مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26 وموعدنا اليوم مع الفصل الأربعون من رواية الفريسة والصياد بقلم منال سالم
رواية الفريسة والصياد بقلم منال سالم - الفصل الأربعون
تابع أيضا: قصص رومانسية |
| رواية الفريسة والصياد - منال سالم |
رواية الفريسة والصياد بقلم منال سالم - الفصل الأربعون
دلفت كلاً من ناهد وشاهي إلى داخل الفيلا ، وما إن أغلقت ناهد الباب خلفها حتى تفاجئت بوجود عدلي و....
-ناهد بدهشة : عدلي !! انت... انت بتعمل ايه هــنا ؟؟؟
-عدلي: ناهد !! ايه اللي جابك الوقتي
-ناهد: نعم ؟؟؟ بتقول ايه ؟؟؟ ايه اللي جابني ؟؟؟ ده بيتي ، انت اللي بتعمل ايه فيه
-شاهي: مامي مين ده ؟؟
-ناهد: اطلعي يا شاهي ع أوضتك دلوقتي
-عدلي: لأ مش هتطلع لفوق
-ناهد: في ايه يا عدلي انت عاوز ايه ؟؟
-شاهي: مامي أنا عاوزة أعرف مين ده ؟؟؟
-ناهد: ده ... آآآآ... ده
-عدلي: ما تقوليلها أنا مين ؟؟ ولا خايفة البت تتصدم !
-ناهد: لأ انا معنتش خايفة منك
-عدلي : هه
-ناهد: ده يا شاهي الراجل .. الراجل اللي آآآ... اتجوزته بعد ... بعد باباكي الله يرحمه
-عدلي: بالظبط يا حلوة ، أنا أبقى جوز أمك
-ناهد: عدلي !! اتكلم كويس
-عدلي: الله ، هو أنا قولت حاجة غلط
-شاهي: ده .. ده يا مامي يبقى جوزك ؟؟؟ ده
-عدلي: ايييه مالي ؟؟ مش عاجبك
-ناهد: من فضلك يا عدلي ، كلمن انا وملكش دعوة بشاهي ، انت ايه اللي جايبك هنا ؟؟؟
-عدلي : عادي ! جاي بيت مراتي
-ناهد بنرفزة: لأ مش عادي طبعاااا ، ده بيتي وبيت أولادي ، وهما بس اللي يحددوا مين اللي يجي ومين مايجيش ، فلو سمحت يا ريت تتفضل الوقتي من هنا
-عدلي : لأ
-شخص ما: عدلي باشا أنا طلبت آآآآ.... لا مؤاخذة !!
-ناهد : مين ده ؟؟؟
-عدلي: نسيت أقولك ، أنا مش جاي لوحدي ، أنا جاي ومعايا رجالتي
-شاهي: مــ...مين الأشكال دي
-ناهد: اتفضل برا ، وخد معاك الأشكال دي
-عدلي: لأ مش هايحصل
-شخص ما: في ايه يا باشا
-عدلي وهي يشير إلى شاهي : خد البت دي وطلعها مع البت اللي فوق وكتفها
-ناهد: ايييييه ؟؟؟
-شخص ما : حاضر يا باشا ، ده انت تؤمر
-ناهد: انت بتقول ايه ؟؟؟
اقترب أحد رجال عدلي من شاهي وجذبها بشدة فصرخت به ناهد ، وقاومته شاهي و...
-شخص ما: تعالي يا بت معايا
-شاهي برعب: مامي الحقيني ، حووشيه عني
-ناهد وهي تضربه: ابعد ايدك عن بنتي يا حيوان انت
-شخص ما وهو يدفع ناهد : حاسبي يا ولية
-شاهي وهي تقاومه : سيبني يا مجرم سيبني !!
-عدلي بحدة: ناهــــــــــد
-ناهد: أنا هاطلب البوليس يجي يلمك انت والحيوانات بتوعك دول
-عدلي: طب فكري بس تلمسي السماعة ، وأنا هدبح بنتك قصاد عينك
-ناهد بفزع: لألألألألألأ
-عدلي: خد البت دي يالا فوق
-شخص ما: حاضر يا باشا
-شاهي: مامــــــــي !!!!
أخذ أحد رجال عدلي شاهي بالقوة وجذبها من ذراعها إلى الطابق العلوي ، بينما ظلت ناهد تتحدث مع عدلي وهي في قمة غضبها مما حدث ، بالاضافة إلى خوفها مما قد يحدث لها ولإبنتها
-ناهد: انت بتعمل كده ليه يا عدلي ؟؟؟ ليييييه ؟؟؟
-عدلي : عشان المصلحة يا ناهد ، ايه لحقتي تنسي ؟؟؟
-ناهد: مصلحة ايه اللي تخليك تيجي تهجم عليا وع بنتي واحنا لوحدنا
-عدلي: انتي نسيتي إني أنا جوزك
-ناهد: أها ... دي بقى الحجة ، خلاص أحنا هنطلق ، وكل واحد يروح لحاله
-عدلي: متأخر أوي القرار ده يا ... يا هانم !
-ناهد: يعني اييييه ؟؟؟
-عدلي: يعني أنا مش هاطلقك غير بمزاجي ، وده مش هيحصل غير لما تنفذي كل اللي بقولك عليه
-ناهد: انت عاوز ايه مني ؟؟؟ عاوز اييييه ؟؟؟
-عدلي: عاوز فلوسي
-ناهد: وأجيبهالك أنا منين ؟؟؟
-عدلي: مسألة تجبيها منين دي خلاص أنا حليتها ، بنت رفعت فوق وأنا هاعرف أخد حقي كله منها
-ناهد : نعم ؟؟ تقصد مين؟؟؟
-عدلي : الله ! هو انتي نسيتي ان رفعت عنده بنت ولا ايه يا ناهد هانم ؟؟؟
-ناهد: لأ مانستش ، بس تقصد ايه بأنها فوق
-عدلي: بصراحة كده أنا خطفتها من جوزها
-ناهد: ايييييييييييه ؟؟؟
-عدلي مكملاً : وملاقتش مكان آئمن من هنا عشان أخبيها فيه
-ناهد: انت اتجننت
-عدلي : لأ طبعاااا ، الجنان جاي بعدين لو مخدتش حقي ، وبعدين محدش هيفكر يدور عليها عندك ، وخصوصاً أخو المحروسة جاسر ابنك ، ده لو فكر يرجع من ألمانيا !!
-ناهد: ازاي تعمل كده؟ ازاي ؟؟؟
-عدلي : ماهو ابنك السبب ، أعد يدعبس ورايا لحد ما قلب عليا الدنيا برا ، والزفت خالد اخو جوزها مش سايب حد إلا لما بيطأس منه عن الماضي بتاعي
-ناهد باستغراب: خالد أخو جوزها ؟؟؟
-عدلي: أوعي تقوليلي انك متعرفيش ان بنت رفعت اتجوزت أدهم ابن اختك
-ناهد: ايييه ؟؟؟ اتجوزوا ؟؟ وده حصل امتى ؟؟؟؟
-عدلي: ايوه ايوه ، اصلك انتي معذورة ، بعد ما رنيتك العلقة التمام ودخلتي بعدها المستشفى ، هما بقى اتجوزوا وسافروا يقضوا شهر العسل
-ناهد : نعــــم ؟؟؟
-عدلي : بس يا حرام ملحقوش يتهنوا ، أنا حرمت جوز العصافير دول من بعض ، وخطفت بنت رفعت
-ناهد: يادي النصيبة
-عدلي: وطبعااااا عشان ماتمسكش ع الأقل لحد ما أضمن اخد حقي وأهرب برا البلد ، ملاقتش إلا بيت مراتي حبيبتي عشان نستخبى فيه
-ناهد: انت مش طبيعي ؟؟؟ ازاي تعمل كده ؟؟؟ انت... انت ممكن توديني في داهية باللي عملته وتورطني في حاجة أنا ماليش فيها ذنب
-عدلي : انتي متورطة من زمان يا ناهد ، ومتقدريش تنكري ده ، وده كان من يوم ما وافقتي ع اننا نتخلص من رفعت ومراته عشان الفلوس، بس لأجل الحظ بنتهم مكانتش معاهم وأنا للأسف معرفتش ده غير بس من قريب ، وفضلت هي الحلقة اللي مانعة حقي يرجعلي ، بس مش بعد السنين دي كلها هضيع الملايين اللي استنتها
-ناهد: حرام عليك
-عدلي : هههههههههههههههه ، حلو وش الحنية ده ، بس مش لايق عليكي يا ...يا ناهد هانم !
-ناهد : منك لله يا شيخ ضيعتني زمان ، والوقتي جاي تضيعني
-عدلي: اخررررسي .. وأحسنلك تحطي الجزمة القديمة في بؤك
-ناهد: اهيء ... اهيء
-عدلي: واطلعي عقلي بنت جوزك الأولاني وقوليلها تمضي ع الورق بدل ما هسويها ع الجانبين ، وانا مش ورايا حاجة إلا هي
-ناهد: طب افرض .. افرض ماوفقتش ؟؟؟
-عدلي: ممممم... لو موافقتش يبقى قولي يا رحمن يا رحيم ع .. ع شرف بنتك !!!!!
-ناهد بخوف : لألألألألألأ .. كله إلا بنتي
-عدلي: ايوه كده يا حلوة ، فكري في مصلحة بنتك ، وأوعي قلبك يرق .. لأحسن لو رق هيجي ع دماغك انتي وبنتك !!!
-ناهد : طــ.... طيب
-عدلي : ايوه كده خليكي زي الشاطرة واسمعي الكلام
-ناهد: اوك
-عدلي: واوعي تنسي أي حركة غدر ، رقبتك انتي وبنتك تحت ايدي ، فاهمة ؟؟؟
-ناهد: خلاص عرفت
-عدلي: تمــــام .. كده تعجبيني ! فين موبايلك بقى
-ناهد: ايه ؟؟ موبايلي ؟؟؟ عاوزه ليه ؟؟؟
-عدلي: فكراني عبيط .. عاوزاني أسيبه معاكي فتقومي مكلمة ابنك تبلغيه باللي بيحصل هنا
-ناهد: آآآ...
-عدلي بحدة : هاتيه يالا
-ناهد بصوت هامس : خد ... خدك ربنا
-عدلي: اطلعي اعملي اللي قولتلك عليه
-ناهد وهي تزفر في ضيق: اوووف .. طيب
..................
في منزل يارا بالغردقة ،،،،،
قرر رأفت أن يعود مع ابنه أدهم إلى القاهرة ، بينما ظل خالد وجاسر في الغردقة لمتابعة أي جديد فيما يخص يارا و...
-أدهم: أنا هرجع القاهرة تاني ، مش قادر أقعد هنا
-خالد: يا أدهم استنى ؟؟؟
-أدهم: هاستنى لإيه بالظبط ؟؟؟ ها قولي ؟؟؟
-خالد: مش يمكن نعرف حاجة
-ادهم: هنعرف ايه ؟؟؟ لو كان في حاجة كنا عرفناها ، لكن مافيش أي جديد ، ووجودي هنا زي قلته ، أنا هنزل القاهرة أدور ع الزفت عدلي ده ، وأحاول أعرف هو فين
-رأفت: أدهم عنده حق ، وجودنا هنا مش هيفيد بحاجة ، وخصوصا إن الشرطة موصلتش لمكان يارا هنا
-خالد: يا بابا مش معنى انهم ملاقوش يارا ، انها مش هتكون موجودة هنا
-جاسر: بالظبط ، وده اللي انا بقوله ، وبعدين زمايلي واصحابي في المباحث بيحاولوا يعملوا اللي عليهم ، ومحدش ساكت ، وأنا بفكر في الأماكن اللي ممكن الزفت عدلي ده يكون مستخبي فيها وخصوصا انه مش ظاهر أبداً في اي حتة
-أدهم: اعملوا اللي تعملوه لكن أنا مش هأقدر اقعد أكتر من كده هنا
-خالد: يا بني اهدى ، وبلاش عصبية خلينا نفكر بالعقل
-ادهم: أنا معدتش فيا عقل خلاص
-رأفت: خلاص يا خالد ، أنا هرجع مع أدهم ، وانتو خليكوا هنا ، وأهو يبقى احنا متقسمين ، جزء هنا وجزء في القاهرة ، واللي يوصل لحاجة يبلغ الباقيين
-جاسر: تمام
-ادهم: يالا يا بابا
-رأفت: ماشي يا بني ، نشوفكم ع خير ان شاء الله
-خالد: خلي بالك وانت سايق يا أدهم
-رأفت: لالالا .. أدهم مش هيسوق العربية ، احنا هنسافر بالطيارة
-جاسر: يكون أفضل وأسرع
-خالد: أها
........................
في مستشفى الغردقة العام ،،،
أفاقت سمر لتجد والدها ووالدتها إلى جوارها ، فرح الأبوين كثيراً لرؤية ابنتهما تفتح عينيها من جديد و...
-سمر : آآآآ....
-عبد الجواد: سمـــر.. يا بنتي .. سمــــر
-تيسير : بنتي حبيبتي ، حمدلله ع سلامتك يا قلبي ، خضتينا عليكي
-عبد الجواد: اخبارك ايه يا بنتي الوقتي ؟؟
-سمر: آآآ... أنا ... أنا فين؟؟
-عبد الجواد: انتي في المستشفى يا بنتي
-سمر: هه
-تيسير : ولاد الحرام هجموا عليكي ، ربنا ياخدهم يا رب ، ضربوكي بالمطواة ، وخطفوا يارا صاحبتك ، إلهي يتشكوا في قلبهم البعدة
-سمر بعيون مدمعة : يــ... يارا !
-تيسير: ان شاء الله يلاقوها ، أهلها مش ساكتين
-عبد الجواد: ربنا يرجعالهم بالسلامة
-سمر: يارب
-تيسير: ويقومك يا بنتي بالسلامة ، ويكرم الجدع اللي جابك هنا بالخير كله
-سمر : جدع ؟؟ مين ده
-عبد الجواد: الأستاذ خالد الله يباركله جابك لهنا وماسبكيش إلا لما اطمن عليكي
-سمر: هــه .. خــ..خالد ؟؟
-تيسير: البت الممرضة قالتلي كمان انه اتبرعلك بدمه ، ربنا يحميه لشبابه
-سمر: كمــان !
-عبد الجواد: والله ماعدناش بنشوف شباب فيهم الشهامة ولا رجولة في الأيام اللي احنا فيها دي
-تيسير : أه والله يا عبده ، عندك حق
-سمر في نفسها : غريبة ... ده حتى اللي يشوفه قبل اللي حصل ميصدقش انه يعمل كده .. سبحان مغير الأحوال
-تيسير: اجيبلك بقى تاكلي يا حبيبتي
-سمر: مش عاوزة يا ماما حاجة
-تيسير: لأ يا بنتي ، انتي لازم تاكلي وتتغذي كويس عشان الجرح يلم بسرعة
-عبد الجواد: اسمعي كلام امك يا سموورة
-سمر: حــ... حاضر
......................
في فيلا ناهد الرفاعي ،،،،
صعدت ناهد إلى الطابق العلوي لتجد كلاً من ابنتها ويارا مقيدتين في غرفة شاهي ، توجهت ناهد إلى ابنتها لتحتضنها بشدة ، بينما نظرت إلى يارا بعيون كلها حزن وندم و...
-ناهد: بنتي !
-شاهي: مامي ، في ايه اللي بيحصل ؟؟ ليه الراجل ده بيعمل معانا كده ؟؟
-ناهد: هه
-شاهي : وليه .. ليه يارا دي مربوطة معايا هنا
-ناهد: هه .. آآآآ عشان آآآ....
-يارا مقاطعة : الله يخليكي يا طنط خلي الراجل ده يسيبني ، انا مش هافتح بؤي بأي حرف ، بس ..بس متخليهوش يقرب مني ، خليه يسبني وأنا هختفي خالص من حياتكو كلكم
-ناهد: أنا .. أنا
-شاهي: مامي ، انا خايفة اوي ، احنا مش عارفين احنا ليه مربوطين ؟؟ وبعدين الراجل ده عاوز ايه مننا ؟؟
-ناهد: هو مش عاوز مننا احنا حاجة
-شاهي : اومال ايه ؟؟؟
-ناهد وهي تنظر ليارا: هو عاوز من يارا
-يارا: عاوز مني ايه ؟؟؟
-ناهد: هو عاوز كل حاجة بتملكيها
-يارا: ماشي أنا مستعدية أديله نصيبي في شركة عمي رأفت
-ناهد: لأ مش ده اللي عاوزه
-يارا: بس انا معنديش إلا ده
-ناهد: هو عاوز كل الملايين اللي باسمك ف ألمانيا
-يارا: اييييه ؟؟؟
-شاهي: مش ممكن
-يارا: الراجل ده مجنون
-ناهد: أيوه ، هو فعلاً مجنون
-يارا: ماشي أنا موافقة اديهومله ، حياتي أهم من أي فلوس
-ناهد: لأ أنا مش ممكن أوافق ع كده
-يارا: أنا عاوزة حريتي وبس ، تغور الفلوس اللي تضيع عمري
-ناهد: يعني .. يعني انتي موافقة تضحي بالملايين بتاعتك عشان حياتك ؟
-يارا: ايوه ، الفلوس بتروح وتيجي ، لكن العمر لأ ، وأنا طول عمري راضية بنصيبي وعايشة ع أدي ، فمش فارق معايا أي ملايين، أنا يهمني بس اني أطلع من اللي أنا فيه
-ناهد: هه
-عدلي وقد صعد اليهم: ها ، وصلتي لحاجة يا ناهد مع الأمورة
-ناهد: آآآ... لسه بتكلم معاها وبحاول أقنعها
-يارا: أنا آآآآ...
-ناهد مقاطعة: ياااااااارا !! أنا لسه مخلصتش كلامي معاكي
عدلي: احسنلك تعقليها يا ناهد ، بدل ما أنتي عارفة اللي ممكن أعمله مع .. مع بنتك !
-شاهي : آآآآ
-يارا: ما أنا قولتلها إني آآآآ....
...........
ثم رن هاتف عدلي برقم ياسر ، فخرج من الغرفة وأجاب عليه .....
-عدلي: هارد بس ع الزفت ده وأرجعلكم
-ناهد في نفسها: إلهي تغور في داهية ما ترجع منها أبداً ..
-عدلي هاتفياً: أهلاً .. يا ريت يكون عندك أخبار جديدة
-ياسر: مش لما أقبض الأول عشان اديك الجديد
-عدلي: هاتلي العينة وأنا أبعتلك التحويل
-ياسر: لأ يا حلو ، أنا قررت أخد الفلوس كاش
-عدلي: نعم ؟؟؟ كاش ؟؟ انت بتقول ايه
-ياسر: أصل الصراحة فكرت كده وحسبتها بعقلي ، لو أنا خدت الفلوس بالتحويل ممكن أتكشف معاك ، لكن لو خدتهم كاش هابقى في السليم
-عدلي : نعم ياخويا ، طب أجيبلك أنا سيولة منين الوقتي ؟؟؟ انت عارف ان فلوسي كلها في البنك ومقدرش أتحرك بحرية اليومين دول
-ياسر: ده اللي عندي ، اتصرف بقى ، اكتب شيك لحد يصرفه ، حولهم لحد تاني ، المهم الفلوس تكون عندي كلها وكاملة
-عدلي بضيق : كمــــــــــان !!
-ياسر: ايوووه ، فكر بقى وكلمني .. سلام
-عدلي بعد أن انهى الاتصال : الله يحرقك
.........
في نفس التوقيت كانت ناهد تتحدث مع يارا وشاهي و...
-ناهد: انتي مجنونة يا يارا عشان تقوليله انك موافقة
-يارا: ايوه ، عاوزة أخلص بقى
-شاهي : لأ متعمليش كده
-ناهد: هو وقت ما خد منك اللي عاوزه هيخلص عليكي
-يارا: وليه هيعمل كده ؟؟؟ ماهو خلاص هيبقى خد الفلوس كلها
-ناهد: انتي غلطانة ، وأنا بقولك انتي مش عارفاه زي ما أنا عارفاه كويس
-شاهي: مامي اوعي توافقي انها تعمل كده ، اوعي تخليه ياخد منها حاجة ، ده راجل حيوان
-ناهد: بالظبط .. طب ششش ، عشان هو جاي
نهضت ناهد من مكانها لتتحدث مع عدلي خارج الغرفة و...
-عدلي: ها ؟؟
-ناهد: أديني بحاول أهوو معاها
-عدلي: طيب
-ناهد: ايه مالك ؟ شكلك مضايق
-عدلي : مافيش
-ناهد وهي تحاول أن تبدو مهتمية لأمره : ازاي مافيش ؟؟ ده باين ع وشك خالص ، قولي يمكن أساعدك
-عدلي: الزفت ياسر عاوز فلوسه كاش عشان يخلصلي الورق بتاعي
-ناهد: طب ودي فيها ايه ؟؟؟
-عدلي: فيها يا هانم اني لو ظهرت قصاد الناس هيعرفوا فين مكاني ، وأنا رجالتي بلغوني ان في مراقبة عن الفيلا والشركة .. يعني مجرد ظهوري معناه إني وقعت في المصيدة ، وأنا مش هاينفع أروح بنفسي أسحب الفلوس ، ولا حتى أدي شيك الفلوس لحد مش مضمون ، ده مبلغ كبير ..!!!
-ناهد: طب والعمل ؟؟
-عدلي : مش عارف ، أديني بفكر هاعمل ايه في الموضوع ده كمان
-ناهد: ممممم... طب واللي يلاقيلك الحل لده
-عدلي: حل ازاي يعني
-ناهد: أنا هاروح أسحبلك الفلوس ، واجيبلك الورق كمان لو عاوز
-عدلي: انتي هبلة !!
-ناهد: لأ مش هبلة وبتكلم بجد
-عدلي وقد اخذ يفكر في الموضوع : مممممم
-ناهد: بص أنا محدش يعرف اني خرجت من المستشفى أصلاً ، فهأقدر أتحرك بحرية وأجيبلك الفلوس ، هادخل البنك زي أي عميل عادي وأسحب الفلوس واجيبها هنا لحد ما صاحبك ده يجيبلك الورق
عدلي : أها
-ناهد: وأعتقد ان بنتي تحت ايدك يعني مش هيكون في غدر كده ولا كده
-عدلي : مممم... انتي عارفة أنا ممكن أعمل ايه فيكي لو شميت انك خنتيني
-ناهد: تقدر تبعت معايا حد من رجالتك عشان تبقى مطمن اكتر
-عدلي : ماشي ، جهزي نفسك بكرة الصبح تروحي البنك
-ناهد: طيب
-ناهد في نفسها: أوصل بس البنك يا عدلي ، وهاعرف ازاي انقذ بنتي وأنا و.. آآآآ.. ويارا منك يا أسوأ حد عرفته في حياتي ..!!
-عدلي: سرحانة في ايه ؟؟؟
-ناهد: ولا حاجة
-عدلي: مممم...
-ناهد: بقولك ايه ، أنا هافك الرباط عن البنات
-عدلي: نعــــــم ؟؟؟
-ناهد: انا عاوزة أخلي البت يارا تطمنلي ، ومش هاينفع أكلمها ولا أضحك عليها وهي مربوطة كده
-عدلي: لأ معلش ، كله إلا البت دي ، أصلها هربت قبل كده ، ومش بعيد تعملها تاني
-ناهد: لأ اطمن ، هي أعدة في اوضة شاهي مش هاتعرف تهرب منها ، دي مافيهاش إلا بلكونة ولو فكرت تنط منها يبقى هتقع ع جدور رقبتها تتقطم
-عدلي: ممممم...
-ناهد: وبعدين رجالتك بيعملوا ايه هنا ؟؟ مش المفروض واخدين بالهم من كل حاجة ولا أنا غلطانة
-عدلي: ماشي ، فكيها ، بس قسماً بالله لو هربت ، حسابي هيبقى مع بنتك مش معاكي انتي
-ناهد: ماشي
......
نزل عدلي إلى الطابق السفلي ليبلغ أحد رجاله بمراقبة ناهد غداً حينما تتوجه إلى البنك ، و أحد أخر بأن يكون كظلها داخل البنك ليضمن عدم حدوث خيانة أو أي أخطاء منها ..
-عدلي: انت هتراقبها من بعيد ، من غير ما تاخد بالها
-شخص ما: تمااام يا باشا
-عدلي : وانت رجلك ع رجلها ان شاء الله تروح فين ، تخلصوا البنك وترجعوا ع طول ع هنا ، وأنا هبلغكم باللي بعد كده
-شخص أخر: أوامرك يا باشا
لمح عدلي أن الإضاءة بمدخل الفيلا عالية ، فاستشاط غضباً و...
-عدلي: قول للزفت اللي برا يقفل النور ده ، احنا مش عاوزين حد يعرف أصلاً اننا في الفيلا
-شخص ما: ماشي يا باشا
-عدلي: والمكان يتآمن كويس
-شخص أخر: اطمن يا باشا .. كله تحت السيطرة
عدلي في نفسه: اخد بس الورق وامضت البت دي ، وهاتخلص من كل الديول اللي هنا ، هانت كلها بــــــس كام ساعة
.........
صعدت ناهد إلى الأعلى ثم حلت وثاق الفتاتين وطلبت أن يظلا في الغرفة ولا يخرجا منها إلا أن تعود غداً من الخارج و...
-ناهد: أنا هافككم انتو الاتنين بس خلوا بالكم من الحيوانات اللي تحت
-يارا: أها
-شاهي: مامي أنا خايفة أوي
-ناهد: متخافيش ، كلها بس للصبح وهنرتاح من ده كله
-يارا: يعني ايه ؟؟
-ناهد: هه.. ولا حاجة .. ناموا انتو بس ومتقلقوش ، كل حاجة هتتحل الصبحية
......................
في فيلا رأفت الصياد ،،،،
وصل ادهم مع والده رأفت إلى الفيلا و...
-رأفت: اطلع يا بني ارتاح في اوضتك ، وبكرة الصبح ان شاء الله هيكون فيها حل
-أدهم: أنا تعبان يا بابا ، محدش حاسس باللي أنا فيه ، كل لحظة بتمر ويارا بعيد عني أنا بتقطع فيها
-رأفت: اصبر يا بني ، وصلي ركعتين لله ، واطلب منه انه يحميها ونلاقيها ان شاء الله
-أدهم: ياااااا رب أمين
-رأفت: وأنا عندي كلام مهم مع ...مع أمك
-ادهم: طيب
-عمر وهو يجري على الدرج : أدهم ، بابا !! عرفتوا أي حاجة ؟؟؟
-أدهم: لأ لسه
-رأفت: لسه يا بني
-عمر: اووووف ...
-أدهم: أنا طالع اصلي
-عمر : استناني ، وانا كمان جاي أصلي معاك ، لعل ربنا يستجيب لحد فينا
-ادهم: ماشي
-عمر: هتوضى وأحصلك
-ادهم: اوك
............
توجه رأفت إلى غرفة فريدة و...
-فريدة: رأفت !! انت ... آآآ... انت جيت
-رأفت وعلى وجهه الضيق: أيوه
-فريدة: ايه أخبارك
-رأفت: زي الزفت
-فريدة: ليه بس
-رأفت: تسمحي تقوليلي يا هانم إيه اللي عملتيه ده ؟؟؟ حفلة واحنا في الظروف الزفت دي ؟؟؟
-فريدة: أنا .. انا
-رأفت: اوعي تنكري ولا تفكري تكدبي عليا
-فريدة: لأ مش هاكدب ولا هانكر حاجة ، أنا فعلاً عملت كده بس آآآ...
-رأفت: بس ايه يا هانم ؟؟ هااااه ؟؟؟؟ ايه السبب القوي اللي خلاكي تتنيلي وتعملي حفلة الوقت ده
-فريدة: مخنوقة يا رأفت ، زهقت وتعبت ، قولت أرفه عن نفسي شوية
-رأفت: لا والله !! ده ع أساس ان احنا كلنا فرحانين والسعادة هتنط من وشنا
-فريدة: يووووه ، انت دايماً كده مستخسر إني أفرح شوية
-رأفت: تفرحي لما نكون في ظروف عادية ، مش في الظروف دي
-فريدة: كل شوية ظروف ظروف ، أنا ملّيت من اللي بيحصل
-رأفت: ملّيتي ؟؟؟ هو أنا بقولك تعالي نشوف فيلم ولا أغنية ، دي روحبني آدمة في خطر ، يعني لازم يكون عندك شوية احساس
-فريدة: والله ده احسن حاجة اتعملت انها غارت من هنا
-رأفت بحدة: فريـــــــــــــــــدة !!
-فريدة: من يوم ما جت البت دي هنا ، وهي جايبة المصايب معاها ، أنا محستش إن أنا في بيتي إلا لما هي غارت منه في داهية ، ده أنا بدعي ربنا إنها مترجعش أبداً هنا ، مش كفاية انها خطفت ابني مني واتجوزته
-رأفت: انتي اكيد مش واحدة طبيعية
-فريدة: لأ أنا ع طبيعتي ، ودي طريقتي واسلوبي ، ده أنا مستنية بفارغ الصبر اللحظة اللي تقولولي فيها إنها ماتت ولا اتقتلت
-رأفت: يا شيخة حرام عليكي ، انتي بتفكري في ايه ، وابنك هيموت نفسه عليها برا
-فريدة: بكرة ينساها ، وأنا بنفسي هاجوزه واحدة تانية !!!
-رأفت: انتي اتهبلتي في عقلك ولا اتلطشتي في مخك
-فريدة: ايه الاسلوب البلدي اللي بتكلمني بيه ده ؟؟
-رأفت: هو انتي لسه شوفتي مني حاجة ، ده أنا هطلعهم عليكي
-فريدة: نعم ؟؟؟
-رأفت: يارا ترجع بالسلامة وأنا ... أنا هعرفك قيمتك
-فريدة: تقصد ايه ؟؟؟
-رأفت: أنا هتجوز عليكي وأجيبلك ضرة تعيش معاكي هنا
-فريدة : ايييييييييييه ؟؟؟
-رأفت: أنا خلاص اتخنقت من عمايلك السودة دي كلها ، وكنت بفكر أطلقك بس بكده هبقى برحمك ، لكن أنا عاوز اطلع البلى الأسود ع جتتك ، فأحسن حاجة أعملها إني أتجوز عليكي
-فريدة بصدمة: تتـــ... تتجوز عليا
-رأفت: أيوه ، ومش أي حد كمان ، أنا هتجوز صبـــــــــــــاح !!!!
-فريدة : نعــــــــــــــــــم ؟؟
-رأفت: لأ ومش بس كده ، هخليها تبقى الكل في الكل و تدلعني وتشوف مزاجي بدل النكد اللي أنا عايش يومياً فيه ، وهأعرفك إن الله حق !
-فريدة: لألألألألألأ
-رأفت: اصبري عليا بس .. إن ما خليتك تباتي في اوضة صباح وهي تبات هنا مكانك مابقاش أنا رأفت
-فريدة: انت... انت اتجننت
-رأفت: اوعي من وشي
ثم دلف رأفت إلى الحمام ليغتسل من الطريق والسفر ، وترك فريدة تتخبط من قراره المفاجيء ......
........................
في صباح اليوم التالي ،،،
في منزل يارا بالغردقة ،،،
كان خالد يستعد للنزول مبكراً ، بينما كان جاسر يستعد للذهاب إلى زميله رامي بمباحث الغردقة و...
-خالد: جاسر ، بقولك ايه
-جاسر: خير ؟
-خالد: انا نازل شوية وراجع
-جاسر: بدري كده ؟؟ ليه ؟؟
-خالد: ورايا مشوار مهم ، هخلصه وراجع
-جاسر: أها
-خالد: عاوز حاجة اجيبهالك وأنا جاي
-جاسر: لأ شكراً ، أنا أصلا نازل كمان شوية
-خالد: وراك حاجة ؟
-جاسر: هاروح لرامي في القسم أشوف عملوا ايه ، ولو في جديد عن يارا
-خالد: تمام .. ولو ملاقناش اي جديد أنا بفكر بصراحة أرجع القاهرة ، هناك هأقدر أتصرف أكتر
-جاسر: اوك .. أنا هاشوف مع رامي الوضع ، ولو مافيش أي حاجة هرجع معاك
-خالد: تمام .. أشوفك ع خير
-جاسر: ان شاء الله
ركب خالد سيارة ادهم ، ثم توجه إلى محل بيع الأزهـــار ، واشترى باقة ورد كبيرة ، ووضع بداخلها كارت صغير كتب فيه (( حمدلله على سلامتك )) ، ثم وضع الباقة بجواره على المقعد وتوجه بالسيارة إلى مستشفى الغردقة العام ..
صعد خالد إلى غرفة سمر ، طرق الباب ثم سمح له الأستاذ عبد الجواد بالدخول و...
-طق ....طق ...طق
-عبد الجواد: اتفضـــــــل
-خالد: السلام عليكم
-عبد الجواد بفرحة: عليكم السلام ، اهلا بيك يا بني ، ازيك عامل ايه؟؟
-خالد: الحمدلله تمام ، أخبار الآنسة سمر ايه النهاردة ؟؟
-عبد الجواد: الحمدلله بخير ، هي بس بتعمل الأشعة مع أمها وراجعة
-خالد: أهـــا
-عبد الجواد: والله ما كان في لازمة انك تتعب نفسك
-خالد: أنا معملتش حاجة ياحاج
-عبد الجواد: ازاي ماعملتش ، متقولتش كده ، ده جميلك هافضل شايله طول عمري فوق راسي و آآآآآ
ثم دخلت سمر إلى الغرفة ووالدتها تسندها و..
-تيسير: بالراحة يا بنتي
-سمر متآلمة : آآآآه ... ما أنا ماشية بشويش أهوو
-خالد: احم... آآآآ... حمدلله ع سلامتك يا آنسة سمر
رفعت سمر رأسها لتتفاجيء بوجود خالد في الغرفة ، فتعثرت في مشيتها ، فأسرع إليها خالد وسندها بذراعه حتى لا تسقط و...
-سمر: هاااه ... آآآ... انت
-تيسير: حاسبي يا بنتي
-خالد وهو يسندها : خلي بالك
-سمر: آآآ... هه .. شــ.. شكراً
-تيسير: متشكرين يا بني
-عبد الجواد: اسندي يا بنتي
جلست سمر على الفراش ، ثم وضعت تيسير عليها الغطاء ، وأمسك خالد بباقة الورد ثم قدمها إلى سمر و...
-خالد مبتسماً: اتفضلي يا آنسة سمر
-سمر: هه .. ده... ده عشاني
-خالد: أيوه
-سمر: ميرسي أوي
-خالد: ع ايه بس ، دي حاجة بسيطة ، وآآآ... احم ألف سلامة عليكي
-عبد الجواد: كلك ذوق والله يا بني ، الواحد مش عارف يقولك ايه
-تيسير: والنبي يا بني معاد في شباب زيك كده جدع وشهم وابن أصول وكله رجولة وأخلاق اليومين دول
-خالد: لا إزاي ، ده في شباب جدع موجود
-تيسير: لألألأ مش كتير
-خالد: أه قبل ما أنسى .. أنا كان معايا حاجات تخص الآنسة سمر ، ونسيت أديهالها
-سمر: حاجات ايه
-عبد الجواد: حاجات ايه دي يا بني ؟؟
-خالد: الموبايل بتاعها ، والمحفظة وكمان ميدالية المفاتيح
-سمر: أها
-عبد الجواد: ياااه يا بني ، دول مش حاجة
-خالد: لأ برضوه ، أنا بس اتلبخت في اللي حصل ، ونسيت أرجعهم لحضرتك أما شوفتك ، فقولت لازم أجي بنفسي أرجع الحاجة للآنسة سمر وبالمرة أشوفها .. آآآ... قصدي أشوفكم وأطمن عليها
-عبد الجواد: فيك الخير يا بني
-خالد: طيب أستأذن أنا بقى
-تيسير: ليه يا بني ما أنت لسه أعد معانا
-خالد: معلش عشان الآنسة سمر تاخد راحتها
-سمر: لالالا .. خليك قاعد .. آآآ.. اقصد يعني أنا مرتاحة كده
-عبد الجواد: استنى بس أجيبلك حاجة تشربها
-خالد: معلش وقت تاني ، وبعدين يدوب ألحق أرجع القاهرة
-سمر: ايه ده انت مسافر
-خالد: أيوه ، كمان شوية هنرجع القاهرة عشان نتابع أخبار يارا
-سمر: أمانة عليك لو عرفت حاجة عنها تطمني ...آآآ... قصدي تطمنا
-خالد: ان شاء الله حاضر
-تيسير: ربنا يرجعهالكم بالسلامة وتمسكوا ولاد الحرام دول
-خالد: يا رب أمييين ، عن اذنكم ، ومرة تانية حمدلله ع سلامتك
-سمر: الله يسلمك ، وميرسي ع الورد
-عبد الجواد: أنا جاي معاك أوصلك لتحت يا بني
-خالد: مافيش داعي يا حاج تتعب نفسك
-عبد الجواد وهو يصطحبه للباب : لا والله أبدااااا .. لازم أوصلك لتحت .. تعالى يا بني
-خالد: اتفضل يا حاج
........
وما إن خرج خالد من الغرفة حتى بدأت تيسير تتحدث عنه و...
-تيسير: ماشاء الله عليه ، راجل شهم ، وطول وعرض ، فعلاً ده اللي يتقال عليه ابن ناس أوي ..
-سمر وهي تشم الورد: اهـــا
-تيسير: ألا هو متجوز يا بت ولا خاطب ؟
-سمر: لأ يا ماما .. انتي بتسألي ليه ؟؟؟
-تيسير: بطمن يا بت ، الصراحة هو عينه كانت هتطلع عليكي
-سمر: نعم ؟؟ ايه اللي بتقوليه ده يا ماما
-تيسير: بقول ياختي اللي شوفته بعينيا
-سمر: لأ يا ماما مش معقول
-تيسير: يا بت أنا أفهمها وهي طايرة ، وهو باين عليه طاب
-سمر: هــه
-تيسير: وبكرة تشوفي يا حبيبتي
........
في خارج الغرفة ،،،
-خالد وهو يعطيه كارتاً ما : الكارت ده فيه أرقام تليفوناتي كلها ، ولو حضرتك عوزت أي حاجة كلمني في أي وقت ، أنا تحت أمرك
-عبد الجواد: كتر خيرك يا بني ، مستورة والحمدلله
-خالد: أنا بتكلم جد والله ، ماتشلش هم أي حاجة ، الحساب بتاع المستشفى مدفوع ، وانا مستعد أعالج سمر ع حسابي في أحسن مكان بس انت تؤمرني بده
-عبد الجواد: مايؤمرش عليك عدو يا بني .. الحمدلله انها فاقت وبقت كويسة ، ده عندي بالدنيا كلها
-خالد: ربنا يطمنك عليها دايماً
-عبد الجواد: تسلم يا بني .. وربنا يسلم طريقك
-خالد: الله يخليك يا رب
.................................
في فيلا ناهد الرفاعي ،،،
كانت ناهد تستعد للذهاب إلى البنك ، اطمأنت ناهد أن كلاً من يارا وشاهي يجلسان سوياً في الغرفة ، ثم اصطحبها أحد رجال عدلي للخارج و...
-ناهد: خدوا بالكو من بعض ، وانتي يا يارا اعملي نفسك رافضة لأي حاجة يقولك عليها
-يارا: طب ليه؟؟؟
-ناهد: من غير ليه ، اعملي اللي بقولك عليه وانتي ساكتة
-شاهي: مامي انتي رايحة فين ؟؟؟
-ناهد: مشوار تبع الزفت اللي تحت هاخلصه وأرجع بسرعة
-شاهي: مامي ماتسيبنيش
-ناهد: متخافيش يا شاهي ، أنا راجعة والله تاني
-عدلي بصوت مرتفع : ناهـــــــــــــــــــــــد ..!!!
-ناهد: ايوه جاية أهووو ...
-ناهد للفتاتين: خالوا بالكم من نفسكم ، هتوحشوني
-شاهي: مامي
-يارا:
-عدلي: خدي بالك أنا عيني عليكي
-ناهد: متخافش ، أنا هاعمل اللي اتفقنا عليه وأرجع تاني
-شخص ما: العربية جاهزة يا باشا
-عدلي: طب اسبقنا
-شخص ما: حاضر
-عدلي : يالا يا ناهد هانم ، ورينا شطارتك
-ناهد وهي تنظر لعدلي بتوعد: اطمـــــــــــــن ....
.............
دلفت ناهد إلى خارج فيلتها وركبت في السيارة مع أحد رجال عدلي ، ثم لحق بهما رجل أخر ليراقبهما أكثر عن كثب ، بينما صعد عدلي إلى غرفة نوم ناهد ليرتاح قليلاً ، وظل باقياً أحد رجال عدلي في الأسفل و...
-عدلي: أنا هاطلع أريح فوق شوية لحد ما الولية دي ترجع من بره ، عاوزك تفتح عينك
-شخص أخر: حاضر يا باشا
-عدلي: ولو في حاجة حصلت كده ولا كده بلغني ع طول
-شخص أخر: اطمن يا باشا
-شخص أخر في نفسه: أما أضرب بقى الحباية السوبر دي عشان دماغي تونون كده وأفوق للشغل .. يااااااه .. مافيش احسن من كده
جلس الشخص الأخير من رجال عدلي في الحديقة ثم تعاطى مخدراً مما جعله يتخيل أشياء مثيرة ، ظل ينظر إلى الأعلى ثم قرر أن يقضي يومه وهو في حضن احدى الفتاتين أو ربما كلتاهما ...
-شخص أخر وهو يمسح بيده على وجهه ورأسه : خلاااااص مش قادر ، دماغي هتضرب مني ، لأ أنا لازم أظبط نفسي ، ايوووه ، مممممم... آآآآخ ، مافيش إلا كده ، واحدة من المزتين اللي فوق دول هي اللي هتروق عليا ، أنا طالعلكم يا حلوين ، الشفاء كله هيبقى عندكم .. آآآآآخ ..................................................... !!!!
*********************
إلي هنا ينتهي الفصل الأربعون من رواية الفريسة والصياد بقلم منال سالم
تابع من هنا: جميع فصول رواية الفريسة والصياد بقلم منال سالم
تابع من هنا: جميع فصول رواية أشواق بقلم قسمة الشبينى
تابع من هنا: جميع فصول رواية أشواق بقلم قسمة الشبينى
تابع أيضاً: جميع فصول رواية همس الأنين بقلم آية محمد
اقرأ أيضا: رواية فى قلبى أنثى عبرية بقلم خولة حمدى
إرسال تعليق
يسعدنا تلقي اقتراحاتك أو تعليقك هنا