مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26 وموعدنا اليوم مع الفصل السابع من رواية الفريسة والصياد بقلم منال سالم
رواية الفريسة والصياد بقلم منال سالم - الفصل السابع
تابع أيضا: قصص رومانسية |
| رواية الفريسة والصياد - منال سالم |
رواية الفريسة والصياد بقلم منال سالم - الفصل السابع
-فريدة: طبعاً الكل نايم ومش على باله الفطار
-رأفت: خلاص يا فريدة مجتش من يوم
-فريدة: أيوه ماهي بدأت بنت الـخـ...
-رأفت: ها قولنا ايه يا فريدة
-فريدة: اوووف
-فريدة بنرفزة : صبااااااااااااح .. صبااااااااااح ..
-صباح من الداخل : ايوه يا هانم
-فريدة: روحي صحي البهوات كلهم ، وقوليلهم عشر دقايق ويكونوا تحت ، وإلا هاطلع أنا بنفسي وساعتها مش هيحصل طيب
-صباح وهي تنظر رأفت : طب و.. والست يارا هانم
-فريدة : أوووام عملتيها هانم !!!
-صباح : أنا..أنا مقصدش يا فريدة هانم
-رأفت: خلاص يا فريدة ، سبيها تنام هي تعبانة برضوه
-فريدة: طول ماهي أعدة في البيت ده يبقى لازم تمشي ع نظامي ، وده اللي عندي
-رأفت : ماشي
-فريدة: اطلعي صحي الهانم اللي فوق ، وبقية البهوات
-صباح : حاضر
صعدت صباح إلى الغرف العلوية لتوقظ الجميع ، وبدأت بغرفة خالد و..
-صباح وهيتطرق الباب : خاااالد بيه ( طق..طق ..طق) ، اصحى يا خالد بيه
-خالد من الداخل: أنا صاحي يا صباح ، هلبس ونازل على طول
-صباح: ماشي يا خالد بيه
-خالد: بلغي ماما إني رايح ع الشركة وهافطر هناك عشان لسه ورايا شغل متعطل
-صباح: حاضر يا خالد بيه
ثم توجهت ناحية غرفة عمر لتوقظه و...
-صباح وهي تطرق الباب : (طق ..طق ..طق ) يا عمر بيه ، اصحى ! ( طق..طق ..طق ) يااااااا عمر بيه
-عمر بصوت ناعس: والنبي يا صباح سيبني أنام
-صباح: ان كان عليا يا بني هاسيبك تنام للمغرب ، بس دي تعليمات الست فريدة هانم
-عمر : يوووه ، طالما تعليمات فريدة هانم يبقى لازم أصحى وإلا مش هاخلص
ثم توجهت لغرفة يارا لتوقظها و...
-صباح: يا آنسة يارا ( طق..طق ..طق)
-يارا من الداخل : تعالي يا صباح
-صباح: صباح الفل عليكي يا ست البنات
-يارا: صباح الخير عليكي
-صباح: ماشاء الله صاحية من بدري
-يارا: هو أنا عرفت أنام أصلاً ، انا مش متعودة أنام غير في سريري
-صباح: معلش يا بنتي يومين وهتتعودي
-يارا: ان شاء الله
-صباح: بقولك يا بنتي الست فريدة هانم بـ.....
-يارا في نفسها: الحيزبونة
-صباح: معايا يا بنتي
-يارا: أيوه ، مالها
-صباح: هي بتقولك تيجي تنزلي تفطري معاها ومع بقية العيلة تحت
-يارا: ماليش نفس ، وبعدين أنا في العادة مش بفطر
-صباح: حتى لو مالكيش نفس يا بنتي ، انزلي برضوه ، نصيحة مني اتقي شر الست دي عشان تقدري تعيشي في البيت ده
-يارا: هو أنا هخاف منها !! ده هي اللي لازم تتقي شري
-صباح: ربنا يكرمك يا بنتي ويحميكي
-يارا: تسلميلي يا صباح ، وأنا جاية وراكي
لم تعلم صباح أن ادهم قد عاد إلى الفيلا لذا لم تتوجه إلى غرفته لتوقظه كالباقين ، وإنما عادت أدراجها للأسفل لتبلغ فريدة الرفاعي باتمامها المهمة ..
-صباح: خلاص يا هانم ، كلهم صحيوا ، بس خالد بيه هيروح ع الشركة ومش هيفطر !
-فريدة: برضوه !! طيب تمام ، روحي انتي هاتي بقية الفطار
-صباح: حاضر
خرجت يارا من غرفتها وتوجهت نحو الأسفل ، هي إلى الآن لا تعلم أين أماكن الغرف و..
-عمر: صباح العسل
-يارا: ايييه ده عمر ، انت صحيت
-عمر: هو أنا أقدر مصحاش ، ده احنا نروح في داهية
-يارا: ممم...
-عمر : بس ايه الشياكة دي ؟؟
كانت يارا ترتدي بيجاما بناتي من القطن ، لونها أصفر في أبيض ، شكلها بسيط ورقيق ، هي تبدو مناسبة للجلوس في المنزل ولكنها بالتأكيد تتنافى مع نظام فريدة هانم الرفاعي الصارم والذي يقتضي التواجد بالملابس الكاجوال أو الكلاسيك في أرجاء الفيلا وغير مسموح بتاتاً بارتداء أي ملابس للنوم أو ما يشبهها خارج غرفة النوم ...
-يارا: تريقة دي ولا ايه ؟
-عمر: احم.. مقدرش أقولك ، بس فريدة هانم هي اللي هتقرر ، وأعتقد آآآآ... لأ ده أنا متأكد انه من وجهة نظرها دي كارثة من الكوارث
-يارا بخبث: قولتلي بقى
-عمر: نصيحة تغيري قبل ما تنزلي
-يارا: تؤ ... انا كده فل
-عمر: أهلاااا بالمعارك الصباحية
-يارا في نفسها : لأ وفي كل الأوقات ، هو أنا هاسيبها ، ده انا هبقى زي عملها الرضي !!!
توجهت يارا مع عمر إلى غرفة الطعام ، وما إن رأت فريدة هيئة يارا حتى شهقت وعلى وجهها نظرة صدمة ولم تقو على بلع اللقمة و...
-يارا: صباح الخير
-عمر: Good morning
-رأفت: صباح الخير يا ولاد
-فريدة بصدمة : ايه المنظر اللي أنا شايفاه ده ؟
-يارا: في ايه ؟
-فريدة: ايه اللي انتي لبساه ده ؟؟
-يارا وهي تسحب الكرسي لتجلس : دي بيجاما قطن
-فريدة: ما أنا عارفة انها زفت بيجاما ، لابساها ليه ؟؟؟؟؟؟
-يارا: أومال عاوزاني ألبس ايه ؟؟
-رأفت: خلاص يا فريدة ، هي لسه متعرفش نظامك
-فريدة: قومي غيري هدومك ، متقعديش معانا وانتي لابسة كده
-يارا: والله أنا طول عمري باقعد مع نوجة بالشكل ده وكان عاجبها ، ده حتى البيجاما قطن 100%
-فريدة: قطن ايه وزفت ايه ، أنا بقولك غيــ...
-يارا مكملة : انتي عارفة دي جايباها منين ؟؟ من الأسر المنتجة ، حاجة فخيمة ومريحة في الأعدة ، أنا ممكن اجيبلك واحدة ع فكرة ، بس يا رب ألاقي مقاسك لأحسن الحاجات دي بتتخطف خطف
-فريدة: بسسسسس ، اسكتي متتكلميش
-يارا : ليه بس يا مرات عمي ولا أقولك يا خالتي ؟؟؟ انهو بتحبيه ؟؟؟؟
-فريدة بضيق: انتي عاوزة تنقطيني ؟؟
-يارا: بعد الشر عنك يا خالتي ، ده انتي لسه في عز شبابك
-فريدة: اوووف ، متقوليش خالتي دي !!!!!
-عمر هامساً لوالده : اوووبا هيسخنوا ع بعض
-رأفت: اتفرج وانت ساكت
-عمر: الظاهر ان يارا هتعمل اللي البيت كله عجز عن عمله
-رأفت: يوضع سره في أضعف خلقه
-عمر: أيون
-رأفت بصوت مرتفع: هاقوم انا عشان ألحق الشركة ، أشوفكم بعدين
-فريدة: اوك
-عمر: باي
-يارا: مع السلامة يا عمي
لم ينم أدهم جيداً ليلة أمس ، ظل يشغل تفكيره ( بنت عمه ) ، فقرر أن يبدأ معركته معها مبكراً ، ارتدى ملابسه الكاجوال ، ونظر في المرآة فوجد آثار الخربشة على خده الأيمن ، اغتاظ من يارا وتوعدها بالرد على ما فعلت ، ثم نزل إلى الأسفل ليتفاجيء بوجود الجميع في غرفة الطعام ، والمناقشة محتدمة بين والدته ويارا ..
-أدهم في نفسه وهو يتحسس أثر الخربشة : ده الكل صاحي !!! مممم... حلو أوي خلينا نبدأ من بدري عشان أخلص من الليلة دي كلها
دلف أدهم إلى غرفة الطعام و..
-فريدة بدهشة : أدهم !!! انت رجعت امتى يا حبيبي ؟؟
-ادهم وهو ينظر ليارا: بالليل
-فريدة: حمدلله ع سلامتك يا حبيبي ، مش كنت تعرفني
-أدهم: عادي يا فيروووو
-فريدة: ايه اللي في وشك ده ؟؟؟؟
-عمر مقاطعاً : ده كان يا ماما من يــ...
-أدهم مقاطعاً: من قطة جديدة كنت بهوشها فخربشتني
-عمر موضحاً : لأ يا أدهم ، انت نسيت ده كان من آآآ...
-أدهم مقاطعاً : انا عاوز أفهم يعني هو انت اللي اتخربشت ولا أنا ؟؟؟ كُل يا عمر وانت ساكت .. هااااا كُل !!!
-عمر: احم... طيب
اقترب أدهم من يارا ، وسحب الكرسي الموضوع بجوارها و...
-أدهم هامساً: ع فكرة انتي أعدة في مكاني
-يارا بقرف: مكانك ؟؟ ليه يعني كان مكتوب عليه اسمك وأنا معرفش !!!
-أدهم: نعم ؟؟
-يارا: اللي هلاقيه فاضي هاقعد عليه ، ولو عاوزه ابقى انزل احجزه من بدري !
-أدهم: ليه هو صوان ؟؟ .. بصي أنا سايبهولك بمزاجي
-يارا: وعلى ايه ، خده اشبع بيه ، أنا هاقعد جمب خالتي اللي بحبها
-أدهم بدهشة : خالتك مين ؟؟؟؟
قامت يارا من مكانها وتوجهت بالقرب من فريدة ، ثم قامت بصب الشاي لنفسها ،و تقليبه ، وما إن انتهت حتى أخرجت الفتلة الخاصة بكيس الشاي وقامت بلفها على الملعقة لتعصر ما بها ، وبينما كانت تفك اللفة من على الملعقة حتى انطلق الكيس كالطلقة وسقط في طبق فريدة
-فريدة بفزع : اييييه القرف ده ؟؟
-يارا: معلش يا خالتي ، الكيس فط مني وأنا بعصره ، لا مؤاخذة مقصدش
-فريدة وقد قامت من مكانها : بيئة !!!
-يارا مبتسمة: وغلاوتك عندي يا خالتي أنا مقصد إلا كل خير
-فريدة: ادهــــــــــم ، تعالى معايا عاوزاك
-أدهم: أنا لسه مفطرتش
-يارا: قومتي ليه خالتي ، اعدي كملي فطارك
-فريدة بحدة: أدهم !!! تعالى بقولك
-أدهم: اوك يا فيرووو
انصرفت فريدة وهي في قمة الغضب ، بينما مال أدهم على يارا و..
-أدهم: وهو اللي يصب الشاي برضوه ينشن ع ..ع خالته !!!
-يارا: روح ورا أمك لأحسن تستعوأك
-أدهم: تـ.. ايه ؟؟
-يارا: الحقها بس
-فريدة بصوت عالي : اااااااااااااادهم !!!
-يارا: شوفت مش قولتلك !!
-أدهم: هاروح أشوفها وراجعلك .. ده انا مش ورايا إلا انتي !!!
-عمر ضاحكاً: هههههههههه يا بنت الايه ، ده انتي مصيبة ، اتعلمتيها ازاي الحركة دي
-يارا مدعية البراءة : احم.. بقولك مقصدش
-عمر: ياما نفسي أبقى زيك كده
-يارا: مش انا أعدة معاكو ، هعلمك كل حاجة
-عمر: ياااااااااااااااا ريت
....................
جلست فريدة مع ادهم لتخبره بما حدث في غيابه ، وتطلب منه معاونتها في طرد يارا من الفيلا في أسرع وقت ممكن ...
-أدهم: مممم.. قولتيلي بقى ، يعني طلعت البت دي بنت شغالة كانت عندك
-فريدة: ايوه ، تخيل انت بقى !!!!
-أدهم: أهـــا
-فريدة مكملة : لأ وأبوك مصمم تعيش معانا البنت البيئة دي تربية الشغالين
-أدهم: ممم..
-فريدة: طب انت يرضيك يا حبيبي البهدلة اللي حصلتلي في غيابك؟
-أدهم: لأ طبعاً يا فيرووو
-فريدة: أنا اتبهدلت أوي ، ومحدش في البيت عاوز يقف معايا
-أدهم: اطمني يا فيرووو ، أنا موجود دلوقتي معاكي
-فريدة: عاوزاك يا أدهومتي تساعدني
-أدهم: في ايه يا ماما
-فريدة: اننا نطرد بنت الخدامين دي من هنا
-أدهم: بس.. بس بابا ممكن يضايق و...آآآ
-فريدة: وانت خلاص بقيت بتخاف ع زعل أبوك ؟؟
-أدهم: لأ ، بس يعني في الأول والأخر هي بنت عمنا و...
-فريدة بحدة: خلاص مش عاوزة مساعدة منك أنا آآآآ...
-أدهم مقاطعاً: اهدي يا فيرووو، انا معاكي في اللي تعوزيه
-فريدة بفرح : حبيبي يا بني ، أنا قولت من الأول ماليش في البيت ده إلا أنت
-ادهم وهو يقبل يد أمه: طبعاااااا يا فيرووو ، اعتمدي عليا في الموضوع ده
-فريدة: وأنا من جهتي هكرها في عيشتها
-أدهم: أيامك بقت معدودة في البيت ده يا ..يا بنت الـ .....
في فيلا ناهد الرفاعي ،،،
كانت شاهي تشعر بالغضب في داخلها بسبب وجود يارا في مكان واحد مع أدهم و...
-شاهي : يعني أنا بالعافية مستحملة أصحابه اللي في النادي ، وأهي كانت بتبقى ساعة ولا اتنين بالكتير وتخلص ، دلوقتي يطلعلي في المقدر بنت الشوارع دي ، كنت ناقصاها هي كمان !!! أنا لازم أتصرف وأخلي البت دي تمشي فوراً من قصاد أدهم لأنه مش هيرتاح إلا لما يشاغلها وألاقيني في منافسة معاها ، وهي هتكون كفتها ربحانة عني لأنها في وشه 24 ساعة.. أيوه أنا هاقف مع أنطي فريدة لحد ما نطرد البت دي خالص !! بالظبط ده اللي أنا هعمله .. استعدي لأيام سودة يا بنت الخدامين .... !!!!
-ناهد: شااااهي .. شاهي
-شاهي : هه ، بتقولي حاجة يا مامي
-ناهد: ده أنا بكلمك من الصبح وانتي في وادي تاني
-شاهي : أها
-ناهد: اللي شاغل بالك
-شاهي: مافيش
-ناهد: ممم..ع مامي برضوه
-جاسر من بعيد : صباح الخير عليكو
-ناهد: صباح الخير عليك يا بني
-جاسر: انا رايح الشغل ، حد فيكو عاوز حاجة مني
-شاهي : اه يا جاسر ، بليز ممكن توصلني ع أنطي فريدة قبل ما تروح شغلك
-جاسر: احنا مش كنا لسه عندهم بالليل
-شاهي: بليز جاسر
-ناهد: وانتي عاوزة تروحي تاني هناك ليه ؟؟
-شاهي : آآآ... هاروح أطمن ع أنطي فريدة
-جاسر: ليه يعني ؟؟؟ ده دي الوحيدة اللي تطمني انها حارقة دم الكل وعادي
-شاهي: الله ، لو مش عاوز توصلني ، it's okay ، هاسوق أنا العربية التانية
-جاسر: اوووف، طب قدامك 5 دقايق تجهزي ، لو جت الدقيقة 6 وانتي مجهزتيش همشي
-شاهي : ع طووول أهوو
-جاسر: مش مرتاح لزيارة شاهي لخالتي
-ناهد: ولا انا
-جاسر: ماما خلي بالك من شاهي ، لأنها بجد هتبقى نسخة مصغرة من فريدة هانم
-ناهد: ربنا يستر
-جاسر: يارب ، احنا كفاية علينا واحدة ، مش ناقصين 2
....................
في فيلا رأفت الصياد ،،،،
-عمر: بقولك يا يارا ، ايه رأيك نروح النادي
-يارا بدهشة : نادي !!!!
-عمر: ايوه ، بدل أعدة البيت دي ، تعالي معايا أهوو أعرفك ع أصحابي وكده
-يارا: هههههههههههه انت ليه محسسني انك واحدة صاحبتي مش ابن عمي
-عمر: ما أنا معتبرك واحد صاحبي
-يارا: نعم ؟؟؟؟
-عمر: مقصدش يعني ، اللي أقصده انك أقرب حد ليا في البيت ده ، الكل هنا همه نفسه وبس ، محدش بيحكي معايا ولا بيقرب مني ولا يعرف مشاكلي ، احنا بس بنتقابل ع الغدا تقضية واجب والسلام ، لكن انتي من أول ما جيتي وأنا حاسس اننا شبه بعض
-يارا: ده انا لسه مش بقالي يوم في البيت ده ، ولحقت أعمل كل ده
-عمر: بجد أنا نفسي تعيشي معانا على طول
-يارا: الله أعلم
-عمر: احنا مالنا قلبناها دراما كده ليه ، يالا بس البسي وخلينا نغير جو ، وانا هاقول للسواق يستنانا
-يارا: أوك
.........
بالفعل بدأت يارا تستعد للذهاب إلى النادي ، لم ترتدي إلا جينز أسود وقميص أسود اللون فوقه ، خرجت من غرفتها لتجد عمر في انتظارها و...
-عمر بفزع: انتي لابسة أسود ليه ؟؟؟
-يارا: انت ناسي ان جدتي ماتت ربنا يرحمها يا رب
-عمر: يا رب
-يارا مكملة : ع فكرة أنا مش ناوية أقلع الأسود ده
-عمر: لأ انا عاوزك تقلعيه
-يارا: لأ ماينفعش
-عمر: ليه بس لازم تقلعي
-أدهم من خلف يارا: ما تقلعي وتريحي عمورة
-يارا بخضة: هـــــاااااااااه
-أدهم بابتسامة : اييييه خضيتك
-يارا: في حد يكلم حد بالشكل ده ، خضتني !!!!
-أدهم: اووووه ، مكونتش أقصد سلامتك من الخضة يا جميل
-يارا متجاهلة أدهم: يالا يا عمر لأحسن نتأخر
-أدهم : ع القلع ؟؟؟
-يارا: استغفر الله العظيم يا رب ، انت فاكر نفسك ظريف لا سمح الله ؟
-أدهم: طبعااااااا
-يارا: انت أخد مقلب في نفسك ع فكرة
-أدهم: لا والله
-عمر: احنا هنفضل نرغي كده كتير ، يالا لأحسن اتأخرنا
-يارا: عندك حق يا عمووورة
-أدهم : انتو رايحين فين كده ؟؟
-يارا: ملكش فيه
-أدهم: لأ ليا
-عمر: يا عم ع النادي ، فيها حاجة دي
-أدهم: خدت اذن من مامتك يا كتكوت انت ؟؟؟
-عمر: لأ ، ودي فيها حاجة دي كمان
-أدهم: اه طبعااااا ، لما تروح لوحدك عادي ، لكن لما تاخد معاك بنت الخدامة يبقى آآآ.....
وفجأة دوت صفعة قوية ع وجه أدهم من يارا الذي لم يتوقع هذا منها ، كاد أن يفتك بها ولكن وقف عمر حائلاً بينهما و...
طااااااااخ
-يارا بغضب: أخرررررس ، قطع لسانك قبل ما تجيب اسمي ولا اسم حد من عيلتي ع لسانك
-أدهم والشرر يتطاير من عينيه : انتي اتجننتي
-عمر وقد حال بينهما : يا جماااعة
-أدهم: ازاي تمدي ايدك عليا
-يارا: لما تغلط في عيلتي يبقى ماتستهلش إلا كده
-أدهم: وانا هدفعك تمن القلم ده غالي
-يارا بثقة : أعلى ما في خيلك اركبه ، أي حد هيغلط فيا أو في أهلي هردله الاهانة باهانة ، فاااااااهم !!!!!!!
-أدهم: ان ماوريتك مابقاش أنا أدهم الصياد
-يارا مدعية الخوف : ياااااا مامي خفت
-أدهم: أحسنلك تخافي ، لأنك وقعتي مع الصياد !
-أدهم بحنق لعمر : تعالى يا زفت قدامي
-عمر: ليه ؟؟
-أدهم وهو يدفع أخيه أمامه : روح قول لفريدة هانم الأول انك عاوز تخرج مع الأشكال دي ، ولو وافقت اتنيل روح ، غير كده مالكش دعوة بيها
-عمر: تبيع أخوك يا أدهم
-أدهم: أه ، ولو جبت سيرة لأي حد مهما كان ولا أنا شميت خبر بأن في حد عرف باللي حصل مش هارحمك
-عمر: طب وأنا مالي هو أنا اللي ضربتك بالقلم
-أدهم: ززززززززفت !!!!!!
-عمر: طيب طيب ، أنا لا أسمع لا أرى لا أتكلم ..!!
-أدهم: ايوه كده
-أدهم في نفسه : ماشي يا بنت الـ .... والله ما سايبك ، ويا أنا يا أنتي ، ان ماخليتك عبرة مابقاش أنا أدهم
-يارا في نفسها : تستاهل القلم ، كله إلا الاهانة ، أنا مش هاكون البنت الضعيفة اللي الكل هيحط عليها في البيت ده
..........
وصل جاسر وبصحبته شاهي إلى فيلا رأفت الصياد و...
-جاسر: شاهي متتأخريش
-شاهي: طيب ، وبعدين هو أنا أعدة في الشارع ، ده أنا أعدة مع أنطي فريدة وولادها
-جاسر: مالكيش دعوة بأي حاجة تحصل ماشي !!
-شاهي: طيب ، خلصت يا حضرت الظابط
-جاسر: ايوه ، اتفضلي
...........
في غرفة فريدة ،،،،
-فريدة بغضب : لألألألألأ
-عمر: ليه بس يا ماما
-فريدة: مافيش مرواح للنادي مع الأشكال دي ، انت فاهم !!!!!!
-عمر: أشكال ايه بس يا ماما ، دي بنت عمنا
-فريدة: اسكت متقولش بنت عمك
-عمر: يعني انتي من الاخر مش عاوزاني أخرج معاها ؟
-فريدة: ايوه
-عمر: طب أعمل انا ايه الوقتي ؟؟؟ اتحبس في البيت يعني
-فريدة: لأ روح النادي بس لوحدك !
-عمر: اوووف ، مش رايح ، انا هستنى معاد تدريب التنس وهاروح
-فريدة: يكون احسن
.......
كان أدهم يقف خارج غرفة فريدة ويبتسم لعمر و..
-عمر: مبسوط دلوقتي
-أدهم: جدااااا
-عمر: بس افتكر انك هتتزنقلي في يوم وساعتها هــ....
-أدهم وهو يمسك بياقته : وله !! احترم نفسك معايا
-عمر: ايوه ، ايوه اتشطر عليا أنا
-أدهم: يالا اتمشى شوف وراك ايييه !
..........
نزلت يارا إلى الحديقة الخاصة بالفيلا لتجلس بها قليلاً وقابلت في طريقها شاهي التي رمقتها بنظرات احتقار ودلفت لداخل الفيلا ...
-يارا في نفسها: مالها دي ، أهي شبه الفقرية اللي جوا
وبينما كان جاسر يدور بسيارته ليخرج بها من الفيلا ، لمح يارا وهي تتجه للحديقة فأوقف سيارته ونزل ليسلم عليها و...
-جاسر: الله مش دي يارا ، ممم.. أسلم عليها ولا أطنش ! أحسن حاجة أنزل اسلم عليها وخلاص ، ماهو اللي يقعد ما فريدة هانم لازم الواحد يطمن عليه انه لسه عايش
-يارا في نفسها: ماشاء الله ، الجنينة هنا حلوة الصراحة ، اللي عملها فنان بجد ، تسلم ايد اللي عملها
-جاسر من الخلف : صباح الخير يا آنسة يارا
التفتت يارا خلفها لتجد جاسر يمد يده ليصافحها و..
-يارا وهي تصافحه : صباح النور
-جاسر: ازيك دلوقتي ؟
-يارا: احسن الحمد لله
-جاسر: أنا قولت اسأل عليكي يعني بعد اللي .. آآآ.. حصل وكده
-يارا: ميرسي
-جاسر: طيب مش عاوزة حاجة
-يارا: لأ شكراً
-جاسر: تمام ، أنا ماشي ، وربنا يعينك ع اللي انتي فيه
-يارا: يا رب
-جاسر: سلام
-يارا: سلام
غادر جاسر الفيلا ، بينما كان يراقب المشهد من فوق أدهم ...
-أدهم: هي الحكاية دخل فيها جاسر كمان ، كده احلوت ع الأخر !!
-شاهي من خلف ادهم: ادهوووومة ، مش ممكن ، انت رجعت ؟؟؟
-أدهم: أيوه
-شاهي : أزيك عامل ايه ؟
-ادهم: تمام
-شاهي : انت مش كان المفروض ترجع كمان يومين
-أدهم بصوت مرتفع وهو ممسك بيد شاهي: أصلي ماستحملتش أقعد أكتر من كده من غيرك يا شاهي
نظرت يارا إلى الأعلى لتجد أدهم وشاهي يقفان سوياً في الشرفة و...
-شاهي: ايه الكلام الحلو ده يا ادهومة
-أدهم: الكلام الحلو للناس اللي تستاهل
-شاهي مدعية الخجل: لأ أنا مش ادك
-ادهم وهو يضع يدها على قلبه : تؤ يا شاهي ، ده انتي أدي وقريبة من الحتة دي
-شاهي: بجد ؟؟؟
-يارا من الأسفل في نفسها : أم الفصلان اللي ع الصبح !! باين أوي انه فيلم فكسان وأوفر أوي .. الواحد عنده مرارة واحدة مش ناقص تتفقع !
انصرفت يارا لتكمل مشاهدة التصميم الرائع للحديقة ، بينما وجه أدهم نظره للأسفل ليتأكد من أن يارا تتابعه ولكنه لم يجدها فترك يد شاهي على الفور ..
-شاهي: الله ! في ايه يا أدهم
-أدهم: هــه ، مافيش ، بس يالا ندخل جوا
-شاهي: اوك ، المهم اني مش مصدقة عيني اني شوفتك
-أدهم: لأ صدقي ، تعالي يالا سلمي ع فيرووو
-شاهي: اوك
.........
في الحديقة ،،،
كان عمر يبحث عن يارا ليعتذر لها عن عدم ذهابه معها إلى النادي ، وبالفعل وجدها في الحديقة و...
-عمر: أخيراااا لاقيتك ، دوختيني عليكي يا شيخة
-يارا: ليه ؟
-عمر: معلش انا أسف مش هاعرف أروح معاكي النادي
-يارا: طب ليه ؟؟ في حاجة حصلت ؟؟؟
-عمر وهو ينظر تجاه الفيلا: حكم القوي
-يارا وقد فهمت ما يقصد: أهـــا .. ولا يهمك
-عمر: والله غصب عني ، أنا لو أقدر كنت خدتك وفسحتك و...
-يارا: خلاص خلاص مافيش مشكلة ، نعوضها وقت تاني
-عمر: ان شاء الله ، بصي أنا هاخلص تدريب التنس وأجيلك ع طول
-يارا: بأمر الله
انصرف عمر مضطراً ، بينما قررت يارا أن تتصل بصديقتها سمر لتستعلم منها عن احوالها و...
-يارا في نفسها: أما أكلم البت سمر أعرف منها ايه الجديد
-سمر هاتفياً: حبيبة قلبي ، ازيك وحشاني أوي اوي اوي
-يارا هاتفياً : وانتي اكتر والله
-سمر: اخبار القاهرة ع حسك ايه ؟
-يارا: مافيش زي الغردقة وجمالها يا سمورة
-سمر: ناوية تقعدي كتير هناك ؟
-يارا: مش عارفة والله ، ع حسب ، بيني وبينك الناس هنا مش اد كده
-سمر: تقصدي ايه ؟؟؟
-يارا: نفوسهم مش صافية وخصوصنا الولية العقربة اللي اسمها فريدة
-سمر: ودي مين دي كمان؟؟؟؟
-يارا: المفروض انها مرات عمي
-سمر: يا ساتر يا رب ، طب وبعدين هتعملي ايه ؟؟؟؟؟
كان يارا منشغلة في الحديث مع سمر ولم تنتبه إلى وجود أدهم الذي قرر أن يعكر صفو يارا ، وقام بتشغيل رشاش المياه الالكتروني في الحديقة و...
-أدهم: رايقة ياختي وبتتكلمي في التليفون ، ان ما نكدت عليكي مابقاش أنا أدهم ..مممم.. فكرة ، أما نخليها تشتي بدري ع نافوخك
-يارا هاتفياً: بس ده اللي حصل و...
فجأة وجدت يارا الأرض تقطر ماءاً من حولها و...
-يارا بفزع: ايييييه ده ، ايه اللي بيحصل ده ؟؟؟
-أدهم ضاحكاً من بعيد بصوت عالي: ههههههههههههههه
-يارا بغضب وهي تجز على شفتيها : اه يا ابن فريدة !!!!
-أدهم: أصل لاقيت الجنينة فيها شوية لامؤاخذة وساخة ، فقولت أنضفها
-سمر هاتفياً: في ايه اللي بيحصل عندك يا يويووو
-يارا: اقفلي الوقتي يا سمر ، هكلمك بعدين
-سمر: استني بس ..الوووو ، الوووو !!!
-يارا بصوت مرتفع : انت أعمى مش شايف اني واقفة بتكلم في التليفون هنا ؟؟
-أدهم من بعيد : لأ شايفك
-يارا: ولما البعيد شايفني بتشغل أم الرشاش ليه ؟؟؟؟
-أدهم : بيتي وأنا حر فيه
-يارا: حر في اللي يخصك ، مش في مرازية الناس
-أدهم بصوت هامس : ده أنا هطلع عينك
ابتلت ملابس يارا بالكامل من آثر المياه وتوجهت ناحية أدهم لتوبخه على ما فعل و...
-يارا وهي تقترب منه : للدرجادي مش باينة قصادك ، شفافة أنا مثلاً
-أدهم وهو يتأملها بخبث : من ناحية شفافة فالصراحة آآآآ...
-يارا مكملة دون اكتراث له: بص لو عندك مشاكل في النظر ممكن أسلفك فلوس ، واهو تعمل قياس نضارة في التأمين الصحي وأكسب فيك ثواب
-أدهم: بتقولي ايه ؟؟ تأمين صحي ونضارة ، لأ وتكسبي فيا ثواب !!!!!
-يارا: يالا ماهو المثل بيقول اعمل الخير وارميه في البحر ، وبعدين مش عيب ان يكون نظرك ضعيف ، لكن العيب انك تسكت ع ده ، وع فكرة التأمين بيعمل نضارة كعب كوباية إنما ايه حكاية ! عارف لو داس عليها قطر هتفضل سليمة
-أدهم باستهزاء : يا شيخة
-يارا: انا عارفة الحقيقة بتجرح ، بس آآآ...
-أدهم مقاطعاً : بس تصدقي شكلك حلو وانتي مبلولة كده ، كله باين ومتفصل
-يارا بارتباك : احم.. اييييه عينك بدل ما أخلعهالك
-ادهم: طب يا ريت تخلعي أي حاجة وأنا آآآآ...
لم يكمل أدهم كلامه ، حيث دفعته يارا بكل قوة ليسقط فوق نجيلة الحديقة المبتلة وتبتل ملابسه وتتسخ و...
-ادهم: آآآي
-يارا: ومايوقعش إلا الشاطر .. يا... يا شاطر
-شاهي من بعيد بضيق: ادهـــــــم !!! بتعمل ايه عندك
-أدهم: تعالي يا بيبي
-شاهي : ايييه ده ، مين اللي عمل فيك كده
-أدهم وهو يشير ليارا: الاستاذة بتهزر معايا
-شاهي بضيق: اوووف ، وده اسمه هزار برضوه يا..يا ، سوري انتي كنتي قولتيلي اسمك ايه
-يارا : لأ انا الصراحة مقولتلكيش ، بس أنا يارا ، اوك؟ احفظيه كويس
-شاهي وهي تساعد أدهم على النهوض: whatever .. أدهم انت كويس ؟؟
-أدهم: زي الفل يا شوشوو
-يارا: طب أسيب أنا طيور الحب تزقزق براحتها وسط الطينة
-شاهي: طينة !!!!!!
-يارا وهي تلوح بيدها : اوووه ييس .. أصل أدهم بيه بيحب يلعب في الطينة أوي ، شوفتي عمل الجنينة زي الغيط ازاي ، أقولك ع حاجة أنا هامشي واسيبكم مع بعض ، أصلي محبش اكون زي العزول بينكم ، يالا انجوووي ، have fun !!!
-شاهي: اوووف بايخة
-أدهم وهو ينظر ليارا : أها
-شاهي وهي تحرك وجه أدهم تجاهها : عينك رايحة فين
-ادهم: لأ عادي
-شاهي: طب تعالى غير هدومك
-أدهم: اوك ، جاي !
-يارا في نفسها : الظاهر ان اللي اسمه أدهم ده نسخة من أمه ، رزل زيها ، وأنا كده مش هاخلص منه بالساهل طالما حطني في دماغه ، بس والله ماهسيب حد فيهم يعلم عليا ....................
*********************
إلي هنا ينتهي الفصل السابع من رواية الفريسة والصياد بقلم منال سالم
تابع من هنا: جميع فصول رواية الفريسة والصياد بقلم منال سالم
تابع من هنا: جميع فصول رواية أشواق بقلم قسمة الشبينى
تابع من هنا: جميع فصول رواية أشواق بقلم قسمة الشبينى
تابع أيضاً: جميع فصول رواية همس الأنين بقلم آية محمد
اقرأ أيضا: رواية فى قلبى أنثى عبرية بقلم خولة حمدى
إرسال تعليق
يسعدنا تلقي اقتراحاتك أو تعليقك هنا