مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية ذات الطابع الإجتماعى مع رواية رومانسية جديدة للكاتبة يسرا جمال علي موقعنا قصص 26 وموعدنا اليوم مع الفصل الثلاثون من رواية بعد النهاية بقلم يسرا جمال .
رواية بعد النهاية بقلم يسرا جمال - الفصل الثلاثون
إقرأ أيضا: رواية غرام
دارين:من فضلك يا بابا انا مستضيفة مازن لكام يوم
فؤاد:ليه ان شاء الله كان بيته هو ؟؟
دارين:انا مقولتش بيته انا قولت مستضيفاه
فؤاد:ليه؟
دارين:شيء يخصني
فؤاد:طب انا عاوز أتكلم معاكي
دارين:بخصوص ايه؟
فؤاد:هتحققي معايا يا دارين علشان عاوز أتكلم معاكي
مازن ينهض:طب هسبكم انا
دارين:خليك يا مـ...
قاطعها مازن:انتو محتاجين تتكلموا
دارين تصمت للحظات وتدرك ان كلامه صحيح هم بالانصراف
دارين:استنى
مازن:ايه؟
دارين:خلي رائد معاك واكله
حمله مازن واخذ الحليب أيضا وتركهم
دارين:خير يا بابا؟
فؤاد:النهاردة لهجة اخوكي كانت غريبة ليه؟
دارين:طب ما تروح تسأله
فؤاد:قالي كلام غريب
دارين:كلام ايه؟
فؤاد:قالي ان قلوبكم مكسورة
دارين:طيب وايه المشكلة ما هي مكسورة من زمان
فؤاد:هو انا ممكن افهم ايه اللي حصل في غيابي ؟
دارين تأخذ نفسا عميقا:انا اتطلقت
فؤاد بصدمة:ليه؟
دارين:قسمة ونصيب
فؤاد:من امتى الكلام ده؟
دارين:من زمان اوي من تاني يوم بعد ولادتي اللي انت سافرت فيه ومحستش بوجعي
فؤاد:ازاي متقوليليش على حاجة ذي دي؟
دارين:وتعرف ليه؟
فؤاد:مش انا ابوكي ؟
دارين:طبعا بابا بس انا حسيت اني مش مهمة عندك لما كلمتك وانا موجوعة وكلمتني انت عن احلامك وطموحاتك في الشغل
فؤاد:انتي هتكلميني ذي ما كلمني تامر ولا ايه؟...انا بعمل كل ده علشانكوا
دارين:ياريتك ادتنا شوية من وقتك بلاش نقعد ونرغي فيه ... شوية وقت بس تعرفنا ان احنا مش لوحدنا في الدنيا تعرفنا ان احنا ذينا ذي أي حد تعرفني ان تكبري ده اخره وجع كبير مش هيخف بسرعة
مسحت دمعة خانتها ونزلت
فؤاد:انا كنت بقول انك لسه صغيرة ومسيرك تفهمي لوحدك
دارين:هفهم ازاي وانا كل شيء مجاب هفهم ازاي وانا محدش بيعاتبني او يحاسبني ...تامر بس كان بيحاسبني ... بس كان بيحاسبني بطريقة غلط
فؤاد:وانتي كنتي عوزاني احاسبك ازاي وكل ما حد يضايقك بتأخدي هدومك وتروحي لمامتك
دارين بإنفعال:كنت سبني مرة اتوجع اوي علشان اعرف ان انا مش كل حاجة في الدنيا ...كنت مرة واحدة علمني فهمني ان انا غلط
فؤاد:مكنتش عاوز احرمك من حاجة علشان مامتك سابتك وانتي عندك 10 سنين
دارين:مش بالطريقة دي كنت خود بالك مني شوية
فؤاد:كنت فاكر اننا قريبين من بعض بدرجة كافية
دارين بأسى:للأسف احنا بعاد اوي عن بعض
نظر فؤاد لها بحزن
دارين: في النهاية دي غلطتي اني مخدتش خطوة جد في حياتي واتغريت بنفسي
فؤاد ينظر اليها:مالك يا حبيبتي ايه اللي يرضيكي وانا اعمله ؟
دارين:لا يا بابا المرة دي مش هتدلعني ذي زمان وتأخد بإيدي وتقولي اطلبي واتمني لاء مش هينفع...المرة دي انا لازم اخود خطوة جد في حياتي واصلحها
فؤاد:واضح ان انتي واخوكي مضغوطين شوية هسيبكم ترتاحوا ونبقى نتكلم بعدين
وتركها وذهب وابتسمت هي في سخرية
____________________________________
في صباح اليوم التالي في شركة عماد
اجتمع الموظفين معاً في مكتب سكرتارية عماد والتي ستصبح الأن لفارس
محسن:ابن الايه اخد كل حاجة على الجاهز
مؤمن:بس ده اتسجن برضو الله يكون في عونه
محسن:انت بتصدق دي لعبة
رشا:هو اللي قتله فعلا ولا ايه؟
مؤمن:يا بنتي ما هو طلع منها وسامح طلع هو اللي عملها
محسن:مش بعيد يكون دبر الموضوع ده مع سامح انت ناسي كان بيقعد معاه ازاي
مؤمن:معقولة يكون عمل كده ده كان احسن واحد فينا
محسن:اللي تحسبه موسى يطلع فرعون يا باشا
دخل فارس وعندما وجدهم مجتمعين تسربت الى آذانه بعض الكلمات من حوارهم
فارس:احم احم
التفتوا اليه في فزع
فارس بهدوء:في اجتماع دلوقتي حالاً
ودخل الى مكتبه وهو في قمة غضبه لكنها في النهاية فترة مؤقتة ولذلك سيتمالك اعصابه
اجتمعوا جميعاً ودخل فارس اليهم ليجد النظرات التي توقعها أمس فتغاضى عنها وجلس فارس:ازيكم يا جماعة ؟
جاوبوا بتتابع ولمح في نبرات صوت البعض كره والبعض فرحة والبعض غير مبالي
فارس:انا هنا مكان أستاذ عماد الله يرحمه لفترة بسيطة جدا فياريت نتعامل كويس مع بعض الفترة دي وانا عارف ومتأكد ان في ناس مش طيقاني هنا واحب اقولهم ان انا كمان مش طايق حد ولا طايق الشركة كلها ولولا تنفيذ الوصية انا مكنتش هاجي
وصمت للحظات ثم أكمل:انا هنا رئيسكم مؤقتا ومش علشان انا مش طايق المكان تتكاسلوا في شغلكم او نتعامل بقلة احترام مع بعض .... الشغل ذي ما هو هيمشي في بعض التعديلات هعملها من بكرا والنهاردة هشوف حال الشغل وصل لفين وهحط خطة نمشي عليها وبكرا هتعرفوها ...دلوقتي اتفضلوا على مكاتبكم
وغادر الجميع
محسن بكره:تؤمر بحاجة يا فندم؟
فارس بإبتسامة باردة:معلش يا محسن مش هتشتغل معايا اصل انا مش هرتاح غير مع السكرتارية بتاعتي ياريت تبدلوا مع بعض
محسن بغيظ:وانا هشتغل مع مين؟
فارس:إيهاب مسك مكاني ده طبعا مؤقتا لحد ما وليد يمسك الشغل ويقرر مين هيكون مكاني
محسن بغيظ:تحت امرك يا فندم
فارس:محسن
التفت اليه:نعم؟
فارس قاصدا استفزازه:ياريت توصيلي على نسكافيه
محسن بغضب مكبوح:حاضر يا فندم
وقبل ان يذهب دخل شخص الى المكتب
فارس:أفندم؟
ياسر:ياسر الدمنهوري اخو المرحوم عماد الدمنهوري
فارس لمحسن:طب روح انت يا محسن ونفذ اللي قولتلك عليه
وذهب محسن
فارس:اتفضل
جلسوا
فارس:خير؟
ياسر:انا كنت في أمريكا ولسه عارف من مفيش اللي حصل
فارس:طب ممتاز انك عرفت البقاء لله
ياسر:انا سمعت من المحامي اللي حصل
فارس:وبعدين؟
ياسر:انا عارف كويس اوي انك كنت كويس جدا في الشركة فأنا عاوزك ذي ما انت في الإدارة مش ناوي أتخلى عنك
فارس يبتسم:نعم؟...انت مين أصلا؟
ياسر:نعم
فارس:وانت جاي ليه أصلا
ياسر:جاي ادير نصيب ابن اخويا
فارس:واضح ان حضرتك مسمعتش كلام المحامي كويس
ياسر:لا انا سمعته كويس
فارس:ويا ترى بقى فهمت معنى انه خلاني واصي على كل املاكه لحد ما ابنه يبلغ السن القانوني
ياسر:فاهم ده كويس بس انا مش غريب انا عمه وانا أولى بنصيبه مش كده
فارس:الوصية مقالتش كده
ياسر:سيبك من الوصية محدش هيمانع اننا نمسك نصيبه في الشركة ونديره ولحد ما برضو يبلغ السن القانوني يعني الوصية هتتنفذ هتتنفذ بس بتعديل بسيط جدا وهو ان انا مكانك
فارس:انا متأسف ليك بس انا مش هتنازل عن تنفيذ وصيته الله يرحمه
ياسر:فارس انا لحد دلوقتي بتكلم بهدوء
فارس:عاوز تعلي صوتك اتفضل بس وقتها هجبلك الأمن يرموك برا
ياسر ينهض وبإنفعال:انت مجنون يا جدع انت ؟..انت نسيت نفسك ولا ايه ده انت مجرد موظف عند اخويا الله يرحمه
فارس:ده كان زمان دلوقتي انا ماسك شركته وكل املاكه وطبعاً لفترة مؤقتة
ياسر:ايوه بس انا أولى ان انا أمسك كل ده وأبقى انا الواصي عليه
فارس:والله والده وصاني انا وانا بنفذ وصية
ياسر:فارس انت أصلا مش من العائلة ازاي تمسك أملاك خاصة بفرد من العائلة
فارس:ده بأمر من فرد من العائلة والأوراق متوثقة رسمي
ياسر:فارس بلاش اللعبة دي معانا
فارس:لعبة؟؟..لا واضح ان انت جاي تهزر وانا الصراحة معنديش وقت علشان اضيعه معاك اتفضل اطلع برا
ياسر:انت اتجننت ؟
فارس:كلمة زيادة وهنده الأمن
ياسر:انت عارف انت بتكلم مين؟
فارس:عارفك كويس ياما أستاذ عماد حكالي عنك ..اتفضل برا قبل ما انده الأمن
ياسر:اعرف ان السكة دي مش حلوة انت متعرفش انا ممكن أعمل ايه ؟
فارس:برااا
وغادرا في غضب بينما نفض هو كل شئ عن رأسه وحاول ان يكون رائعاً كما كان دائماً في عمله
__________________________________
في فيلا عماد
استعد وليد كي يذهب الى المدرسة كان بداخله ألم شديد بسبب الظروف التي مر بها لكنه قرر ان تلك الظروف ستكون مصدر قوة له كي يحقق حلم والده ويتخرج هذه السنة
____________________________________
وجدت دارين رسالة من نور
(انا رتبت خروجة لينا انا بجد محتاجة اشوفك اوي تعالي يا دارين ارجوكي بجد عاوزة اشوفك ... هنتقابل في مطعم*****علشان نتغدا سوا )
(انا اللي عاوزة اشوفك يا نور جايا بإذن الله)
كانت جالسة في مكتبها في الشركة رن هاتف الشركة
دارين:الو
فارس:الو أستاذة دارين ؟
دارين:ايوه مين؟
فارس:انا فارس
دارين:اه اهلا
فارس:انا حبيت اشكرك على وقوفك جنبي ومساعدتك
دارين:على ايه بس ده واجب.... حمدا لله على السلامة
فارس:الله يسلمك متشكر
دارين:العفو
فارس:بالنسبة للتعاقد اللي بينا
دارين:ايوه
فارس:انا حاليا مسؤول مكانه الله يرحمه
دارين:اه تمام وانا عمتا حاليا مش هبقى مسؤولة عن أي حاجة بخصوص الموضوع ده
فارس:مش فاهم ازاي يعني؟
دارين:يعني انت كلامك هيبقى مع الشركا لاني مش هكون فاضية الفترة الجاية
فارس:اه تمام
دارين:سلام
فارس:سلام
وأغلقت دارين الخط
دارين:خلاص جه الوقت
_____________________________________
في شركة الهندسة
يرن هاتف شادي الخليوي
شادي:الو
سناء:الو يا حبيبي انت جاي امتى؟
شادي:هخلص شغل واجي علطول في حاجة؟
سناء:لا يا حبيبي بس تعبانة شوية وعوزاك تيجي تقعد مع بنتك
شادي:هو انا بعرف اقعد معاها برضو يا ماما
سناء:وبعدين يا ابني الوضع كده مش هينفع لازم تلاقي حل
شادي:حاضر يا ماما
__________________________________
وفي احدى المطاعم وقت الغدا أخيرا اجتمع الأصدقاء
نور:والله وحشتيني اوي
دارين:وانتي كمان فينك؟
نور:معلش مريت بشوية ظروف
دارين:وانا كمان مريت بشوية ظروف
نور:المهم كويسة دلوقتي ؟
دارين:اه ياختي هيكون مالي يعني مطلقة وعندي ولد
نور بصدمة:اتطلقتي
دارين:ايوه ياختي اتطلقت
نور:والله يا دارين ما عارفة اقولك ايه انا شكلي انا كمان هطلق
دارين:اتوكلي على الله
نور:بجد ده رأيك؟
دارين:انا رأيي انك لو واثقة من موضوع الطلاق ده اعمليه مفيش داعي تأجليه خالص
نور:على الاغلب ..متأكدة
دارين:مش عارفة اذا كنت انا الشخص اللي المفروض يديكي نصيحة ولا لاء بس عموماً دي كانت نصيحة بعد تجربة عشتها وندمت اني كملت فيها وانا مش مرتاحة
نور:شكلي خلاص اخدت قرار
دارين:ايه هتطلبي الطلاق خلاص؟
نور:لو طلبت الطلاق هعمل لنفسي مشاكل كتير في البيت خليه هو يطلقني من نفسه يمكن ابان قدامهم مجروحة فيخففوا عني بدل ما يوجعوني زيادة
دارين:انتي حرة بتوقفي حياتك على الفاضي
نور مغيرة الموضوع:سيبك مني ...ايه الاستايل الجديد ده؟
دارين بإبتسامة:ميرسي
جلسوا يتناولون الطعام معاً لكن بلا اي شهية كلاهما متألمة بكل معنى للكلمة لكنها لم تعد تحمل تلك الطاقة للحديث
__________________________________
وفي فيلا إبراهيم
إبراهيم:انا مبسوط اوي انك قاعد بتتغدا معايا
فارس:انا خلاص مش هكرر غلطة زمان
إبراهيم:كنت اعزم وليد يا ابني الولد عايش حالة صعبة اكيد دلوقتي
فارس:لا يا بابا سيبه يحاول يتغلب على احزانه ويفوق من الوجع اللي هو فيه
إبراهيم:انا قصدي نقف جنبه
فارس:لو عاوزنا هيجلنا
إبراهيم:هو انت مخبي عليا حاجة
فارس بتوتر:لاء
إبراهيم:طب يومك في الشركة كان عامل ازاي؟
فارس:زفت طبعا ناس تحس انها عاوزة تولع فيا
إبراهيم:ليه كده؟
فارس:غيرة بقى حقد ...كره ..الله اعلم
إبراهيم:بس مش معقول الكل
فارس:قليلين المرحبين بوجودي
وابتسم بسخرية:منهم طبعا إيهاب اللي عينته مكاني
إبراهيم:انا عارف انك قدها
فارس:اني ادير الشركة مش حاجة جديدة عليا انا تقريبا كنت بديرها حتى لما كان استاذ عماد عايش
إبراهيم:ربنا يوفقك
فارس:يا رب
لم يشأ أن يخبره بما خطط له بشأن وليد لا يدري لماذا من المفترض ان والده سيقف الى جانب قراره لكنه شعر انه سيعارضه ربما لان شادي عارضه فيعتقد ان والده سيعارضه هو الآخر
____________________________________
في منزل سناء
انهى عمله وعاد الى المنزل حاول التعامل مع الصغيرة كي يخفف عن والدته هذا الحمل دون فائدة لم يفلح معها
سناء:يا ابني وانت شايلها خود بالك من رأسها حط ايدك تحت راسها
شادي بعصبيه:يووووه انا تعبت بقى
سناء:يا ابني متعليش صوتك بتحس هي بالحاجات دي
شادي:انا خلاص تعبت يا ماما انا مش عارف اتعامل معها
سناء:الوضع هيبقى صعب شوية في الاول بعد كده هتتعود
شادي:ولحد ما اتعود اعمل ايه؟
سناء:قولتلك الحل اللي عندي
شادي:اتجوز؟؟
سناء:عندك فكرة احلى
شادي:مش هقدر اتجوز بعد ليلى
سناء:يا ابني دي مش خيانة
شادي:خيانة او لاء مش هتجوز بعد ليلى
سناء:ليه؟
شادي:مش هقدر
سناء:طب شوف حل تاني بقى وحط في الاعتبار اني مش حمل اني اراعيها ذي ما انت شايف والبنت لسه صغيرة ومحتاجة لحد ياخد باله منها وانت بتروح شغلك ده على فرض انك عارف تستحملها مثلاً
صمت شادي ولم يستطع مجاراتها في الحديث انها على حق فصغيرته في حاجة الى رعاية
نظر اليها في حب ونفسه تحدثه بالتضحية لأجلها
_____________________________________
في منزل مصطفى
جلست نور في غرفتها على فراشها ضامة ساقيها بيديها تشعر بالحزن
اتصل مصطفى بها فأجابت ببرود:نعم؟
مصطفى:هو ايه اللي نعم يا نور بتكلميني كده ليه؟
نور:معلش لسه راجعة من برا
مصطفى:مش مصدقك ومش مهم
نور:آمال ايه اللي مهم؟
ابتسم مصطفى:وحشتيني
ابتسمت في سخرية:فعلاً؟
مصطفى:اه طبعاً امال بهزر
نور:لا اكيد مفيش مزاج للهزار دلوقتي
وكملت:هانت يا حبيبي خلاص كلها يومين وترجعلي العادي بتاع كل سفرية
مصطفى:طب مش عاوزة حاجة من هنا؟
نور:عوزاك
مصطفى:بجد؟
نور:اكيد
مصطفى كان متضايق من نبرتها اللي بتحاول تبين انها مش متضايقة لكنها من جواها متضايقة
مصطفى بيحاول يتجاهل لهجتها:احكيلي عملتي ايه النهارده ؟
نور:ولا حاجة قاعدة بفكر فيك؟
مصطفى وقد سأم تلك اللهجة:في ايه مالك يا نور؟
نور:مليش
مصطفى:طب ما تتكلمي معايا كويس؟
نور:طب سلام يا مصطفى ابقى بلغني بالطريقة اللي تحبني نتكلم بيها وانا هتدرب عليها
واغلقت الخط وعندما حاول الاتصال مجدداً لم تجب ليتوقف بعد اول محاولة رن هاتفها مجدداً لكن هذه المرة عائشة فأجابت بسرعة
نور:عائشة ازيك؟
عائشة:الحقيني يا نور
نور بقلق:في ايه؟
_____________________________________
في صباح اليوم التالي في فيلا الحكيم
استيقظ مازن وجلس على السرير فوجد تامر يستعد أمام المرآة ويبدو عليه الضيق
مازن:صباح الخير
تامر بلامبالاة:صباح الخير
مازن:هو في حاجة حصلت؟
تامر:ده على أساس ان انت مش عارف
مازن:مش عارف ايه؟
تامر:ان دارين مسافرة
مازن:كنا عاوزين نقولك بس ملقناش فرصة
تامر:لا ممتاز
مازن:بجد كنا هنقولك
تامر يلتفت اليه:ليه مسافرين؟
مازن:هي عاوزة تسافر وانا مش عاوز اسبها لوحدها
تامر:طب هي عاوزة تسافر ليه؟
مازن:ومسألتهاش ليه؟
تامر:سألتها وقالتلي عاوزة تبعد بس انا عاوز اعرف ليه هي عاوزة تبعد
مازن:هنرجع تاني يا تامر هنرجع
وغادر تامر الغرفة فتبعه مازن متجها الى غرفة دارين طرق الباب
دارين:ادخل
دخل مازن فوجدها تعد حقيبتها
دارين:صباح الخير ..كويس انك صحيت
مازن:انتي خلاص بدأتي تحضري شنطتك
دارين:ما السفر بكرا الصبح
مازن:انتي مسافرة علشان تبعدي علشان شريف ؟
دارين:اه علشان شريف
مازن:انتي شايفة ان ده الحل
دارين:اه شايفة كده
مازن:طب وابنه؟
دارين:هأخده معايا كام يوم وبعدين هبقى أتصرف وأخليه ينزل تاني لشريف
مازن:ليه كل ده؟
دارين:لازم ابعد شوية واشوف دارين الجديدة عاوزة ايه؟..اراجع حساباتي واشوف حياتي المفروض تكون ازاي ؟
دارين:انت بقى ليه عاوز تيجي معايا؟
مازن:انا تقريبا محتاج نفس الموضوع
دارين:بلاش يا مازن انت مش موجوع ذيي
مازن:وانتي عرفتي منين؟
دارين:ايه وجعك طيب؟
مازن: هقولك في أمريكا
دارين بإستغراب:ماتقول دلوقتي
مازن:في أمريكا
دارين:طب حضر شنطتك بقى علشان انا مش هأجل السفر
مازن:وانا مش عاوزك تأجلي السفر..انا بس محتاج اجيب جواز
دارين:طب كويس انا كنت هروح اسلم على ماما نروح سوا
مازن بارتباك لا روحي انتي
دارين: ليه؟
مازن:لا ابداً انا اصلاً مش عارف هروح امتى
دارين:مالك يا مازن مريب كده ليه النهاردة ؟
مازن:ولا مريب ولا حاجة عن اذنك
دارين:تحب اجبلك جواز سفرك معايا
مازن:لا بلاش انتي
دارين:ليه؟
مازن:لا عادي بس بلاش تتعبي نفسك
دارين:اتعب نفسي
صمت مازن
دارين بشك:مازن انت مخبي ايه بالظبط؟
تابع من هنا: جميع فصول رواية أبو البنات بقلم رهف سيد
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا