مرحباً بكم أصدقائي وأحبابي عاشقي القراءة والقصص مع رواية اجتماعية جديدة للكاتبة لولو طارق التي سبق أن قدمنا لها العديد من القصص والروايات الجميلة علي موقعنا قصص 26 و موعدنا اليوم مع الفصل الخامس من رواية شرسة ولكن بقلم لولو طارق.
رواية شرسة ولكن بقلم لولو طارق - الفصل الخامس
كبير القبيله بيشاور على الحصانين : ها دول الخيل يخصونا و ملك لبنتنا الصبيه ورد .. وينها
سعفان قرب على حازم بالرشاش الا فى ايده وزق بيه راسه .. راح غربلك هون انت وياها ليش هى عندك
حازم زق الرشاش بدون اى خوف ظاهر عليه ووجه كلامه لكبير القابيله : انا عارف انكو ناااس بتخافوو على بناتكم وبتحموهم لو فيها بحور دم .. بس الحصانين دول انا لقيتهم فى الناحيه الشرقيه وانا بتمشى بعربيتى .. وقولت بدال ما يموتو فى الصحرا أجيبهم هنا اشربهم واسأل على اقرب قابيله موجوده واسلمهم لهم عشان انا مهندس فى مشروع الكبارى الا شغال على الطريق العمومى برا وكل البيت هنا مهندسين زيى وبنتكم مانعرفش عنها اى حاجه
سعفان : ورد كل يوم بتطلع بالخيل وترجع جبل الغروب وعمرها ما جدمت على الناحيه الشرجيه
حازم رفع اكتافه وبثبات عكس الا جواه : انا ماعرفش إلا عندى قولته جايز الخيل هرب منها .. وبيكلم كبير القابيله لو عايز تتاكد بنفسك اننا لوحدنا فوق تعالا معايا .. انا اتمنى تلاقو بنتكم ومايكنش حصل لها مكروه
كبير القابيله : صادق يا والدى .. شدو الخيل من شان نروح للناحيه الشرجيه نلحج بتنا
سعفان قرب على حازم وشده وبغل وكره باين جوا عيونه : بتعرف لو لجيتها عنديك او ليك يد ورا ضياع ورد راح أجتلك
حازم ابتسم براخمه لسعفان : لو بقى وزق ايده اتفضل عشان لو بلغت الشرطه ها يجو يلموكم كلكم لانكم بتتعدو علينا بس انا محترم كبيرك ومحترم ظروفكم
سعفان : نحنا ما نخاف إلا من الله .. اطلع فوج بتاكد لاول
كبير القابيله : بيكفى يا سعفان يا ولدى .. جدامى
سعفان : الكذب باين جوات عنيه .. بتاكد وبعدين بنرحل لو مافى شى يا جدى
حازم : اتفضل وبيشاور على السلم وبيدعى ربنا تكون نور فهمت وخبت ورد وهو طالع على صوته على الباب وكلم محى بصوت عالى : اوعا كدا عشان يدورو على بنتهم فاكرنها هنا و سعفان دور فى الشقه الا تخص الشباب كلها .. وبعدين راحو على شقه نور وبيخبطو
نور فتحت وعامله نفسها لسا قايمه من النوم : ايوا .. سعفان بيبص لها من فوق لتحت باستغراب هيئتها مش باينه اذا كانت بنت والا ولد
حازم : محمد زميلنا بس لسا متخرج وصغير فى السن .. ممكن يا محمد يدخل يتاكد انك لوحدك
نور حطت ايديها على شعرها من ورا وتخنت صوتها شويه : ليه حملة التفتيش على البيت والا ايه
حازم شدها بايده وبقت هى وراه ومدارى عليها عشان سعفان مايكشفش انها بنت .. اتفضل دور وخلصنا
سعفان بص بعيونه وفتح الاوض بص فيها وبعدين خرج .. طلع على السطح ونزل
حازم : كدا بقى ما شوفش وشك تانى ماشى
سعفان : راح نشوف واتحرك هو والقبيله وخد الحصانين معاه
حازم : طلع لنور والشباب واقفه على السلم .. دخل وقفل الباب وراه .. حلو كدا اهى بدأت الحرب عشان انتى واحده متهوره
نور بتحاول تهدى نفسها و قدرت اللى هو عمله : خلاص هى ها تمشى من هنا خالص
حازم بيبص لورد الا واقفه مرعوبه : طيب قدامى اهربك وواديكى لمكان قريب منهم وقولى اى حاجه
نور باعتراض : لا هى مش ها ترجع لهم انت فهمت غلط .. ها تسافر معايا على القاهره
حازم بصوت عالى : اتجننتى بجد .. انتى بتعملى مصيبه انتى مش قدهم وها تخليهم يخلصو على حياة المسكينه الا ماشيه وراكى دى وبيشاور على ورد
نور بصوت اعلى : ممكن تهدى هى مش عايزا ترجع .. ومحدش يقدر يغصبها على عيشه هى مش عايزاها
حازم : اه وبيلف بدماغه .. وانتى بقى الفتوه بتاعها .. الا ها تهربيها من هنا صح
نور : ايوا صح وياريت ملكش دعوه .. خلاص بنشكرك على الدور البطولى الا عملته من شويااا ومستغنين عن خادمتك اتفضل
حازم بيشاور على نفسه : انا استاهل المفروض كنت سيبتهم اتصرفو مع واحده زيك بس اكيد بكرا ها تعرفى ان كل تصرفاتك غلط فى غلط .. وخرج على الشقه وزمايله دخلو وراه بيسألوه فى ايه ما ردش عليهم .. وخد شنتطه الا بيجهزها قفلها ونزل ومحى بيجرى وراه
محى : انت رايح فين المكان مقطوع ومفيش موصلات هنا
حازم : الطريق قريب مش بعيد ها أمشى لحد اول الطريق واركب مع اى عربيه لمكان المشروع والصبح ها ارجع مع الاتوبيس اخد باقى حاجتى
محى : ليه فهمنى طيب وماشى جمبه وحازم ماشى ما بيقفش
حازم : عشان لايمكن اقعد فى المكان الا فيه البنى ادمه الا اسمها نور وعشان كلكو ها تموتو هنا بسببها
محى : يا حازم طلع نور من دماغك دى واحده حياتها وعيشتها طول عمرها كدا انت رضيت او لاء
حازم بمهاجمه : على نفسها يا محى مش علينا لازم تفهم ان لكل شئ حدود لازم تفهم ان ساعات كلامها وقرارتها غلط فى غلط
محى : هى عملت ايه
حازم : انت مش شايف البنت البدويه الا عايزا تهربها من اهلها وأقسم بالله لو اكتشفو البنت فى البيت كانو خلصو عليها وعليكو اكيد نور دى مش طبيعيه
محى بحيره : اكيد البنت دى مش عايزا تعيش معاهم يا حازم
حازم : انت ليه دايما عندك مبررات لكل حاجه
محى : عشان دا الطبيعى مفيش حد بيعمل حاجه من غير سبب مفيش بنت ها تسيب قبيلتها واهلها وهى عارفه انها ميته ميته من غير سبب وسبب كبير كمان وحط ايده على صدره احنا بشر يا بنى ربنا خلقنا كدا احرار ولما بيكتر الضغط علينااا ممكن نتصرف بغباء
حازم وقف وبص لمحى الا يدوب شايفه على ضوء القمر والنجوم : محى بجد انا حبيتك قوى وكل كلمه انت بتقولها انا مقدرها وفاهمها كويس وانت نفسك لو فكرت ها تعرف ان نور دى متهوره وما بتعملش حساب للحواليها اهى مصيبه وزى ما تيجى تيجى قرارها من دماغها وبس انا صعب اتقبل كدا والاصعب اتقبل ان واحده تتحكم فيا عشان سكن والا فلووس او أى إن كان
***********
سلوى بتتكلم بنبرات صوت مختلفه : ماما .. مامى .. مامو سماعنى ط .. ماما وعلت صوتها ماما .. وبصوت أعلى نوجاااااااااا
نوجا بتفرد ايديها وبصويت : عايزا ايه .. ما تنطقى على طول لازم المقدمه بتاعتك وبتجعر ماما ماما
سلوى قعدت جمبها : نور لسا قافله معايااا وكان فى حاجه كدا
نوجا اتعدلت : حصل لها حاجه والا اتخانقت مع العقربه أحلام تانى اوعى يكون حمدى مد ايده عليها عارفه ايده سابقه لسانه
سلوى بابتسامه : لا دا ولا دا .. هى جايه ومعاها مصيبه ممكن تقبليها بمصيبتها عادى والا ها تعملى بلوووو
نوجا بصويت فى وش سلوى : ها الاحق على مصايبك انتى وإلا هى وبتنفض ايديها فى الهوا ارحمنى يارب من دى بنات وبتشاور على بنتها واحده 24 ساعه بتفكر تهرب والتانيه بتجرى ورا المصايب وبتاخدها بالحضن مبقاش اسمها نور حمدى بقى اسمها نور مصايب وبلاوى
سلوى بتفكيررر وبصوت هامس : انا لسا مقولتلهاش نور عملت ايه أمال لما اقولها ها تاكلنى وبتقوم براحه من جمب أمها انا الحق اهرب وادخل الاوضه فى الخفى كدا
نوجا مسكتها جااامد من ضهرها وهى قايمه لدرجه انها فزعتها
سلووى : اعاااااا .. ايه يا نوجا .. ايه ها تجبيلى لومباجو مبكر
نوجا : راحه فين .. انطقى نور عملت ايه
سلوى بتشيل ايد امها براحه : طيب سيبى بس وقامت تجرى وهى بتجرى اتكلمت .. هربت واحده بدويه وجايبها معاها هنا
نوجاااا ضربت على صدرها جااامد : يا مصيبتى .. بدويه .. حصلت تهربو بنات الناس كمان .. مش كفايه انتو وعمايلكو السودا
سلوى واقفه ورا باب الاوضه ومطلعه راسها بس منه : مليش دعوه يا نوجا اوعى تاخدينى بذنبها عارفاكى لازم يبقى العقاب جماعى وزعلانه من عمووو حمدى ما انتى زيه الشبشب شغال 24 ساعه
نوجا : هى فكرتك ما تخرجش برا دماغك الهربانه منك زعلانه من الشبشب قولى يجيب نتيجه معاكووو لا كلام نافع ولا مداديه نافعه والبسى انتى يا نوجا
سلوى : وربنا منا دى هياااا وقفلت الباب عليها
نوجااا راحت وبتخبط على الباب : افتحى يا سلوى .. افتحى يا بيت
سلوى بعياط مصطنع : مش ها افتح لحد ما نور تيجى
نوجاا : هى جايه امتى
سلوى : بكرا الصبح
نوجا بصوت عالى ومشيت من على الباب : صبرنى يارب .. الصبر من عندك يارب .. يارب ادينى الصبر .. يارب شوية صبر
سلوى بصوت هامس وبتضحك : أمى بتشكل فى الصبر
*************
حمدى رجع البيت تااانى .. واحلام نازله من فوق
أحلام : ايه يا حمدى مالك كدا
حمدى بأستعجال مفيش .. نسيت ورق مهم المفروض اوديه لكامل وهو مستنينى عشان اوديهوله
أحلام : شكلك ما يطمنش اوعا يكون فى حاجه مخبيها عليااا .. انا مراتك حبيبتك
حمدى دخل المكتب وفتح الخزنه وجاب ملف وقفلها تااانى .. وخارج وما بيردش على أحلام
أحلام بتجرى وراه : يا حمدى كلمنى
حمدى وقفها : انتى راحه فين بمنظرك دا ادخلى جوا عايزا الحرس يشوفك بقميص النوم
أحلام : طيب .. ما تتاخرش
حمدى وهو ماشى : لا مش ها اتاخر وركب عربيته ومشى بيها تاااانى
حمدى بيتصل بالتليفون : كامل قابلنى عند ال.... وخد الملف ان رجعت عشان خاطرك
كامل : ربع ساعه واكون هناك ان شاء الله كنت عايز اكلمك بخصوص نور فى حاجه
حمدى بصوت عالى ونرفزه : عملت ايه تااانى
كامل : هى ما عملتش اولانى عشان تعمل تانى
حمدى : خلاص مش وقته يا كامل نتكلم بكرا
كامل : لا انهارده يا حمدى .. انا خايف يحصل حاجه
حمدى : يا الله منك يا كامل .. بتقلقنى ليه انا ناقص يا راجل .. قابلنى ونتكلم .. وبعد وقت وصل حمدى لكامل .. وعطاه الملف واستأذن منه يتكلم فى التليفون وبعدين قعد معاه
حمدى : اتفضل اشجينى اصلى ناقص
كامل : انت داخل حامى عليا ليه كدا .. على العموم ها ادخل فى الموضوع كان حصل مشكله بين نور وبين المهندس حازم الا ماسك مشروع ال____وانا مش فاهم سوء التفاهم او سبب المشكله بالظبط بينهم بس المهندس زى ما انت عارف طلب يسيب المشروع بسببها
حمدى : واتنقل مشروع ال____
وبعدين سكت وبص لكامل وضحك وبيضرب كف على كف .. يعنى هو وبنتى هناك فى بيت واحد دلوقتى والمفروض انهم مش طايقين بعض
كامل : بالظبط كدا انا ماعرفش انه اتنقل هناك غير انهارده وانت عارف نور عصبيه والمصيبه بقى ان المهندس دا بالذات ما بيتفهمش ابدا مع الا بيدايقه يمكن هو احترم انها بنت وبعد عنها غير كدا ماكنش ساب حقه
حمدى بيهز راسه : كملت على البركه يا حمدى وبيخبط ايد على ايد اعمل ايه دلوقتى جاى تقولى بعد خراب مالطه
كامل : انا قولتلك الا فيها اتصل على نور وخليها تتجنبه الواد ها ينضر بسببها لو ساب المشروع دا كمان عليه شروط جزائيه تودى فى داهيه لان ساب مشروع قبله ماضى على عقد تقيل يا حمدى وهو ما يستهلش والله لانه فعلا ما بيجيش على حق غيره
حمدى بحيره : طيب ماتعرفش اى حاجه من سوء التفاهم الا بينهم
كامل : والله ما اعرف حتى نور ماقالتش
حمدى : ماشى يا كامل فى حاجه تانيه
كامل : اه فى .. خف على نور شويه بنتك بقت اد السيخ يا راجل من الهم الا هى شايله .. غير ابنى الا انت ماسكهلها لما خليتها ولد بجد الناس بتتصدم من ولد ولد
حمدى : اه ها ندخل فى المواعظ
كامل : نفسى افهم بتعمل معاها كدا ليه
حمدى بعصبيه : عملت ايه .. استحملت أمها 15 سنه كل ما تخلف ولد يموت .. لحد ما حابتلى نور وبعدها بردو نزلت كام ولد وماتو وهى بعدهم كان لازم احس ان ليا ضهر اتسند عليه علمتها تبقى راجل واهه اسد تقف فى اى مكان تسد ايه غلطى وما تنساش ان رباب كانت كدا معاها وهى الا سيباها وكل ما تتكلم تقولى دى ضهرك وسندك
كامل : انت راجل مخك مضلم ورباب هى الا ياما استحملتك مش انت كفايه انها وقفت جمبك وماشفتش منك ريق حلووو .. وطول الوقت بتهددها تتجوز عشان تجيب الولد .. فضلت حمل ورا حمل .. حتى بعد نور حملت 3 مرات لما صحتها انتهت وهى كمان راحت بسبب مخك التخين .. كفايه الا عملته فى امها دى بنتك لحمك ودمك يا راجل ولو أمها عملت كدا من خوفها ما تكملش انت عليها
حمدى : اهى بنتى دى مطلعه عينى وبتكره احلام وابنى وعايزا تحرمهم من فلوسى من بعدى يرضيك
كامل : انا راضى ضميرك .. نور الا بتلف على العمال تتاكد انهم كلو وشربو وبينامو كويس وإلا لاء ها تعمل كدا فى اخوها ... هى البت عشان صغيره عليك ضحكت على عقلك وكرهتك فى بنتك
حمدى : كامل فوق لنفسك انا مش عيل صغير قدامك
كامل : ولا انا كمان صغير انا قولتلك اللى فى ضميرى .. وادينى قايم ماشى واحنا حلوين مع بعض .. بنتك زى بنتى وصعبانه عليا .. سلام يا حمدى .. وسابه ومشى
وحمدى قام هو كمان حاسس ان طوق حديد بيلف حوالين راقبته ومش قادر يتنفس يا ترى الايام اللى جايه مع نور شكلها ايه وانا نفسى مش راضى عن وضعها وحياتها الا بتضيع يوم عن التانى البنات فى سنها اتجوزت وخلفت اخ يا حمدى من حيرتك طول الوقت طيب ها تأمن لمين يشيل شغلك وحياتك غيرها
**************
نور ياله يا ورد البسى هدومى دى واسعه ها تيجى مقاسك
ورد : ما بدى ها دول الأواعى .. كيف بلبسهم
نور : خلصى مش وقت دلعك دا الحل الوحيد عشان محدش من القبيله يعرفك .. البسى خلصى وساعدتها وبعد ما خلصت لبس بتبص على نفسها فى المرايه
ورد حاضنه نفسها : يا عيب الشوم عليكى يا ورد ... ما بدى اخرج هيك خيتى والله مابقدر
نور : اخترتى عيشه غير عيشاتكم لازم تكونى أدها من دلوقتى ها تقابلى وتواجهى كتير انتى فاهمه
ورد مطت شفايفها لقدام : ايه فاهمه وخايفه كتير
نور جابت كاااب : ما تخافيش ان شاء الله خير .. اوعى كدا البسى دا ولمى شعرك ما يبنش منه .. وابتسمت تحبى ارسملك شنب ودقن بالمكياج
ورد : لا بيكفى .. وخلصو ونزلو مع بعض ركبو العربيه ونور بتسوق بسرعه جدا .. بتلف من ورا صخره كبيره فى وسط الطريق وفجأه وقفت وورد بتشهق جااامد وحطا ايديها على بوئها ونور قلبها وقع من الا حصل معاهم
*********************
إلي هنا ينتهي الفصل الخامس من رواية شرسة ولكن بقلم لولو طارق
تابع من هنا: جميع فصول رواية شرسة ولكن بقلم لولو طارق
تابع من هنا: جميع فصول رواية شرسة ولكن بقلم لولو طارق
تابع أيضاً: جميع فصول رواية آدم ولانا بقلم امونه
تابعوا صفحتنا على الفيس بوك للمزيد من روايات حب
إرسال تعليق
يسعدنا تلقي اقتراحاتك أو تعليقك هنا