مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26 وموعدنا اليوم مع الفصل الحادى عشر من رواية الفريسة والصياد بقلم منال سالم
رواية الفريسة والصياد بقلم منال سالم - الفصل الحادى عشر
تابع أيضا: قصص رومانسية |
| رواية الفريسة والصياد - منال سالم |
رواية الفريسة والصياد بقلم منال سالم - الفصل الحادى عشر
-فريدة: انتي هنا يا حرامية يا نصابة
-يارا: اييييه
-عماد: في ايه يا فريدة هانم ؟؟ البت دي عملتلك حاجة ؟؟
-فريدة: أيوه ، البت دي سرقتني !!
-يارا: بتقولي ايه ؟؟؟
-عماد: ازاي ده حصل يا هانم ؟؟؟
-فريدة: كانت واقفة جمبي وبعد كده مشت وشوية وبفتح شنطتي ملاقتش الفلوس ولا الموبايل اللي كانوا فيها ، وجيت عشان ابلغكوا باللي حصل
-يارا: محصلش يا خالتي ، انا كنت مع ...
-فريدة بصوت مرتفع : اتصرف يا عماد بيه ، أنا مش هاسكت عن اللي حصل ده
-يارا لفريدة : والله ما حصل ، اسمعيني بس
-عماد مقاطعا: انتي تخرسي خااااااااااالص ، مسمعش نفسك
-يارا: لأ مش هاسكت لأني بقول الحقيقة
-فريدة:أنا معرفش النادي ازاي يسمح للأشكال دي تدخل جواه
-عماد : خلاص يا فريدة هانم ، أنا هتصرف وهاجيب لحضرتك الحاجة بتاعتك بطريقتي
-فريدة: يا ريت يا عماد بيه وإلا لو رأفت باشا عرف مش هيحصل طيب
-عماد : اطمني يا هانم ومتقلقيش
-يارا: والله العظيم الست دي بتتبلى عليا
-عماد : روح انت يا محمد ع شغلك الوقتي ، وأنا هطلب القسم ونعمل محضر باللي حصل
-يارا: لألألأ
-النادل محمد: حاضر يا باشا
-عماد: اتلأحي هنا يا بنت الـ .....
.............
في نفس الوقت عند مدرب التنس ،،،
-الكابتن: يا عمر مين قالك الكلام ده ، احنا ميعادنا ثابت زي ماهو ، وبعدين لو عاوز أبلغك بحاجة هتصل بيك بنفسي مش هبعتلك حد
-عمر: يعني محصلش
-الكابتن: لأ
-عمر: الله اومال تامر قالي كده ليه !!!!
أسرع عمر إلى الكافيتريا ولكنه لم يجد يارا هناك و...
-عمر : الله اومال يارا راحت فين !! تكونش دخلت الحمام ولا حاجة ، بس هي قالت هتستناني ، يوووه ، طب أنا هسأل حد من الكافيتريا
-عمر : لو سمحت
-النادل: ايوه يا فندم
-عمر: كان في آنسة أعدة هنا من شوية ، متعرفش هي فين ؟؟؟؟
-النادل: مخدتش بالي بصراحة
-عمر: طب شكرااااا
خرج عمر وهو يتسائل عن مكان يارا و..
-عمر لنفسه: طب هتكون راحت فين بس؟؟؟ يمكن قامت تتمشى شوية ، طب أنا هدور عليها فين بالظبط
ثم لمح عمر والدته بصحبة أصدقائها وهن يجلس في حديقة النادي ويضحكن و..
-عمر : أروح أسأل ماما عنها يمكن تكون شافتها
.....
-عمر لوالدته : ماما ، ممكن سؤال
-فريدة: تعالى يا حبيبي اقعد معانا شوية
-ناهد : عمورة انت هنا ؟
-عمر: أيوه
-فريدة: كلنا هنا يا ناهوودة من شوية
-ناهد: طب كويس والله
-فريدة مضيفة : ده حتى رأفت هيخلص مع أصحابه الجيم ، وهيحصلنا
-ناهد: ماهو جاسر في الجيم برضوه ، أكيد هيقابلوا بعض هناك
-فريدة: يبقى ننتظر انهما يرجعوا سوا
-نادية: الأعدة دي ناقصها بقية الشلة
-فريدة: أنا كلمت صافي وشريفة وهما جايين
-نادية : طب وايمان
-فريدة: مش هتقدر تيجي لأنها مسافرة
-نادية: تيجي بالسلامة
-عمر: يا ماما من فضلك عاوزك في كلمة
-فريدة: ايه في ايه ؟
-عمر: تعالي بس لحظة هنا
-فريدة: ما تقول اللي انت عاوزه قصاد الكل
-عمر: ماشوفتيش يارا ؟
-فريدة: اوووف ، ليه السيرة الزفت دي
-عمر: أنا بسأل بس سؤال شوفتيها ولا لأ
-فريدة بقرف: لأ
-نادية: مين يارا دي ؟ واحدة صاحبتك
-عمر: لأ دي بنت آآآ...
-فريدة مقاطعة : روح يا عمر هاتلنا حاجة ساقعة بسرعة
-عمر: طيب لما أدور الأول على آآآآ..
-فريدة مكملة: الله ، هاتلنا الحاجة الساقعة الأول وبعد كده شوف انت عاوز ايه !! اسمع الكلام !
-عمر بضيق: طيب !!!!!
..................
في داخل صالة الألعاب ،،،
-رأفت: ماشاء الله يا جاسر ، جسمك رياضي
-جاسر: وحضرتك برضوه يا عمي
-رأفت: بس مش زيك برضوه
-جاسر: متقولش كده يا عمي
-رأفت: مش يالا بينا عشان نشوف الجماعة
-جاسر: اوك ، هتتغدوا هنا ولا هتمشوا
-رأفت: لأ احنا أعدين هنا طول اليوم ، وخالد لما هيخلص هيحصلنا
-جاسر: عظييييم اوي
انصرف جاسر ورأفت من صالة الألعاب الرياضية وتوجها إلى حديقة النادي ، وفي طريقهما للحديقة رأى جاسر زميله مصطفى بسيارة الشرطة داخل النادي ، فإستأذن رأفت في الذهاب لتحيته
-جاسر لنفسه : الله ، مش ده مصطفى ، اه هو فعلااااا ، بس بيعمل ايه هنا !!!
-جاسر لرأفت: معلش يا عمي هستأذنك بس هاروح أسلم على صاحبي وهحصلك
-رأفت: وماله يا بني ، أما تخلص حصلنا
-جاسر: شكرااا يا عمي
-جاسر بصوت مرتفع: مصطفى ، مصطفـــــى
-مصطفى: الله ، جاسر باشا
-جاسر: مصطفى بيه ، منور والله النادي
-مصطفى : الله يخليك يا رب
-جاسر: اييه فينك ؟؟ مش باين بقالك فترة
-مصطفى : أنا موجود أهوو
-جاسر: انت لسه شغال في قسم ((...))
-مصطفى: لا خلاص اتنقلت قسم ((...))
-جاسر: أريح بكتير طبعااااا
-مصطفى: فرق الناس والتعامل وكل حاجة
-جاسر: أكيييييد ، المكان بيفرق ، المهم ايه اللي جابك عندنا النهاردة
-مصطفى : مافيش ، الظاهر ان في بت كده سرقة حد في النادي فجاي أشوفها من المقاطيع اللي نعرفهم ولا وجه جديد
-جاسر: أها ... يالا ربنا يعين
-مصطفى: تسلم يا جاسر بيه
-جاسر: طيب ابقى هاتلي رقم تليفونك عشان لو احتاجناك في حاجة
-مصطفى وهو يعطيه الهاتف: انت تؤمر يا باشا
-جاسر: تمام ، هاسيبك أنا بقى تكمل شغلك ، وأروح أشوف الجماعة
-مصطفى: اوك يا جاسر بيه
-جاسر: وخلينا نشوفك دايماً
-مصطفى: اكيييييد
............
في كافيتريا النادي ،،،
ذهب عمر مرة أخرى إلى الكافيتريا ليستعلم عن يارا المختفية ، وحينما وصل إلى هناك كان النادل محمد يتحدث عن فتاة ما مع نادل أخر ، فاستمع عمر لحوارهما و...
-النادل محمد: بس وعماد باشا قال هيظبطها
-نادل أخر: يعني طلعت حرامية كمان
-النادل محمد: الظاهر كده
-نادل أخر: طيب دخلوها النادي ازاي
-النادل محمد: معرفش ، وده اللي عماد بيه مستغربه ، بس الأكيد انها هتتنفخ
-نادل أخر: تستاهل ، اشكال زبالة
-عمر بدهشة: انتو بتكلموا عن مين ؟؟
-النادل محمد: أهلاً عمر بيه
-عمر مكرراً سؤاله : مين دي اللي بتحكوا عنها
-النادل محمد: عن واحدة حرامية نصبت علينا في الكافيتريا وسرقت هانم من هوانم النادي
-عمر: شكلها ايه دي ؟؟
-النادل محمد: شكلها عادي كده ، و آه لابسة أسود في اسود
-عمر: ايييييييه ؟؟ طب هي فين دلوقتي ؟؟؟؟؟
-النادل محمد: في مكتب عماد باشا وطلبلها البوليس
-عمر : نعم !!!!!!
لم ينتظر عمر وإنما جرى مسرعاً ناحية مكتب مدير أمن النادي وارتطم دون قصد بأخيه أدهم و...
-أدهم: مش تفتح وانت ماشي
-عمر وهو يدفع أخيه : حاسب دلوقتي يا أدهم مش وقتك
-أدهم: ليه يعني هيفوتك الديوان لا سمح الله
-عمر: اوعى بس خليني ألحق يارا قبل ما تبات في التخشيبة
-أدهم: اييييييه ؟؟ بتقول ايه ؟
-عمر: بعدين بعدين
-أدهم ممسكاً ذراع أخيه : استنى هنا وفهمني اللي بيحصل
-عمر: يارا الأمن ماسكها في النادي وهيسلمها للبوليس ، وأنا لازم ألحقها
-أدهم: أنا جاي معاك
بالفعل انطلق أدهم وعمر تجاه مكتب مدير أمن النادي ، بينما كانت يارا تعاني ويلات الاهانة و...
-عماد: اسمك ايه يا بت انتي
-يارا: أولا أنا مش بت ، واسمي يارا رفعت
-عماد: انتي هتعدلي عليا يا بنت الـ ***
-يارا: لو سمحت ماتشتمش ، أنا معملتش حاجة لكل ده
-عماد بزعيق: فين بطاقتك ؟؟؟
-يارا: ثواني هشوفها
بحثت يارا عن بطاقة الهوية الخاصة بها ولكن للأسف تذكرت أنها لا تأخذها عادة معها وتركتها في فيلا عمها و...
-يارا: آآآآ... الظاهر انها مش...مش معايا
-عماد: كمان !!!! وقعتك سودة ومهببة ، يومك مش هيعدي ع خير
دلف الضابط مصطفى إلى داخل المكتب الخاص بمدير أمن النادي و...
-مصطفى : صباح الفل يا عماد بيه ، خير يا باشا في ايه
-عماد: مصطفى بيه ، منور المكتب والله
-مصطفى : الله يخليك
-عماد: البت اللي هناك دي سرقت واحدة من النادي ونصبت على اللي شغالين في الكافيتريا
-مصطفى: اسمك ايه يا بت انتي
-يارا ببكاء : أنا مسرقتش حد
-مصطفى: ما تردي ع السؤال يا بنت الـ***** ، اسمك ايه
-يارا بضيق وحنق : يارا رفعت الصـ...
-عماد مقاطعاً: ومعهاش بطاقة ولا أي حاجة ، يعني ممكن تكون بتكدب وليها ملف في الداخلية
-مصطفى: جايز برضوه ، متستبعدش حاجة يا عماد بيه
-عماد: بالظبط
-مصطفى: انتي ممسوكة قبل كده يا بت ؟
-يارا ببكاء : ممسوكة في ايه بالظبط ؟؟ أنا مش فاهمة الكلام اللي بتقوله ده
-عماد بعصبية : أم الغباء بتاعك
-مصطفى: خلاص يا عماد بيه ، أنا هاخدها عندي القسم وهظبطها ، ربع ساعة بس وهاتكون معترفة باللي عملته
-عماد : ياريت يا مصطفى بيه ، لحظة أبعت أجيبلك عامل الكافيتريا يشهد عليها
-مصطفى: ايوه ، خلينا نعمل المحضر
-عماد : مسافة ماتشرب قهوتك هيكون جه
-مصطفى : عظيم اوي
كان أدهم وعمر في طريقهما إلى مكتب مدير أمن النادي حينما قابلا جاسر في طريقهما و...
-جاسر: سبحان الله ، ده أنا لسه كنت جاي عندكم
-أدهم: ازيك يا جاسر معلش احنا مستعجلين
-جاسر: في ايه ؟
-عمر: عاوزين نلحق يارا بس قبل ما يتقبض عليها
-جاسر باستغراب وقلق: يارا ؟؟؟ طب ليييييه ؟؟
-أدهم: بعدين
-جاسر: طب انتو رايحين فين كده ؟؟؟
-أدهم: على مكتب عماد بيه
-جاسر: عماد ، يبقى عشان كده مصطفى جه ، طب استنوا أنا جاي معاكو
انطلق الثلاثة إلى مكتب عماد مدير أمن النادي ، كان مصطفى على وشك البدء في المحضر حينما دخلوا إليه و...
-أدهم وهو يتجه لها : يااااارا
-عماد: خير يا أدهم باشا
-يارا ببكاء : أنا معملتش حاجة
-جاسر وهو يقترب منها : يااااارا ، مصطفى في ايه ؟؟
-عماد: حضراتكو تعرفوا البت دي
-عمر بنرفزة: ماتقولش عليها بت ، دي بنت عمي
-عماد: نعم ؟؟
-مصطفى: خير يا جاسر بيه
-جاسر: في ايه اللي بيحصل مع يارا
-عماد : البـ.. قصدي الاستاذة متهمة في النصب على عمال الكافيتريا ، وفي سرقة آآآآ...
-أدهم: سرقة مين ؟؟؟
-عماد: والدة حضرتك يا أدهم بيه
-أدهم: اييييه
-جاسر: نعم ؟؟؟
-عمر: مييييين ؟؟؟
-عماد: ده اللي حصل ، وبعدين احنا مكوناش نعرف انها بنت عم حضرتك ، مافيش أي بطاقة معاها ولا حتى هيئتها و...
-أدهم: يارا حد قالك حاجة ، حد اتعرضلك بكلمة
-يارا وهي تنظر لعماد: آآآآ...
-جاسر: يارا اتكلمي
-يارا: أنا عاوزة أمشي من هنا ، أنا معملتش حاجة
-جاسر: مصطفى بيه ، يارا دي تبعي ، واعتقد ان الموضوع مافيش داعي انه يكبر ، ممكن يتحل ودي
-أدهم: الحاجة اللي بتقولوا انها اتسرقت ، أنا اللي أخدتها أيا كانت ايه هي
-عماد: يا أدهم باشا في بيتها
-عمر: انا هدفع حساب الكافيتريا ، أظن كده ان كل حاجة اتحلت
-عماد: طبعاً ، رأيك ايه يا مصطفى بيه
-مصطفى: أعتقد ان كده المحضر مالوش لازمة الوقتي ، لأن مافيش قضية أو مشكلة من أساسه
-عماد:تمام
-مصطفى: أستأذن أنا بقى
-يارا: أقدر أمشي
-عماد: اتفضلي يا آنسة ، بس ياريت تخلي بطاقتك معاكي ويبقى في كارنيه عضوية معاكي للنادي أو تذكرة عشان محدش يتعرضلك تاني
-يارا: بس ياربت حضرتك برضوه قبل ما تهيني وتشتمني تسمعني للأخر
-أدهم : نعم هو شتمك ؟؟؟
-عماد: أنا كنت مفكر انها نصابة
-يارا: خلاص حصل خير ، بس أرجو ان يكون في معاملة أكثر آدمية
-أدهم: ازاي ده حصل ؟؟؟؟؟
-جاسر: عماد بيه ، أظن حضرتك المفروض تعتذر عن الاساءة اللي سببتها للآنسة يارا لأن لو عمها رأفت باشا بلغه الأمر بيتهيألي مش هيحصل كويس
-عماد على مضض: أسف يا آنسة
-يارا: حصل خير
-عمر: تعالي يا يارا
بالفعل خرج الجميع من المكتب وحاولوا التخفيف عن يارا و..
-جاسر: بصي هو عنده حق لازم يبقى معاكي بطاقتك وإلا ممكن تتعرضلي لمواقف بايخة كتير
-يارا: أها
-أدهم: أقسم بالله ، لو مكنش اعتذرلك لكنت عرفته شغله
-يارا: شكراً مافيش داعي
-عمر: بس الغريب ان ماما تعمل كده
-يارا:ده العادي بتاعها
-عمر: متزعليش من ماما يا يارا
-يارا: فريدة هانم !! وهي دي برضوه حد يزعل منها
-عمر: بس نفسي أعرف انتي لما سبتك في الكافيتريا طلبتي ايه طالما يعني مكنش معاكي احم... فلوس وكده
-يارا: مش أنا اللي طلبت
-عمر: اومال مين
-يارا وهي تنظر لجاسر: شاهي
-جاسر: ايييه ؟؟؟ أختي !!!!!
-أدهم: نعم ، شاهي ؟؟؟؟؟؟
-يارا: ايوه
-جاسر: طب ليه عملت كده ؟؟؟
-يارا: معرفش اسألها
-أدهم في نفسه : شاهي اللي عملت كده !!!! ماشي ، انا ليا لي كلام معاها
-جاسر: طب يالا يا جماعة نروح نتغدى وننسى اللي حصل ده
-يارا: معلش انا ماليش نفس
-عمر: عشان خاطري أنا
-يارا: والله معاد ليا نفس لأي حاجة
-عمر: معلش ، ارمي ورا ضهرك اللي حصل ده
-أدهم: أنا رايح شوية وهحصلكم
-جاسر: رايح فين ؟؟
-أدهم: الكافيتريا وراجع
-جاسر: طيب
....................
في حديقة النادي ،،،
كانت فريدة تجلس والابتسامة تعلو وجهها خاصة حينما علمت بانجاز شاهي للجزء الخاص بها من الخطة ، بالاضافة إلى اتهامها ليارا بسرقتها ...
-فريدة في نفسها: أخيراااااااااااااا ارتحت من البلوى السودة دي ، يااااه ، الواحد كان حاسس انه في كابوس وانزاح من عليه
-نادية: مالك يا فيرووو ، شكلك مبسوط اوي
-فريدة: ولا حاجة يا نادية ، بس الجو جميل وحلو أوي
-صافي: فعلاااااا
-شريفة: النهاردة فعلاً الجو حلو ، لأ وكمان مزاجك رايق عن الأول
-فريدة: اه أوي
-صافي: يارب دايماً ، مش عارفة الأكل اتأخر ليه كل ده
-فريدة: رأفت راح من بدري يطلب الأوردر
-شريفة: أها
-صافي: مافيش حد بيلتزم بمواعيد أبداً في مصر
-فريدة: عندك حق يا صافي ....
مدت فريدة يدها لترتشف العصير الموضوع أمامها وفجـــأة شرقت
-فريدة : كح...كح .. مش ممكن ... انتي !!!!!
-يارا بابتسامة : طبعااااااااااااا وهو أنا أقدر ابعد عنك لحظة يا طنط أم خالد !!!
-فريدة: اييييييييه ؟؟؟
-يارا: ايه رأيك في ده ، بيتهيألي ألطف وأظرف ، صح ولا لأ ؟؟
-فريدة: انتي ...انتي آآآ
-جاسر: طيب أنا هاروح أشوف شاهي فين وراجعلكم
-ناهد: ماشي يا بني متتأخرش
-جاسر: ع طووول
....
ذهب جاسر ليبحث عن اخته شاهي ، بينما جلست يارا و...
-يارا: تعرفي يا خالتي أنا بحبك حب مش هحبه لحد قابلك ولا بعدك ... سامحني يااااا رب ع كلامي ده
-عمر: اقعدي يا يارا
-يارا وهي تجلس : طبعاً هاقعد ، ده أنا صاحبة مكان
-عمر: أكييييد طبعا ، ها تحبي أجيبلك ايه تروقي بيه دمك ؟؟
-يارا: أنا دمي رايق ع فكرة ، بس ده مايمنعش اني عطشانة
-عمر: اطلبي وأنا أنفذ
-يارا: ممممم... مياه ساقعة
-عمر: بس ؟
-يارا: أه كفاية كده ، ما احنا هنتغدى سوا ، وبعدين أنا عاوزة أقعد مع طنط أم خالد شوية
-عمر هامساً ليارا: أستودعك الله بقى
-يارا بدلع: متتأخرش يا عموري
-نادية: مين البنت دي يا فريدة ؟؟
-ناهد: استر يا رب
-صافي: مش دي البنت اللي شوفناها عندك يا فيرووو
-فريدة: آآآآ...
-يارا: أه أنا اللي شوفتوني بشحمي ولحمي ...
-شريفة: تقربلك ايه يا فريدة ؟؟؟؟
-صافي : ايوه عاوزين نعرف !
-يارا: ما تقوليلهم يا طنط أم خالد أنا مين ؟؟؟؟
-فريدة بعصبية : أنا ماسميش أم خالد
-يارا: بالراحة طيب عشان ضغطك وسكرك
-نادية : ما تردي علينا يا فريدة وتقوليلنا مين دي ؟؟؟
-يارا: ماتتعبوش نفسكم ، طنط أم خالد مكسوفة تقول ان انا يارا رفعت الصياد بنت عم ولادها
-صافي: اييييه ؟؟؟
-شريفة: ميييين ؟؟؟
-نادية: مش معقول ؟؟ انتي بنت عمهم .. لأ مش ممكن !!!!!
-شريفة: الكلام ده بجد يا فريدة ؟؟؟؟؟؟
-يارا: اه والله ، مش كده يا طنط
-فريدة بنرفزة : اسكتي خاااااالص ، ماتتكلميش ، انتي لما بتفتحي بؤك أنا بتعصب
-يارا: وليه تتعصبي يا طنط أم خالد ؟؟ ده حتى وحش ع صحتك
-فريدة: نفسي أعرف مين اللي حدفك عليا ، وبعدين انتي ...انتي مش كنتي آآآ..
-يارا: تقصدي كنت مع مدير أمن النادي
-فريدة: ايوه ، ازاي سابك تمشي
-يارا وهي تشير لهاتف فريدة : ده سوء تفاهم حصل ، وبعدين يا طنط ام خالد مش ده الموبايل بتاعك على ما اعتقد
-فريدة : هه .. آآآآ.. أه هو
-يارا: اومال ليه قولتي ان أنا خدته ؟؟؟ مش عيب يا طنط تكدبي وانتي في السن ده ؟؟؟ زمان علمونا ان اللي بيكدب بيروح النار ، وانتي كده يا طنط أم خالد هتأطأي في النار
-فريدة وقد قامت من مكانها : لو سمعت حسك تاني مش هيحصلك طيب
-يارا: أنا عارفة انتي متعصبة عشان أنا بقول الحقيقة
-رأفت من بعيد: الله الحبايب كلهم هنا
-فريدة وقد جلست : اوووف
-رأفت: ازيكم يا جماعة ، الأكل جاي كمان شوية
-ناهد: ان شاء الله
-رأفت: انا شايف يا يارا انك اندمجتي بسرعة
-يارا: طبعاً يا عمو
-رأفت: دي يارا بنت أخويا رفعت الله يرحمه ، كانت أعدة في الغردقة بس الوقتي عايشة معانا
-نادية: أها
-صافي: مممم...
-رأفت: انتي معرفتيش صحابك على يارا ولا ايه يا فريدة ؟؟؟؟
-فريدة: أوووف
-أحد الأشخاص من بعيد ويدعى سامي : رأفت باشا
-رأفت: سامي بيه ، منور
-سامي: معلش ممكن كلمة يا رأفت باشا
-رأفت: أه طبعاااا ، عن اذنكو لحظة يا جماعة
-يارا بابتسامة : اتفضل يا عمو خد راحتك
وقف رأفت بعيداً ليتحدث مع صديقه ، بينما ظلت يارا تبتسم بطريقة مستفزة للجميع و..
-يارا: منورين كلكم
............................
عند كافيتريا النادي ،،،،
ذهب أدهم إلى كافيتريا النادي ليتحدث مع العاملين فيه ويوبخهم لما فعلوه ما يارا و...
-أدهم : ازاي تتجرأوا وتعملوا كده مع واحدة من عيلة الصياد
-أحد العاملين: أدهم باشا احنا مكوناش نعرف انها تبعك والله
-النادل محمد : يا باشا احنا لو نعرف انها قريبتك والله ما نتكلم معاها نص كلمة
-أدهم: وأديكوا عرفتوا هتعملوا ايه الوقتي ؟؟؟ اهانة حد من عيلة الصياد كأنها اهانة ليا أنا شخصياً !!!!!!!!!!
-أحد العاملين : احنا أسفين يا باشا
-الكاشير متدخلاً في الحوار : يا باشا اللي كان طلب الحاجات دي الآنسة ندى اللي بتيجي مع حضرتك دايماَ
-أدهم باستغراب : ندى !!!!
-الكاشير مكملاً: ايوه يا أدهم باشا وأنا فكرت انها هتحاسب لكن لاقيتها بتقولي ان الآنسة اللي أعدة معاها هي اللي هتحاسب وشاورتلي عشان تأكد كلامها وكان موجود معاهم الآنسة شاهي والآنسة رزان !
-أدهم في نفسه : يعني مش بس شاهي لأ رزان كمان !!!!
-الكاشير مضيفاً : يا باشا !! ولو حضرتك مش مصدق كلامي ، في كاميرات في الكافيتريا تقدر تشوفها
-أدهم وقد اخذ يفكر : هـــه
-النادل محمد: أنا والله متصرفتش إلا لما لاقيت الكل مشى وهي فضلت تقول معهاش فلوس ومطلبتش حاجة ، فعشان كده مكنش في قدامي بديل إلا كده
-أدهم بعصبية : حسابك كام يعني ؟؟؟
-النادل محمد بخوف : 400 جنية
-أدهم: خد فلوسك اهي ، وأي حاجة تطلبها الآنسة يارا من هنا ورايح تحاسبني أنا عليها ولو شميت بس خبر ولا عرفت انك خدت منها مليم واحد مش هيحصل طيب ، انت فاااااااااهم !!!!!
-النادل محمد: حاضر يا باشا
-أدهم: واتفضل خد دول كمان ويتعملها الوقتي حالاً تورتة اعتذار من الكافيتريا
-النادل محمد: ماشي يا باشا
انصرف أدهم من الكافيتريا وهو يفكر في السبب الذي دفع شاهي ورزان وندى لعمل هذا مع يارا و...
-أدهم : طب ليه عملوا كده ؟؟؟ هيستفادوا ايه لما يحرجوها قصاد الكل لأ وكمان كانوا ناويين يودها في داهية ، بس أنا هربيهم التلاتة بطريقتي ....
-رزان من بعيد: اوووه ، مش معقول أدهومة بنفسه هنا
-أدهم في نفسه: أهلا ، كويس انك جيتي برجليكي
-رزان: miss you كتيرررر والله
-أدهم: ما أنا لسه كنت معاكو من يومين
-رزان: بس كده تمشي من البورتو من غير ما تقولي
-أدهم: عادي يعني
-رزان: بجد المكان بقى وحش وانت مش فيه
لمح أدهم لافتة تشير إلى وجود معرض مجوهرات بالنادي ، فدارت برأسه فكرة ما و..
-أدهم : بقولي ايه يا روووزا ، ماتيجي معايا المعرض ده
-رزان : معرض ايه
-أدهم: معرض المجوهرات اللي في النادي ده
-رزان بخبث: ها ليييه ؟
-أدهم بابتسامة ومكر: هتعرفي يا روووزا هناك ، تعالي يالا
-رزان بفرحة : اوك
.......................
بحث جاسر عن شاهي اخته في النادي، وظل يطلبها على هاتفها إلى أن ردت و...
-شاهي هاتفياً : الوووو
-جاسر هاتفياً: انتي فين ؟؟؟
-شاهي: في النادي طبعاً ، هاكون فين يعني
-جاسر بضيق: فين في النادي ؟؟؟
-شاهي : عند حمامات السباحة ، ليه
-جاسر: طب خليكي عندك أنا جايلك حالاً
أسرع جاسر إلى حيث توجد اخته ، وما إن وجدها جالسة مع أصدقائها حتى قام بسحبها من يدها بطريقة مستفزة أمام الجميع و...
-شاهي : الله في ايه جاسر ، حد يعمل كده
-جاسر وهو يسحبها خلفه : تعالي عاوزك
-شاهي : طيب بشويش بس ، أنا جاية معاك
-جاسر: يالا
وقف جاسر مع اخته بعيداً عن أصدقائها وبدأ في عتابها و..
-جاسر: ايه الهباب اللي انتي نيلتيه ده
-شاهي وهي تعقد يدها أمام صدرها: عملت ايه تاني
-جاسر: انتي عارفة عملتي ايه كويس
-شاهي : وضح كلامك من فضلك
-جاسر: عملتي مع يارا كده ليه
-شاهي : هه .. أنا مش فاهمة تقصد ايه
-جاسر : لا والله ، وموضوع الكافيتريا ده كان ايه ؟؟
-شاهي بلا مبالاة : هوانت تقصد ده ، ع فكرة ده كان هزار ، مقلب عادي يعني
-جاسر: لو والله مقلب
-شاهي: أه ، فيها ايه يعني ؟؟
-جاسر: طيب !!!أنا بقى عاوز اعرف ليه عملتي مع يارا المقلب السخيف ده ؟؟؟
-شاهي : آآآآ... عادي ، وبعدين هي كانت عارفة وموافقة ع ده كمان
-جاسر بحدة: انتي كدابة
-شاهي باستهزاء : لأ أنا مش كدابة ، ايييه هي بنت الشغالين وقعتك انت كمان في مصيدتها ولا ايه يا حضرت الظابط؟؟؟؟
وفجأة وجدت شاهي صفعة على وجهها و..
طااااااااااخ
-جاسر بصوت مرتفع: اخرسي !!!!!
-شاهي: انتي بتضربني عشان خاطر الجربوعة دي
-جاسر: وأكسر عضمك كله طالما هتتعوجي علينا ولا تتبلي ع حد بالظلم
-شاهي: والله لأوريها بنت الشغالين دول ، أنا تضربني عشان خاطرها دي
-جاسر وقد أمسكها من ذراعها : اه وأعرفك شغلك كويس ، اياكي بس تفكري تتعرضيلها تاني، أنا اللي هاقفلك ، فااااهمة !!!!!
-شاهي متآلمة : آآآآه ، طيب يا جاسر ماشي
-جاسر: ولعلمك أدهم عرف باللي حصل ، ومعجبهوش ده خالص
-شاهي بخوف : آآآآ... أدهم عرف
-جاسر: أيوه
-شاهي: طيب عرف كمان بقى انه مامته هي اللي مخططة لده
-جاسر : نعم ؟؟؟
-شاهي: أنطي فريدة هي اللي قالتلي أعمل كده ،واعتقد لما أنطي هتطلب مني حاجة مش هتأخر عنها
-جاسر: فريدة هانم !!!!
-شاهي: أها .. ماتروح تمد ايدك عليها بالمرة هي كمان
-جاسر: هي حسابها مع جوزها ، لكن انتي مسئوليتي
-شاهي : يوووه مش هنخلص من الكلام ده
-جاسر: ايوه مش هتخلصي ابدااااا ، واتفضلي يالا قدامي عشان تعتذري ليارا ع اللي عملتيه فيها
-شاهي : كمان ؟؟
-جاسر: ده أقل حاجة تعمليها ، ده انتي كنتي بهزارك البارد ده هتوديها في داهية
-شاهي: ياريتها كانت راحت
-جاسر بغضب: لو ماعتذرتيش يا شاهي ليها والله لهتشوفي مني الوش التاني اللي عمرك ما تتخيلي ايه هو !!!
-شاهي برعب: طيب .. طيب
...............
في معرض المجوهرات الملحق بالنادي ،،،
-رزان: واو ، المعرض تحفة يا أدهم
-أدهم: عاوزك بقى يا روووزا تنقي حاجة شيك على ذوقك انتي
-رزان: اوووه ، انت بتكلم جد
-أدهم: طبعاااا
ظلت رزان تنتقي بين العديد والعديد من المجوهرات المعروضة في المعرض ما وجدته في نظرها مناسباً وراقياً وملائماً لها ...
-رزان: بص يا أدهومي ، ايه رأيك في الخاتم ده ؟؟
-أدهم: عاجبك
-رزان : ممم.. طب استنى أما أشوف العقد ده
-أدهم : اوك
-رزان: بصراحة كل حاجة هنا شكلها روووعة ، أنا محتارة أختار ايه بالظبط
-أدهم: اختاري اكتر حاجة عجبتك فيهم
-رزان: بصراحة عاجبني الخاتم ده والعقد ده كمان
-ادهم: خلاص هاخد الاتنين
-رزان: بجد ؟؟
-أدهم: طبعااااا
-رزان: أنا مcش مصدقة
-أدهم لمسئول البيع بالمعرض: لو سمحت احنا عاوزين العقد والخاتم
-المسئول: حاضر يا فندم
-أدهم: اتفضل ، أنا هدفع بالـ visa card
-المسئول: تمام يا فندم
-أدهم: ولو سمحت حطهم في علبة شيك
-المسئول: أكيييييد طبعاً يا فندم ، وأحب أحيي الهانم ع ذوقها الكلاسيكي الراقي
-رزان بفرحة: ميرسي
-أدهم: عاوزك بقى يا روووزا تيجي معايا عند فيرووو والعيلة
-رزان: ليه ؟
-أدهم بابتسامة خبيثة: هتعرفي هناك يا بيبي
-رزان: اوووه ، أدهم ، انت عاملي مفاجأة صح
-أدهم: طبعااااااااا
وضع مسئول البيع بالمعرض المجوهرات في علبة قيمة وأعطاها لأدهم و
-المسئول: اتفضل يا فندم
-ادهم: شكراً
-المسئول: شرفتونا
انصرف ادهم بصحبة رزان وتوجها سوياً حيث تجلس عائلة أدهم و..
-رزان في نفسها: أنا مش مصدقة أدهم اشترى المجوهرات دي عشاني ، لأ وكمان هيقدمهالي قصاد أهله ، أكييييد ناوي يخطبني تاني ، اوووه ، أنا مش مصدقة نفسي ، بجد هبقى حديث الموسم
...............
في حديقة النادي ،،،
أحضر عاملو توصيل الطلبات المأكولات التي طلبها رأفت الصياد ، وبدأ تجهيز المكان لغذاء عائلي كبير ، حضر خالد إلى النادي بعد أن انتهى من عمله بالشركة ، ثم التقى بعمر الذي كان ينتظره لكي يخبره على انفراد بما حدث مع يارا و...
-خالد بضيق : كل ده حصل
-عمر: أيوه ، وكانت هتروح القسم لو مكوناش لحقناها
-خالد: وانتو كنتو فين لما ده حصل ؟؟
-عمر: أنا اتعمل عليا ملعوب وماما كملت عليها في الباقي
-خالد: برضوه ماما !!!
-عمر: ايوه ، ومحدش هيقدر يكلمها كالعادة
-خالد مقاطعاً : طيب يارا كويسة الوقتي ؟؟
-عمر: اه الحمدلله
-خالد: يعني كان ممكن الموضوع يتحل لو يارا كان معاها فلوس في جيبها
-عمر: بالظبط ، بس هي كانت قيلالي ان مش معاها أي حاجة ، حتى كانت رافضة تشرب أي حاجة من غير ما تدفع فلوسها
-خالد وقد أخذ يفكر في شيئاً ما: أها ..
-عمر: هي موافقتش تشرب معايا عصير إلا لما وعدتها انها تعزمني ع واحد تاني أما يبقى معاها فلوس
-خالد: مممم.. ماشي
-عمر: طب ناوي تعمل ايه ؟
-خالد: بص أنا جاتلي فكرة وعاوزك تجاريني فيها
-عمر: ايه هي
-خالد: عاوزك تعمل آآ......................................... !!
استمع عمر إلى فكرة خالد ووافق على مساعدته في تنفيذها و..
-عمر: تمام أنا معاك
-خالد: هنشوف
-عمر: اطمن !
-رأفت من بعيد: يالا يا ولاد ، انتو هتفضلوا واقفين كده بعيد ، تعالوا يالا
-عمر: ايووه يا بابا جايين أهوو
-خالد : ماشي يا بابا
-خالد لعمر وهو يعطيه شيئاً ما بيده : متنساش اللي اتفقنا عليه
-عمر: اوك
بالفعل توجه عمر وخالد إلى طاولة الطعام المعدة ، جلس عمر إلى جوار يارا وبجانبه خالد ، وظلت فريدة متجهمة وجلست بجوارها ناهد ورأفت وعلى مقربة منهم جلست صديقات فريدة ، ثم ألقى عمر شيئاً ما أسفل مقعد يارا و....
-عمر: ايه ده يا يارا اللي واقع تحتك ؟؟
-يارا: فين ده
-عمر: ده اللي هناك ده
-يارا وقد انحنت للأسفل: ايه ده ؟ فلوس !!!
-عمر: ايوه بتوعك
-يارا : لأ
-عمر: ازاي دول واقعين منك
-يارا: لأ مش بتوعي
-خالد مضيفاً: بس أنا شوفتهم بيقعوا منك
-يارا: محصلش والله
-عمر: يا بنتي انتي اللي تلاقيكي مش واخدة بالك ولا حاجة
-يارا: ابداً ، أنا لو بتوعي هاقول ، بس دول لأ مش ممكن ، وبعدين يا عمر ما انت عارف اللي فيها
-عمر: ربك بيرزق
-يارا: يا سلام
-عمر : اه طبعاااااااااا
-خالد: حطيهم في جيبك بدل ما يضيعوا
-يارا: ازاي أخد حاجة مش بتاعتي
-عمر هامساً: يارا أبوس ايدك الناس هتاخد بالها ، حطيهم في جيبك وبعدين هفهمك
-يارا: بس.. آآآ
-عمر: يالا بقى بدل ما خالتك تاخد بالها
-يارا مستسلمة : طيب
جاء جاسر من بعيد ومعه شاهي اخته ، نظرت شاهي ليارا بنظرات حقد وغل ، بينما نظرت يارا لها بنظرات غضب وكره ، ثم أشار جاسر لها بالحديث و...
-جاسر: يارا ، شاهي كانت عاوزة تقولك حاجة
-يارا: خير
-شاهي: .........
-جاسر بحدة: شاهي ، اتكلمي
-شاهي : آآآ.. سوري
-يارا : اوك
-رأفت: هو انتي بتعتذري ليارا ليه ؟؟
-جاسر وهو ينظر : اصلها هزرت هزار بايخ مع يارا ،ولا حضرتك رأيك ايه يا خالتي ؟؟
-فريدة: هه
-رأفت: هزار ايه ؟؟
-يارا: متخدش في بالك يا عمي ، خالتي أم خالد بتحــ...
-رأفت ضاحكاً: هههههههههههههههههه قولتي ايه
-يارا: خالتي
-رأفت: لأ اللي بعدها هههههههههههههههه
-يارا: أم خالد
-رأفت : ايوه هي دي .. ههههههههههههههههه ، رهيبة ، ماسمعتش اللقب ده أبداً
-الجميع : ههههههههههههههههههههههه
-فريدة: اوووف بقى ، أنا مش حابة الكلام البلدي ده
-رأفت: والله لايق عليكي ، ست كلاس وشيك واسمها ام خالد
-فريدة بضيق: رأفت لو سمحت
-رأفت: طيب طيب
-ناهد: اقعد يا جاسي ، يالا يا شاهي
-جاسر: اوك
-شاهي: اومال فين أدهم ؟؟
-فريدة: اكيد جاي
...
-نادية: أخبار الشغل ايه يا خالد ؟؟
-خالد : الحمدلله تمام
-نادية : طبعا رأفت بيه معتمد عليك في كل حاجة
-رأفت: أيوه طبعااا ، مش ابني حبيبي
-صافي: مش ناوية يا فريدة هانم تدوريله على عروسة حلوة وبنت ناس ومن عيلة كده
-فريدة: والله جبتله كتير بس هو رافض
-خالد: أعتقد ان الموضوع ده يخصني ، ويوم ما أفكر أرتبط أكيد هاقول على طول مش هنتظر
-شريفة: أنا عندي عروسة من عيلة وآآآآ...
-خالد: انا رأيي يا طنط شريفة تدوقي الشوربة قبل ما تبرد أحسن
-شريفة باحراج : أها ...
ثم حضر أدهم وبصحبته رزان التي كانت تتبختر في مشيتها و...
-رزان بفرحة وغرور: هاي عليكو
-رأفت: أهلا يا بنتي
-فريدة: هاي يا رووزا
-نادية: رزان ازيك sweetie
-صافي: تعالي رووزا اقعدي معانا
-شاهي: أدهم ..انت كنت مع رزان
-أدهم: أه طبعااااا
-رزان: أصل أدهومة خدني من ايدي وحب آآآ...
-أدهم: لالالالا يا روووزا بلاش تكلمي انتي ، خليني أنا اللي أحكي
-رزان: أوك أدهوم
-أدهم : بصوا يا جماعة ، أنا شوفت بالصدفة الاعلان عن معرض المجوهرات اللي في النادي ، وخدت معايا رزان طبعاً كلكم عرفينها
-فريدة: أكيييد
-صافي: رزان غنية عن التعريف
-شاهي : اووف
-ناهد: أها
-رأفت: مممم..
-أدهم: المهم أخدت رزان معايا عشان تختار على ذوقها حاجة شيك ومناسبة عشان أقدمها هدية متواضعة ل
-أدهم : بصوا يا جماعة ، أنا شوفت بالصدفة الاعلان عن معرض المجوهرات اللي في النادي ، وخدت معايا رزان طبعاً كلكم عرفينها
-فريدة: أكيييد
-صافي: رزان غنية عن التعريف
-شاهي : اووف
-ناهد: أها
-رأفت: مممم..
-أدهم: المهم أخدت رزان معايا عشان تختار على ذوقها حاجة شيك ومناسبة عشان أقدمها هدية متواضعة لـ...
-رزان مقاطعة بفرحة: طبعاً ليــ..آآآ
-أدهم مكملاً: ليارا
-الجميع بدهشة : اييييييييييه ؟؟؟؟
-أدهم وهو يقترب بالعلبة من يارا: يا ريت تقبلي الهدية البسيطة دي مني
-يارا: نعم ؟؟؟
-أدهم وقد وضع العلبة أمامها : يا رب ذوق رزان يعجبك ، هي نقت حاجة شيك وفخمة بس عشانك !!!!!
-يارا بدهشة: أفندم؟؟؟
-رزان بضيق وهي تشير ليارا : انت بتقول ايه ؟؟؟ يعني كنت أخدني معاك بس عشان خاطر البنت دي ؟؟؟؟
-أدهم وهو ينظر لرزان بغضب : طبعاااا يا روووزا ، وده درس بسيط ليكي عشان ماتفكريش تتعرضي لحد من طرفي مرة تانية ولو حتى بهزار !!!!
-رزان بضيق : آآآآآ.. أنا ..أنا
-أدهم: انتي ايه ، يالا بقى يا رووزا روحي شوفي وراكي ايه ، مهمتك لحد هنا انتهت ، وشكراً لخدماتك .. !!!!!!
انصرفت رزان وهي تشعر بالاحراج والغضب مما فعله أدهم بها ، جلس أدهم بجوار يارا التي أصرت على عدم قبول هدية أدهم و...
-يارا: أنا أسفة مش هاقدر أخد الهدية دي
-أدهم: ليه ؟
-يارا: لأن بكل بساطة مش هاقدر أردها
-أدهم: ومحدش طلب منك ترديها
-يارا: معلش مش هاقدر برضوه
كان جاسر ينظر بضيق لأدهم ويارا ، فاستأذن بالذهاب و..
-جاسر: انا هاروح الحمام
-ناهد: انت ماكلتش حاجة يا بني
-جاسر: معلش أنا بحب أبقى خفيف خفيف كده
-رأفت: اها بتحافظ على جسمك الرياضي
-فريدة: طبعااا طول عمره مهتم بجسمه
-جاسر: مم.. هاروح وأرجع تاني
-رأفت: يارا حبيبتي ، كملي أكلك
-يارا: حاضر يا عمي
-خالد: بابا كنت عاوز أقولك ان شركة آآآ
-رأفت مقاطعاً: خلي الكلام في الشغل بعدين
-يارا لعمر: عمر ممكن توريني مكان التويلت فين
-عمر:يا سلام ، غالي والطلب رخيص
-يارا: شكراً يا عمر ، دايما مزهقاك بطلباتي
-عمر: متقوليش كده
نهضت يارا من مكانها ومعها عمر ، فاستفسر رأفت عن سبب قيامهما و..
-رأفت: رايحين فين يا ولاد
-عمر: التويلت يا بابا
-رأفت: طب مش لما تكملوا أكل
-يارا: أنا الحمدلله شبعت
-أدهم: استنوا أنا جاي معاكو
-يارا: متتعبش نفسك ، عمر هيوصلني
-أدهم: يالا بقى
سحب أدهم يارا من يدها وسط استغراب الجميع ، وتحرك بها بعيداً عنهم ، ولحق بهم عمر و..
-يارا بضيق: لو سمحت متعملش كده تاني ، أنا مش جاموسة ساحبها وراك
-أدهم: ده العادي بتاعي على فكرة
-عمر: هو انتو مش بتزهقوا من كتر الخناق
-يارا: قول لأخوك دايماً مستقصدني
-أدهم : يعني ده جزاتي اني عملت فيكي معروف
-يارا: شكراً يا سيدي ع معروفك الجميل ، هحطه فوق راسي
-أدهم: العفو ! ع العموم أنا ماشي
-يارا: اتفضل
-أدهم في نفسه وهو يبتعد : ما أنا مش ناقص خنقة ، هاروح أشوف رووزا وأصالحها ، الظاهر ان يارا دي دماغها ناشفة زي الحجر
.....
-يارا: عمر ابقى خد هدية أدهم واديها لمامتك ،أنا مش عاوزة حاجة
-عمر: ليه
-يارا: كده ، لما أعوز حاجة هبقى أشتريها ، أه واتفضل خد دول
أعطت يارا عمر النقود التي وجدتها أسفل مقعدها و..
-عمر : ايه دول ؟؟
-يارا: الفلوس اللي ادتوهاني وأنا أعدة هناك
-عمر: طب ليه ، ماتخليهم معاكي
-يارا: شكراااا ، أنا مش بقبل حاجة من حد
-عمر: هو احنا أي حد
-يارا: برضوه
-عمر: على فكرة دي مش فلوسي
-يارا: اومال فلوس مين
-عمر: خالد
-يارا: ميييين ؟؟
-عمر: خالد أخويا ، هو اللي قالي أعمل كده ، ولو عاوزة ترجعيهم يبقى تديهم لخالد نفسه مش أنا
-يارا: طب ما تديهومله انت وخلاص مكاني
-عمر: لأ طبعاااا ، هو أنا أهبل عشان أعمل كده ، وبعدين لو أدهم مجنون 24 قيراط ، خالد أفظع منه بمراحل ، ده انا حتى مستغرب انه ازاي بقى هادي كده
-يارا: يا سلام
-عمر: أه والله ، انتي بس لسه مش عارفاه ، ده في الشغل يا ساتر يارب عليه
-يارا: ربنا يستر منه
-عمر: تعالي أوريكي فين مكان التويلت
-يارا: اوك
-عمر: احفظي الطريق كويس عشان اما ترجعيلنا تاني
-يارا: حاضر
...........
جلس رأفت بجوار خالد ليتحدث معه بشـــأن ...
-رأفت: خالد يا حبيبي
-خالد: أيوه يا بابا
-رأفت: بص أنا عاوز يارا تنزل تتدرب معانا ع الشغل
-خالد: اها ، خلاص ماشي ، شوف هي عاوزة تتدرب فين واحنا نوديها المكان اللي هي عاوزاه
-رأفت: أنا عاوزها تشتغل تحت ايدك
-خالد: نعم ؟؟ وهو أنا فاضي يا بابا أدرب حد لسه ، انت عارف أنا بيبقى ورايا أد ايه على دماغي
-رأفت: معلش يا بني ، أنا عاوزها تتعلم منك انت
-خالد: بابا ، انت عارف كويس أوي اني مش بحب الوسايط في الشغل ، وهتيجي وتدلع اكمني ابن عمها وكده
-رأفت: اتصرف معاها زي ما بتتصرف مع أي موظف شغال عندك
-خالد: تمام ، بس ماتجيش تدافع عنها
-رأفت: لالالا ، انا ماليش دعوة باللي بتعمله ، المهم عندي انها تتعلم الشغل كويس
-خالد: ربنا يسهل
-رأفت: عظيم أوي ، بكرة هتيجي معاك
-خالد: ايييه ، ع طول كده
-رأفت: طبعاً ، مافيش وقت نضيعه !!
-خالد بضيق: طيب ..
.................
أوصل عمر يارا إلى مكان المرحاض ، ثم انصرف هو ، وحينما انتهت من غسل يديها خرجت لتعود من حيث جاءت ولكنها وجدت طفلاً ما يبكي فذهبت إليه و...
-يارا: مالك يا حبيبي ، بتعيط ليه
-مالك: مامي سابتني
-يارا: سابتك فين ؟
-مالك: مش عارف
-يارا: طيب تحب ندور عليها
-مالك: لأ هي قالتلي استناها هنا ، بس أنا زهقت وجوعت وعاوزها بقى
-يارا: طب معلش يا حبيبي ، الوقتي هي هتيجي
-مالك: اهيء ..اهيء
-يارا وقد أخذت تفكر في حل للمعضلة : مممم...
-مالك : اهيء ... انا عاوز مامي
استمعت يارا إلى صوت موسيقى يأتي من داخل أحد المباني المجاورة لها فقررت أن تستغلها في ...
-يارا: قولي انت اسمك ايه الأول ؟
-مالك : أنا اسمي مالك
-يارا: الله ! مالك ده اسم جميل اوي ، أنا اسمي يارا
-مالك ببكاء: اهيء ..
-يارا: خلاص بقى يا مالك بلاش تعيط ، طب ايه رأيك لو رقصنا شوية ع الأغنية دي
-مالك: ايه
-يارا: بص احنا هنعمل شوية حركات بسيطة كده ع الأغنية اللي شغالة دي
-مالك : أنا مش بعرف أعمل حاجة
-يارا: انت قلدني وهتعرف
-مالك: اوك
-يارا: يالا بينا ، 1 ، 2 ، 3
بدأت يارا ممارسة بعض حركات الآيروبيكس التي كانت تقوم بها مع الأطفال في المركز الرياضي بالغردقة ، فتفاعل معها الطفل مالك وبدأ بتقليدها و..
-يارا بتشجيع : برافو مالك ، يالا
-مالك : دي سهلة أوي
-يارا: أه جدااااا
بدأ بعض الأطفال يتجمعون ليقلدوا يارا في حركاتها ويضحكون بصوت عالي وهم في قمة السعادة حتى خرجت سيدة ما من داخل المبنى المجاور ومعها رجل يرتدي ملابس رياضية ...
-شيرين: ايه اللي بيحصل هناك ده
-الكابتن سليم: مش عارف
-شيرين: تعالى كده نشوف
-الكابتن سليم: طيب
جرى مالك ناحية والدته حينما رأها ثم أخبرها بـ...
-مالك بفرحة حينما رأه والدته : مامي ، مامي ! تعالي شوفيني وأنا برقص
-شيرين: مالووك حبيبي ، انت جميل خالص
-مالك: بصي بس عليا
-شيرين: الله ، حلو أوي
-مالك: يارا علمتني اعمل كده
-شيرين بدهشة: يارا مين ؟؟؟
-مالك وهو يشير ليارا: يارا دي يا مامي
-شيرين: أها ..
توجهت شيرين إلى يارا لتشكرها عما فعلت و..
-شيرين: انتي يارا
-يارا : أيوه
-شيرين: أنا مامت مالك ، أنا جاية أشكرك ع اللي عملتيه مع ابني
-يارا: أنا معملتش حاجة والله
-شيرين: كفاية انك خليتيه يضحك ويرقص
-يارا: هو كان بس بيعيط عشان مفتقدك وأنا بس خففت عنه
-شيرين : دي كبيرة عندي
-يارا: ربنا يخليكي
-شيرين: بس انتي شاطرة أوي مع الأطفال
-يارا : انا كنت بشتغل مع الأطفال في الغردقة
-شيرين: بجد ؟؟
-يارا: أيوه ، أنا كنت مدربة آيروبيكس للأطفال هناك
-شيرين: والله
-يارا مكملة : اه ، بس سبته لما اتنقلت للعيش هنا
-شيرين وقد أخذت تفكر في أمراً ما : ممممم
-يارا: انا مش هعطلك وسعيدة اني اتعرفت بحضرتك وبمالك
-شيرين: ايه رأيك لو تشتغلي هنا
-يارا : ايه ؟؟
-شيرين: زي ما سمعتيني ، ايه رأيك تشتغلي هنا
-يارا: بس آآآ
-شيرين بصوت مرتفع: كابتن سليم ، كابتن سليم
-كابتن سليم: ايوه
-شيرين: ايه رأيك لو خلينا الاستاذة يارا تشتغل في الجيم هنا
-كابتن سليم: حضرتك خريجة تربية رياضية يا استاذة
-يارا: لأ ، أنا معهد سياحة وفنادق بالغردقة
-كابتن سليم: بس ماينفعش يا مدام شيرين حد مش خريج تربية رياضية يشتغل هنا في الجيم
-شيرين: طب ليه يا كابتن ؟
-كابتن سليم: دي قوانين النادي
-شيرين: أها .. طب مافيش أي exception ( استثناء)
-كابتن سليم: صعب والله
-يارا: مافيش مشكلة ، أنا أصلاً كنت بلعب مع الأطفال
-شيرين: طب أنا عندي اقتراح ، وأعتقد ان كل الـ ماميز (mommies) هتوافق عليه
-كابتن سليم: ايه هو
-شيرين: انت عارف يا كابتن ان الأمهات لما بتيجي الجيم هنا بتبقى محتارة تودي الـ babies بتوعها فين ، فأنا بقترح يعني ان يارا تدربهم زي ما احنا بندرب بس في الـ store الفاضي اللي جمبنا
-كابتن سليم : مممم..
-شيرين: يعني هي هتاخد بالها منهم وفي نفس الوقت هتدربهم واحنا كمان مش هنشيل هم هما فين أو نوديهم فين ، وهتبقى حاجة غير رسمية ، ها ايه رأيك يا كابتن؟؟
-كابتن سليم: هي فكرة مش وحشة
-شيرين: واحنا الـ store بتاع الأجهزة القديمة دي هنوضبه ع حسابنا ويكون جاهز
-كابتن سليم: أنا معنديش مانع لو العضوات وافقوا ع ده
-شيرين: أنا واثقة انهم هيوافقوا ، ده ماهيصدقوا طبعااااا
-كابتن سليم: طيب أنا عاوز الـ cv بتاعك ، يعني بياناتك وكده عشان نتأكد منك ، معلش ده اجراء روتيني بيتعمل
-يارا: اها .. حاضر
-شيرين: تصدقي لحد الوقتي معرفتش اسمك بالكامل
-يارا: أنا يارا رفعت الصياد
-كابتن سليم: انتي تقريبي حاجة للمهندس رأفت الصياد ، أو الكابتن أدهم ؟؟
-يارا: أيوه ، هو عمي وأدهم ابن عمي
-كابتن سليم: مش معقول !
-شيرين: بجد ، طب ده احنا أول مرة نشوفك في النادي
-يارا: ما أنا قولت لحضرتك أنا كنت عايشة في الغردقة
-شيرين: بيتهيألي كده يا كابتن انت مش محتاج موافقة أصلاً من العضوات ، دي من عيلة الصياد وبنت عم ادهم
-كابتن سليم: لالالالا موافقة ايه بس ، الجيم كله تحت أمرها
-يارا: بس آآآ
-شيرين: من غير بس ولا حاجة ، احنا هنستناكي من بكرة تيجي
-كابتن سليم: انا هخلي العمال يجهزوا الصالة اللي فوق للأطفال ، وهعملك كارنيه خاص بالـ stuff كمان عشان تقدري تشتغلي براحتك
-يارا: طب هاروح اخد رأي عمي الأول وكده واجي أبلغكم ..
شيرين: اه طبعاً ، وانا واثقة انه هيوافق .. ولا أقولك على حاجة ، أنا هاروح أكلمه بنفسي
-كابتن سليم: انا جاي معاكي يا مدام شيرين
-شيرين: افرح يا مالوووك ، يارا هتبقى الكوتش بتاعك في النادي
-مالك بفرحة: هييييييه
لم تتوقع يارا أن يتم عرض وظيفة عمل عليها خاصة بعد أيام قليلة فقط من اقامتها في القاهرة .. ولكنها شعرت الآن أنها ستعاود ممارسة ما تحب في وقت فقدت فيه من أحبت ...
ذهبت شيرين بصحبة الكابتن سليم إلى رأفت الصياد وتحدثوا معه حول توظيف يارا في النادي و..
-شيرين: مساء الخير عليكو جميعا
-رأفت: مساء الخير
-نادية: ازيك يا شيري وحشاني
-شيرين: انتي اكتر يا نادية هانم
-صافي: فينك يا شيري ، مش باينة ليه ؟؟؟
-شيرين: أنا على طول موجودة ، ازيك يا فريدة هانم
-فريدة بقرف: هاي
-شيرين: رأفت بيه ممكن لحظة
-رأفت: خير يا هانم
-شيرين: ممكن بس أتكلم معاك كلمتين على انفراد
-رأفت: اوك ، اتفضلي
وقف رأفت مع شيرين والكابتن سليم ليتحدثوا معه بشأن موضوع يارا و..
-شيرين: من غير ما ضيع وقت حضرتك ، احنا كنا عاوزين يارا بنت أخوك تشتغل في النادي هنا
-رأفت باستغراب: تشتغل !
-شيرين: ايوه ، ماشاء الله هي ممتازة في مهارات تدريب الأطفال ، أنا شوفتها على الطبيعة ، بصراحة هي موهوبة
-رأفت: بس يارا مش محتاجة شغل
-كابتن سليم: ليه بس يا رأفت باشا
-شيرين: أنا عارفة انها مش محتاجة الشغل ده ، بس احنا عاوزينها ومحتاجينها
-يارا من الخلف: من فضلك يا عمي أنا حابة أشتغل هنا
-رأفت: بس يا بنتي أنا عاوزك تيجي تشتغلي في الشركة معايا عشان تعرفي النظام ماشي ازاي
-يارا: أنا حابة المجال ده يا عمي ، وبعدين أنا مش بفهم في اللي حضرتك بتشتغل فيه
-شيرين: احنا عاوزين يارا بس ساعتين في اليوم ، يعني مش هنعطلها كتير
-كابتن سليم: صدقني يا رأفت باشا ، الاستاذة يارا هتعمل فرق لو اشتغلت هنا معانا خصوصاً ان شغلها هيكون مع الأطفال
-شيرين: والأطفال أحباب الله
-يارا: من فضلك يا عمي وافق ، ده أول طلب أطلبه من حضرتك
-رأفت: ممم.. ماشي ، بس على شرط
-يارا: ايه هو ؟؟
-رأفت: متلبسيش أسود تاني ، مش ناقصين الأطفال تتعقد
-يارا وهي تحتضن عمها: حبيبي يا عمي
-كابتن سليم: شكراً يا رأفت باشا
-شيرين بسعادة: ميرسي يا رأفت باشا على كرم حضرتك
-رأفت: بس اوعى حد يضايق يارا ولا يزهقها
-كابتن سليم: اطمن يا رأفت باشا
..........
-نادية : هما عاوزين رأفت جوزك في ايه يا فيروو
-فريدة: مش عارفة
-صافي: أكيد حاجة تخص البنت دي
-فريدة: دي ابتلاء من ربنا والله
-ناهد: شاهي حبيبتي ، قومي اتمشي في النادي بدل ما أنتي أعدة كده
-شاهي بضيق: اوك ، لأحسن أنا زهقت
نهضت شاهي من مكانها وهي في قمة الضيق من يارا ونظرت إليها وهي تمر بجوارها نظرات احتقار وتوعد بالانتقام و...
-شاهي في نفسها: القلم اللي أخدته من اخويا النهاردة هردهولك أضعاف مضاعفة يا بنت الخدامين !!!!
انصرفت شيرين ومعها الكابتن سليم ، بينما تحدث رأفت مع يارا في أمر عملها بالشركة و...
-رأفت: بصي أنا وافقت بس تيجي النادي هنا عشان تغيري جو ، لكن ده مش معناه اني هوافق ان دي تكون شغلتك الأساسية
-يارا: يعني ايه ؟
-رأفت: يعني زي ما وافقت انك تشتغلي في النادي انتي كمان لازم توافقي تشتغلي في الشركة
-يارا: بس .. آآآ
-رأفت: انتي لازم تعرفي فلوسك رايحة فين وتفهمي الشغل ماشي ازاي عشان لما تستلمي مني ميراثك تعرفي ازاي تحافظي عليه
-يارا: اها
-رأفت: من بكرة ان شاء الله أعملي حسابك هتنزلي مع خالد ، هو اللي هيدربك ،اوك
-يارا: خالد !!
-رأفت: ايوه .. وأنا خلاص كلمته وهو وافق يدربك رغم انه كان معترض في البداية !
-يارا: اها
-رأفت: جهزي نفسك بكرة
-يارا: حاضر ..
-رأفت: يالا بينا نقعد
-يارا: اوك
..................
بعد أن قضى الجميع ليلة طيبة بالنادي ، عادوا إلى الفيلا .. حاولت فريدة أن تحسن صورتها أمام أصدقائها في النادي بكل الطرق الممكنة ، لكنها كانت حديث الجميع مما أغضبها كثيراً ، كان خالد يشعر بالضيق لأنهمضطر أن يدرب يارا على قواعد العمل في الشركة ، وكانت يارا تشعر بالتوتر من عملها الجديد .. أبلغ رأفت فريدة بنيته في تعيين يارا بالشركة فثارت كالبركان و...
-فريدة: انت بتقول اييييه ؟؟؟ كمان هتخليها تنزل الشغل ، ده اللي كان ناقصني
-رأفت: الله ، مش من حقها تعرف فلوسها بتروح فين
-فريدة: عاوزها تعرف فلوس ولادي أد أيه بنت الخدامين البيئة دي؟؟ مش كفاية اننا بنأكلها من اكلنا وأعدة في بيتنا ببلاش
-رأفت: ايه الكلام اللي مالوش طعم ده ، ايه بنأكلها ببلاش ؟؟ انتي كمان عاوزاني أخد من بنت أخويا حق النومة والآكلة
-فريدة: يوووه ، أنت عاوز بالعافية تخليها تكوش على كل حاجة ، الفيلا والولاد والفلوس كمان !!!!!!!!!
-رأفت: نامي يا فريدة ، وشيلي الأوهام دي من دماغك .. دي بنتك أخويا ومن حقها عليا اني أعوضها عن سنين الحرمان
-فريدة: أنام كده بالساهل !!!
-رأفت: اه ، اقفلي بس النور لأحسن الواحد عاوز ينعس بقى
-فريدة على مضض : ماشي .. نام يا رأفت وارتاح ع الاخر
-فريدة في نفسها : انتي حسابك تقل أوي يا بنت الشغالة !!!!
.................
في غرفة خالد ،،،،
كان خالد يشعر بالحيرة حول مسألة تدريبه ليارا في العمل و...
-خالد في نفسه: له كده بس يا بابا ، يعني انت قاصد تخليها تشتغل معايا ، انت عارف اني في الشغل معرفش أبويا .. بس طالما قررت أنا هنفذ بس مترجعش تلومني بعد كده ...... !!!!!!!
*********************
إلي هنا ينتهي الفصل الحادى عشر من رواية الفريسة والصياد بقلم منال سالم
تابع من هنا: جميع فصول رواية الفريسة والصياد بقلم منال سالم
تابع من هنا: جميع فصول رواية أشواق بقلم قسمة الشبينى
تابع من هنا: جميع فصول رواية أشواق بقلم قسمة الشبينى
تابع أيضاً: جميع فصول رواية همس الأنين بقلم آية محمد
اقرأ أيضا: رواية فى قلبى أنثى عبرية بقلم خولة حمدى
إرسال تعليق
يسعدنا تلقي اقتراحاتك أو تعليقك هنا