قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26  وموعدنا اليوم مع الفصل الرابع عشر من رواية الفريسة والصياد بقلم منال سالم 

رواية الفريسة والصياد بقلم منال سالم - الفصل الرابع عشر

تابع أيضا: قصص رومانسية

رواية الفريسة والصياد - منال سالم

رواية الفريسة والصياد بقلم منال سالم - الفصل الرابع عشر

في غرفة يارا ،،،
صعدت يارا إلى غرفتها ، وما إن فتحت الباب حتى تفاجئت بما هو موجود على فراشها و..
-يارا بدهشة : اييييه ده ؟؟؟ مين اللي جاب الحاجات دي هنا ؟؟؟؟

أخذت يارا تتفحص الحقائب وترى ما بداخلها وتفتح علب الهدايا و..
-يارا: مش ممكن ، هدوم كلاسيك ، لأ وكمان جزم وشنط !! ده مين اللي جابلي الحاجات دي ؟؟ أنا أصلاً كنت لسه محتارة هلبس بكرة ايه ، وكنت بجهز نفسي عشان اسمع كلمتين باردين من أبو الغضب ، بس الظاهر ان الحمدلله ربنا هينجيني .. بس يا ترى مين اللي جابوهم ؟؟؟ ومين عرف مقاسي ، أكيد عمي رأفت !! هو مخلصهوش اني أتهان تاني من ابنه ، ربنا يخليك ليا يا عمي ، دايماً وافق في ضهري .. أما أجرب الهدوم دي وأشوف هتطلع مقاسي ولا لأ

ظلت يارا تقييس الملابس الجديدة ووجدت أن المقاس ملائم لها إلى حد ما ، ولكن كان لديها مشكلة واحدة فقط وهي أن الأحذية ذات كعوب عالية وهي لم تعتد ارتداء مثل تلك الكعوب من قبل إلا في مناسبات محدودة و..
-يارا: الهدوم الحمد لله تقريباً مظبوطة عليا ، بس مشكلتي الوقتي مع الجزم دي ، هلبس أنا أزاي الكعب ده كله ، ده أنا كان أخري 4 ولا 5 سم مش بتاع زي ده !! أوووف هعمل أنا ايييه ، لازم أتصرف .. بس الحمدلله اني لاقيت حاجة ألبسها بكرة .. آآآآه ، ده الواحد حاسس ان جسمه كله مكسر ومدشدش ع الاخر .. المرادي أنا هظبط المنبه والموبايل عشان أصحى في ميعادي مش ناقصة كلمة بايخة من أبو الغضب !!!

حاولت يارا أن تنام ولكنها للأسف أصيبت بالأرق لخوفها من عدم تمكنها من الاستيقاظ مبكراً ، فلم تنم إلا قرب الفجر ....
....................

في غرفة خالد ،،،،
كان خالد يدور في غرفته ذهاباً واياباً ، هو يريد أن يعرف ردة فعل يارا حول ما اشتراه لها من ملابس وأشياء اخرى و...
-خالد: يا ترى الحاجة عجبتها ؟؟؟ طب هتطلع مقاسها ولا لأ ؟؟ طب هي ممكن تلبسها أصلاً بكرة ولا ترجعها زي الفلوس .. بس هي متعرفش ان أنا اللي جبتلها الحاجة ، ما انا لو قولتلها ممكن مترضاش تاخدها.. هيبان بقى بكرة .. ربنا يسهل ويهديها ...

.......................
في غرفة فريدة ،،،،،
-فريدة: الهانم راجعة مع أدهم وعمر
-رأفت: طب كويس والله ، أهي بدأت تندمج مع ادهم كمان
-فريدة: يعني انت مش معترض ع ده ؟؟؟
-رأفت : واعترض ليه ، دول ولاد عمها وهيخافوا عليها
-فريدة: ده أنا اللي خايفة عليهم منها ، دي بت مش سهلة وناوية على شر أكيد
-رأفت: يا فريدة متظلميهاش ، دي أغلب من الغلب
-فريدة: أه طبعاً ، دافع عنها زي عوايدك ، أل غلبانة أب ، دي مش مضيعها وقتها خالص ، الصبح تلاقيها مع خالد في الشغل ، وبالليل مع أدهم في النادي ، ووقت فراغها مع المفعوص الصغير عمر !!!! مش بتضيع وقتها ع الأخر .....!!!!
-رأفت: يا شيخة بلاش الكلام ده
-فريدة: ده أنا فاهمة ألاعيبها البت دي !! لكن مش هتخيل عليا ، وأنا هفضل وراها بالمرصاد
-رأفت في نفسه: احسن حاجة أعملها أني أنام ، بدل أم الاسطوانة اللي مابتخلصش دي كل يوم !!!
-فريدة: الله !! انت نمت وسبتني
-رأفت: Zzzzzzzzz
-فريدة: يا رأفت ، هو أنا بكلم نفسي ؟؟؟
-رأفت: Zzzzzzzzzz
-فريدة بقرف : اوووف !!!

..............................
في صباح اليوم التالي ،،،
استيقظت يارا مبكراً قبل أن يرن منبهها حتى ، بدأت ترتدي ملابسها الجديدة وهي سعيدة ، ارتدت يارا قميصاً أبيض اللون وجيبة سوداء تصل إلى ما بعد الركبة بقليل وتركت شعرها منساباً على ظهرها ، أما بالنسبة لمشكلة الحذاء ذو الكعب العالي فقد توصلت إلى حل ما مريح بالنسبة لها و...
-يارا بعدم تصديق وفرحة: لالالا مش ممكن ، دي انا ، لأ استحالة .. ههههههه ، أنا معرفتنيش ، ممم.. أعمل ايه مع الكعب ده .. ممم.. فكرة ، والله هتبقى حلوة ، أنا أصلاً مش هلبسه إلا في الضرورة ، حلو أوي هاخد معايا الاسبدريه وأحط الجزمة في شنطتي وأبقى ألبسها وأنا في المكتب ، ولو حد طلبني وأنا أشك في ده أبقى ألبس الكعب العالي ، اشطااا .. أما ألحق أنزل بسرعة قبل ما تشوفني أم أربعة وأربعين وأبقى أبدل الجزمة تحت ..

خرجت يارا من غرفتها وهي تمسك بالحذاء في يدها فقابلت فريدة التي اندهشت من هيئتها و...
-فريدة بصوت مرتفع وهي تنظر للحذاء : ايه المنظر البيئة ده ؟؟
-يارا بخضة : يامه
-فريدة: ايييه ؟؟؟ شوفتي عفريت ؟؟؟؟؟
-يارا: آآآآآ... لأ
-فريدة وهي ترمقها بنظرات احتقار : في واحدة تطلع من اوضتها ماسكة الشوز بالمنظر ده ولابسة حاجة تانية في رجلها
-يارا: أنا...آآآ.. يعني كنت مستعجلة وكده
-فريدة: الكلام ده مايحصلش عندي ، شغل الخدامين ده يتعمل في أي حتة تانية إلا هنا !
-يارا: ان شاء الله ، عن اذنك يا خالتي
-فريدة: اووووف، مش بتزهأي ؟؟؟
-يارا: لأ .. سلام .. يا..يا طنط أم خالد
-فريدة بضيق : بسسسس !!!!! متقوليليش كده

نزلت يارا درجات السلم وهي تبتسم لاغاظتها لفريدة و...
-يارا: ههههههههههههه ، بتجننك أم خالد ، أحسن ، ما هو أنا مش نقصاكي ع الصبح ، سيبني ألحق اروح الشغل قبل ما تبدأ خميرة العكننة التانية

وجدت يارا رأفت جالساً يتناول افطاره و..
-رأفت: تعالي يا يارا عشان تاكلي
-يارا في نفسها : أما أشكر عمي ع اللبس اللي جابهولي
-رأفت: يالا يا بنتي
-يارا: حاضر
-رأفت: ايه اللي مسكاه في ايدك ده
-يارا وهي تضع الحذاء جانباً : هه ، ولا حاجة .. !!
-رأفت: طب يالا يا بنتي افطري معايا
-يارا: اوك .. انت هتروح الشغل الوقتي يا عمي ؟؟
-رأفت: لأ مش دلوقتي ، أنا المدير
-يارا: أها ... صح

قررت يارا أن تشكر عمها و..
-يارا بتردد: عمي آآآآ....
-رأفت: ايوه
-يارا: ميرسي
-رأفت: على ايه ؟؟
-يارا : يعني ع الحاجات اللي انت جبتهالي وكده
-رأفت باستغراب: حاجات ايه ؟؟
-يارا: الـ...آآآآآ

-خالد مقاطعاً وهو ينظر ليارا: صباح الخير
-يارا في نفسها: أعوذو بالله ، النكد بدأ بدري أوي
-رأفت: صباح الخير يا بني ، تعالى أفطر
-خالد: لأ شكراً ، الساعة 9 إلا ربع ، يدوب ألحق أوصل الشركة
-يارا بفزع: ايييييييييه ، 9 إلا ربع ، أنا لازم أروح بسرررعة
-رأفت: استني أما تكملي فطارك
-يارا: اكمل ايه ؟؟ أصل أنا عندي مدير زي النسمة
-خالد: احم... أنا وافق لسه
-يارا: أنا قولت حاجة غلط ؟؟
-خالد: لأ.. ما أنا مستني تكملي
-رأفت: طيب اسبقيني وأنا هحصلك
-يارا: يعني أخلي السواق يوصلني الأول
-رأفت: أيوه ، وبعد كده يرجعلي
-يارا: أوك

جرت يارا بسرعة دون أن تدري أنها لم تأخذ الحذاء معها ، نادى عليها رأفت ولكنها لم تستمع إليه و..
-رأفت: يا يارا .. ياراااااااااا
-خالد: بتنادي عليها ليه يا بابا ؟؟
-رأفت: البنت نسيت الشوز بتاعها ع التربيذة !!!
-خالد: هه .. طب هاته يا بابا وأنا هدهولها في الشغل
-رأفت: طيب .. بس بلاش الله يكرمك عمايلك معاها
-خالد: بابا ، انت كلفتني بمهمة تدريبها فسبني أكمل للأخر
-رأفت: ربنا يستر وما تطفش

...............
وصلت يارا إلى السيارة التي ستقلها ، ثم ركبت في المقعد الخلفي وطلبت من السائق الانطلاق فوراً ، وحينما كانت في منتصف الطريق تذكرت انها نسيت الحذاء ذو الكعب العالي
-يارا: اووووبا ، ده أنا نسيت الجزمة جوا ، كده انا مش هلحق أرجع وأخدها .. أعمل ايه بس يا ربي ، ده مافيش وقت خالص .. يووووه ، لبخني أبو الغضب !! خلاص بقى هحاول ماتحركش من مكتبي كتير النهاردة وربنا يوحشه عني ..
.......................
خرج خالد مبتسماً من الفيلا لأن يارا قد ارتدت ما اشتراه لها ، وما إن تذكر هيئتها وهي تجري مهرولة حتى ضحك و...
-خالد في نفسه: الحمدلله انها لبستهم ، شكلها حلو الصراحة ، بس مجنووونة ، ممم.. انا هحط الشوز بتاعها في الـ suitcase ماهو مش معقول هدخل الشركة وانا ماسكة في ايدي ، أنا أه مدير الشركة ومن حقي أعمل اللي أنا عاوزه بس في نفس الوقت مش مجنون زي يارا ..

..........................
في الشركة ،،،،
وصلت يارا إلى الشركة قبل خالد فحمدت الله على هذا ، ثم صعدت إلى مكتبها ورغم أن الموظفين كانوا يرمقونها بنظرات غريبة إلا أنها لم تعبأ بهم و...
-يارا: الحمدلله وصلت قبله ، أخيرااااا .. ألحق أطلع المكتب .. مال الناس بتبصلي كده ليه ، عادي عادي ، امشي بثقة يا يارا ميهمكيش من حد ، محدش ليه عندك حاجة !!

.............
في مكتب يارا ،،،
ألقى الأستاذ منير التحية علىيارا حينما وجدها متواجدة في المكتب و..
-منير: صباح الخير يا بنتي
-يارا: صباح الخير يا استاذ منير
-منير: ايه الأخبار ؟
-يارا: الحمدلله في نعمة
-منير: يارب دايماً ، جاهزة للشغل من بدري
-يارا: ان شاء الله ، أديني بحاول أكمل من عند ما وقفت امبارح
-منير: تمام .. لو احتاجتي حاجة أنا موجود
-يارا: اوك
-منير: تحبي أطلبلك فطار ولا حاجة
-يارا: لأ أنا خلاص فطرت
-منير: ألف هنا .. يالا أسيبك تشتغلي بقى
-يارا: شكراً

ظلت يارا تعمل بتفاني في محاولة لأن تثبت نفسها ، ولكن فجأة انقطع التيار الكهربي دون أن تقوم يارا بحفظ ما قامت بكتابته ، فصرخت و..
-يارا: لألألألألألألألألألألأ
-منير: عادي يا بنتي ، ساعات بتحصل ان الكهربا تقطع ، الوقتي المولد الاحتياطي يشتغل
-يارا: أنا بصوت مش عشان الكهربا اتقطعت لأ عشان شغلي اللي عملته نسيت أحفظه !!
-منير: اييييه
-يارا: لألألألأ ، والله العظيم أنا مدعي عليا بالشغلانة دي ، يا حظي الأسود ، أعمل أنا ايه الوقتي
-منير: اهدي بس ، ان شاء الله كل مشكلة وليها حل ، مش يمكن تكوني حفظتي اللي كتبتيه وانتي ناسية
-يارا: ياااااا رب اكون عملت كده ، ياااااا رب

وماهي إلا بضع دقائق اخرى حتى عاد التيار الكهربي مرة أخرى ، فقامت يارا بتشغيل جهاز الحاسب الآلي الخاص بها ، ثم أعادت تشغيل برنامج الكتابة وكانت الصدمة أنها لم تحفظ أخر ما قامت بتعديله في المستند
-يارا بصدمة: تعبي !!!! لألألألألأ
-منير: برضوه يا بنتي
-يارا: الحقني يا أستاذ منير ، أعمل أنا ايه الوقتي ؟؟
-منير: لله الأمر من قبل ومن بعد
-يارا: طب..طب مافيش حد يرجع اللي عملته ، مافيش أي حل ؟؟؟؟؟؟
-منير: ممممم...

وفجأة رن الهاتف الموجود بالمكتب ، فانتفضت يارا من الفزع ، ذهب الاستاذ منير ليجيب ولكن يارا طلبت منه ألا يرد و..
تررررررررن...تررررررررررن
-يارا: الله يكرمك يا أستاذ منير متردش
-منير: ليه
-يارا: قلبي حاسس ان المكالمة دي عشاني
-منير: طب وفيها ايه ؟؟
-يارا: فيها كتيرررررر طبعاااااا ، انت مش عارف أبو الغضب
-منير: أبو الغضب مين يا بنتي ؟؟ احنا معندناش حد شغال في الشركة اسمه ابو الغضب
-يارا: عشان خاطري متردش
-منير: ثواني بس يا بنتي، يمكن حاجة مهمة
-يارا باحباط : لأ
.......
-منير هاتفياً: ألووو .. ايوه
-المتصل: .............................
-منير: طيب ، حاضر
-المتصل: .............................
-منير: اوك.

أنهى الأستاذ منير المكالمة و..
-يارا: من غير ما تكلم ، أكيد المكالمة دي عشاني
-منير وهو يهز رأسه بالايجاب: أهـــا
-يارا: اصدمني وقولي انه..انه ..آآآآآ
-منير: أيوه هو
-يارا: اللهم إني لا أسألك رد القضاء ولكن أسألك اللطف فيه !!!!!

خرجت يارا من مكتبها وهي تحمل هماً كبيراً ، تناست معه تماماً أنها ترتدي حذائاً رياضياً وتوجهت نحو مكتب خالد بالطابق العاشر
.....................

في مكتب خالد ،،،
-يارا للسكرتيرة : أبو الغضب طالب يشوفني
-السكرتيرة: نعم ؟؟؟
-يارا: أقصد المهندس خالد عاوزني
-السكرتيرة: لحظة أبلغه انك هنا
-يارا: أوك

-يارا في نفسها: يااااارب نجني منه ، ياااا رب ما أسمع كلمة بايخة ، أنا مش ناقصة حرقة دم ع الصبح و..
-السكرتيرة : اتفضلي يا آنسة يارا
-يارا: ماشي

طرقت يارا باب المكتب ، فسمح لها خالد بالدخول و..
-طق ...طق...طق
-خالد: اتفضل
-يارا: احم... انت ..آآآ..قصدي حضرتك طلبتني
-خالد: أيوه ، كنت عاوز أقولك آآآ...
-يارا مقاطعة: والله والله والله لو أعدت أحلفلك من هنا للسنة الجاية اني كنت بشتغل اكيد مش هتصدقني ، بس والله ده اللي حصل أنا كنت أعدة وبشتغل عادي ، ونسيت أحفظ اللي عملته ، فالكهربا لما قطعت أنا كنت هتشل هيجرالي حاجة، وبقالي ساعة بحاول مع الاستاذ منير نشوف حل للموضوع ده ، ماهو أنا آآآآ...
-خالد بصوت مرتفع: اييييييه ، في اييييه ؟؟؟ اهدي شوية
-يارا: أنا بحاول أوضحلك اللي حصل
-خالد: أنا جايبك لحاجة تانية خالص
-يارا بعدم تصديق: هـــه
-خالد: ع فكرة شكلك حلو النهاردة
-يارا بدهشة: نعم ؟؟؟
-خالد مكملاً: بس الشياكة دي ناقصها حاجة ولا أنا غلطان ؟؟
-يارا: ايه ؟؟
-خالد مشيراً لقدمها: آآآ...أقصد ..آآآ
-يارا: احم... اها .. ده موضوع تاني ، أنا كنت متأخرة..و..آآآ.. ونسيت احم ..قصدي ده نيو لوك جديد .. موضة يعني
-خالد: لا والله
-يارا: طبعاً
-خالد: طب افتحي الشنطة اللي هناك دي
-يارا: ليه؟
-خالد: فيها حاجة تخصك
-يارا: حاجة ايه
-خالد: افتحي وانتي هتعرفي
-يارا: اوعى يكون جواب رفدي !! ده أنا ملحقتش
-خالد: يعني أنا لو عاوز أرفدك هحطلك الجواب في شنطتي مثلاً
-يارا: أه ، تلاقيك كتبته وانت بتشرب الشاي
-خالد: لأ لسه مكتبتهوش، بس ناوي لو مفتحتيش الشنطة
-يارا: طيب ..طيب

فتحت يارا الحقيبة الخاصة بخالد لتتفاجيء بوجود حذائها ذو الكعب العالي بداخلها و..
-يارا : اييييه ده ؟؟؟
-خالد: اظن ان ده يخصك ، صح ؟
-يارا: أيوه ، بس.. بس جبته ازاي
-خالد: يعني كنت في الفيلا وقتها وآآآ ....، انتي هترغي معايا ، خديه يالا وماتنسيش تلبيسيه تاني ! مفهوم
-يارا: ربنا يسهل
-خالد بوجه عابس : اتفضلي ع مكتبك
-يارا: بس كده
-خالد: أه ... !!!!
-يارا بصوت هامس : عليك بوز الله اكبررررر..
-خالد: بتقولي حاجة ؟
-يارا: لأ ..آه .. بقول شكرااا .
في شركة الصياد ،،،
كان الجميع يعمل بهمة ونشاط لانجاز ماهو مطلوب من أعمال ، كانت يارا تشعر بالارهاق والتعب خاصة أنها لم تنم جيداً ، حاولت جاهدة أن تهني ما كلفها به خالد ، واستطاعت إلى حد ما انجاز جزء منه و..
-يارا: ها يا استاذ منير ايه رأيك في كده ؟
-منير: الله ينور يا بنتي ، تمام
-يارا: ده أنا دوخت أوي عقبال ما وصلت للطريقة دي
-منير: هي طريقة مبتكرة بس أنجزت معاكي
-يارا : الحمدلله
-منير: مش هتطلعي البريك
-يارا: لأ محتاجة أطلع فعلاً ، عاوزة أشرب كوباية نسكافيه عشان أفوق
-منير: أها ..
-يارا: بس اطبع اللي أنا عملته احتياطي عشان يكون عندنا نسخة ورقية
-منير: تمام
-يارا: أروح أطبع بقى فين ؟؟
-منير: في مكتب طباعة هنا في أخر الطرقة بس لو ملاقيتهوش شغال ، هتلاقي واحد في الدور السادس ، وواحد في الدور العاشر وفي الـ...آآآ
-يارا مقاطعة: حلو بتاعنا ، ولو ملاقتش هاطلع ع السادس ، وربنا يبعد عنا العاشر
-منير: هههههههههه ، دمك خفيف يا بنتي
-يارا: الله يكرمك يا أستاذ منير

.....
ذهبت يارا لتطبع الورق الخاص بها في مكتب الطباعة في نفس الطابق ولكن كان مغلق لأنها فترة الراحة ، فقررت أن تصعد للطابق السادس وكذلك كان الحال .. فلم يعد أمامها إلا الطابق العاشر لتصعد اليه و..
-يارا: لو سمحت .. بعد اذنك !
-أحد الموظفين: خير يا آنسة ..
-يارا: هو المكتب مش شغال ولا ايه ؟؟؟
-أحد الموظفين: هما في البريك يا آنسة
-يارا: اها .. طيب المكتب اللي في السادس شغال
-أحد الموظفين: ممكن تلاقيه برضوه في وقت البريك ، اللي مش بياخد بريك وشغال دايماً المكتب اللي في العاشر
-يارا: الظاهر انه اتكتب عليا أطلع العاشر
-أحد الموظفين: في حاجة يا آنسة ؟؟
-يارا: هه .. لأ مافيش ، شكراً ع مساعدتك
-أحد الموظفين: العفو ..

......... اضطرت يارا أن تصعد إلى الطابق العاشر لتطبع الورق الذي انجزته ، كانت تتمنى في نفسها ألا ترى خالد و..
-يارا: أووووبا ده أنا نسيت ألبس الجزمة أم كعب، يارب مايشوفني ، ده ممكن يعملي فيلم من الموضوع الهايف ده ، أنا أحسن حاجة أعملها أطبع وأخلع من هنا ، بس فين مكتب الطباعة اللي هنا ..

استوقفت يارا أحد الموظفين لتعرف منه مكان المكتب الخاص بالطباعة و...
-يارا: لو سمحت فين مكتب الطباعة الموجود هنا ؟
-موظف وهو يشير لها بيده : هناك يا استاذة جمب سكرتارية المهندس خالد

-يارا: ايييييه ؟؟ يادي الحظ ، استر يا رب !

توجهت يارا نحو مكتب الطباعة وهي تدعو الله ألا تصادف خالد و...
-يارا: يارب ما أقابله ، يارب ألبخه في أي حاجة ، يااا رب

قامت يارا بطباعة الأوراق وحمدت الله أنها قاربت على الانتهاء من هذا في وقت قصير ، ولكنها سمعت صوتاً عالياً بالخارج فنظرت من الباب لتجد أن خالد يوبخ شخصاً ما لأنه أوقع بدون قصد المشروب الخاص به و...
-خالد بصوت عالي : دي اسمها مهزلة !!!!
-موظف: أسف يا فندم
-خالد: الكافيتريا معمولة ليه ان شاء الله ؟؟؟ مش عشان الأكل والشرب يبقى فيها
-موظف: يا فندم آآآ...
-خالد: اتفضل ابعت حد ينضف اللي عملته ده ، وده أخر تحذير ليك
-موظف: دي ..دي أول مرة يا...يا بشمهندس خالد
-خالد: ماهي عشانها أول مرة فأنا بحذرك بعد كده هيكون في كلام تاني ، فاااااااااااهم !!!
-موظف بخوف : حـ...حاضر

-يارا من داخل المكتب : يا مصيبتي !!! ده..ده واقف برا ، ده ممكن يجي يدخل هنا ، طب أروح فين ؟؟ ده واحد وقع شوية بتاع ع الأرض مسح بيه البلاط ، اومال لو شافني كده هيعمل فيا ايه ؟؟ مش بعيد يقيم عليا الحد

انصرف خالد إلى مكتبه ، فتنفست يارا الصعداء و..
-يارا: الحمدلله ، مشى ، يا سلااااااام ..
-يارا للموظف: الله يكرمك خلص اللي ناقص
-الموظف: حاضر ، لحظة ، أنا كنت بنسقلك الورق قبل ما أطبع
-يارا: طيب

أخذت يارا الورق ، ثم خرجت من المكتب الخاص بالطباعة ، كان عامل النظافة يقوم بمسح الأرضية وتنظيفها ، ثم قام بوضع لافتة تشير إلى أن الأرضية مبللة ، توجهت يارا نحو المصعد ، ولكنها وجدت خالد يوليها ظهره ويتحدث في الهاتف ، فتسمرت في مكانها لثواني ثم جرت بسرعة من حيث جاءت و...
-يارا بصدمة: اوووبا ده...ده.. ده هنا !!!
-خالد هاتفياً : لأ تمام ، اديهم ميعاد كمان يومين ان شاء الله

انتبه خالد لصوت يارا فالتفت ليجدها تسير بخطوات سريعة فنادى عليها مما أربكها وجعلها تجري فارة من أمامه و..
-خالد وهو يلتفت لها : يااااارا !!!
-يارا وهي تمشي سريعاً : يارب ما يشوفني ، يارب مايشوفني
-خالد: يارااااا ..!!! استني !!!
-يارا: ده شافني ،ده شافني

لحق خالد بيارا ، ولكنها جرت بسرعة ولم تنتبه للأرض المبللة ، ولأنها كانت ترتدي حذاءاً رياضياً سهل هذا إنزلاقها على الأرض و...
-يارا وهي تجري : ياااااااني ، ده شافني !!!!
-خالد من خلفها : ياااااارا استني أنا بكلمك !!!
-يارا: لألأ..
-خالد بصوت مرتفع: يااااااااااااارا ، حااااااااااسبي
-يارا بصراخ وهي تطير في الهواء: عااااااااااا ، آآآآآآآآآآآآه !!!!
-خالد: حااااااااااااسبي

طاااااااااخ ...
-يارا متآلمة : آآآآآه ...

انزلقت يارا على الأرض فأسرع خالد إليها ، وكذلك بعض الموظفين على أثر صراخها العالي وحاولت احدى الموظفات مساعدتها على الوقوف
-يارا: رجلي .. آآآآه ، رجلي ، مش قادرة
-خالد: انتي أكيد هبلة يا مجنونة
-يارا: آآآآه
-خالد: في حد يعمل الجنان ده ، يعني مش شايفة الأرض مبلولة ازاي ؟؟؟
-موظفة ما: حضرتك كويسة يا آنسة؟
-موظف اخر: حد يساعدها تقف
-موظفة ثانية: هاتي ايدك ..
-يارا: اه يا رجلي ، هو ده وقتك
-خالد: ما أنتي اللي مش واعية لنفسك
-يارا متآلمة : آآآه... وهو حد يشوفك ويبقى ع طبيعته
-خالد: أفندم ؟؟
-موظفة ما: تقدري تقفي عليها
-يارا: أها.. هحاول ، بس ايدك معايا الله يكرمك
-موظفة ما وهي تمد يدها : هاتي ايدك
-يارا وهي تستند عليها : شكرااا
-خالد بصوت مرتفع : الكل يروح ع مكتبه فوراً ، وسيبوها ، يالااااااااااا
-تنوعت ردود الموظفين : حــ..حاضر ، تمام يا فندم
-يارا في نفسها: آآآه ، أما انت معندكش دم صحيح .. يعني مستخسر حتى ان البت تسندني لمكتبي

وما إن تأكد خالد من انصراف الموظفين إلى عمله حتى اقترب من يارا و...
-خالد: انتي جريتي ليه ؟
-يارا: آآآ... آآآآ...
-خالد: انتي هتهتهي تاني ؟
-يارا: لأ .. بس آآآآ...
-خالد وهو يجذبها من ذراعها : طب تعالي معايا
-يارا متآلمة: آآآه .. طب بالراحة ، انا ...
وفجأة حمل خالد يارا وتوجه بها نحو مكتبه و...
-يارا بخضة: انت .. بتعمل ايه
-خالد: ولا حاجة
-يارا: عيب مايصحش ، ده ..ده في موظفين وأنا ..أنا شكلي بقى فانلة خالص قصادهم
-خالد: نعم ؟؟ شكلك بقى ايه ؟؟؟
-يارا: أقصد شكلي ومنظري قصادهم آآآ...
-خالد: يا شيخة ، وقبل كده كان عادي ، وبعدين لو كنتي ناسية فأنا مدير الشركة وأعمل اللي عاوزه
-يارا: بس شوفتني وأنا بعمل بلانس في الهوا
-خالد: كنتي مسخرة

أجلس خالد يارا على الأريكة الموجودة بمكتبه ، وجلس على ركبتيه وأمسك بقدم يارا و...
-يارا: انت هتعمل ايه تاني ؟؟
-خالد: هشوف رجلك
-يارا: وتشوفها ليه ، هي...هي كويسة
-خالد: ششششش... اسكتي شوية خليني أشوف رجلك مالها
-يارا بتوتر : لألأ.. آآآه ..
-خالد: بس متتحركيش كتير
-يارا باحراج: ايه اللي بتعمله ده ..
-خالد وهو يفحص قدمها : مممم... ان شاء الله بسيطة

فحص خالد قدم يارا فوجدها ملتوية قليلاً ، فدخل إلى الحمام الملحق بغرفته وأحضر من الداخل مرهماً خاصاً بالكدمات و...
-خالد: اعتقد ان ده هيجيب نتيجة معاكي
-يارا: ايه ده
-خالد: ده مرهم عشان الكدمات
-يارا: أها ... شكراً
-خالد: مدي رجلك شوية
-يارا: أفندم ؟
-خالد: عشان أدهنهالك
-يارا: لأ كله إلا كده ، أنا هدهن لنفسي

ثم فتح الباب فجأة رأفت الصياد ، فارتبكت يارا لرؤيته وحاولت أن تنهض من مكانها ولكنها تآلمت للحركة الفجائية و...
-رأفت: احم.. هو انا جيت في وقت غير مناسب ولاحاجة
-يارا بفزع وآلم : عمو رأفت ..آآآآآه
-خالد ببرود: أهلا يا بابا ، تعالى
-رأفت: في ايه اللي حصل
-خالد: يارا حبت تلعب باليه مائي في الشركة فوقعت
-رأفت: مايوقع إلا الشاطر ، انتي كويسة ؟؟
-يارا وهي تدهن قدمها بالمرهم : أها .. الحمدلله
-رأفت: ألف سلامة عليكي ، أنا بأكد عليك يا خالد على معاد الاجتماع مع الوفد الألماني كمان يومين
-خالد: أها ، خلاص عرفت يا بابا وظبطت الدنيا
-رأفت: طب تمام
-يارا باحراج: استناني يا عمو عشان أنا جاية معاك
-خالد باستغراب: بس أنا لسه آآآآ...
-يارا مقاطعة : شـ...شكراً ع اللي عملته معايا يا خــ...يا بشمهندس ، عن اذنك

خرجت يارا بصحبة عمها ، كانت تعرج قليلاً ولكن حدة الآلم بدأت تخف تدريجياً بفعل المرهم الخاص بخالد ، ثم عادت إلى مكتبها مرة أخرى فاستغرب الأستاذ منير من حالتها و..
-منير: ايه اللي حصلك يا بنتي ؟
-يارا: ولا حاجة ، اصابة عمل
-منير: يا ساتر يا رب ، طب انتي كويسة
-يارا: الحمدلله
-منير: طبعتي الورق
-يارا وهي تخبط كفها في رأسها : اوباااا ... الورق !!!

..................

في فيلا رأفت الصياد ،،،،
استيقظ أدهم ونزل إلى الأسفل ليجد والدته تتحدث هاتفياً مع أختها ناهد و..
-فريدة هاتفياً: طبعاااا يا ناهووود ، ده احلى عيد ميلاد هيتعملها ، هو احنا عندنا أغلى من شاهي
-ناهد: تسلميلي يا فريدة ، مش هوصيكي ، وكلكم طبعاً معزومين
-فريدة: هو احنا محتاجين عزومة ، ده احنا أصحاب مكان
-ناهد: أكييييد طبعاااا
-فريدة: ماتشليش هم حاجة ، أنا هتصرف
-ناهد: ربنا يخليكي ليا
-فريدة: طيب ، سلام دلوقتي عشان أدهومة صحى وأنا هظبط معاه الدنيا
-ناهد: سلميلي عليه أوي ، وباي
-فريدة : باي

أنهت فريدة المكالمة مع أختها لتجلس وتتحدث مع أدهم و...
-فريدة: صباح الخير يا ادهومة
-أدهم: صباحك جميل زيك يا فيرووو
-فريدة: ادهومة بقولك ايه ، عيد ميلاد شاهي كمان يومين وعاوزاك بقى تبهرنا زي كل سنة
-أدهم بعدم اكتراث : ان شاء الله
-فريدة : مالك يا حبيبي ، شكلك مأريف ليه كده ؟
-أدهم: عادي يا فيرووو ، تلاقيني بس محتاج أشرب مج كابتشينو ولا حاجة عشان أفوق
-فريدة: انا هخلي صباح تعملك الوقتي واحد ، وبالمرة نفطر سوا
-أدهم: اوك ، اومال البيت ماله ساكت كده ليه ؟؟
-فريدة بقرف: طبعاً طالما بنت الخدامة مش فيه هتلاقينا رجعنا للهدوء تاني
-أدهم: يارا !! ليه ؟؟ هي راحت فين ؟؟
-فريدة: باباك أخدها معاه الشركة
-أدهم بدهشة : نعم ؟؟؟ بتقولي ايه ؟؟؟ الشركة !!!
-فريدة: ايوه ماهو الهانم مش بتضيع وقت ، بعد ما حطت رجلها في الفيلا ، قالت تحط رجلها في الشركة كمان !!
-أدهم: الكلام ده حصل من امتى ؟؟
-فريدة: من امبارح ، انت بتسأل ليه ؟؟؟
-أدهم: يعني هي مع بابا الوقتي ؟
-فريدة: لأ ... مع أخوك خالد ، ماهو بابا مخلصهوش ان حد غريب يدربها ، فخلى خالد هو اللي مسئول عنها ...!
-أدهم: اييييييه ، خـــــــالد !!!!!!!
-فريدة : ايوه .. والهانم مصدقت صاحية من النجمة عشان تلحق تروح وتعجب و..آآآ
-ادهم مقاطعاً: ماما أنا هنزل اشتغل في الشركة

*********************

إلي هنا ينتهي الفصل الرابع عشر من رواية الفريسة والصياد بقلم منال سالم

تابع من هنا: جميع فصول رواية الفريسة والصياد بقلم منال سالم
تابع من هنا: جميع فصول رواية أشواق بقلم قسمة الشبينى

تابع أيضاً: جميع فصول رواية همس الأنين بقلم آية محمد

تابعوا صفحتنا على الفيس بوك للمزيد من القصص الرومانسية
حمل تطبيق قصص وروايات عربية من جوجل بلاي

اقرأ أيضا: رواية فى قلبى أنثى عبرية بقلم خولة حمدى