مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية ذات الطابع الإجتماعى مع رواية رومانسية جديدة للكاتبة يسرا جمال علي موقعنا قصص 26 وموعدنا اليوم مع الفصل الثانى عشر من رواية بعد النهاية بقلم يسرا جمال .
رواية بعد النهاية بقلم يسرا جمال - الفصل الثانى عشر
إقرأ أيضا: رواية غرام
فارس:الاوضة كلها أوراق وبقالي ساعتين بدور على ورقة مهمة ومش لاقيها
شادي:إيه اللي بهدل الأوضة كده
فارس:أنا يا سيدي برجع من الشغل أحط كل حاجة على المكتب ....أنا دلوقتي قدرت اللي بابا كان بيعمله في أوضتي ويقولي النظام سر النجاح
شادي:آه يعني انت غلطان أهو
فارس:متشكر
شادي:ههههههههه خلاص متزعلش وهاتلك خدامة يا سيدي تظبطلك مكتبك ده
فارس:شكلي هعمل كده خصوصا بابا شكله مطول في سفريته
شادي:يلا ييجي بالسلامة
فارس:آه صحيح انت متصل ليه؟
شادي بفرحة:احم بعتلك دعوة وصلتك ؟
فارس:دعوة إيه وبعتها إمتى؟
شادي:بعتها من فترة
فارس:والله يا شادي وصلتني حاجات كتير أوي ومبصتش في أي حاجة منهم
شادي بأسى:طيب
فارس:المهم دعوة إيه؟
شادي:دعوة فرحي يا أستاذ
فارس بفرحة:مش ممكن أخيرا
شادي:هههههه ليه هو أنا عنست
فارس:أيوه يا شادي معاك
شادي:إيه ؟..بتقول إيه؟
فارس:معلش مكنتش مركز معاك لقيت الورقة أخيرا دعوة إيه بقى؟
شادي بضيق:لا فارس ركز معايا علشان بجد هتخنق منك كده
فارس:معاك أهو
شادي:بعتلك دعوة فرحي
فارس بفرحة:مبروووك يا شادي
شادي بفرحة:الله يبارك فيك عقبالك
فارس:تسلم يا حبيبي إمتى الفرح ؟
شادي:افتح الدعوة وشوف
فارس:احتمال أنسى قول إمتى؟
شادي:الليلة
فارس:بتهزر
شادي:لا والله بتكلم جد
فارس:بسرعة كده ؟
شادي:بسرعة إيه أنا بقالي شهر بجهز في بيتي
فارس:واضح إني أخر من يعلم
شادي:لو بتفتح الرسايل اللي بتجيلك كنت هتكون أول من يعلم
فارس:خلاص المهم ألف مبروك يا جدع فرحك الساعة كام ؟
شادي:الساعة 9
فارس:خلاص إن شاء الله جاي بس موعدكش أحضر الفرح من أوله
شادي:عادي ولا يهمك المهم تيجي
فارس:إن شاء الله جاي سلام
شادي:سلام
وأغلق شادي الخط وابتسم
_____________________________________
جلس في غرفته يكتب الجزء الثاني من الأحداث وهو في قمة الفرح
سمع طرقات على باب غرفته
باسم:اتفضل
دخلت سامية:باسم انت قاعد يا ابني بتعمل إيه؟
باسم:بشتغل يا ماما
سامية بفرحة:انت لقيت شغل ؟
باسم:آه صحيح نسيت أقولك أنا اشتغلت في مجلة
سامية:بتصمم إعلانات لمجلة
باسم:ههههههه لا خلاص انسي موضوع الإعلانات ده
سامية:أنساه ازاي آمال انت بتشتغل إيه؟
باسم:كاتب بكتب قصة وبنشرها في المجلة
سامية:ودي شغلانة مناسبة يا ابني
باسم:ما أنا شغال فيها بقالي شهر وأجري هيزيد كمان
سامية:من إمتى وانت ليك في الكتابة ؟
باسم:من زمان ومكنتش واخد بالي
سامية:ربنا يوفقك يا ابني
باسم:يا رب
سامية:نسمة بتسألني عنك هو انت قافل موبيلك ؟
باسم بضيق:آه قافله
سامية:انت لسه زعلان من نسمة؟
نظر باسم إلى عينيها:اقفلي الموضوع يا ماما من فضلك
سامية بحزن:أقفله ازاي بس ده إنتو أولادي وأحب إن العلاقة بينكم تكون كويسة
باسم:ربنا يسهل يا ماما سبيني أشتغل دلوقتي
سامية بأسى:طيب يا ابني
وغادرت الغرفة
أمسك جواله وهم بالاتصال بها لكنه تراجع وأعاد الجوال مكانه
وأكمل عمله
عادت نور من عملها وهي تشعر بالضيق من مديرها
ريهام وهي تمسك دعوة عرس بيدها:إيه ده يا نور؟
نور:دعوة فرح ذي ما إنتي شايفة كويس إنك فكرتيني إن النهاردة فرح شادي
ريهام:هي العائلة كلها بقيت بتتجوز بسرعة كده
نور متصنعة البلاهة:سبحان الله
ريهام:بلاش استفزاز يا نور
نور:كنت لسه هقول نفس الكلمة
ريهام بحدة:نور اتكلمي بأدب
نور:ماما أنا راجعة مخنوقة من كل حاجة حتى من نفسي فأرجوكي بلاش خناق دلوقتي على موضوع لا بإيدي ولا بإيدك
ودخلت إلى غرفتها ومددت على سريرها في تعب وتتساءل كيف لها ان تلومها وهي السبب الرئيسي في تأخر زواجها فهي من ولد المخاوف بداخلها
___________________________________
في منزل نورهان أنهوا تناول الغداء
نورهان:مصطفى عوزاك
مصطفى:اتفضلي يا ماما
نورهان:مش ناوي تفرحني بيك يا حبيبي ؟
مصطفى:ربنا يسهل
نورهان:طب إيه رأيك في نور؟
مصطفى:نور مين؟
نورهان:نور بنت خالتك ريهام
مصطفى:لا أنا اتعقدت من العائلة كلها
نورهان:جرا ايه يا مصطفى هو علشان نسمة تقفل من كل البنات
مصطفى بغضب:موضوع نسمة انتهى خلاص كام مرا لازم أقول
نورهان:طيب نور لاء ليه؟
مصطفى:يا ماما أنا ونور بحس إننا مش مناسبين
نورهان:وانت كنت قعدت واتكلمت معاها يا ابني اسمعني نور ذي القمر ومؤدبة ونعرفها
مصطفى:ما نسمة كمان كنا نعرفها
نورهان:يادي نسمة ...هو إحنا مش هنخلص
مصطفى:أنا بأكدلك إن الموضوع خلص بس ده مش معناه إن أعيد التجربة تاني
نورهان:مين قال نعيد التجربة تاني
مصطفى:آمال نور دي تبقى إيه؟
نورهان:نور تختلف عن نسمة
مصطفى:أوعي تفتكري إني مبسوط بالعزوبية نفسي أتجوز النهاردة قبل بكرا نفسي يكون عندي أولاد بس تقدري تقوليلي بقى نور كويسة ليه؟
نورهان:اؤكدلك إن نور غير
مصطفى:تمام يا ماما نشوف موضوع نور
نورهان بفرحة:خلاص اتفقنا
_________________________________
في فيلا فؤاد سمعت دارين طرقات على باب غرفتها
دارين:اتفضل
دخلت علياء:خلصتي غدا يا دارين ؟
دارين:آه خودي الصنية
نظرت علياء الى الصنية فوجدتها لم تأكل إلا القليل
علياء:إيه ده يا بنتي ده بس اللي أكلتيه كلي كمان ده انتي جواكي طفل عاوز غذا
دارين:أنا شبعت خودي الأكل وسبيني لوحدي
اخذت علياء الصنية وانصرفت
شعرت دارين بالتعب أمسكت الهاتف واتصلت بشريف
شريف:الو
دارين بدموع:شريف
شريف بقلق:مال صوتك؟
دارين:أنا تعبانة أوي يا شريف أوووي
شريف:مالك؟
دارين بعياط:تعالا أنا تعبانة أوي
شريف:أنا جاي حالا اهدي
وأغلق شريف الخط وغادر المكتب أوقفه تامر
تامر:انت رايح فين ورانا اجتماع
شريف:اجتماع إيه دارين تعبانة
تامر:تلاقيها بتدلع علشان مش حمل التعب اللي هي فيه
شريف:بص يا تامر مليش دعوة بالعداوة اللي بينك وبين أختك أنا كل اللي أعرفه إن دارين تعبانة ومحتجالي
غضب تامر و ذهب شريف إلى فيلا فؤاد الحكيم
___________________________________
في شركة عماد
أنهوا الاجتماع
فارس:أنا هروح مكتبي تؤمرني بحاجة يا فندم
عماد:لاء متشكر روح انت
وذهب فارس إلى مكتبه فوجد وليد جالس على احدى الكرسيين التابعين للمكتب
أغلق فارس الباب
فارس:خير؟
وليد:مفيش زهقت من قعدة البيت قولت أجي
فارس:عماد بيه فاضي ممكن تروحله
وليد:لا أنا جايلك انت حتى بابا ميعرفش إني هنا
فارس:وجايلي أنا ليه؟
وليد:عاوزك تعملي ميزانية أو تشوفلي حد يعملي ميزانية
جلس فارس مقابلا له:ميزانية؟
وليد:آه
فارس:لإيه؟
وليد:لمطعم
فارس:آه انت مصمم على الموضوع ده
وليد:بالظبط كده
فارس:طب ما تقول لباباك
وليد:إيه السخافة دي ما أنا قايلك بابا مش موافق
فارس:اتفاهم معاه واقنعه
وليد:مش هيوافق أنا عارف
فارس:آيوه بس أنا مقدرش أعمل حاجة ذي دي
وليد:ليه؟
فارس:أنا مش عاوز أتدخل يا وليد من فضلك
وليد:آه طبعا حقك ياريت بس بابا ميعرفش بالكلام ده
ونهض وليد وغادر وشعر فارس أن وليد غير راض عن رده
___________________________________
في فيلا فؤاد الحكيم دخل شريف إلى الغرفة فوجدها تبكي فجلس إلى جوارها واحتضنها
شريف:اهدي يا حبيبتي اهدي خلاص أنا جنبك
دارين:أنا تعبانة أوي يا شريف الحمل متعب أوي
شريف:طب اهدي بس اهدي
استمرت دارين في البكاء
شريف:تحبي نروح لدكتور؟
دارين ببكاء طفولي:يعني هو هيتعب مكاني
شريف:هههههه لا يا حبيبتي بس ممكن يقولنا حاجة
دارين:معرفش بقى
شريف:طب أنا هنزل أجهز العربية وإنتي اجهزي تمام؟
دارين تمسك بجاكيت بدلته:لا خليك
شريف بحنان :طيب يا حبيبتي اهدي أول وبعد كده نبقى نروح للدكتور
دارين:ذي ما تحب
تعجب شريف منها فقد كانت تشاجره في الصباح والآن هي كالأطفال في أحضانه بل وتستمع إلى كلامه أيضا
_________________________________
في المساء كان حفل زفاف هادئ لكن ملئ بالفرح
وفي قاعة السيدات
أمضت نور الحفل بجانب ليلى فقد تعرفت عليها وأحبت شخصيتها للغاية
وفي قاعة الرجال
حضر فارس في نهاية حفل الزفاف والعروسان يغادران استوقفهم و ذهب وعانق شادي
فارس:مبروك
شادي:رخم وبايخ هو ده اللي جاي
فارس:لا على فكرة والله كنت جاي بس لما خلصت شغل قولت أروح البيت أغير هدومي مددت على السرير نمت من غير ما أحس شوف حتى ملحقتش أغير هدومي وجيتلك بيها
شادي:ههههههههه مكتوبلك تيجي بيها
فارس:تعالوا أوصلكوا المطار
شادي:لا إحنا مش مسافرين بالطيارة
فارس:آمال؟؟
شادي:بالأتوبيس
فارس:أتوبيس؟
شادي:آه ليلى عاوزة كده
فارس:طب برضو تعالوا أوصلكوا
أتت ليلى بعد أن سلمت على والديها
شادي:فارس صاحبي ...ليلى مراتي
فارس:مبروك
ليلى:الله يبارك فيك
فارس:طب يلا يا شادي
شادي:فارس هيوصلنا
ليلى:مفيش داعي تتعب نفسك بابا راح يوقف تاكسي
فارس:تاكسي وأنا موجود ما تقول حاجة يا شادي
شادي بمرح:لاء خلاص خلينا نحوش فلوس التاكسي ... روح هات انت عربيتك وأنا هقول لعمي
فارس:هههههه طيب
أحضر فارس سيارته وأوقفها
فتح شادي الباب لليلى وأغلق الباب وذهب إلى الإتجاه الأخر ليركب بجوارها وانطلقت السيارة وسط التصفيق والتهنئة
___________________________________
في صباح اليوم التالي استيقظت نور باكرا فقد رحلت البارحة من الحفل في وقت مبكر نهضت واستعدت للعمل خرجت من غرفتها لتناول الفطور فوجدت والدها فقبلته بفرحة
نور:وحشتني يا دكتور
وجلست
ماهر:وانتي كمان يا حبيبتي عاملة إيه؟
نور:كويسة الحمد لله ....بس إيه ده أول مرا تنورنا على الفطار على كده هصحى بدري علشانك
ماهر:ههههههه مامتك اللي كلمتني وأصرت عليا أجي
نور:خير يا ماما؟
ريهام:بصراحة في عريس وأنا موافقة عليه جدا
نور:مبرووك بس هتسيبي بابا ..بس ولا يهمك أخده أنا
ريهام لماهر:شايف بنتك ؟
ماهر:ههههههههههه يا نور متعصبهاش
نور:يا بابا دي بتتكلم على أساس إن المهم هي توافق وأنا أولع
ريهام:مقولتش كده
نور:آمال؟؟
ريهام:رأيك إيه يا نور
نور:مش أعرف هو مين؟
ريهام:مصطفى
نور بدهشة:ابن خالتو نورهان؟
ريهام:آيوه
نور:يا ماما ده كان خاطب نسمة
ريهام:واتفسخت الخطوبة من زمان وانتي عارفة
نور:آيوه بس ...
قاطعتها :بس إيه ده طلبك للجواز امبارح
نور بخجل:طلبني أنا ازاي يعني؟
ريهام:ذي الناس يا نور ...خالتك كلمتني امبارح وأنا خلاص تعبت يا نور إمتى تتجوزي وتفرحيني بقى
نور:نشوف يا ماما
ريهام لماهر:اتكلم
ماهر:ما تشوفيه يا نور
نور:أشوف في إيه يا بابا ما أنا عارفاه
ماهر:طب إيه رأيك فيه؟
نور:كويس يا بابا بس أنا مش حاسة إنه مناسب ليا
ماهر:يا بنتي متحكميش من غير ما تتكلموا
نور:نتكلم إيه يا بابا هو أنا فاضية ده أنا عندي شغل ولما برجع بشتغل في البيت وبنام
ريهام:اتصرف معاها بقى
نور:على فكرة أنا اتأخرت
ماهر:علشان خاطري يا نور
نور منهية الحوار:طيب يا بابا حاضر هقابله
ريهام بفرحة:يعني أقول لنورهان ؟
نور:قولي يا ماما قولي
ونهضت وسحبت حقيبتها وقبلت رأس والدها:يلا انا همشي سلام
ريهام:مفيش بوسة ليا هو بابا وبس يعني
نور وهي تغلق الباب:مش كفايا عليكي العريس يا أمي
ماهر:هههههههههههههههههه
ريهام:انت بتضحك ؟
ماهر:بنتك دي عسل
ريهام:وعنيدة
ماهر:بلاش تجبريها بعدين ترجعي تندمي
ريهام:ماهر أنا مش هعشلها العمر كله وعاوزة أتطمن عليها علشان أرتاح
ماهر:ليه الكلام ده يا ريهام ؟
ريهام:أنا بقول الواقع
ماهر:بلاش الكلام الوحش ده الله يكرمك
ريهام:حاضر يا ماهر هسكت أهو بس ساعدني نخليها توافق على مصطفى
ماهر:مش لما أنا أعرفه أول
ريهام:يا سيدي أحكيلك أنا عنه
ماهر:اتفضلي يا ستي
ريهام:شوفــ....
رن هاتفه الخليوي
ماهر:الو....طيب أنا جاي سلام
ونهض قائلا:معلش يا ريهام في حالة متابعة معايا وشكلها تعبانة أوي فهروح أشوفها
ريهام:يا ماهر أنا ملحقتش أتكلم
ماهر:حددي معاد معاهم وأنا هاجي أحضر المقابلة ياستي ووقتها هتعرف على مصطفى ده تمام كده
ريهام:تمام يا ماهر
وغادر ماهر
لا تدري نور لما اعترضت على مصطفى وهي على علمٍ به فلم يكن يوماً شخصاً سئ السمعة بالعائلة بل كان دائماً الحديث عنه رائعاً ...أتظنها هي خيانة لنسمة؟...لكن نسمة كانت مصرة على فسخ الخطبة ...أم أنها تعتقدها خيانة لخالتها ؟...أم انها خيانة لنفسها التي وعدتها بعدم الاقدام على هذا الأمر؟...لكن هل كان وعداً صائباً أم متهوراً؟
___________________________________
في فيلا فؤاد الحكيم
استيقظت دارين فوجدته ممسكا بكفها
جلست دارين وسحبت كفها
شريف بإبتسامة:صباح النور يا حياتي
دارين:صباح النور انت إيه اللي مقعدك كده ؟
شريف:مستنيكي لما تصحي
دارين:طب أنا خلاص صحيت روح شوف شغلك
شريف:لا يا ستي أنا فضيت نفسي علشانك قومي نلبسي علشان نروح للدكتور
دارين:دكتور ليه؟
شريف:مش قولتي إنك تعبانة ؟
دارين:بقيت أحسن
شريف:طب أنا عاوز أتطمن
دارين:مليش مزاج أروح في حتة يا شريف
شريف:خلاص ذي ما تحبي
ثم اردف:أشغلك فلم يسليكي؟
دارين:لا مش عاوزة ...احم وحاجة كمان
وصمتت للحظات ثم قالت:عاوزة أقعد لوحدي
شريف متصنع الابتسامة:حاضر هسيبك لوحدك
ونهض شريف وغادر الغرفة في حزن
أمسكت دارين هاتفها الخليوي واتصلت بنور
نور:دودوووو وحشتيني
دارين بخنقة:نور ممكن طلب؟
نور:مال صوتك؟
دارين:لا أبدا تعبانة بس
نور:سلامتك
دارين:الله يسلمك
نور:قولي طلب إيه؟
دارين:اسأليلي باباكي كده عن تعب ما قبل الولادة إيه سببه
نور:هههههه هيشتمني
دارين:ليه بس؟
نور:طبيعي يا بنتي إنك تعبانة
دارين:لا مش طبيعي التعب ده مضايقني أوي وبعدين اسأليه انتي خسرانة إيه؟
نور:طب إيه رأيك تروحيله المركز دلوقتي وتكشفي
دارين:لا بخاف
نور:كان نفسي أقولك أجي معاكي بس أنا في الشغل حاليا
دارين:أنا مش عاوزة أروح لوحدي
نور:روحي مع جوزك يا مدام هههههههههه
دارين بخنقة:لا مش هينفع
نور:ليه؟
دارين:شريف في الشغل
نور:كلمي حد يفيدك او شوفي حد او استنيني
دارين:طيب سلام
نور:سلام يا حبي وطمنيني عليكي
دارين:طيب
وأغلقت دارين الخط
دارين:عليااااااااء
لم تجب علياء فاتصلت دارين بها فجاءت علياء
علياء:خير يا بنتي ؟
دارين:ساعديني أغير هدومي
علياء:حاضر يا بنتي ولو إني شايفة إن خروجك وانتي حامل ملوش لازمة
دارين بغضب مكبوح وتعب:ساعديني يا علياء وانتي ساكتة أنا مش نقصاكي واعملي حسابك انتي جاية معايا
علياء:طيب
____________________________________
في بيت مصطفى
نورهان:ومالو نيجي النهاردة بليل
ريهام:خلاص يا نورهان هستناكي
نورهان:طيب يا ريهام سلام
ريهام:معلش بس ماهر الليلة هيكون فاضي حسب ما اتفقت معاه معرفش إمتى تاني ممكن يكون فاضي
نورهان:لا بالعكس كده كويس جدا
ريهام:طيب سلام
نورهان:سلام
وأغلقت نورهان الخط
نورهان:مصطفى
جاء مصطفى وهو يستعد:خير يا ماما؟
نورهان:انت خارج؟
مصطفى:أها بتسألي ليه؟
نورهان:اتفقت مع خالتك نروحلهم النهاردة بليل
مصطفى:نروح لمين وليه؟
نورهان:لخالتك ريهام يا مصطفى علشان نخطب نور
مصطفى:طيب يا ماما
نورهان بإستغراب:افتكرتك هتعترض
مصطفى:مينفعش أعترض بعد ما اتفقتي خلاص
نورهان:يعني لولا إني اتفقت مكنتش وافقت
مصطفى:ليه نتخانق يا ماما
نورهان:أنا بتخانق يا مصطفى
مصطفى:أنا خارج
نورهان:رايح فين؟
مصطفى:رايح لباسم
نورهان:هترجع إمتى؟
مصطفى:هحضر المقابلة الليلة يا ماما سلام
وغادر مصطفى
_____________________________________
وقفت السيارة أمام مركز والد نور
علياء:ليه جينا هنا ؟
دارين:يا رب صبرني انزلي يا علياء انزلي
علياء:طب خلاص نازلة اهو
دارين:وتعالي ساعديني انزل
علياء:حاضر يا بنتي
وساعدتها على النزولودخلتا معا
وسألت دارين في الاستقبال
دارين:دكتور ماهر هنا؟
_آيوه يا فندم في مكتبه
دارين:شكرا
وتوجهتا معا
استوعبت علياء الموقف فقالت:مش كان جوزك ييجي معاكي يا دارين
صمتت دارين ولم تجب هي نفسها لا تدري لما ابعدته ولم ترده معها اليوم بل لما ارادته البارحة واليوم اعتبرته كأن لم يكن زوجها يوماً
____________________________________
في فيلا فؤاد الحكيم رن الهاتف
هند:الو
شريف:الو ...دارين فين ؟
هند:خرجت يا فندم
شريف في نفسه"علشان كده مبتردش على الموبيل"
هند:أبلغها بحاجة يا شريف بيه
شريف:اسمي شريف بس ...دارين راحت فين؟
هند:معرفش والله هي خرجت مع داده علياء وقالتلي اخود بالي من البيت
شريف:أنهي سواق
هند:علاء
شريف:طيب شكرا يا هند
وأغلق الخط
واتصل بعلاء
شريف:الو
علاء:الو
شريف:أنا شريف يا علاء
علاء:آيوه يا فندم
شريف:أخدت المدام وعلياء على فين؟
علاء:مركز طبي يا فندم
شريف بقلق:ليه مالها جرالها ايه؟
علاء:معتقدش ان فيها حاجة يا فندم هي داخلة على رجليها وكويسة
شريف:متأكد؟؟
علاء:آيوه يا فندم
شريف:طيب متشكر
علاء:أبلغها بحاجة
شريف:لاء وبلاش تعرف إن أنا اتصلت
علاء:تحت أمرك يا فندم
شريف:شكرا
علاء:العفو يا فندم
وأغلق شريف الخط وهو في قمة الغضب
شريف:ليه بتعمل كده ما أنا كنت معاها النهاردة
تابع من هنا: جميع فصول رواية أبو البنات بقلم رهف سيد
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا