مرحباً بكم أصدقائي وأحبابي عاشقي القراءة والقصص مع رواية اجتماعية جديدة للكاتبة لولو طارق التي سبق أن قدمنا لها العديد من القصص والروايات الجميلة علي موقعنا قصص 26 و موعدنا اليوم مع الفصل السابع من رواية شرسة ولكن بقلم لولو طارق.
رواية شرسة ولكن بقلم لولو طارق - الفصل السابع
نجيه بعياااط : ابوس ايدك يابنى سيبه وفهمنى
حازم بعصبيه اكتر : تبوسى ايد مين
الظابط : احنا ها نقف نتحايل على بعض ونتسامر وإلا ايه .. ممكن تتفضل قدامى وكل حاجه ها تعرفها فى التحقيق
حازم مسك ايد أمه باسها وبأبتسامه : متقلقيش ان شاء الله مفيش حاجه .. كلمى رامز يعدى عليكى
نجيه بعياط أكتر وهما بيشدوه وبينزلو معاهم .. قعدت وبتخبط على رجلها وبنار قايده جواها مش عايزا تهدى : يا حبيبى انا حاسه والله حاسه بكل دا .. يارب استرها يارب وجريت لبست العبايه ونزلت مش شايفه قدامها .. بتجرى وسط العربيات بعزم ما فيها وقفت قدام تاكسى الا فرمل على اخر لحظه
سواق التاكسى : مش تحاسبى يا ست وبعدين ندخل فى سين وجيم ويجيبو الحق علينا
نجيه : بلهفه قربت عليه .. معلش يابنى .. ارجوك ودينى القسم
سواق التاكسى : قسم ايه الله يخربيتكم انا عملتلك حاجه
نجيه : لا فهمت غلط وعيطت ابنى خادوه وماعرفش خادوه ليه .. ودينى وها اديلك إلا أنت عايزه
سواق التاكسى : لو مؤاخده ياما ما تزعليش انا زى ابنك .. اركبى يا حاجه وركبت نجيه وبتلف من قسم لقسم تدور عليه
**********
حمدى بيخبط على شقه نوجاااا
نوجا : طيب يا اللى على الباب .. فى ايه وفتحت . .. اهلا اهلا براحه طيب ها تهد علينا البيت
حمدى : فين نور يا نوجا
نوجا : نايمه جوا .. ايه جاى تتخانق معاها زى عوايدك طبعا
حمدى : نوجا ما تعصبنيش انا مش عارف انتى مش طيقانى ليه كدا
نوجا : ادخل يا حمدى انت على الباب وسابته ودخلت وبتصحى نور .. نور .. انتى يا بت
نور بنوم : نعم يا خالتى سيبينى شويه كمان
نوجا : كان بودى .. بس ابوكى برا
نور اتعدلت مره واحده ؛ هو عرف منين انى هنا
نوجا : ودى عايزا كلام من المخبرين الا ممشيهم وراكى .. وبتبص على ورد الا بتتعدل .. اتخمدى انتى ماتقميش الا الصبح
ورد نااامت تااانى وبتقول بنوم : حاضر يا خاله
نوجا بنفاذ صبر ؛ جاتكو خوت كلكم .. هى المشرحه ناقصه قتله ياربى .. نهايته قدامى .. ونور قايمه وطالعه على برا
حمدى : حمدالله على السلامه
نور : الله يسلمك يا حج .. خيررر
حمدى : خيررر انتى .. اخرتها معاكى ايه سايبه الدنيا تضرب تقلب وحاجتنا تتسرق .. وبتجرى ورا بنت بدويه احنا ناقصين مشاكل مع البدو كمان بسببك
نور بتشاور بصباعها على صدرها : هو انا للدرجه دى عملالك مشاكل ومش ملاحق عليا
حمدى : اه مش ملاحق .. تنكرى ان كل يوم والتانى عامله مشاكل مع أحلام .. وعامله مشاكل مع المهندس حازم .. واهو مشاكل كمان مع البدو
نور بعصبيه : وانت ممشى ورايا مخبرين محدش فيهم فهمك مين اللى بيبتدى بالمشاكل الاول معاااايا ... والعقربه الا اسمها احلام دى على أى اساس مصدقها .. هى الا بتعمل مصايب معايا وعايزا تطفشنى من جنتك وبتنطر ايديها جنتك الا انا مش عايزاها اصلا اشبع بيها وبمراتك وابنك
حمدى قرب عليها بعنف وبصوت عالى صحى البنات وخرج نوجا الا ماسكه نفسها وضربها بالقلم جاااامد ومسكها من شعرها بيشدها بعنف منه .. انا شكلى قصرت فى تربيتك وعايزا تتربى يا بنت ال
نوجا : لحد هنا ومش عايزا ربع كلمه وشدت نور لحضنها وحضنتها جاامد ونور منهاره .. انت ايه يا راجل انت اعمى البصر والبصيره .. واحلام مين دى الا جاى تضرب بنتك عشانها .. بنتك الا قلبت كيانها ودمرت حياتها وراميها بين الرجاله ومعدات وحياه مش بتاعتها وياريتك سايبها فى حالها
حمدى : بنتى وانا حر فيها يا نوجا ملكيش فيه واوعى تنسى ان السبب من الاول رباب امها .. وبيبص لنور .. انا طول عمرى بقول خلفت راجل مش بنت أمنتك على مالى وحالى خلاص بقيت عدوك ومش طايقه جنتى .. كل دا عشان اتجوزت وجبت الواد الا نفسى فيه .. اخوكى يا نور واحلام زى أمك
نور بمهاجمه : مفيش واحده زى أمى ... امى دى اشرف ست مش ست مايصه أمى استحملت الفقر والهم وفضلت جمبك لحد ما ربنا كرمك شافت يوم حلووو بتشاور بصباعها لاء ابدا .. اهانه وذل وقرف وبتقول حاضر وطيب ونعم .. حمل ورا حمل ورا حمل لحد ما صحتها راحت وماتت .. لما جريت ورا واحده من دور عيالك واتجوزتها ماتقدرش تقولها تلت التلاته كام .. اللى بتتنعم فى خير الست الا استحملت وحطت القرش على القرش عشان تبقى حمدى بيه وتحكم وتتحكم بنتك الا احلام خلتها عدوتك هى سبب انك واقف على رجلك وبيدخلك ملاين وكل يوم من موقع لموقع وشغل ومناقصات اد كدا وبتفتع دراعها على اخرهم والسبب العبدلله وبتشاور على نفسها . ناس تبنى وتدوق المرررر وناس تترفه وتعيش على قفا الكل
حمدى بان على وشه الزعل : كل دا فى قلبك .. وبيبص لنوجا كله منك يا نوجا فضلتى وراها لحد ما كرهتيها فياااا .. للدرجه دى انا كنت وحش مع اختك .. للدرجه دى كنت تاعبها ومدوقها المر
نوجا : ايوا يا حمدى افتكر كدا وارجع بذاكرتك لورا .. افتكر كام مره مديت ايدك على اختى وجت تعيط وتتقهر لوحدها فى اوضه مقفول عليها عشان محدش يحس بيها .. كام مره كسرت خاطرها عشان بتخلف بنات وبيموتو .. كام مره سيبتها من غير فلوووس ولا سائل فيها وكل ما تكلمها تقول لها عيشى على قدك ومن يوم ما اتجوزتك اتبهدلت واتمرمطت ودبلت .. وردتنا المفتحه دبلت وراحت وانت السبب .. بنتك دى انا ما بتكلمش معاها عليك لا بخير ولا شرررر .. بس كفايه بقى .. روحت جبت عيله تحكم وتتحكم عشان الواد جبت عقربه كل يوم والتانى تسمم جسم بنتك بالمشاكل والكلام .. وجاى تقول نور هى الا بتعمل مشاكل ههههه ضحكتنى والله
حمدى ضحك بسخريه : ياااه دانا شيطان رجيم وانا مش عارف ..وبينطر راسه براحتك يا بنتى اعملى الا على كيفك وبتحدى وانا كمان ها اعمل اللى على كيفى .. واه قبل ما أمشى بص بصه سريعه على ورد .. الواد الا عايزا تتجوزيه ها اقولهالك تااانى مش ها يشوف ضافرك ومش ها تلوى دراعى وبيشاور على ورد لا ببدو ولا بشغل ليا وبالاذن وسابهم ومشى .. ونور قعدت على الكنبه وسلوى وورد جمبها وبدأت تعيط بقهرررر وبطريقه وجعتهم كلهم وبقو يعيطو على عياطها
نوجا بعياط : يا حبيبتى اوعى تقهرى نفسك كدا يجرالك حاجه يا نونتى .
نور : تعبت يا خالتى .. تعبت هو بيعمل معايا كدا ليه .. دانا مرميه تحت رجله ارجل من اى راجل كان جابه .. ذنبى ايه ان امى جابتنى بنت . ورفعت راسها ودموعها نازله يارب انا مش عارفه هو بيعاقبنى على ايه بخاف ازعله عشان خاطرك بس مقدرتش اكتم فى نفسى اكتر من كدا .. والله بحبه بس تعبت وبتبص لهم واحده واحده وكلهم بيعيطو .. انا تعبت فااااض بيا اعملو اى حاجه تريحنى
سلوى حضنتها من ناحيه وورد من ناحيه وبيحاولو يهدوها
************
حازم قاعد قدام مكتب الظابط وبيبصلو : افهم انا موجود هنا ليه
الظابط مسك ورقه قدامه : امر بضبطتك واحضارك بعد ثبوت تورطك فى سرقه خامات ومعدات تخص المقاول حمدى عبدالغنى زاهر وتقدر قيمه المسروقات بمليون ونص
حازم ضحك وبيشاور على نفسه : انا ها أسرق وحمدى دا مش المقاول الا ماسك المشروع الا انا شغال فيه
الظابط : ايوا هو
حازم : هو تهمنى التهمه دى على أى أساس
الظابط : مش هو الا تهمك .. فى تلاته سواقين لعربيات النقل التقيل الا كانت بتنقل لكم معدات وحديد وخامات انضربو على طريق ال... امبارح الساعه 2 .. والتلاته بعد ما فاقو فى المستشفى تم استجوابهم وفيهم واحد شاف وش شخص من الا اعتدى عليهم وبعد التحريات عنه طلع المدعو سامى واعترف ان أنت إلا أتفقت معاهم يعملو كدا بمقابل مدى كبير هو وإلا نفذو معاه
حازم ضم حواجبه على بعض باستغراب : انا ماعرفش لا حاجه عن الواقعه دى ولا إللى انت بتتكلم عليه ولا ليا اى صله بالموضوع
الظابط : افتح المحضر . واكتب .. فى يوم الثلاثاء الموافق 3/١ الساعه وبيبص فى ساعته التاسعه مساءا تم ضبط واحضار حازم سامى عبدالله أحد المهندسين المسئولين عن مشروع ال____
بعد ان تم البلاغ بواقعه سرقة معدات وحديد وخامات تقدر ثمنها بمليون ونص المليون جنيه مصرى من المدعو حمدى زاهر وذلك بعد ان تم القبض على المشتبه بهم واعترفو بارتكابهم الجريمه بعد ان تقاضو مبلغ مالى من المهندس المسؤل والذى سايتم استجوابه ألأن أمام معاون مباحث دائرة قسم ____ وهو وبيشاور على نفسه النقيب سيف خالد المنياوى وبأمر ضبط وإحضار من النيابه العامه
س .. ماهو قولك فى المنسوب إليك باتهماك بسرقه كل ما هو المذكور أعلاه وهو ____ ___
وبيبص له بعد ما خلص كلام
ج : حازم ماعرفش اى حاجه عن المسروقات ولا الناس إلا ادعت انى اتفقت معاهم
س : لماذا تم اتهامك من قبل المتهمين
ج : حازم مش عارف ممكن عشان انا لسا جديد فا خدونى كبش فدا لهم
س : كنت فين الساعه الساعه 1 بعد منتصف الليل وليه سايب مكانك هناك ونزلت القاهره بدون علم حد
ج : كنت مع محى زميلى حصلت مشاده بينى وبين نور بنت المقاول فى مكان استراحتنا وسيبت المكان وقص كل ما حدث بس ما جبش سيرة ورد خالص وقال ان هو و نور حصلت بينهم مشاده وهو ما بيرتاحش لها وفضل يسيب المكان ويرجع يقعد فى شغله وسط العمال ..
س : ليه مبلغتوش اى جهه مختصه باإلا لحصل
ج : الوقت كان متأخر جدا والسفر طويل وهو أصر انى افضل جمبه عشان كدا سافرت والمفروض تكون هى بلغت باإلاحصل عدم تواجدنا انا والمهندس محى فى موقع الشغل ..
وفضل التحقيق شغال اكتر من ساعتين متواصلين
اثناء التحقيق .. استنا يابنى ما تكتبش حاجه .. وبيبص لحازم تحب تشرب ايه يا بشمهندس
حازم : اذا سمحت فنجان قهوه مظبوط
سيف داس على زرار قدامه دخل العسكرى وبيبص للكاتب الا جمبه وانت يا على
على : زيكم يا باشا
سيف : 3 قهوه مظبوط يابنى
العسكرى : تمام يا فندم وخرج وقفل الباب وراه
سيف : اسمحلى ادردش معاك بشكل ودى خارج التحقيق عشان القضيه مش سهله يا بشمهندس خصوصا ان فى اجماع على كلام الولاد اللى نفذت .. ومقدمين مقطع متصور ليك وانت بتدي واحد فيهم فلوس وواقف تتكلم معااااه
حازم بصدمه : انا .. محصلش
سيف : لا افتكر انا عايز اخدمك عشان من تعاملى مع الناس والمجرمين فا بعرف افرق بين المجرم والحرامى والناس الا فعلا ممكن تكون كبش فدا ليهم .. شاكك فى حد مثلا .. ممكن يكون المهندس الا كنت معاه وبنت المقاول عملو التمثليه دى عشان لو حصل اى شئ يبقى هما فى الامان واتفقو مع العيال دى يقولو كدا او تكون مشترك معاهم بسبب ديقه ماليه ليك
حازم بنفى : لا يمكن يكون دا حصل .. المهندس محى انسان محترم وما يعملش كدا .. ونور هى بنت المقاول ها تستفيد ايه المال مالها وما اعتقدتش انها تعمل كدا بردو وبغض النظر عن سوء التفاهم الا بينى وبينها .. الكل بيشكر فيها
سيف بيبص له : انت كدا بتثبتها على نفسك
حازم : انا واثق انى برئ وان ربنا ها يظهر برأتى من التهمه القذره دى وصدقنى مش قلقان ابدا
العسكرى دخل وقدم القهوه وخرج
سيف : اتفضل يا بشمهندس واتمنى فعلا تكون زى ما بتقول .. وبيشربو القهوه .. افتكر اى شئ حتى لو بسيط من امبارح الساعه 8 لحد وقتنا دا وقولى عليه او قبل كدا وخصوصا الولاد الا بتقول انهم مصورين الا حصل وانت بتتفق مع واحد فيهم ... وبص فى ورقه قدامه اسمه سامى
حازم : ها احاول .. اى حاجه ها افتكرها مش ها اتردد انى اقولها ... وبعد وقت كبيررر من التحقيق معاه ووقت كبير حازم نزلو الحجز .
******
سواق التاكسى : احنا بنلف بقالنا 3 ساعات يا حاجه .. ومش لاقين ابنك دا
نجيه بعياط : طيب دا اخر واحد ها نروحه .. ياله يابنى ووصلو القسم ودخلت وسئلت وعرفت انه موجود فى القسم وتم حجزه .. ودخلوها للنقيب سيف بعد محيالات .. وقعدت قدامه بتعيط جااامد
سيف قام وقعد قدامها ونادا على العسكرى يجيب لها لمون .. وجبالها
سيف : ممكن تهدى يا حاجه
نجيه بعياط وشنهفه : ابنى واخدينه وحبستوه ليه دا محترم وعمره ما عمل حاجه كدا والا كدا .. متربى وعارف الحلال والحرام
سيف : والله هو باين عليه .. موضوع بسيط نثبت برائته وها يخرج ان شاء الله ووعد مش ها اسيبه لو هو برئ فعلا
نجيه بتخبط على صدرها : قولى ابنى تهمته بايه
سيف بأسف باين على وشه : تهمته سرقه وشروع فى قتل 3 سواقين بالاتفاق
نجيه شهقت و برقت جاااامد ونفورة دموع نازله من عيونها وخبطت على رجليها جااامد وبتشاور بايديها لا .. لا ابنى ما يعملش كدا .. ابن الاصول ما يعملهاش والله صدقنى وبتوطى على ايد الظابط تبوووس ايده
سيف شد ايده : استغفر الله اترمت على رجله وسيف بيقومها
نجيه : عشان خاطرى اعتبرنى زى أمك واعملو اى حاجه دا أغلب من الغلب ومليش غيره . انا اتكفى على ابنى من بعد ابوه وابعده عن اللى اخلاقهم وحشه واعلمه الاخلاق والدين قبل التعليم نفسه وانت تقولى سرق وقتل .. لا مش ابنى الايعمل كدا مش هووو
سيف : اسمعينى واهدى يا أمى .. دلوقتى لازم تقوميله محامى شاطر واللى عليا واقدر اعمله والله ها أعمله
نجيه بترجى : طيب اشوفه .. اطمن قلبى وأكد لنفسى انه لايمكن يعملها
سيف : رغم انه ممنوع دلوقتى بس ها اطمنك عليه حاضررر وطلب احضاره من الحجز .. وفعلا جااابوه واول ما شاف امه حضنها جااامد فى وجود ظابط تااانى مع سيف
نجيه ماسكه وش حازم : قولى انك متعملهاش يابن بطنى وقلبى
حازم : والله يا أمى لا عملتها ولا عمرى اعملها اطمنى وامسحى دموعك
نجيه بعياط : مطمنه ادام قولتلى انك متعملهاش
حازم بزعل : عندك شك
نجيه بنفى وبتهز راسها : ابدا .. ابدا .. وبصت لسيف سمعت هو لا يمكن يعملها
حازم حضنها جاااامد اهدى وعشان خاطرى اطمنى وخلى بالك على نفسك هى مسئلة وقت وها اخرج ان شاء الله
نجيه حاااضر يا حبيبى حاضر .. ونزلو حازم الحجز تااانى ونجيه خرجت
الظابط : ايه الا بتعمله دا يا منياوى
سيف : ايه يا محمود
محمود : مش عارف .. قولتلك ابعد مشاعرك عن الشغل
سيف : مشاعرى بعيده عن الشغل والمهندس محبوس ايه بقى معترض على ايه
محمود : واحد سرق وكان ها يقتل . جايبلى امه وبتتسامر معاها ومتعاطف معاه وشويه شويه ها تنيمه فى مكتبك
سيف : هى ذنبها ايه انت عارف يعنى ايه أم بتتألم ومحروقه على ابنها وكمان لحد دلوقتى ما اتثبتش انه هو الا عمل كدا وشكله فعلا برئ
محمود : يا حبيبى يا رايق .. خدنى واحده واحده
سيف ضحك : اه انت عايزا تودى اى حد فى داهيه اهى قضيه والسلام
محمود : يابنى تلت تربعهم بيتمسكنو وبعد ما يطلعو عنينا تحريات وغيره يطلعو ولاد 60 فى 70
سيف : انت قولتها تلت تربعهم يعنى لو فى واحد بس مظلوم انا ماعنديش استعداد اشيل ذنبه وصلت يا وحش
محمود : وصلت خليك انت كدا كل قضيه تمسكها تقعد فيها سنه ها تفضل محلك سرررر .. لا ها تروح ولا تيجى .. المفروض تيك ترك وتخلص
سيف باعتراض : ابدا . انا اقسمت انى ما اجيش على حق مظلوم .. ولحد ما اعرف هو مظلوم والا ظالم مش ها اتخذ اى اجراء ضده يأزيه ولا يمكن اكسف وأهين والدته واذلها
محمود : معاك ربنا يا ابو قلب حنين بالاذن عندى ضبط واحضار وهما يومين وبيرفع صوبعين وتكون القضيه خلصت
سيف ابتسم : الله يكون فى عون الا بيقعو فى ايدك
محمود بيشاور على نفسه : وفى عونى انا كمان من الاشكال دى ومن منك وخرج ..
*******
نجيه خارجه قدام القسم تايهه وبتكلم نفسها ونازله على السلم مش باصه على حاجه وفجأه حصلت حاله هرج ومرج فى المكان واصوات الناس عليت
*********************
إلي هنا ينتهي الفصل السابع من رواية شرسة ولكن بقلم لولو طارق
تابع من هنا: جميع فصول رواية شرسة ولكن بقلم لولو طارق
تابع من هنا: جميع فصول رواية شرسة ولكن بقلم لولو طارق
تابع أيضاً: جميع فصول رواية آدم ولانا بقلم امونه
تابعوا صفحتنا على الفيس بوك للمزيد من روايات حب
إرسال تعليق
يسعدنا تلقي اقتراحاتك أو تعليقك هنا