليها قدام اهل البلد فى كتب الكتاب
ام ميرفت :- شدت الدهب وقالت ورينى كده
احمد :- اخده تانى من ايديها وقال هتشوفيه عليها وقال نقراه الفاتحه الاول
الكل قراه الفاتحه
ام ميرفت :- قعدت تزغرط وقالت لما اقوم اجيب الشربات
احمد :- طيب استنى لما تشوفينى وانا بلبس الشبكه يا عمتى
ام ميرفت :- ماشى يا روح عمتك
احمد :- بص لميرفت وقال هاتى ايدك يا عروسه
ميرفت :- وهى الدموع محبوسه فى عينيها مدت ايديها
أحمد :- لبسها الشبكه وقال هاتى رقبتك يا عروسه
ميرفت :- ليه
احمد :- هلبسك السلسله دى
ميرفت :- لاء هات انا هلبسها
أحمد :- ماشى يا عروسه واداها ليها
ميرفت :- اخدتها من أيده ولبستها
أحمد :- سبونى بقى مع خطيبتى
ام ميرفت :- اه طبعآ يا حبيبى ده حقك يلا يا حسن تعال معايا نجهز الشنط
حسن :- يلا يا اما
ام ميرفت :- قوم يلا يا راجل خليهم براحتهم يلا يا اخويه تعالو معايا بره
ابو ميرفت :- بص على بنته بقلة حيلة وقام خرج معاهم وسابهم
أحمد :- مبروك يا قلبى
ميرفت :- لو سمحت الزم ادبك فى الكلام معايا أسمى ميرفت مش قلبك
أحمد :- وفيها ايه لما اقولك قلبى مش خطيبتى وبكره هتكونى مراتى حلالى
ميرفت :- بقرف خلاص لما يجى بكره ويتكتب الكتاب يبقى يحلها ربنا
أحمد :- طيب ما تجيبى اى حاجه تصبيره وقرب منها وحاول يبوسها
ميرفت :- تصدق انك واطى وجبان ده انا حتى بنت عمتك قبل ما أكون خطيبتك يعنى المفروض تحافظ عليا مش تحاول وسكتت وقالت بس هقول ايه اللى فيه طبع عمره ما هيغيرو وانت طول عمرك بنأدم زباله ولا تنتمى لصعايده الجدعان بأى صلة الصعايده رجاله بجد مش زيك
احمد :- ليه كل ده علشان حاولت اخد بوسه من خطيبتى ده كلها يوم وتبقى مراتى يعنى مأذنبتش
ميرفت :- انت ضامن تعيش لحد بكره ولا انا اعيش لحد بكره يعنى لو موتنا هنبقى زانيآ لانك لحد ما تكتب كتابى تبقى راجل أجنبى بالنسبه ليا واى لمسه منك ليا تغضب ربنا وتبقى زنا وانا مش مستعده أغضب ربنا علشان واحد زيك
أحمد :- طيب يا اختى ربنا يهدينا يا ست الشيخه
ميرفت :- هقولك ايه جاهل فى دينك ولا تعرف حاجه عنه
أحمد :- خلتلك انتى المعرفه يا ست الشيخه
ميرفت :- وقفت قالت ربنا يهديك عن اذنك هروح احضر شنتطى وسابته وراحت على اوضتها واترمت على السرير وقعدت تعيط وفى الوقت ده حست بأيد على كتفها بتبص لاقيته ابوها اترمت فى حضنه وقعدت تعيط
ابو ميرفت :- ششششش أهدى يا حبيبتى
ميرفت :- بدموع هموت يا بابا مش طيقاه ولا طايقه اسمع صوته
ابو ميرفت :- أهربى
ميرفت :- بعدت عن حضنه وقالت ايه
ابو ميرفت :- مدام مش فى ايدى حاجه اساعدك بيها اهربى فى اقرب فرصه تقابلك يمكن يوعدك ربنا بحد يقدر يساعدك
ميرفت :- مقدرش اعمل كده مستحيل اخاف يا بابا
ابو ميرفت :- اهربى واطلبى المساعده من الراجل اللى بتشتغلى معاه هيساعدك
ميرفت :- لاء يا بابا مقدرش اعمل كده اخاف عليك
ابو ميرفت :- متخافيش بصى حاولى تخدى تليفونك من امك من غير ما تحس وابقى طمنينى عليك فى اى وقت تقدرى توصليلى فيها
ميرفت :- بس اهرب ازاى وهما عنيهم عليا علطول
ابو ميرفت :- واحنا فى الطريق اطلبى انك عايزه تدخلى الحمام ولما تنزلى وتدخلى الحمام تكونى مجهزه هدوم ونقاب مخبياهم فى هدومك وغيرى وأهربى بس خلى بالك على نفسك وهديكى رقم واحد معرفه طيب ومراته وعياله كويسين هياخدك تعيشى معاهم
ميرفت :- بس
ابو ميرفت :- مفيش بس اسمعى كلامى مينفعش تتجوزى احمد هيوريكى المرار كلنا عارفين احمد ده ايه
ميرفت :- دموعها نزلت منها وقالت مش هقدر ابعد عنك يا بابا
ابو ميرفت :- ما انتى كده كده كنتى هتبعدى عنى وهتعيشى فى الصعيد
ميرفت :- بدموع حاضر يا بابا واترمت فى حضنه وقعدت تعيط
ابو ميرفت :- طبطب عليها ودموعه نزلت منه وقعد يبوس فى راسها ويقول هدعيلك فى كل صلاتى يا بنتى يكفيكى شر طريقك ومسح دموعه وقام وقف وقال قومى جهزى شنتطك يلا
ميرفت :- حاضر وقامت وقفت
ابو ميرفت :- مشى لحد الباب ولف تانى رجع تانى عند بنته وشدها فى حضنه وبسها وقال بدموع هتوحشينى يا حبيبتى يا عالم هنتقابل تانى مع بعض ولا لاء
ميرفت :- اتشعلقت فيه اكتر ودموعها نزلت وقالت ابوس ايدك يا بابا بلاش الكلام ده
ابو ميرفت :- بعد عنها ومسح دموعه وقال معلش يا حبيبتى اصل اول مره هتبعدى عنى ومعرفش عنك حاجه خدى بالك على نفسك وسابها وخرج وكلهم حضرو الشنط بتاعتهم وركبو العربيات مع العريس وأهله وراحو على الصعيد
~•~•~•~•~•~•~•~•~•~•~•~•~•
فى بيت سعيد
خرج حمزه من اوضه وهو محضر شنطته وحاجته وقال
حمزه :- يلا بقى يدوب امشى اشوف وشكم بخير
سعيد :- اخد حاجتك كلها
حمزه:- ايوه
مؤمن :- طيب هتنزل امته اجازه
حمزه :- ههههه وانا لسه استلمت الشغل علشان اعرف امته هنزل اجازه
داليا :- بدموع خلى بالك على نفسك يا حمزه كل كويس وخلى بالك من الغطا علشان بيقع من عليك طول الليل وبلاش نومك التقيل هناك علشان مش هتلاقى حد يصحيك بطريقتى
حمزه :- هههههههه ده.انا ارتحت من مقالبك بتاعة كل يوم وانتى بتصحينى
داليا :- اخس عليك يا ابو الحماميز بذمتك مش هتوحشك غلستى عليك
حمزه :- عايزه الصراحه هتوحشنى اوى
داليا :- اترمت فى حضن حمزه وقعدت تعيط وقالت اعمل حسابك مش هحضر فرحى لو مجتش الفرح
حمزه:- هههههههه يا مجنونه ازاى مش هتحضرى فرحك
داليا :- هو كده ها
حمزه :- والله مش عارف ايه الظروف بس ربنا يسهل
سعيد :- يلا بقى يا ابنى علشان متتأخرش
حمزه:- ماشى وباس أخته من راسها وسلم على ابوه وسلم على أخوه مؤمن
مؤمن :- شال الشنط وقال انا نازل معاك اوصلك
حمزه :- لالالا خليك انت
مؤمن :- لاء طبعآ مش هسيبك وشال الشنط وقال يلا بس ونزل
حمزه :- يلا السلام عليكم ونزل
سعيد :- وعليكم السلام ورحمة الله وبركاته ربنا يحفظك ويجعل ليك فى كل خطوه سلامه يارب
داليا :- اللهم امين
سعيد :- انتى ايه اللى عملتيه مع ادهم ده
داليا :- عملت ايه عادى يعنى خلصت الكلام معاه ودخلت اوضى
سعيد :- بس طريقتك دى هتخليه يعاند اكتر مش هتساعديه كده.انتى كده هتخليه اسوء من الاول بكتير
داليا:- يا بابا انا بفرض شخصيتى عليه علشان يشوفنى قويه مش زى اى واحده عرفها قبل كده
سعيد :- يا عبيطه مش كل مره مره تظهرى قويه ومره تحسسيه بضعفك ومحتاجه جنبك زيه بالظبط
داليا :- احم بس انا عمرى ما هحتاجه انا وجودكم جنبى يكفينى
سعيد :- بجد بس انا مش شايف كده شايف واحده كانت واقفه وراه الباب بتسمع كلامنا وبتراقبنا
داليا :- ها ه.ه.هو حضرتك شوفتنى
سعيد :- ايوه حضرتى شافك وانتى واقفه وراه الباب
داليا :- احم ا.ا.انا كنت بشوفه هيقول ايه بس مش اكتر
سعيد :- اه ما انا عارف
داليا :- يووووه بقى يا بابا انا داخله انام تصبح على خير ودخلت تجرى على اوضتها
سعيد :- هههههههههه وانتى من أهل الخير يا حبيبتى وقام دخل اوضه اتوضه وقعد يقراه فى المصحف
~•~•~•~•~•~•~•~•~•~•~•~•~•
فى الطريق
كانت ميرفت قاعده بتفكر فى كلام ابوها وسرحانه ومش حاسه بأى حاجه وفاقت على صوت احمد
احمد :- ميرفت يا ميرفت
ميرفت :- ها ا.ا.ايه
احمد :- ايه فينك عمال اكلمك وانتى ولا هنا
ميرفت :- ما اخدش بالى
احمد :- اللى واخد عقلك يا عمرى
ميرفت :- بصت ليه بغيظ وبصت لابوها فى مراية العربيه وقالت لو سمحت عايزه ادخل الحمام
احمد :- ماشى يا قمر من عنيا
ابو ميرفت :- بصلها فى المرايا وابتسم ليها يودعها
احمد :- وقف وقال ادخلى الكافتيريا دى
ميرفت :- حبست الدموع فى عينيها وبصت بصه اخيرا على ابوها فى المرايا واخدت الشنطه بتاعتها ولسه هتنزل
احمد :- انتى ليه واخده الشنطه معاكى
ميرفت :- ها ع.ع.علشان هاخد منها حاجه بناتى
احمد :- احم اه ماشى بس متتأخريش
ميرفت :- ح.ح.حاضر وبصت تانى لابوها ودخلت الكافتيريا وسألته على باب تانى غير اللى دخلت منه وقال ليها أن فيه باب تانى وشاور ليها عليه وطلعت تجرى منه ميرفت وهى الدموع فى عينيها وتبص وراها بخوف وتجرى لحد ما وصلت لطريق العربيات وبقت تجرى تجرى وهى كل شويه تبص وراها بخوف وفى اخر لحظه عربيه وقفت من قبل ما تخبطها وميرفت اتخضت واغمى عليها ووقعت قدام العربيه
عند أحمد قلق وبص لابو ميرفت وقال هى مالها اتأخرت اوى كده
ابو ميرفت :- متأخرتش ولا حاجه تلاقي الحمامات زحمه
احمد:- ممكن وفى الوقت ده تليفونه رن رد عليه وقال ايوه يا عمتى
ام ميرفت :- انتو فين كل ده
احمد :- ميرفت بس فى الحمام تطلع وهنيجى عليكم علطول
ام ميرفت :- ماشى بس بسرعه وقفلت معاه
احمد :- بص فى الساعه وقال هنزل ابص عليها
ابو ميرفت :- اصبر يا ابنى شويه أن الله مع الصابرين
احمد :- انا هطمن عليها بس ونزل من العربيه وراح عند الكافتيريا
ابو ميرفت :- يارب يا بنتى تكونى عرفتى تتصرفى
احمد :- دخل وسأل على ميرفت وقال ليه المواصفات وقال الراجل ليه أن فيه واحده بالمواصفات دى سألت على باب تانى وخرجت منه وشاور ليه على الباب اللى خرجت منه وطلع يجرى احمد من الباب اللى خرجت منه وطلع يجرى فى الشارع يبص عليها يمين وشمال لحد ما وصل لطريق العربيات وبص حاوليه ملاقاش حاجه رجع تانى عند عربيته وقال شوفت بنتك الفاجره هربت وربنا ما هسيبها ومسك تليفونه واتصل على حسن وقال تعال ليا عند كافتيريا (....) بسرعه
حسن:- ايه حصل
احمد :- اختك هربت مننا
حسن :- ايه انا جاى حالا
احمد:- قفل وبص لابو ميرفت وقال ودينى لاجبها وهحسبها أشد حساب على العامله دى
ابو ميرفت :- فى نفسه ربنا يكفيكى شر طريقك يا بنتى ويوقفلك ولاد الحلال يارب
احمد :- ماشى يا ميرفت ماشى
~•~•~•~•~•~•~•~•~•~•~•~•~•
اشرقت شمس صباح يوم جديد بنورها الساطع فى سماء الاسكندريه لتبدء دينا بفتح عيونها على صوت تليفونها مدت ايديها واخدت تليفونها وفتحت التليفون من غير ما تشوف مين وقالت بصوت نعسان
دينا :- السلام عليكم
تامر :- اخيرآ رديتى عليا
دينا :- يووووه مين معايا
تامر :- انا تامر يا دينا
دينا :- فتحت عينيها ودعكتهم وبصت على الاسم اللى على التليفون وقالت انت
تامر :- ايوه انا يا دينا وفرحت انك حنيتى عليا ورديتى بس شكلها صدفه مش برضاكى
دينا :- فعلا صدفه انا فتحت من غير ما اشوف مين على التليفون ولو كنت اعرف أنه انت مكنتش رديت
تامر :- ليه بتعملى كده معايا يا دينا
دينا :- علشان عمر ما اللى فى دماغك ده هيحصل يا استاذ تامر افهم ده بقى
تامر :- ليه يا دينا سيبى نفسك لو مره واحده بس وخلينا نقعد مع بعض شويه ونتكلم يمكن اقدر اغير تفكيرك وتوافقى عليا
دينا :- افهمنى ارجوك أنا صعب أمن لراجل تانى بعد اللى حصلى اه انت ساعدنى وبشكرك بجد من كل قلبى بس ده مش معناه ان احبك لان قلبى مجروح اوى من جوه والجرح ده محتاج سنين وسنين على ما يلم وحتى لو لم هيتبقى اثر الجرح ده محفور جوايا ارجوك يا استاذ تامر انسانى فكر فى واحده غيرى حب واتجوز واحده تستاهلك ام لاولادك تفتخر بيها
تامر :- من الاخر انا مش شايف غيرك ام لاولادى وهبقى فخور جدآ بيكى انك انتى ام ولادى يا دينا انتى غلطى زى الناس ما كلها بتغلط احنا بشر مش ملايكه بلاش تحملى نفسك الذنب اكتر من كده هتتعبى كتير صدقينى
دينا :- بحمل نفسى الذنب لأن انا فعلا مذنبه فى حقى وحق اهلى وشرفى ومهما تقول مش هيغير نظرتى فى نفسى بالله عليك روح وشوف غيرى ومتتصلش بيا تانى بترجاك وقفلت التليفون فى وش تامر ونامت على السرير وقعدت تعيط
~•~•~•~•~•~•~•~•~•~•~•~•~•
فى اوضت أدهم
دخل أكرم الاوضه عند ادهم لاقه لسه نايم خبط على كتفه وقال
أكرم :- أدهم ادهومى يا دومى قوم يلا اتأخرنا على الشغل
ادهم :- اممممم
أكرم :- امممم ايه قوم يلا يا ابنى
ادهم :- هوووف أكرم اطلع بره واطفى النور علشان مخربش عليك
أكرم :- لاء مش هطلع بره غير لما تقوم وتدخل الحمام كمان
ادهم :- يا ابنى ارحمنى وبعدين متتعبش نفسك كتير انا مش رايح الشركه دلوقتى لسه قدامى مشوار هعملو وبعد كده هروح على الشركه
أكرم :- مشوار ايه ده
ادهم :- وانت مالك يا حشرى
أكرم :- عليك برود مشفتهوش على حد فيها ايه لو تريح اللى قدامك وتقول رايح فين
ادهم :- انا كده واتفضل بقى اطلع بره واطفى النور وخلينى اكمل نومى
أكرم :- برضه لاء قوم علشان عايز اتكلم معاك فى موضوع
ادهم :- أجل الموضوع ده لما اجى الشركه
أكرم :- مينفعش يتأجل خالص
ادهم :- قعد ونفخ وقال هووووف اتفضل اتزفت وأتكلم
أكرم :- يا سلام اكتر حاجه بحبها فيك احترامك ليا
ادهم :- هتتكلم وتخلص ولا اشيلك احدفك بره الاوضه
أكرم :- خلاص خلاص هتكلم ميرفت
ادهم :- مالها
أكرم :- مجدش امبارح والنهارده الشركه وبرن عليها تليفونها مقفول
ادهم :- طيب روح ليها بيتها شوف ايه سبب اختفائها
أكرم :- مش هستنا لما تقولى طبعآ روحت ومفيش حد فى البيت والقفل على الباب بتاعهم
ادهم :- والعمل
أكرم :- انت بتسألنى انا
ادهم:- امال أسأل مين
أكرم :- أسأل ميرفت نفسها
ادهم :- والله وانا اجيب ميرفت منين
أكرم :- سؤال وجيه برضه
ادهم :- أكرم اتصرف وشوف الموضوع ده ميرفت معاها كل المواعيد واسرار كتيره لشغل
أكرم :- هحاول اوصلها وربنا يسهل
ادهم :- اطلع بره بقى
أكرم :- طيب مش عايز تقولى ايه هو المشوار
ادهم :- لاء امشى بقى يخربيت برودك
أكرم :- ماشى ماشى ليك يوم يا ظالم وخرج من الاوضه وسابه
ادهم :- نفخ ونام تانى وحط المخده على وشه
~•~•~•~•~•~•~•~•~•~•~•~•~•
فى شقة سعيد
فى اوضت داليا
كانت لسه نايمه وصحيت على صوت خبط على باب اوضتها وصوت مؤمن وهو بيقول
مؤمن :- دودى يا دودى جتلك اهو قبل معادنا كمان هنا هو وفتح الباب وقال صحى النوم يا جميل
داليا :- ايه يا ابنى الدوشه اللى انت عاملها دى
مؤمن :- دوشه انتى بتسمى صوتى دوشه ده كروان يا بنتى حد يطول يصحه على الصوت ده
داليا:- طيب يا عم الكروان اخلص وقول عايز ايه
مؤمن :- بابا بيقولك اصحى يلا علشان تاكلى وتجهزى علشان ادهومتك جاى ياخدك
داليا :- بعصبيه خدك ربنا حد يصحى حد على اسم المخفى ده
مؤمن :- وانا مالى زى ما ابوكى قالى قولتلك
داليا :- طيب امشى بقى
مؤمن :- انا هاجي علي نفسي وهبعد يمكن انسي هواك عشان ملقتش راحتي معاك ولا مرة من نفسي مش لازم استني خلاص مبقاش في قلبي مكان اتاري لكل وقت ادان ودي دنيا مش دايمة
داليا :- اخلص يا عم تامر عاشور انت
مؤمن :- مشكلتها بطلة العالم في النكد
ونمرة واحد في العقد
شكاكة حاجة مش معقولة
مشكلتها شهور بصالح أنا فيها
و ياريت بعرف أنسيها
دي نجمة القفش الأولى
داليا:- والله
مؤمن :-كل يوم زن زن ون ون راديو ومبتسكتش
والخناق فن فن فن حوارت مبتفصلش
وفي التمثيل فنانة قديرة
مبروك كسبتي معانا جايزة أحسن تكشيرة
داليا :- حدفته بالمخده وقالت وحياة امك
مؤمن :- اه يا مجنونه والله الله يكون فى عون أدهم منك وطلع من الاوضه وسابها
داليا :- هههههههه غلس بس بموت فيه هههههههه
ومسكت تليفونها وطلبت رقم فاطمه وانتظرت الرد
فاطمه :- دودى حبيبت قلبى عامله ايه
داليا :- والله ده على اساس انك قولتى لسانى مش هيخاطب لسانك
فاطمه :- لاء ده انا بس اندمجت فى الدور شويه هههههههههه
داليا :- احلى ما فيكى جنانك
فاطمه :- دودى يا دودو يا دوده
داليا :- امممم
فاطمه :- احم كنت عايزه اسألك فى سؤال
داليا :- تسألينى فى سؤال اتفضلى اسألى فى سؤال
فاطمه :- احم امبارح مجبتوش سيرتى كده ولا كده
داليا :- وهى بتكتم ضحكتها قالت طبعآ جبنا سيرتك
فاطمه :- بفرحه بجد قولتو ايه
داليا :- قال انك مجنونه ومنسكتش عليكى علشان حالتك بتسوء اكتر من الاول ههههههههه
فاطمه :- نعم هو ده اللى قولتو عليا
داليا :- ايوآ
فاطمه :- تصدقى انا من النهارده مش عايزه اعرف حد فيكم
داليا :- ههههههههه ليه بس يا طمطم
فاطمه :- بدل ما تقوليلو أن انا جميله ودمى خفيف ومزه لقته حرام تروح من ايديه بتضحكى
داليا:- ما الصراحه لما توته قالت ليا اللى حصل ساعة التليفون كنت هموت ليكى من الكسوف ومقدرش اقول حاجه بعد ما سمع كده بودنه
فاطمه :- اعمل ايه ما هو حاجه استغفر الله العظيم حلو اوى اوى يجر الواحد لأفكار قليلة ادب
داليا :- ههههههههههه انتى اللى دماغك سو هههههههههه
فاطمه :- يا اختى هو انا لاقيت اللى ينفذ اللى فى دماغى وقولت لاء انا قابله للانحراف
داليا :- ههههههههههه هموت ده انتى فظيعه
فاطمه :- هو ده اللى بخده منكم الضحك وبس
داليا :- ههههههههه خلاص خلاص هههههههه
فاطمه :- والله
داليا :- لاء بجد هسكت بقولك انا مش جايه النهارده
فاطمه :- ليه أن شاءالله
داليا :- خطيبى العزيز عايز يفرجنى على الفيلا عايش الدور ابن المنكوبه
فاطمه :- يعنى هتروحى معاه الفيلا لواحدك
داليا :- ايوه ليه
فاطمه :- هييييييييييح يعنى هتبقى انتى وهو وثالثكم الشيطان يا حلاوه يا ولاد اموت انا هيييييييييييح
داليا :- الله يحرقك ايه اللى انتى بتقوليه ده هو انا بطيقه
فاطمه :- امانه عليكى تقوليلى ايه اللى هيحصل ما بنكم بالظبط
داليا :- يا بنتى اتلمى شويه فين البت توته
فاطمه :- توته راحت عند علاء الحناوى هييييييييح
داليا :- هو انتى بتهيييييييييح على نفسك علطول كده
فاطمه :- نفسى اهييييييييييح انا كمان
داليا :- يارب صبرنى متنسيش بقى انا مش جايه اعمليلى اجازه سلام يا مجنونه
فاطمه :- سلام هييييييييييح
داليا:- ههههههههههه مجنونه وربنا وقفلت السكه وقامت دخلت الحمام اتوضت وأدت فرضها وخرجت من الاوضه وقالت صباح الخير
سعيد :- ايه يا بنتى كل ده
داليا :- سورى يا بابا كلمة طمطم وصليت وجيت علطول
سعيد :- ماشى يا حبيبتى كلى علشان أدهم جاى دلوقتى
داليا :- هو فيه حد يجى لحد بدرى كده
مؤمن :- مش ادهم.جاى بدرى
داليا :- اه
مؤمن :- يبقى فيه
داليا :- ههه خفه
سعيد :- بطلى كلام وكلى بقى
داليا :- حاضر وقعدت تاكل وشويه قامت وقفت وقالت الحمدالله شبعت هدخل اجهز بقى
سعيد :- ماشى يا حبيبتى
داليا :- دخلت الاوضه تجهز نفسها
سعيد :- يلا
مؤمن :- يلا ايه
سعيد :- يلا شيل الاطباق
مؤمن :- لولولولولولوى افرحي يا اما ابنك على اخر الزمن هيبقى الشغاله سعديه وبص لابوه وقال اوامرك يا سيد الناس وشال الاطباق وهو بيقول يقطع الجواز وسنين الجواز وبعدين رقص وقال هاتلي فوديكا وجيفاز انحرف كبلي جاز يلعن ابو الجواز ده الغرام هو المراد
ده انتي لاف السنين ده انتي اجدع فيتامين كوكو خدني الحنين بحبها من غير ميعاد
سعيد :- امشى اللعن ابوك خلفه سوده
مؤمن :- طلع يجرى بالاطباق وهو بيضحك
وفى الوقت ده جرس الباب رن وفتح سعيد الباب وقال تعال يا ابنى
ادهم:- شكرآ داليا جاهزه
داليا :- خرجت وقالت انا جاهزه يا بابا
سعيد :- يا ابنى هتمشى من على الباب كده
ادهم :- مفيش وقت
داليا :- خلاص يا بابا براحته خلينا نخلص
سعيد :- ماشى اللى يريحكم
ادهم :- بص لداليا وقال امشى
داليا :- مشيت من غير ولا كلمه ونزلت قدامه
سعيد :- أدهم
ادهم :- بص ليه
سعيد :- خلى بالك على داليا
ادهم :- هز رأسه بمعنى ماشى ونزل
داليا:- نزلت ولسه هتركب وراه
ادهم :- قدام انا مش السواق بتاع حضرتك
داليا :- نفخت وقالت اللهم يطولك يا روح وركبت قدام ورزعت الباب وراها
ادهم :- لف وركب العربيه وقال حطى الحزام
داليا :- اتنهدت ومن غير ما ترد عليه حاولت تحطه بس معرفتش
ادهم :- شاف داليا مش عارفه تحطه قرب منها ومسك الحزام وقفله ليها وهو بيبص فى عينيها
داليا :- اتوترت من قرب ادهم ليها وبلعت ريقها بصعوبه وبصت من الشباك
ادهم :- بعد عنها وشغل العربيه ومشى بيها وبعد وقت وصل على الفيلا ونزل من العربيه وقال انزلى
داليا :- حست بشوية رهبه من جواها وبصت على الفيلا من بره ورجعت بصت تانى على ادهم.
ادهم:- هفضل مستنى كتير ما تنزلى
داليا :- احم انا نازله اهو ونزلت من العربيه ومشيت وراه ادهم
ادهم :- وصل عند الباب وغمض عينه واتنهد ومد ايده وفتح الباب وقال ادخلى
داليا :- ها
ادهم:- ادخلى
داليا :- م.م.ماشى ودخلت وهى خايفه
ادهم :- دخل وراها ولسه هيقفل الباب
داليا :- ل.ل.لا سيبه مفتوح
ادهم.:- اشمعنا
داليا :- كده
ادهم :- نفخ وسابها ودخل
داليا :- مشيت وراه وهى بتتفرج على الفيلا ومعحبه جدآ بجمال الفيلا
ادهم :- حابه تغيرى حاجه هنا
داليا :- سبق وقولتلك مش شاغله بالى لأنها حاجه مؤقته
ادهم:- وهو بيدوس على سنانه قال فعلا هتبقى حاجه مؤقته على ما اخليكى تتمنى الموت ومطلهوش
داليا :- هههههه الاعمار بيدى الله مش بأيدك
ادهم:- انا بقى هوريكى المعنى الحقيقى للموت
داليا :- على فكره انا مش بخاف يعنى متحاولش تهددنى علشان كده انت بتتعب نفسك على الفاضى
ادهم.:- بكره نشوف وشاور ليها وهو ماشى وقال تعالى ورايا
داليا :- بقرف وصوت واطى جتك القرف وانت شبه المدير بتاعى فى الشغل
ادهم :- من فوق هستنا كتير اطلعى
داليا :- طلعت تجرى وراه واتفرجت على الاوض لحد ما وصلت لاوضه ولسه هتمد ايديها تفتحها
ادهم:- مسك ايديها ومنعها وقال دى لاء
داليا :- اشمعنا
ادهم:- متسأليش اللى اقول عليه تسمعيه من غير نقاش الاوضه دى ممنوع تيجى جنبها
داليا :- يا اخويه اشبع بيها وبالفيلا كلها جتك نيله عليها
ادهم :- مسكها من دراعها وقال لمى لسانك وهو بيشدها قربت منه جدآ والاتنين قعدو يبصو لبعض فتره وادهم بص على شفايفها ولسه هيقرب منها
داليا :- اتوترت من قرب ادهم ليها واول ما شافت ادهم بيقرب من شفايفها علشان يبوسها زقته وبعدت عنه وقالت احم م.م.مش خلاص كده اتفرجنا على الفيلا روحنى بقى وسابته ونزلت
ادهم :- غمض عينه واخد نفس عميق وخرجه بهدوء ونزل وراها ركبو العربيه ومشو على شقة سعيد من تانى
~•~•~•~•~•~•~•~•~•~•~•~•~•
فى الصعيد
فى شقه صغيره جدآ فاقت ميرفت وهى دايخه ومش قادره تتحرك بصت حاوليها ولاقت نفسها فى مكان غريب قالت ان احمد وصل ليها تانى قامت تجرى وكانت لسه دايخه وقعت فى الارض وقامت سندت على الحيطه وفتحت الباب بتاع الاوضه براحه وبصت ملاقتش حد فتحت باب الاوضه وخرجت منه ولسه هتفتح باب الشقه سمعت صوت بيقولها
........:- انتى رايحه فين
ميرفت :- اتخضت وبصت وراها وقالت بصدمه انت
*********************
إلي هنا ينتهي الفصل الثالث عشر من رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابع أيضاً: جميع فصول رواية انتقام ثم عشق بقلم لولو الصياد
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
أو أرسل لنا رسالة مباشرة عبر الماسنجر باسم القصة التي تريدها
اقرأ أيضا: رواية من أجلك فقط بقلم لولو الصياد
إرسال تعليق
يسعدنا تلقي اقتراحاتك أو تعليقك هنا