قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة سحر فرج علي موقعنا قصص 26 وموعدنا اليوم مع الفصل السادس والعشرون من  رواية قصة عشق بقلم سحر فرج. 

رواية قصة عشق بقلم سحر فرج – الفصل السادس والعشرون

اقرأ أيضا: رواية فارس عشقي  بقلم سحر فرج

قصة عشق بقلم سحر فرج

رواية قصة عشق بقلم سحر فرج – الفصل السادس والعشرون

وفى ثوانى كانوا واخديين بعضهم بسرعه وجريوا من الاوضه ونزلوا على تحت .
والشباب نزلت وراهم جرى واستحلفوا ليهم هما الاتنين وقالوا .. ليليتكم سودا باذن الله .

وكل لما يحاولوا يجروا يقعوا ويتزحلقوا من المايه اللى كانت مغرقه الارض يقوموا ويقعوا يقوموا ويقعوا لحد ما مسكوا ايد بعضهم وخرجوا من الاوضه ونزلوا بسرعه يدوروا على البنات فى كل حته .
والبنات للاسف كل واحده فيهم استخبت فى حته شكل .
وشويه وسمعوا صوت هدى وهى بتصرخ ودخلت عليهم من باب الجنينه وهى بتعيط وبتقول ....... الحقوووووا الحقووووووا بسرعه.

عدى جرى عليها ومسكها وقال .. لا والله هاتستهبلى يا اختى وعامله نفسك بتعيطى بس على مين وحيات امى ما هاسيبكم النهارده .. انطقى بقيت العصابه بتاعتكم فين .
هدى بعياط وصريخ .. مش وقته يا عدى الحقوا ملك وقعت فى البسين بسرعه ومش بتعرف تعوم ارجوكم الحقوها قبل ما تغرق .

فهد بتقولى ايه ملك ... ومن غير اى رد من هدى كان جرى فهد بسرعه وحصله عدى وهدى وراحوا ناحيه البسين وشافوا ملك وهى عماله تطلع وتنزل وتطلع براسها فى المايه وبتشاور بايدها وفى ثانيه نط فهد فى قلب حمام السباحه وجرى عليها ومسكها ورفع راسها لفوق وعدى كمان نط وجرى عليهم وشدوها من ايديها وطلعوها على حرف البسين .

فى اللحظه دى كانت جت البنات ضحى وسلمى وفرح على صوت الصريخ وشافوا منظر ملك وهما شايلانها من حمام السباحه وبيطلعوها لفوق فاتصدموا لمنظرها وجريوا عليها وقالوا .. ملك ملك حصل ايه يا هدى ملك فوقى يا حبيبتى .

هدى بعياط كنا بنجرى زيكم علشان نستخبى من عدى وفهد وفضلنا نجرى انا وهى لحد ما جينا هنا وفجأه اختل توزانها واتفاجات بيها وهى بتقع فى المايه وفضلت اصرخ واصرخ وروحت ندهت عدى وفهد بسرعه وطلعوها .

ضحى جريت عليها بما انها دكتورة ونزلت على الارض جنبها وحاولت تفوقها .

سلمى بعياط هى وفرح بصوا لضحى و قالوا .. طمنينا يا ضحى ارجوك .. فوقى يا ملك 😥
انا هاروح اتصل على قصى يجى بسرعه .

ضحى .. استنوا يا بنات هى بدأت تفوق اهى الحمد لله وملوش لازمه نقلقهم على الفاضى .
بس حد فيكم يجبلى اى بشكير من فوق بسرعه .
فاجرى عدى على فوق وجاب بشكير ونزل تانى جرى واداه لضحى وغطوا بيه ملك علشان جسمها كان بيرجف جامد .. وبدات بشويش تفتح فى عيونها .
واول لما فتحت عنيها وبصت لهم الكل فرح اوى وحمدوا ربنا انها كويسه وبخير وبالذات فهد اللى الكل كان مستغربه من كتر الخوف اللى كان خايفه على ملك .
واول لما فتحت عنيها قرب منها وابتسم لها وقال ... ملك انتى كويسه طمنينى عليكى ولا تحبى اوديكى المستشفى .

ملك بتعب .. ابتسمت لما شافت خوف فهد عليها وقالت .. لا انا كويسه متقلقوش وحاولت ترفع نفسها وتقعد والبنات سندوها .
وفعلا قعدت وشويه صغيرين وقامت ووقفت وهدى وضحى سندوها لحد ما دخلت لجوا .
واول لما قعدوا وسندوا ملك لحد الكرسى .

عدى بهزار بصلهم وقال .. احمدوا ربنا على اللى حصل لملك .. علشان اقسم بالله ما هاعدلكم اللى انتم هببتوه فينا ده واحنا نايمين بس اصبروا عليا 🤨
اما طلعته على جدتتكم انتى وهى وهى وهى .
ملك بضحك رجعت لطبيعتها الاصليه اللى كلنا عارفينها عنها وبصتله بقرف وقالت .. اجرى اجرى يا اللى كنت شبه ام اربعه واربعين وشكلك يفطس من الضحك انت وهو ولا اقولك شبه السلعوه بتاعه الحاجه انعام اللى كانت بتخوفنا بيها واحنا صغيرين علشان ننام فاكرين ولا افكركم 😂😂
عدى قام وقف وحاول يمسكها من شعرها بهزار بس فهد زق ايده وقاله بس ياض انت وسيب ملك فى حالها وروح كده وانت فعلا شبه السلعوة 🤔
عدى ...🙄🙄🙄
الكل فضلوا يضحكوا عليهم وعلى هزارهم مع بعض فاعدى بصله 🤨 وقال .. بقى كده يا صاحبى انا زى السلعوة يا فهد دى اخرتها .
تقف فى صف الغجر دول على عدى حبيبك .. تشكر يا ابن عمى وبصله اووووى وقال.....
انا شاكك فيك ياض هى العيال دى رشتك بكام علشان تبقى فى صفهم كده وبتدافع على ست ملك بالمنظر ده ؟؟

فهد ... رشتنى هههههه تصدق ضحكتنى .
طب قوم قوم خلينا نطلع على فوق ناخد شاور علشان منظرنا العار ده وانتم يا بنات ابدؤا جهزوا لبسكم علشان حفله بالليل بتاعه الافتتاح .

عدى .. ماشى يا صاحبى هاعديهالك المرة دى .. بس المرة الجايه لاااا يمكن ابددددا يالا بينا علشان انا فعلا قرفان من منظرك ومنظرى اللى بالالوان ده 👻
وطلعوا على فوق وسابوا البنات قاعدين مع بعض شويه عقبال ما ملك تشد حيلها حبتين وتقدر تطلع على فوق .
وافتكروا اللى عملوه فى عدى وفهد وحمدوا ربنا ان قصى مش موجود كان طلع عينهم .
________________________________
وفى الفندق كان المكان كله عبارة عن خليه نحل كل واحد بينفذ المطلوب منه على اكمل وجه زى ما امر البشمهندس سليم بالضبط .

قصى وفارس كانوا قاعدين مع سليم فى مكتبه اللى كان يدوبك لسه مخلص كل حاجه ويادوبك ياخدهم ويرجعوا على الشاليه علشان مفيش وقت على المغرب وبعد ما يفطروا على طول يجهزوا نفسهم وياخدهم ويجبهم على الفندق .
لان الحفله هاتبدا الساعه تسعه بالضبط وهو المفروض يكون هناك قبلها بحوالى ساعه على الاقل علشان يكون فى استقبال الضيوف هو وحسام زميله .

وفعلا الشباب التلاته خدوا بعضهم ونزلوا من الفندق وسليم ركب عربيته ومعاه قصى وفارس وراحوا على المطعم الاول يجيبوا الفطار وبعدها يروحوا بيه على الشاليه .
وبعد حوالى نصف ساعه كانوا وصلوا الشاليه وشافوا الكل متجمع فى الجنينه .

هدى اول لنا شافتهم قامت وجريت على سليم اخوها وسلمت عليه وقصى سلم على الكل وبعيونه غمز لفرح 😉
وكذلك فارس اللى قرب من الكرسى اللى قاعده عليه سلمى ومد ايده ليها وسلم بكل رقه وقال .. عامله ايه يا سلمى .

سلمى بابتسامه رقيقه بصتله وقالت .. بخير الحمد لله .
وبعدها شدوا كراسى وقعدوا الشباب كلهم مع بعض بعد ما البنات دخلت تجهز السفره لزوم الفطار وبدأ عدى وفهد يحكوا ليهم على اللى حصل مع ملك ووقوعها فى البيسين .
وده اللى صدم سليم وقصى وكمان فارس وحمدوا ربنا انها خرجت بالسلامه .

قصى بغضب بص لعدى وقال .. انا مش عارف انتم الاتنين بالذات هاتعقلوا امتى .. كل واحد فيكم بيعمل كل نصيبه ونصيبه لحد ما فى يوم من الايام حد هايحصله حاجه بسببكم انتم الجوز .
احمدوا ربنا انها عدت على خير وخرجت من المايه بالسلامه .
عدى بصله وقال .. وانا مالى انا ما هما اللى جروا شكلنا واحنا نايمين فى امان الله ومعملناش ليهم حاجه.
يبقى كده مين اللى غلطان فينا يا عم قصى .
قول انت يا سليم بزمتك مين اللى غلط المرة دى .

سليم .. حصل خير يا عدى بس زى ما قصى بيقول حاولوا تخفوا الهزار الجامد ده ويكون فيه شويه عقل شويه ... افرض انتم مكنتوش لحقتوها كان حصل ايه لا قدر الله .
او وهى بتقع فى البسين دماغها اتخبطت واتفتحت او افرض ان هدى مكنتش معاها وشافتها وهى بتقع وندهت عليكم .
يالا حصل خير .. تعالوا قوموا يالا المغرب فاضل عليه دقيقتين اهو علشان نلحق نفطر ونجهز نفسنا لحفله الافتتاح ادعولى تعدى على خير .
وفعلا قاموا الشباب كلهم وراحوا على السفره واتجمعوا على تربيزة واحده فى لمه عائليه جميله كلها حب ودفء وصله رحم .
__________________________

وفى السرايه وبالتحديد فى المطبخ بعد ما الكل فطر وشرب الشاى كمان والرجاله راحت لصلاه التروايح .
دخلت الحاجه انعام للمطبخ وكان معاها فاتن مرات صلاح وسماح مرات عصام .

الحاجه انعام بصت ليهم وقالت .. اعملوا حسابكم كلها يومين ونبدا نجهز كعك العيد كل سنه وانتم طيبين وان شاء الله العيد السنه الجايه يكونوا العيال كلهم اتجوزا وفرحنا بيهم .
فابقى شوفى كدة يا فاتن انت و احلام سلفتك ايه اللى هانحتاجه لزوم الكعك ومتنسيش توصى على العجوة لزوم القراقيش انتى عارفه ان العيال كلهم بيحبوها .. وعاوزين السنه دى نزود الكميه شويه علشان نفرق على كل حبايبنا فهمانى يا فاتن ؟

فاتن بحب بصت لها وقالت .. فهماكى يا حاجه وكل سنه وانتى طيبه اطمنى انا من بكرة الصبح ان شاء الله هابعت البت هنيه تجيب كل حاجه من السوق .

الحاجه انعام .. واعملوا حسابكم العيال هايرجعوا من السفر بكره بعد الفطار .. جهزوا اوضهم ونضفوها كويس .
واعملى حسابك بكره الضهر كده هاروح انا وانتى نزور جده سليم ونطمن عليها فاجهزى زيارة كبيرة كده ناخدها معانا ماشى يا فاتن با بنتى .

فاتن ردت وقالت .. اللى تؤمرى بيه يا حاجه .
ربنا يديكى الصحه وطوله العمر ويخليكى لينا يااارب.
الحاجه انعام .. اسيبكم انا بقى واروح اصلى التراويح ولو عزتى اى حاجه انتى ولا هى اطلعيلى على اوضتى .
فاتن .. ماشى وربنا يتقبل منك يا حاجه باذن الله .
________________________

وفى الغردقه وبالتحديد فى الشاليه البنات كانت فى اوضهم ولبسوا فساتين جميله جدا جدا وكانوا طالعين زى القمر هما الخمسه .. كانوا احلى من بعض كلهم .

والشباب كذلك كانوا خلصوا لبسهم وكانوا حلوين اوى اوى هما كمان ومش اقل حلاوة منهم .. ولما خلصوا نزلوا على تحت فى انتظار البنات .
سليم طلب من السواقين اللى بره انهم يستعدوا فى اى لحظه لخروجهم .

عدى وفهد كانوا قاعدين وبيهزورا مع بعض زى عاويدهم .. وقصى واقف هو وفارس وعيونهم على السلم فى انتظار نزول فرح وسلمى وباقى البنات .
وسليم ماسك موبيله وبيتكلم مع حسام على اخر التجهيزات الأخيرة للحفله.
وفجاه حسوا بخطوات كعب عالى نازله على السلم والكل التفت لمصدر الصوت واول واحده ظهرت ونزلت كانت ملك وبعدها هدى ومنظرهم كان روعه .. واتفاجأ الكل بحلاوتهم وجمالهم ومتخيلوش انهم يكونوا بكل الحلاوة دى وبالذات الواد عدى والواد فهد اللى اول لما شافوهم بالمنظر ده قاموا ووقفوا و تنحوا من كتر جمالهم .

هدى ابتسمت وجريت على سليم ولفت نفسها بفستنها الجميل وقالت .. ايه رايك يا سليم فى الفستان الجميل ده .

سليم ابتسم ليها وقفل الخط مع حسام وقال .. ايه يا حبيبتى الحلاوة دى طالعه زى القمر .
وانتى كمان يا ملك جميله اوى .
عدى قرب من هدى وقال .. تصدقى معرفتكوش خالص يا غفر .... فضربته هدى فى كتفه وقال قصدى يا بنات بس ايه الحلاوة دى ... ومد ايده ناحيه هدى وقال .. ممكن اتعرف عليك يا قمر انت 😉
معاكى عدى السيوفى ☺
هدى ابتسمت ليه بخجل وبصت لاخوها .

سليم 🤨 وبعدييين معاك يا ابنى انت اعمل حسابى يا استاذ عدى .. انت ناسى انها اختى ولا ايه .
فاجرى عليه عدى بحركات طفوليه وقاله .. انا طالب القرب منك يا سليم فى اختك هدى قولت ايه .
ولسه سليم هايرد الا وكانت ضحى نازله من فوق بس كانت ايه صارووووخ 😂 قصدى زى القمر بفستان طويل لونه نبيتى وده اللى اتفاجأ بيه سليم وهخلاه ما يقدرش يرد على عدى واستكفى انه يفضل باصص ليها هى وبس .
عدى بصله وقال ... انت يا عم .. انت يا سيدى .. بقولك عاوز اخطب اختك .
هو متنح كده ليه يا جدعان .

سليم انتبه لصوت عدى وقال .. عاوز ايه يا عدى ؟
عدى ... لا اله الا الله حصلك ايه يا ابنى انت كل ده علشان ضحى طالعه زى القمر وموووزة وحلوة بالشكل ده .

سليم مد ايده ورزعه حته قفى وقاله .. لم نفسك شويه ولم لسانك بدل ما اقطعهولك يا بلوة .
قصى بضحك .. والله تستاهل وحلال فيك .
الكل فضل يضحك وعدى بيدعك فى قفاه اللى مهرى منهم كلهم كل شويه ضرب وقال .. يا دى النيله .. هو قفايا مغرى للدرجه دى كل اللى رايح واللى جاى يلطش فيه حرام عليكم حرااااام هاتروحوا من ربنا فين يا بشر .
وقبل ما يكمل كلامه تنح للى نازلين على السلم وقال .. ياااا حلاااااوة 😲😲😲
وعيونه على سلمى وفرح اللى كانوا نازلين من فوق وكانوا حلويييييين اوى اوى.
فرح بفستان اسود رقيق جدا .
وسلمى بفستان بينك روعه .
قصى من كتر حلاوتها تنح هو كمان ومكنش متخيل انها هاتطلع بالجمال والمنظر ده .
وفارس كذلك مكنش متخيل سلمى وحلاوتها الزياده دى .

فهد بضحك بصلهم كلهم وقال .. فى ايه يا جدعان اخلصوا هانتاخر على الحفله يا سليم بيه انت نسيت ولا ايه وسيبوا نظرات الاعجاب والحب دى لبعدين .
خدوا بعضهم كلهم وخرجوا من الشاليه واقسموا نفسهم على تلت عربيات وبعد حوالى نصف ساعه وقفت العربيات اودام باب الفندق .
وسليم دخلهم كلهم وقعدهم فى التربيزه اللى اتحجزت ليهم مخصوص .
واستأذن منهم وراح يقف عند الباب لاستقبال الضيوف .

عيونه كانت بدور على حسام فى كل مكان لحد ما لمحه على بعد واقف مع بعض المهندسين فاشاورله و اول لما جاله خده علشان يعرفه عليهم كلهم عند التربيزة بتاعتهم .

سليم بابتسامه.. يا جماعه احب اعرفكم على البشمهندس حسام صديقى من سنين وهو اللى كان بيشرف على إنشاء الفندق ده بنفسه.

الكل رحب بيه ومد ايده وسلم عليهم كلهم وسليم عرفه بيهم واحد واحد بالاسم وجه لحد ملك ومد ايده ليها وعيونه مانزلتش من عليها و على جمالها ورقتها .

ملك اتكسفت اوى وسحبت ايديها بسرعه من ايده وسليم خد باله .

سليم .. عن اذنكم هاروح انا وحسام عند الباب الرئيسى علشان نبقى فى استقبال الضيوف وزق حسام فى كتفه علشان يفوق لكلامه لانه كان لسه سرحان فى رقه وحلاوة ملك .
فهد كان قاعد عيونه بتطلع شرار وحس بغيرة لمجرد نظرات حسام لملك .

حسام انتبه لكلام سليم وببتسامه بصلهم وقال ... عندك حق عن اذنكم يا جماعه لازم اروح انا وسليم دلوقتى .

سليم ما صدق انه يمشى هو حسام من عند التربيزة وبدا يبهدله على اللى هو عمله ده .

سليم بغضب بصله قال .. انت ايه اللى هببته ده يا زفت .. انت بتستهبل وكسفتها معاك .

حسام .. عملت ايه يعنى دى مجرد نظرة بس طويله شويه .. املى عينى من جمالها ورقتها وبرائتها .. ولا عيونها يا لهوى على حلاوتهم .

سليم اشتد غضبه ووقف اودامه وقال .. لااا انت اكيد مجنون . اللى بتتكلم عليها دى يا حيوان تبقى بنت خالى و ما اسمحلكش انك تتكلم عليها كده اودامى او من ورايا حتى انت فاهم ولا لااااا ولا تحب اطلع عليك الصعيدى اللى جوايا واخلص منك .
انا عامل حساب السنين الطويله اللى بينا .

حسام ... لااا يا سليم اوعى ورحمة ابوك ادينى سكت اهو .. حقك عليا .. ويالا بينا نروح نقف لان الناس بدات تيجى اهى .

سليم بغضب .. اودامى يا زفت .

لكن عند تربيزة الشباب .. هدى قربت براسها من ملك وبصوت واطى وقالت .. اشطى عليكى يا ست ملك اللى اسمه حسام ده تنح عليكى كده ليه من اول نظرة .. حتى فهد حسيت من نظرته ليه انه عاوز يقوم ويطبق فى زومارة رقبته وكان غيران عليكى الظاهر .

ملك بفرحه .. بتتكلمى بجد يا هدى .. فهد كان غيران عليا .. يعنى هو بيحبنى زى انا ما بموووت فيه .

هدى .. الظاهر كده يا بت يا ملك .

عدى كان واخد باله من كلامهم اللى بهدوء ده فابصلهم وقال .. بتنموا على مين انتى وهى ارحموا نفسكم شويه .

هدى .. وانت مالك ما تخليك فى حالك يا ابنى انت .

فهد بغيظ واضح عليه وجه كلامه لعدى وقال ... قوم يا عدى نتمشى شويه ونشوف الناس اللى هنا لانى هاطق .

هدى بصت لملك وابتسمت ليها علشان تاكد لها الكلام اللى قالته ليها 😉وقالت .. خدونا معاكم يا فهد انت وهو واحنا كمان عاوزين نتمشى ونشوف الفندق وبالذات من بره عند البحر المنظر شكله روعه .

عدى بابتسامه بص ليهم وقال .. وماله مفيش مشكله قوموا وتعالوا معانا يالا .. حد فيكم يا بنات عاوز يجى معانا .

فرح بصت لسلمى وضحى وقالت .. ايه رايكم تيجى نروح معاهم ؟

سلمى .. لا روحوا انتى يا فرح لو حابه اصل الجذمه عاليه اوى وديقه ومش قادرة احرك رجلى .
فرح وانتى يا ضحى قومى يالا وتعالى نتمشى معاهم .
ضحى .. ماشى مفيش مشكله .
قصى ... استنوا انا جاى معاكم علشان البلاوى دى مش بتروح فى اى حته غير لما تعمل نصيبه .

عدى .. والله انتم ظالمنا دايما انا وفهد ده احنا زى النسمه وبص لهدى وملك وقال .. قومى يا اختى انتى وهى جبتولى الكلام من البووووس الكبييير .

وقام الكل فعلا وسابوا فارس هو وسلمى لوحدهم على التربيزة .

وخرجوا من الباب الرئيسى وبلغوا سليم انهم هايتمشوا شويه فى جنينه الفندق علشان يتفرجوا على المكان وبالذات منظر البحر.

عيون حسام منزلتش برضه من على ملك وده اللى غاظ فهد جدا ولسه هايتهور ويقرب من حسام الا وايد قصى كانت اسرع منه وبصوت هادى قاله .. اعقل يا فهد .. علشان خاطر سليم .. وانا بعدين هاعرف شغلى معاه الظاهر هو مش عارف احنا عيله مين بالضبط .. يالا اودامى انت وهما علشان ما يحصلش مشكله لابن عمتك فى يوم زى ده .

سليم خد باله منهم وحاول يكون هادى علشان الناس اللى جاياله .. فابتسم لضحى وطلب منها انها تفضل واقفه معاه ..فارحبت ضحى بطلبه وفضلت واقفه جنبه .

والشباب خدوا بعضهم فعلا و خرجوا من الباب وراحوا يتمشوا فى الجنينه الجميله بتاعه الفندق .
فهد كان الدم بيغلى فى عروقه وبصوت عالى بص لقصى وقال .. كنتى سيبنى على اللى اسمه حسام ده وانا كنت هاعرفه شغله كويس اوى .. ده مشلش عينه من على الهانم دى خالص.

قصى حب يستفذه اكتر علشان يطلع الاحساس اللى جواه وقال .. هو فعلا زودها حبتين بس انت ايه اللى مزعلك اوى كده يا فهد .. اوعى تكون ب.........

وقبل ما قصى يكمل كلامه نطق فهد من غير تفكير وقال .. ااااه بحبها يا قصى وبغير عليها .
ولف وشه ووقف اودام ملك وقال .. اه بحبك يا ملك بحبك .. تقبلى تتجوزينى .

*********************

إلي هنا ينتهي الفصل السادس والعشرون من رواية قصة عشق بقلم سحر فرج
تابع من هنا: جميع فصول رواية قصة عشق بقلم سحر فرج

تابع من هنا: جميع فصول رواية فارس عشقي ج2 بقلم سحر فرج

تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها

اقرأ أيضا: قصة عشق بلا رحمة بقلم دينا ابراهيم
يمكنك تحميل تطبيق قصص وروايات عربية من متجر جوجل بلاي للإستمتاع بكل قصصنا