قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والقصص والخيال مع قصص رعب علي موقعنا قصص 26 وموعدنا اليوم مع رواية جديدة مخيفة جدا ستحبس الأنفاس مع الفصل التاسع من رواية ساري بقلم الشيماء محمد.

رواية ساري بقلم الشيماء محمد - الفصل التاسع

رواية ساري بقلم الشيماء محمد

رواية ساري بقلم الشيماء محمد - الفصل التاسع

تاسهيك وهيا مع ايتوكان مره واحده حطت ايدها علي قلبها
ايتوكان: في ايه مالك؟؟؟تاسهيك مالك؟
تاسهيك: في سحر اسود بيتم ...في شر هيحصل ..شر عظيم هيحصل
ايتوكان: فين؟؟هيحصل فين؟؟
تاسهيك: هنا ...........ساري
جريوا هما الاتنين عند ساري وفضلوا يحاولو يفتحوا الباب ومش قادرين
لحد اخيرا مادخلوا وما لقوش حد نهائي في الاوضه لا ساري ولا موات
موات كانت اخدت ساري وطلعت بيها بره المملكه بشكلها الجديد
موات: بكده محدش هيعرف مكانك ابدا ولا هيقدروا يوصلولك
ساري: طيب رجعيني لشكلي بقي
موات: لو رجعتك دلوقتي ابوكي هيرجعك بسهوله للملكه وهيحبسك تاني
ده غير انه هيعرف اني ساعدتك وهيحبسني معاكي ..لكن كده مش هيعرف
يوصلك ابدا..روحي اوصلي لمحمود الاول وفكريه بحبك
ساري: افكره ازاي وانا بالشكل ده...انا بقيت قطه..تفتكري هعرف اروحله
او اكلمه او هو هيفهمني ...انا معنديش اي قدرات نهائي
موات: بمجرد ما ترجعي لشكلك ابوكي هيحدد مكانك بالنافذه بتاعته
وهترجعي..يبقي تخاطري كده ولا نرجع من دلوقتي؟؟؟
سكتت ساري وهيا مش عارفه تقول ايه؟؟حست انها غلطت قوي لما
سمعت كلام موات وسمحتلها تحولها
موات: انا لازم ارجع ابوكي بينادي عليا والمملكه كلها اتقلبت وبتدور عليكي
وانتي لازم تبعدي بسرعه
ساري: استني وانا هحمي نفسي ازاي كده .؟ من البشر او الحيوانات او
اي شئ حواليا.؟؟؟انتي مش هتسيبيني كده؟
موات: انا اسفه انا لازم اروح دلوقتي ابوكي بينادي ولو عرف مكاني ؟؟
هرجعلك تاني

ومشيت ساري في العالم الواسع تدور علي حبيب مجهول واتفاجئت قد
ايه العالم بقي كبير قوي من مكانها ...هتدور فين وهتلاقيه ازاي؟؟؟
وموات اتخلت عنها بعد ما حولتها كده...وبقيت وحيده في عالم كبير
جدا عليها...
عدت سنه كامله و ايتوكان وتاسهيك مش بيقوموا من قدام
النافذه السحريه بتاعتهم بيفتشوا عن بنتهم اللي ملهاش وجود ابدا
ايتوكان: ده معناه ان بنتنا ماتت صح؟؟؟
تاسهيك: حاسه بقلبها لسه بينبض ...نبضاته ضعيفه بس موجوده
ايتوكان: لو عايشه كنا شفناها هنا ..كنا قدرنا نحدد مكانها؟
تاسهيك: يمكن تكون عامله تعويذه تخفيها عننا؟
ايتوكان: مفيش تعويذه بالقوه دي تقدر تخفيها الفتره دي كلها
مفيش تعويذه تخفي حد سنه كامله ...سنه كامله عدت وبنتنا ملهاش اثر
هنا دخل حد عليهم
:::مولاي الملك الاحتفال قرب ولازم نجهز ليه علشان تنصيب وليه العهد
لمملكه ...هيحضره كل مملكه الجن وكل العشائر ولازم التتويج يتم
ايتوكان: مفيش تتويج هيتم وبنتي مش موجوده
::::لو بنتك ما ظهرتش لحد يوم التتويج يبقي نائبتها تتعين مكانها
ده القانون وحضرتك عارفه كويس
يوم وري يوم بيعدي واخيرا جه يوم التتويج وساري ملهاش اثر نهائي
واتضطروا يتوجوا موات وليه للعهد ...
تاسهيك كانت من اتعس ما يكون يمكن لو كانت ساعدت بنتها بدال وقفتها
ضدها كانت هتكون موجوده دلوقتي...فيها ايه لو سمحتلها تستمر مع
حبيبها ؟؟؟كان ممكن تعيش بين العالمين ...مع حبيبها وبرضه ملكه في
مملكتها ؟؟بس الغباء كان مسيطر عليها وضيعت بنتها من ايديها
بعد الاحتفال ايتوكان قفل النافذه المفتوحه
تاسهيك: قفلتها ليه مش ممكن ساري؟؟؟
ايتوكان: ممكن ايه؟؟ترجع؟؟ولا تسترد عرشها ولا ايه؟؟؟خلاص كل شيئ
انتهي خلاص
تاسهيك: انت هتفقد الامل في بنتك؟
ايتوكان: هيا اختارت طريقها واحنا اهملنا المملكه كتير وجه الوقت
اللي كل واحد لازم يقوم بدوره..موات استلمت منصبها ومحتاجه
تدريب علشان تستعد انها تكون ملكه في يوم من الايام
تاسهيك: طول ما ساري عايشه عمر ما موات هتبقي ملكه بنتي
هترجع وهتستلم مكانها وحقها الشرعي
ايتوكان: احلمي ...احلمي برجوعها وتتويجها لكن انا خلاص اكتفيت
من عالم الاحلام وهرجع للواقع ..والواقع مفيهوش ساري
تاسهيك رفضت تسلم بالامر الواقع ..من جواها حاسه ان موات ليها يد
في الموضوع..موات هيا السر في اختفاء ساري...وموات هيا اللي هتوصلها
لساري:::لازم تقري افكار موات
فعلا راحتلها وبدأت تتكلم معاها
تاسهيك: مبروك يا موات علي منصبك الجديد
موات: متشكره
تاسهيك: اخيرا وصلتي للي بتتمنيه من زمان...واختفاء ساري فتحلك الطريق
موات: مش انا اللي خفيتها او انا اللي هربت من عشيرتي علشان حب
مالوش امل ..انا اخدت حقي الشرعي
تاسهيك: حقك الشرعي؟؟؟انتي كنتي خدامتها
موات: انا كنت بقوم بكل حاجه..انا اللي استحق المنصب ده مش هيا
وبعدين هيا اختارت كل حاجه بنفسها..هيا حبت الشخص الغلط
تاسهيك: انتي ليكي يد في حبها ده
موات: انتي عارفه ان مفيش حد ليه قوه علي قلب انه يدق..ده كان مجرد
حسن حظ مش اكتر..انها تحب انسي
تاسهيك: بس الانسي ده صرفها من حياته ايه اللي خلاه يرجعلها تاني؟
موات: كام كابوس..وصرخ ونادي علي حبيبته تلحقه من كوابيسه
ضحكت ضحكه خبيثه عاليه
تاسهيك: انتي عملتي ايه يا موات
موات: انا ما عملتش اي حاجه...هما اللي عملوا انا كنت بتفرج من بعيد
بس ضايقني لما صرفها فاضطريت ادخل لافكاره واعيشه في اسوء
كوابيس وهو ما استحملش وفضل ينادي عليها وهيا لازم تلبي نداه وكنت عارفه
انهم لو اتقابلوا تاني هيضعف قدامها وقلبه هيدق تاني وفعلا قلبه دق ومقدرش
يستغني عنها تاني...الباقي بقي انتي عملتيه بأيدك..انا بحب ساري وكنت عايزاها تعيش
في حب مع حبيبها وتتخلي عن عرشها ..لكن اللي انتو عملتوه هو اللي
بعدها ولا طالت ده ولا طالت ده وبقت روح معذبه وبس
تاسهيك قربت منها وكلها شرر بيتطاير من عنيها
تاسهيك: انتي عملتي ايه في بنتي؟؟؟؟؟؟
مسكت ايدين موات جامد وخلتها تركع قدامها ودخلت افكارها ووصلت
لحد ما حولت ساري لقطه وهنا صرخت ووقعت في الارض
تاسهيك: انتي عملتي فيها ايه؟؟؟ انتي لازم تبطلي السحر ده
موات بضحك: اسفه بس مفيش شيئ يبطل السحر ده غير حبيبها الضايع
حبيبها بس.. لو قلبه رجع يدق تاني ساري هترجع..وطبعا بما انك مسحتيها
نهائي من ذكرياته فعمر ما قلبه هيدق لقطه ...ههههههه
ضحكتها كانت شريره جدا ..كل ده كان تخطيط موات علشان توصل للعرش
وهيا بغبائها ساعدتها وحطتها مكان بنتها
خرجت واصرت انها لازم تلاقي بنتها وترجعها تاني ..فضلت ايام وايام
تدور عليها وكلها اصرار انها تلاقيها ..طبعا راحت لمحمود تراقبه من بعيد
يمكن تكون راحتله ..بس شافته مع واحده تانيه...واحده قريبه جدا منها..
محمود استمر في حياته وتقريبا قلبه دق تاني لحد غيرها وده بسببها
كل ضحكه وكل لحظه فرح بيعيشها بنتها بتتعذب الف عذاب وعذاب
كل ضمه بيضمه لحبيبته الجديده بنتها نار بتضمها وتحرقها..
فضلت تدور اكتر واكتر علي بنتها لحد ما اخيرا لقتها
ماشيه وحيده وحزينه فقربت منها
تاسهيك: ساري؟؟؟انتي ساري؟
رفعت لقطه راسها تشوف مين ...شافت امها ودموعها في عنيها
تاسهيك: سامحيني يا بنتي سامحيني انا اللي وصلتك لكل ده
سابتها القطه وكملت طريقها ماشيه بتجر رجل وري رجل
جريت وراها تاسهيك ومسكتها وشالتها
تاسهيك: استني انتي لازم تسمحيلي اساعدك
ساري: تساعديني؟؟انتي جايه دلوقتي تساعديني؟؟؟انتي افتكرتي دلوقتي
انك امي وجايه تساعديني
نطت ساري بعيد عنها
تاسهيك: ارجوكي انا من ساعه ما اختفيتي وانا بدور عليكي ومش لاقياكي
ولولا اني قريت افكار موات مكنتش عرفت الاقيكي ابدا
ساري: موات؟؟؟موات اللي حولتنيني واتخليت عني ..هيا كمان اتخلت عني
تاسهيك: موات كان كل همها عرشك ووصلتله كانت عايزه تبعدك باي طريقه
وانتي سمحتليها تبعدك
ساري: عرشي؟؟كانت بتساعدني علشان عرشي؟؟لو طلبته كنت اديتهولها
انتو ليه كده؟؟سيبيني في حالي ..سيبني وامشي وارجعي لعرشك
قبل ما موات تاخده منك انتي كمان ..سيبوني كلكم وانسوني زي ما هو
نسيني وكمل حياته مع اللي قلبه اختارها ...انا هفضل كده لحد ما اموت
وحياه القطط هنا مش بتفضل كتير... سيبيني وامشي
تاسهيك: اسمحيلي اساعدك يا ساري ارجوكي
ساري: ماشي هسمحلك...رجعيلي محمود ..رجعي قلبه يدق تاني ليا
تاسهيك: مقدرش مفيش قوه علي الارض تخلي قلب يدق
ساري: شوفتي يبقي ما تقدرش تساعديني
تاسهيك: انا ممكن احميكي من مخاطر الدنيا
ساري: ومين قالك اني عايزه اكون في امان..طالما حياتي هو مش فيها
يبقي الموت اهونلي من كل شيئ ..بس مش عارفه ليه الموت مش عايز
يجيلي..كل يوم بشوف قطط كتير بتموت وانا مش عارفه اموت زيهم
سابتها ساري ومشيت في طريقها وتاسهيك رجعت لمملكتها تبكي وتبكي
وحست انها مهما تبكي عمرها ما هتكفر ذنبها ابدا ابدا في حق بنتها
قالت لايتوكان علي اللي حصل ..وطبعا هو كمان شاركها ندمه بس
حس انه لازم ينتقم لبنته من موات فراحلها
ايتوكان: مواااااااااااات..انتي ازاي تعملي كده في بنتي ؟؟..انا هحبسك
موات: ما تقدرش ..كل شيئ تم بموافقتها
ايتوكان: انتي خدعتيها
جرب يستخدم سحره ضدها او يأذيها باي طريقه بس معرفش
كل ما يوجه ناحيتها سحر يرجع تاني ومايأثرش فيها
موات: قلتلك كل حاجه تمت بموافقتها وعلشان كده مش هتقدر تعملي اي شيئ
ايتوكان: انتي لا يمكن تقعدي علي العرش
موات: لا انا هقعد علي العرش وهاخد مكانك انت كمان
بدأت موات تعمل تعاويذ وترفع ايديها لفوق وتعمل سحر غريب
موات: ودلوقتي يا ملك ايتوكان بما انك فقدت كل قواك وبقيت ضعيف
العرش ما بقاش من حقك ..العرش من حقي انا
ايتوكان: لا يمكن
هنا موات استخدمت كل قواها ضده وسحبت التاج من راسه وحطته علي
راسها ولبسته وهنا كل قوي ايتوكان بقت ملكها
اتحركت وراحت قعدت علي العرش وجمعت العشيره كلها
موات: الكل يسمع من دلوقتي انا الملكه هنا لان الملك بقي ضعيف
وما ينفعش يبقي قائد لمملكه عظيمه زي مملكتنا ..الكل يركعلي واللي مش
هيركع هيواجه غضبي....
هنا الكل ركع الا تاسهيك وقفت فموات وجهت سحرها ناحيتها والسحر خلاها
تركع غصب عنها وتوطي
تاسهيك: انتي ممكن تجبريني اوطي بس مش هتقدري ابدا تجبريني اتقبلك
ووضعك ده مش هيستمر
ضحكت موات: ومين هيمنعني..انتي؟؟ولا ايتوكان؟؟؟ولا ساري القطه؟؟
مملكه الجن كلها بقت تحت امر موات واخيرا موات قعدت
علي العرش اللي بتتمناه ....
ساري كانت ماشيه كالعاده في طريقها بتدور في كل الوشوش يمكن تلمحه
او تشوفوه كانت اقصي امنيه ليها انها بس تشوفوه
وهيا بتعدي الطريق فجأه لقت عربيه جايه عليها بسرعه ولسه هتجري
لقت نفسها بتقف وهتجري ليه ؟؟وهتعيش لايه؟؟مش يمكن دي فرصتها
وتنهي حياتها ؟؟؟كفايه جري ..استسلمي للواقع...محمود مش ليكي ابدا
وخلاص نسيكي واستمر في حياته وانتي خلاص فقدتي كل حاجه غاليه
يبقي استسلمي للموت ..قدامك اهوه بينك وبينه خطوه...
فعلا غمضت عنيها واستنت العربيه تدوس عليها

ونكمل بكره ونشوف ساري هتموت ولا لسه في امل؟؟
موات مين هيقف قدامها ومين هيتصدالها؟؟؟
محمود فعلا استمر في حياته ولا لسه جواه شعاع امل؟؟
استنوني تعرفوا

*********************

إلي هنا ينتهي الفصل التاسع من رواية ساري بقلم الشيماء محمد
تابع من هنا: جميع حلقات رواية ساري بقلم الشيماء محمد
تابع من هنا: جميع فصول رواية فارس عشقي

تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
اقرأ أيضا: رواية شهد الحياة بقلم زيزي محمد