قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والروايات الرومانسية مع رواية رومانسية جديدة للمبدعة قسمة الشبينى والتي سبق أن قدمنا لها العديد من القصص والروايات الجميلةعلي موقعنا قصص 26 وموعدنا اليوم مع الفصل الأول من رواية فرصة للحياة الجزء الثانى بقلم قسمة الشبينى

رواية فرصة للحياة الجزء الثانى بقلم قسمة الشبينى - الفصل الأول

اقرأ أيضا: روايات إجتماعية

رواية فرصة للحياه ج2 - قسمة الشبيني

رواية فرصة للحياة الجزء الثانى بقلم قسمة الشبينى - الفصل الأول

حين يحيا الإنسان سعيدا تمر الأعوام كلمح البصر وهذا ما حدث لدرة ويحيى فقد حرص طيلة الاعوام الماضية على سعادتها وحرصت هى على سعادته
انتقلا للعاصمة بعد حصول چنا على الشهادة الثانوية بتفوق ودخولها كلية الطب منذ اعوام فهى بالفرقة السادسة وتتقدم دفعتها كل عام بتقدير ممتاز مما جعلها محط إعجاب اساتذتها فهى إنسانة عملية جدا واهم أولوياتها التفوق
لمى الساحرة الصغيرة بالفرقة الأولى بكلية الفنون الجميلة
يحيى حمدى تخرج العام الماضي من كلية الهندسة
*********
فى صباح أحد الأيام
درة: يحيى قوم يا يحيى الساعة بقت تسعة مش رايح المستشفى ولا اية
يحيى بتكاسل: خلينى انام كمان شويه يا قلبى مفيش عمليات النهاردة
اقتربت لتجلس جواره بالفراش وتقول: يعنى مفيش عمليات مش هتروح قوم يا يحيى بطل كسل
يحيي وهو يعتدل جالسا: انا عارف مفيش فايدة مش هتسبينى الا لما اقوم
درة: وأما انت عارف كدة قوم وبطل دلع
همت لتنهض لكنها جذبها لتجلس مرة أخرى وقال: انتى رايحة فين مش هتصبحى عليا
أمسكت وجهه بكفيها وقبلت جبينه وقالت: صباح الفل والياسمين والورد...قوم بقى
يحيى: يا سلام واعمل ايه بالجنينة الى لمتيها عليا دى
زفرت درة بقلة حيلة وهي تقول: وبعدين معاك يا يحيى مش هتكبر بقى
هز رأسه بإبتسامة مستفزة وهو يقول: لا مش هكبر هتستحملينى ولا اروح اشوف واحدة تستحملنى
هبت واقفة وهى تنظر له بتحدى: لو تقدر تشوف غيرى شوف
وغادرت الغرفة بينما مسح وجهه بكفه وهو ينظر فى أثرها ويقول: اشوف مين هو بعدك فى ستات فى الدنيا
**********
هبط يحيى بعد قليل ليجد الجميع يجتمع على مائدة الإفطار ماعدا چنا
يحيى: هى چنا مشيت من غير فطار بردو
درة: النهاردة اول يوم فى الترم التانى ونزلت جرى قالت هتفطر فى الكلية
نظر للمى وقال وحبيبة قلبى أوصلها ولا هتقول لا زى چنا
لمى: لا مين يا سى بابا امال اروح الجامعه لوحدى هتوصلنى طبعا
يحيى: لو تحبى يا لمى اجيب لك عربية زى چنا
لمى: لا يا سيدى انا بحب اتمنظر بيك قدام صحباتى
ضحك يحيى بينما نظرت لها درة بغضب وهو تقول متعمدة لاستفزاز امها : دا انا كل يومين تيجى واحدة تخطبك منى
شهقت درة وقالت: لمى وبعدين
لمى وكأنها لا تلتفت للحديث: صدقينى يا ماما صحباتى مش مصدقين أنه بابا
ابتسم يحيى وهو يقول: لا لو كدة اجى بقى اتعرف عليهم المهم يكونوا حلوين
غمزت له لمى بعينها وقالت: عيب عليك يا سى بابا انا هورطك بردوا
درة: طب خلصى فطارك يا ام لسانين انتِ علشان تلحقى محاضراتك
اخفضت لمى رأسها واقترب يحيى برأسه وقال لها : خلاص شكلنا هنضرب انا وانتِ
لمى بهمس: لسه بتغير عليك يا بابا شوف بتبص لى ازاى
ضحكا سويا حين قالت درة بحزم: مش كفاية ودودة ولا ايه
تنحنح يحيى وقال: يلا يا قلبى علشان اوصلك
ضحكت لمى وقالت : أيوة لو سبتنى هنا هتيجى مش هتلاقينى
وتعلقت بذراع يحيى الذى اقترب يقبل جبين درة ويقول: مش عاوزة حاجة قبل ما أمشى
هزت رأسها نفيا ولم ترد
تحرك يحيى ولمى التى قالت: ماما زعلانة بجد
يحيى: ماتخافيش لما اجى هأصالحها
***********
بكلية الطب جامعة القاهرة
كانت چنا بصحبة صديقتيها هاجر ومها
مها: يعنى يا ربى اول محاضرة كدة Sterilization
چنا: وماله Sterilizationيا مها
مها : مادة معقدة
هاجر : والله انتِ الى دماغك مش معاكى دا حتى الدكتور محمد الصفتى شرحه سهل جدا
ابتسمت مها وقالت: لا ياختى الدكتور الصفتى مش هيدينا الترم ده
چنا: ازاى امال مين هيدينا انا بفهم منه اوى
مها : انتِ كمان يا چنا يا حبيبتي انتِ بتفهمى من غير دكاترة خالص
هاجر: الله اكبر بطلى قر جبتينا ورا
مها: اتلهى قر ايه المهم ركزو معايا بيقولوا الدكتور الجديد جاى من برة وصغير اصغر دكتور فى الكلية
چنا : واحنا مالنا صغير ولا كبير احنا لينا الشرح وبس
مها: يالهوى على الغباء انجرى قدامى منك ليها
دخلت الفتيات إلى المدرج لتلقى المحاضرة الأولى وبعد فترة دخل الدكتور
مازن: السلام عليكم،ازيكم يا شباب انا الدكتور مازن العنانى هكون معاكم الترم ده فى مادة Sterilization بدل الدكتور الصفتى لأنه اعتذر لظروف صحية
مها بهمس: يالهوى ده قمر
وكزتها چنا وقالت: اتلمى يا تقومى من هنا
بدأ مازن فى شرح المحاضرة بإسلوب سلس أحبته چنا كثيرا وبدأت تناقشه فى عدة أمور كغيرها من الطلاب وهو يجيب الجميع بصدر رحب حتى انتهت المحاضرة
مازن: بكدة خلصنا يا شباب و اشوفكم بكرة فى العملى
خرجت الفتيات فقالت مها: چنا شوفتى الدكتور كان بيبص لك ازاى
چنا لا إجابة
هاجر: مالك يا چنا مسهمة كدة ليه
چنا بشرود : مش عارفة حاسة انى شوفته قبل كدة
مها: يابنتى بيقولوا لسه جاى من برة هتشوفيه فين
چنا : ده مجرد احساس يلا نفطر قبل المحاضره التانية
**********
مساءا فى القصر
جلسوا جميعا يتناولون العشاء بهدوء
فريال: ها يا بنات عملتم ايه فى الجامعة النهاردة
چنا: انا تمام الحمدلله بس زعلت ان دكتور الصفتى اعتذر الترم ده
يحيى: ومين هيديكم Sterilization
چنا: دكتور جديد اسمه مازن العنانى بس شرحه سهل لسه لما نشوف
درة: صبرنى يا رب هو انتِ الى هتقيمى الدكتور كمان
چنا بثقة: طبعا من حقى اقيمه لازم أتأكد أنه هيقدم لى محتوى علمى بشكل جيد
يحيى: مازن العنانى اسمه مش غريب عليا
ابتسمت فريال وقالت: وانتِ يا لمى
نظرت لمى بخبث وقالت: انا هقلب سى بابا طالبين مننا ادوات كتير وغالية اوى
درة: انا مش فاهمه مادخلتيش هندسة ليه لما هنا عمارة وهنا عمارة
لمى: يا ماما يا حبيبتي فنون جميله فى العمارة اعلى من الهندسة
درة : خلاص انتو حرين
يحيى وهو ينظر للمى : سيبيها يا درة تدخل الكلية اللى تريحها
درة بغضب: خليك دلع فيها لما نشوف اخرتها ايه
فريال: لما هو مايدلعهاش مين يدلعها يا درة
درة: بس مش بالشكل ده يا ماما
ونظرت للمى وقالت : انتِ دخلتى الكلية اللى انتِ عاوزاها وصممتى عليها وانا هأحاسبك على التقدير
لمى بإبتسامة: وانا موافقة ديل يا ماما لو ماجبتش امتياز ليكى حق
ابتسم يحيى وهو يقول: خلاص بقى كفاية كلام فى الدراسة
ونظر لامه وقال: طمنينى يا ماما فى حاجة تعباكى
فريال: لا يا ابنى انا كويسة الحمدلله وچنا واخدة بالها اوى من علاجى
درة : ياماما انا زعلانه علشان مش بتنزلى تفطرى معانا
فريال: انا هنزل هنا فى اوضة تحت السلم بقى يتعبنى
********
دخلت لمى غرفتها بعد انتهاء الطعام لتتصل ب يحيى حمدى فهو حب طفولتها كبر حبه معها عاما بعد عام رغم مشاكسته لها دائما إلا أنه يحبها ايضا ويراها فتاة أحلامه وظل لأعوام يخفى حبه لها خلف مشاكسته إلا أنه بالاخير لم يتمكن من المقاومة واعترف بحقيقة مشاعره لها
دق هاتف يحيى فأسرع يجيب: لمى وحشتينى اووووى
لمى: انت كمان وحشتينى يا يحيى مش هتيجى تزورنا بقى
يحيى:* خايف عنيا تفضحنى خايف من خالى اوى يا لمى لو عرف انى بكلمك من وراه
لمى: ماتخافش بابا عمره ما يقف فى طريق سعادتى ابدا
يحيى:* طمنينى اخبار الجامعة ايه اوعى اعرف انك بتكلمى حد من زمايلك انا بقولك من دلوقتى
لمى بعندها المعهود: يا سلام انت هتتحكم فيا اكلم مين ومااكلمش مين
يحيى:* أيوة واسمعى الكلام احسن لك لحد ما يفوت الترم ده واجى اطلبك
لمى : مش هسمع الكلام وهكلم إلى انا عاوزاه
يحيى:* لمى ماتجنينيش
لمى : لا اتجنن براحتك
يحيى:* بقى كدة طب اقفلى بقى احسن هقفل الخط واجى افتح دماغك
واغلق الهاتف بغضب بينما كانت لمى تبتسم بظفر فهى دائما ما تنجح فى إثارة غيرته تتمتع بحبه ولهفته عليها ولم لا وهى لم تعرف الحب إلا معه الحب بالنسبة لها يتمثل ب يحيى فقط لا ترى غيره من الشباب ولا تلتفت لهم حتى
اغلقت الهاتف وهى واثقة أنه سيحاول بعد قليل استرضاءها وكم تعشق حنانه حين يسترضيها تفتعل احيانا المشادة من أجل هذا فقط
وبالفعل بعد ساعة واحدة عاود الاتصال بها
لمى وهى تتصنع الحزن: عاوز ايه تانى فى أوامر تانية نسيت تقولها
يحيى *بحنان: حبيبتي انتِ زعلانة منى
لمى: اه زعلانة وهفضل زعلانة
يحيى*: أنا أسف حقك عليا والله بغير عليكى اعمل ايه بس
لمى بخبث: بطل تزعلنى مش كل يوم خناق
يحيى:* حاضر خلاص بقى حقك عليا بقولك ايه
لمى : ها
يحيى*: مفيش مواد صعبة اجى اشرحهالك
ضحكت وقالت: ده كل المواد زفت ومخى بلاطة بس تيجى تشرح لى
ظلا يتحدثان لوقت طويل لا يشعرا بالعالم حولهما حتى غفت لمى دون اغلاق الخط وحين همس يحيى* بإسمها ولم ترد وتأكد من غفوتها اغلق عينيه بسعادة
يال هذة الساحرة التى احتلت قلبه ستصل به إلى الجنون يوما ما لكن لا بأس بذلك فيا مرحبا بالجنون مع من نحب

*********************

إلي هنا ينتهي الفصل الأول من رواية فرصة للحياة ج2 بقلم قسمة الشبينى
تابع من هنا: جميع فصول رواية فرصة للحياة ج2 بقلم قسمة الشبينى
تابع من هنا: جميع فصول رواية أرض الشهوات بقلم سمر محمد

تابع أيضاً: جميع فصول رواية قسمتى بقلم أسماء سليمان

تابعوا صفحتنا على الفيس بوك للمزيد من روايات حب
حمل تطبيق قصص وروايات عربية من جوجل بلاي

اقرأ أيضا: جميع فصول رواية رحم للإيجار بقلم ريحانة الجنة