مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة ريناد الشهيرة ب رينوو والتى سبق أن قدمنا لها العديد من الروايات علي موقعنا قصص 26 وموعدنا اليوم مع الفصل الرابع من رواية فرعون ج 3 بقلم ريناد (رينووو) .
رواية فرعون ج 3 بقلم ريناد - الفصل الرابع
إقرأ أيضا: قصص قبل النوم
رواية فرعون ج 3 بقلم ريناد - الفصل الرابع
ليل
الايام عتعدى وتبقا شهور ونجمتى عتكبر قدام عينى ....وكل ماتكبر ملامحها تبان واشوف فيها نسخه من غريب مع اختلاف انها سمره بس الحمد لله مش نفس درجة سمارى ..وواخده منى نفس الشعر بلونه ونعومته وطوله ...كانت جميله جمال خاص محدش يشوفها الا ويناغشها ويبقى عاوز يخطفها خطف من حلاوتها ...
واللى زايدها جمال لسانها ولماضتها مع كل الناس اللى تعرفه واللى متعرفهوش برغم انها لسه يادوب ٣ سنين بس اللى يشوف كلامها يديها اكبر من سنها خلت الكل اتعلق بيها وبقا ليها جماهيريه عريضه من كل الجيران ...
خاله فريال لو تطول كانت حبستها ومطلعتهاش من البيت واصل ...
كانت تقولى البت دى انا خايفه عليها من العين دى العين فلقت الحجر وهى المضروبه مبتستغربش من حد خالص وعامله زى البغبغان ...
كنت اضحك واقولها ياستى سيبيها عالله محدش عيشوف غير نصيبه ومكتوبه ...
كانت تسكت وخصوصى انها معتقدرش على نجمه ام لسان ونص زى مامسمياها ..
فالوقت دا شغلى اتعرف واتعرفت فى المنطقه والمناطق القريبه بس حسيت ان دا مش كفايه ...اعلنت على صفحتى فالفيس انى بعمل وكل بيتى حسب الطلب وبقيت انزل صور الاكلات اللى بعملها وبصراحه جالى شغل كتير قوى وعملت زباين اكتر ...
فمره قاعده على صفحتى زى كل يوم بالليل بعد ماخلصت اللى ورايا وبكلم الزباين وباخد طلبات واوردرات بكره وبعد ماخلصت دخلت حساب غريب زى كل يوم ولقيته ناشر صوره ليه وهو واقف فصحرا وكاتب عليها ..
((فى غيابك اصبحت حياتى خالية جرداء كهذه الصحراء ..الفرق الوحيد ان هذه الصحراء بامكان اى شخص ان يرويها ...انما صحرائى لن ترتوى وتزهر سوى من يدك انتى فقط .))
حفظت الصوره حداى على تلفونى زى مادايما ععمل مع اى صوره جديده ينشرها، وفضلت طول الليل ابصله وابكى وانى ععاتب فصورته والومها زى مايكون هو اللى قاعد قصادى بشحمه ولحمه وسامعنى وحاسس بالنار اللى طالعه من جوفى مع كل كلمه .
ياترى ياغريبي لسه فاكرنى ولا اميره وحلاوتها نستك ليل وايامها ؟...
اظن دلوكيت عايش معاها على راحتك من غير ماتكون محتاج انك تخبى مشاعرك ليها وحبك ورا شتيمه او كره كداب وتقول عليها كام كلمه عفشه تتدارى وراهم زى ماكنت عتعمل وانى معاك ...
موطرحى اللى كنت متعوده احط دماغى فيه على صدرك واغفى بقى من حق اميره دلوك؟ ...
يدك اكيد نسيت ملمس شعر ليل واتعودت على شعر اميره ...اكيد عتسمعها كل الكلام الحلو اللى عيدوخ اللى كنت تقولهولى واكتر كمانى ...طبعا مهى احلى وتستاهل الزياده ...ياترى عتعاملك كيف مكنت ععاملك وعتاخد بالها منيك زى متكون ولدها وحته من روحها كيف ماكنت ععمل ؟..
شتمت نفسى وقلبي على سؤالى عليه ولُمتهم على اهتمامهم وقلقهم على تفاصيل مبقتش من حقى ..
بس فضل السؤال اللى طول الوكت محيرنى ومبرجل نافوخى ....لما هو خد اللى عجباه واتجوزها ..ليه حاساه مش فرحان ..ليه كل كلامه ومنشوراته مليانين حزن ...والسؤال الاكبر ياترى نادر عيمل ايه بعد اللى عملة غريب مع خطيبته وحبيبته ...
اكيد اتجرح جرح عمره وحاله ميقلش عن حالى ...حاسه اننا احنا الاتنين شربنا من نفس كاس المر سوا واتقسم مابينا بالنص ...
قفلت تلفونى بعد ماتعبت وانى عاخد وادى مع حالى واسأل نفسى واجاوبها لغاية ماراسى وجعتنى ...
خدت بتى فحضنى وغفيت وانى عشم فيها وابوس فملامحها اللى هى فالاصل ملامح غريبي .
عدت الايام زى ماكنت عايزه وعلى مزاجى وهواى لغايه مافيوم غلطت غلطة عمرى ...وزى ماعيقولو غلطة الشاطر بالف ...
نشرت صوره حلوه لنجمه كانت مصوراهالها رحاب وهما فالمول وكتبت عليها ...نجمتى وضيائى ونور عينى وفرحة حياتى ..
ودخلت على صفحة غريب قلبت فيها شويه زى كل يوم وبمجرد ماطلعت من الصفحه مفيش دقايق وجالى اشعار برساله على الماسنجر فتحته ولقيت رساله من غريب كاتبلى فيها كلمه وحده بس ((ليل ؟؟))
قلبي وقع فرجلى وانى عقراها ..عرفنى كيف ؟ وميته ..كتبتله بأيد عتترعش ..ليل مين ؟
لقيته بعتلى :انتى ليل ..ردى عليا ابوس ايدك ..قولى انك هى ارجوكى .
رديت عليه :حضرتك غلطان انا مش ليل اللى بتسأل عليها دى
غريب : طب انتى مش ليل ...ليه داخله صفحتى وعملتى لايك انا واثق انه اتعمل غصب عنك؟.. بلاش دى قولى ان دى مش بنتى كمان ...
وبعتلى صورة نجمه اللى نشرتها ...
عقلى اتبرجل ومبقتش عارفه اعمل ايه ولا اتصرف كيف وبدون تردد قفلت حسابى وحزفته خالص وكسرت الرقم اللى كنت حاطاه عالصفحه للشغل مع انى بكده هخسر خساره كبيره بضياع زباينى اللى عرفونى ...
لكن اى خساره فالكون هتوبقا هينه قدام خسارتى لكرامتى لما يرجعنى عشان خاطر بته ويرجع يغصب نفسه على العيشه معاى من تانى ...
بس الفرق النوبادى انى هبقا عارفه ان اى كلمه وحركه منه مش اكتر من تمثيل فتمثيل ...
طلعت من الاوضه يومها وانى وشى مخطوف وطلعت بوشى على شقة خاله فريال وكانت نجمه فاليوم ديه بايته مع رحاب عشان كان يوم اجازتها ...فتحتلى رحاب الباب واول ماشافت وشى سألتنى بقلق :
ليل ؟ مالك فيه ايه وشكلك متوتر وخايفه كده من ايه ادخلى ادخلى ؟
دخلت بسرعه على اوضتها اللى نايمه فيها هى ونجمه متخطيه خالتى فريال اللى نايمه فالصاله واول مادخلت قعدت على السرير وشلت نجمه حضنتها على صدرى وانا هموت من الخوف لمجرد انى تخيلت انها ممكن تبعد عنى او ممكن غريب ياخدها منى غصب لو كان عرف موطرحنا .
رحاب قعدت جارى وحطت يدها على كتفى بحنيه وسألتنى :
مالك ياليل بتعملى كده ليه ياحبيبتى هتخضى البنت حلمتى بكابوس ولا ايه؟ ...
عموما حتى لو كان كابوس اطمنى نجمه زى الفل ومش هيحصلها اى حاجه وحشه بأذن الله احنا كلنا حواليها .
ليل نزلت نجمه من حضنها ونيمتها على السرير وفضلت باصالها وبتلعب فشعرها ورحاب عماله تسألها مالها وليل مش بترد ...
فين وفين لما اتكلمت وحكت لرحاب كل اللى حصل ..
وفوسط الكلام ابتدت تحكى لرحاب عن ضعفها و اشتياقها لغريب ...لكلامه ..للمساته ..لهمساته .
.لكن رحاب لما شافت ان كلام ليل ابتدا ياخد منحنى خطير وابتدت تغوص فأدق تفاصيل حياتها وعلاقتها بغريب وقفت مره وحده وزعقت فيها :
استنى عندك ياليل انتى بتتكلمى معايا كده ازاى ؟
انتى متعرفيش ان الكلام اللى بتتكلمى فيه دا حاجه خاصه جدا ومينفعش يتحكى لاى حد ولا حتى يطلع من اوضة نومك ولا يجى على لسانك بعد مايحصل بينك وبين جوزك الا مع جوزك وبس ؟
ليل :انى عتحدت معاكى عشان ععتبرك زى اختى يارحاب وربنا اللى يعلم .
رحاب :الكلام دا مينفعش يتحكى حتى لاختك ذات نفسها ياليل لو ليكى اخت ...انتى ازاى مثقفه وفاهمه ومتعرفيش ان الكلام دا اكبر حرام ؟ ...مسمعتيش مره حديث لشيخ بيقول ان دينا نهى الزوجين ان حد فيهم يكشف عورة التانى قدام اى حد ؟
بجد انا مصدومه فيكى ياليل ...وكمان ماراعيتيش انى لسه بنت وحياء البنت يمنعها انها تسمع كلام الناس المتجوزه ده ؟
طيب انتى تعرفى ان كلامك دا ممكن يخلينى احب جوزك واتعلق بيه من غير مااحس وانا مش بسمع منك عليه غير كلام حلو ومطلعاه قدامى فارس احلام كل البنات اللى ساب الكل واختارك انتى وبقا من نصيبك ؟
ياليل متزعليش منى بس انا ازهريه يعنى دارسه اصول الدين وعارفه دينى كويس اوى ...وإن كان كلامى جاف معاكى فدا لان فيه حجات مينفعش التهاون فيها ...وخصوصا لو حاجه متعلقه بالحلال والحرام .
بصى ياليل من غير زعل انا ملاحظه انك بتحكى كل تفاصيل حياتك وادقها قدامى انا وماما ودى حاجه مدايقانى منك جدا ،وكنت هكلمك فيها كذا مره لكن كنت بتراجع لما اقول اكيد نفسيتها تعبانه وبتعمل كده من كم الضغط النفسى اللى عايشه فيه وبكره هتفوق لنفسها وتنتبه لكلامها بس دا للاسف مبيحصلش ...
حياتنا مينفعش ياليل تكون مشاع للكل ...مينفعش نبقا كتاب مفتوح لاى حد ويعرف نقاط قوتنا فين ونقاط ضعفنا فين ويستغلها وقت مايحب ويضغط علينا بيها ولما ييجى يضربنا يضربنا فمقتل ..
ولا ينفع كمان احكى عن اولادى وعن اكلى وشربى وعن كل حاجه عندى ومتوفرالى وممكن يصدف ان اللى بيسمعنى يكون ميمتكلش ربع اللى عندى . احنا منعرفش ظروف حد..
دا حتى الواحد يخاف على نفسه من الحسد ياشيخه ...ولا مبتأمنيش بالحسد اللى نازل فالقرآن ياليل ؟
انتى بتتعاملى طول الوقت مع الناس اللى حواليكى بطيبه مفرطه ياليل وفاكره ان كل الناس زيك وقلبها ابيض زى قلبك وبتحب الخير لغيرها ودا مش حقيقى ...فوقى لنفسك ياليل واتعلمى تتعاملى مع اللى حواليكى بحرص اكتر من كده .
ليل مكنتش بترد على رحاب مش عشان كلام رحاب مش عاجبها ..لكن عشان رجعت بذاكرتها وافتكرت ان كل دا واكتر كانت بتعمله وتحكيه لاميره واميره مكنتش عتعترض على اكده...بلعت ريقها بتوتر وهى بتفتكر رد فعل اميره لما كانت بتكلمها عن غريب وبتحكيلها كل تفاصيله ..وافتكرت الفتره الاخيره لما اميره بنفسها اللى كانت بتطلب من ليل انها تحكيلها عن غريب وتسألها عن تفاصيل يومهم وعمل معاها ايه النهارده وقالها ايه جديد بعد ماكان موقفها فالاول نفس موقف رحاب من كلام ليل عن غريب ..
ديقت حواجبها وهى بتسأل نفسها ...معقوله تكون اميره اتعلقت بغريب من كلامى عنيه ؟ معقول تكون حست ناحيته بالكلام اللى عتقول عليه رحاب ديه ؟ بس رجعت وافتكرت كلام اميره مع غريب ولومها ليه واتهامها ليه بالخيانه والنفاق ورد فعلها اللى مكنش رد فعل وحده سلمتله نفسها بأرادتها ابدا ...
وكمان سكوته وعدم دفاعه عن نفسه ولا عن ليل بكلمه وحده بيأكدلها ان استنتاجها دا مظبوط ...
فاقت من شرودها على صوت رحاب وهى بتنادى باسمها ..
ليل ...لييييل ..روحتى فين ..متزعليش منى عشان نصحتك بالقسوه دى بس دا كان لازم عشان افوقك واعرفك غلطك ومتعمليهوش تانى ...
ليل بابتسامه خفيفه :له ياحبيبتى انى مزعلانشى منك ..عندنا مثل عيقول افرح لمبكياتك متفرحشى لمضحكاتك ...وانى عارفه انك عتوعينى وفعلا فتحتى عينى على حاجه كانت غايبه عنى وكنت ععملها بحسن نيه ..
رحاب مدت ايدها مسكت ايد ليل وطبطبت عليها بالايد التانيه ...انا عارفه انك اطيب وحده فالدنيا ومش بتعملى حاجه غير بحسن نيه ...بس ياليل مش كل الناس طيبه زينا واخلاقها زى اخلاقنا ... يلا بقا نامى معانا هنا انا ونجمه انتى نامى فالجمب دا وانا فالجمب التانى ..وبالنسبه لموضوع غريب متقلقيش انتى تصرفتى صح وبسرعه واكيد هو ملحقش يعرف حاجه ...
مع ان لو جيتى للحق والعدل ياليل ...المفروض غريب يعرف انه عنده بنت ...دا ابسط حقوقها وحقوقه ...لان مهما كان حنان الام ورعايتها للطفل عمره مايغنى الطفل عن وجود ابوه فحياته ..الاب امان وسند ومش من حق حد يحرم حد من امانه وسنده وحمايته حتى لو كان الحد دا الام ...فاهمانى ياليل؟ ..
ليل وقفت منتوره :له مفهماشى ...
ومحدش ليه حداى بنات ..نجمه بتى انى وبس ..نجمه تعويضى اللى طلعت بيه من جوازتى من غريب ..
نجمه حق تعبى وحبى ...نجمه تمن جرح قلبي .
رحاب :يعنى برضو مصره انك متعرفيهوش انه له بنت ياليل ؟
ليل :ابوها اللى خانى يحلم يشوف ضافرها حتى ...هو مش اتجوز وعايش حياته ...يوبقى مش من حقه يعرف ان حداه بت من اصله...وتوبقا اميره تخلفله عيال حلوه زيها هيعمل ايه هو ببت ليل ...مش ليل دى اللى كان عايش معاها بالعافيه وغصب عنيه ودايس على روحه ؟!..
رحاب :بصى يابنت الناس انا مليش دعوه بكل الكلام دا عشان دى نقره ودى نقره، واللى بتعمليه دا اسمه انانيه ،وانا اللى عليا نصحتك ووريتك الغلط والصح والحرام من الحلال ،واظن الحرام بيين والحلال بين وانتى حره ..انا كده اتبريت من ذنبك ...
ليل :نامى بس انتى وسيبينى فذنبى لحالى وانى عارفه ان ربنا عالم بحالى وهيسامحنى عشان هو بس اللى شايف النار اللى جواى وهو علي احن وارحم من اى مخلوق على وش الارض.
رحاب :ونعم بالله طبعا ...اتنهدت ..
عموما نامى دلوقتى والصباح رباح وسبحان الله ربك تدابيره بيحتار قدامها المخلوق ومحدش عارف بكره شايل ايه وهيحصل فيه ايه ...يلا تصبحى على خير ..
نامت رحاب وادت ضهرها لليل اللى حست انها محتاجه تبكى عشان تطلع كل اللى فقلبها من الم وكبت وهى حبت تديها المساحه اللى تخلى دموعها تنزل بحريه ومن غير تقييد .
وبالفعل ليل حضنت بنتها نجمه واستسلمت لدموعها وحنينها وزكرياتها اللى هاجت عليها مره وحده وهيجت جروحها بمجرد كلمتين منه فرساله ....
واتأكدت ان لسه كلامه له نفس التأثير عليها ولسه رغم سنين البعد قلبها بيدقله بنفس القوه وبنفس الطريقه ...
ليل عملت ايميل تانى وابتدت تنشر عليه كل شغلها وتحط صور الاكلات اللى كانت حطاها على حسابها القديم ووحده وحده ابتدت تجيلها زباين جدد والقدام اتواصلت مع اللى تعرف تتواصل معاه منهم والباقى سابته للصدفه تجمعهم ...
دخلت حساب غريب بعد ايام من الانقطاع بسبب انها خافت يكونو فالداخليه عندهم حاجه يعرفو بيها مين دخل حساباتهم ويعرفها ويقدر يلاقيها ..
قلبها دق بعنف وهى شايفه صورة نجمه بنتها غريب حاططها صورة غلاف لصفحته وكمان حاططها فمنشور وجمبها صورة ضفيرتها اللى قصتها وبعتتهاله وجمبهم فصوره تالته الخلخال .
وكاتب فالبوست :((لقد تطشرت اجزاء قلبي وتناثرت بعيدا عنى ...لكن لا تحزن ايها القلب فوالله لاجمعن اجزائك واعيد اليك الحياة من جديد .))
عنيها دمعت وهى بتمشى ايدها على صورة الخلخال وبتفتكر اليوم اللى اشتراهولها فيه وكمية السعاده اللى حست بيها يومها وافتكرت السعاده اللى دخلت حياتهم بعدها ومتعرفش ليه لحظتها سمعت صوت رنة الخلخال فودنها وابتسمت بحزن وهى بتتمنى لو ترجع تنام فحضن غريبها مره وحده بس وبعدها مش هتطلب اى حاجه تانيه من الدنيا ..
بااااااااااك
فاقت ليل من شرودها وانتبهت على نجمه اللى دخلت من الباب بسرعه واتشعبطت فرجليها وليل شالتها ونجمه ابتدت تحكى لليل كل حاجه شافوها فالمول هى ورحاب ونزلت من حضن مامتها ومسكت ايدها وهى بتجرها لبره عشان تفرجها على الحجات اللى اشتروها من هناك ....
رحاب بتفرج ليل :ايه رأيك ياليل فالحجات اللى جبتها دى اوعى تقولى وحشين زى ماما ..
ليل :له عفشين كيف دول زى العسل ..وبصت لفريال :ليه ياخاله تعيبيلها عليهم وتكسرى فرحتها بيهم ؟
فريال :يابنتى دول عاملين زى الجلاليب الرجالى مفهمش اى حاجه بتلمع ولا ورده ولا فيونكه حتى ...
طب والله خساره فيهم الفلوس ...
رحاب :ياستى انا مبحبش البهرجه فى الهدوم ولا بحب الحاجه الملفته للنظر ..ليه يعنى البس حاجه بتلمع انا وطول منا ماشيه ازغلل فعيون الناس واجبرهم يبصو عليا ...ياامى لعن الله الناظر والمنظور ...يعنى اللى بتلبس حاجه تجبر الناس النظر ليها دى ملعونه وبتخرج من رحمة ربنا .
وياستى انا على كل حال لابسه الخمار ومداري نص جسمى واكتر ..يعنى مش هيبان من اللى لابساه غير النص التحتانى بس ...
فريال :خلاص يختى اعملى اللى انتى عايزاه متصدعنيش ...هو انا هعرف اخلص من لسانك الطويل دا ؟
نجمه :بيبو طلعى لسانك الطويل اشوفه .
رحاب ضحكت ومدت لسانها لنجمه ...
نجمه :مش طويل ..لسانى انا اطول ..ومدت لسانها هى كمان
فريال :فدى انتو الاتنين لسانكم اطول من بعض ...اللى يشوفكم يقول فوله واتقسمت نصين فاللماضه ..
وبصت لليل ...كان لازم يعنى تتوحمى عليها وتجيبى البنت زيها ؟ مش كفايه رحاب وحده علينا ؟
ليل :ومالها رحاب دى ست البنته كلهم ...طب بس ياريت نجمه تطلع زيها هو انا اطول ...
رحاب :ياحبيبتى ياليل ...ايوه كده انصفينى قدام الست دى ...واوعدك هخليلك نجمه دى نسخه بالكربون منى ..
فريال :من غير ماتوعدى ولا تخلى هى لوحدها شاربه منك يختى .
ليل ضحكت بخفه واتنهدت ..
فريال :مالك ياليل بتنفخى بقهر كده ليه يبنتى هتولعى فينا قدامك ؟
ليل :اتوحشت اهلى قوى ياخاله وبالاخص سند حبيبي ...طول المده دى لاروحت ولازرتهم وتلاقيهم زعلانين منى ...نفسى آخد نجمه واوريها لجدها وجدتها واخوها واوريها قبرهم والبيت اللى اتولدت واتربيت فيه...٤سنين متحدتش معاهم ...
رحاب :طيب متروحى ياليل واكيد غريب حتى لوكان بيدور عليكى اكيد مل وزهق بعد المده دى كلها ...دا ان مكانش نسيكى اصلا بعد مااتجوز وعايش حياته زى مابتقولى .
ليل بلعت ريقها بمراره من كلام رحاب اللى برغم من انه الحقيقه الا انه لسه بيجرحها ويوجعها جدا وردت عليها :
مش يمكن موصى حد من اهل البلد لو شافنى يمشى وراى ويعرف طريقى ؟ ..غريب ذكى يارحاب ..وبعدين انى مقدرشى اجازف وخصوصى وانى عارفه ومتوكده ان اقل غلطه منى هتخسرنى بتى اللى محلتيش غيرها فالدنيا ..
انتى متعرفيش غريب كان متعلق بالعيال كد ايه ونفسه يكونله عيل بفارغ الصبر وكان عيتمناها من ربنا كل يوم ...اكيد لو اتأكد ان حداه بت مش هيفوتها واصل دى صوره على الفيس شك فيها قلب الدنيا قلب.
فريال :يابنتى متقهريش نفسك وكفايه تحمليها فوق طاقتها ...وان كان على اهلك.. دعاكى ليهم هيوصلهم من اى مكان تكونى فيه ..كترى بس انتى من الدعا ومتقطعيش الصدقات اللى بتطلعيهالهم واطمنى هما فمكان احسن وانضف وحالهم احسن من حالك بكتير ...
ليل هزت دماغها بالموافقه وسابتهم وقامت دخلت المطبخ عشان تجهز لطلبات بكره وهى حاسه انها منهكة القوى وروحها مستنزفه لآخر قطره ..
بعدها بكام شهر فريال تعبت شوية تعب شداد وعلى اثرهم نامت فالسرير وليل امورها اتلخبطت جدا ومبقتش عارفه تعمل ايه مابين فريال ،وبنتها نجمه، وشغلها، ومزاكرتها ...وخصوصا انها كانت ايام امتحانات آخر السنه ورحاب متقدرش تنزل اجازه من البلد اللى فيها جامعتها غير بعد ماتخلص امتحانات ...بعد تفكير قررت ليل انها تدخل نجمه روضة اطفال مخصوصه للى فسن نجمه ..وبرغم خوفها وقلقها على نجمه ووجعها على فراقها ومفارقتها لحضنها الا انها كانت مضطره تعمل كده ومفيش قدامها حل تانى ..دورتلها على احسن حضانه والاغلى ولحسن الحظ الحضانه دى كانت قريبه من منطقتهم و كانت معروفه وناس كتير كانت بتجيب فيها اطفالها بالعربيات من آخر الدنيا ...
واهى يبقا عندها كام ساعه تقدر تجهز فيهم شغلها وباقى اليوم يادوبك على نجمه وخالتها فريال وطلباتهم وبالليل تزاكرلها شويه للامتحان بتاع تانى يوم ...
فتره كانت صعبه قوى على ليل لكنها كانت قدها ومقصرتش فأى مسؤليه من اللى عليها ...
الست فريال ابتدت صحتها تتحسن بفضل رعاية ليل ليها ... ولسانها طول الوقت مسكتش من الدعوات لليل اللى فعلا اثبتتلها بالفعل مش بالكلام انها بنتها اللى مخلفتهاش وشالتها فشدتها وفعلا ابن الاصول ميبانش غير وقت الشده ...
خلصت ليل امتحاناتها ورحاب كمان خلصت ورجعت بعد شهر كامل لمامتها اللى مكانتش تعرف بتعبها لان ليل مرضيتش تقولها ولا خلت فريال تحسسها انها تعبانه عشان متشتتش عقلها عن مذاكرتها وامتحاناتها وتضيع عليها السنه بسبب قلقها على امها ..
رحاب وفريال الاتنين شالو جميل ليل فوق دماغهم، ورحاب حست ان ليل شيلتها جميل هيفضل دين فرقبتها لآخر العمر وخصوصا المبلغ الكبير اللى صرفته ليل على علاج امها ومترددتش لحظه وهى بتصرف كل قرش جمعته من يوم ماابتدت شغل ..
الامور ابتدت تستقر من تانى بالنسبه لليل ونجمه اتأقلمت فالروضه واتعودت عليها وليل فرحانه وهى شايفه فرحة نجمه عشان كل يوم كانت بترجع متعلمه حاجه جديده
ظهرت النتيجه ورحاب نجحت فسنه تانيه كلية دراسات اسلاميه وليل كمان نجحت فسنه تانيه اعدادى وعملو تورته جميله واحتفلو بنجاحهم وفريال طول الوقت تصلى على النبى وفرحانه بيهم وهما الاتنين طول الوقت يبوسو فأديها..
رحاب فالاجازه بقت تساعد ليل فالشغل ومع بعض كانو بينجزو بسرعه ويجهزو اوردرات اكبر ورحاب اتعلمت تعمل حجات كتير بفضل ليل والظروف رجعت تتحسن من تانى
ليل كانت بتخصص مبلغ من الفلوس على جمب للسنه الجديده بتاعت رحاب فالكليه والباقى تصرفه على البيت وعلى نجمه ...
فالفتره دى ثقتها فنفسها زادت اضعاف لما اتأكدت انها مبقتش محتاجه لمساعدة اى حد ليها عشان تقدر تكمل حياتها وتربى بنتها لوحدها ...اكتشفت ان شكلها مش عائق لأى حاجه وبلعكس اغلب الناس بتتعامل معاها عادى ...
اكتشفت ان اى حد كان بيشوفها وحشه دا كان عيبه هو عشان هو اللى بيبقى حاطط معايير معينه للجمال من وجهة نظره ....اتمنت لو انها اكتشفت كل دا بدرى شويه ...اكيد كانت حجات كتير اوى هتتغير ..
مبقتش تتكسف من نفسها لما تشوف فعيون حد نظره مش حلوه ليها وهى ماشيه فالشارع ...بالعكس دى بتشفق على صاحب النظره دى لانها دلوقتى بقت متأكده انه فقلبه مرض واصحاب امراض القلوب لا تجوز عليهم الا الشفقه
********
اما عند غريب .
قاسم صحى الصبح بدرى وخرج بعد مااخد حمام وغير هدومه وراح على مكتب غريب لكن العسكرى ايوب اللى كان واقف على الباب قاله ان غريب باشا بيتمرن ورا المبنى زى كل يوم فالميعاد ده ....
قاسم لف ورا المبنى وشاف غريب وهو بيعمل تمرينات عنيفة وبطريقه قاسيه ..
قاسم وقف وراه :يبنى خاف على نفسك كده هيجيلك تمزق فالاربطه .
غريب رد عليه من غير مايبصله ..مايجينى وانتا يخصك ايه هى اربطتك ولا اربطتى ...
قاسم :حقك عليا انا اللى خايف عليك ...ياكشى تتمزق كل اربطتك وميلاقوش فيك ولا رباط ويحطولك رباط جزمه قديمه مكانهم...
غريب ضربه فوشه بفوطه بعد مانشف فيها عرقه وقاسم رماها على الارض بقرف ..
قاسم :هاه هنبتدى من فين ؟ انا رأيي نمشط كل المناطق الصحراويه النهارده .
غريب :تؤ ...المناطق الصحراويه مفهاش حاجه انا عارف ...احنا هنمشط المناطق الساحيه زى دهب ونويبع وطابا ...اظن انهم ممكن يفكرو يستغلو البلاد دى فدخول البضاعه وخصوصا انها مناطق سياحيه ومش هتبقى غريبه لو شافو وجوه جديده وناس غريبه عليهم ..
قاسم :يبنى بقولك المخدرات اللى بتنزل السوق بتغرقه بكميات مهوله ...اظن بضاعه بالحجم دا هتكون متشافه اوى لو دخلت جوا بلد صغيره من دول او خرجت منها ..
غريب : ومين قالك انها بتدخلها مره وحده او بتخرج منها دفعه وحده ؟ مايمكن البضاعه بتجيلهم قطاعى وبتخرج من عندهم قطاعى وفالتوزيع بتتوزع مره وحده ...
قاسم : بص هو رأيك صح وتمام وكل حاجه ...بس انا شايف انها هتكون تكلفه ومخاطره عاليه اوى عليهم لو عملو زى منتا بتقول كده ..وخصوصا ان نقل البضايع اللى من النوع دا بيكون مكلف جدا نظرا لخطورته ...فأظن ان المستورد نظرا لان مصاريف التوصيل عليه هيحاول يوفر ويدخل الشحنه مره وحده بتكلفه وحده ...
غريب :وممكن يكون ذكى ويخاف لو اتمسكت منه شحنه يبقى معاه غيرها لما يقسمهم على دفعات وميبقاش خسر كل حاجه مره وحده ...
قاسم :فعلا ...يبقا هنا احنا لازم ناخد بالاحتمالين ونتصرف على هذا الاساس ...يعنى التمشيط هيكون شامل كل المناطق ...ايه بقا اول خطوه هتعملها ...
غريب :فالاثناء اللى انتا واقف بتتكلم فيها دى انا اخدت الخطوه من بدرى سيادتك ... انا وزعت عناصر متخفيه فكل المناطق وكمان كلفت المجندين بتوعنا من البدو انهم يراقبو كل شبر فالمنطقه كويس اوى ..وبعد تلت ساعه الطياره الهليوكوبتر هتلاقيها وصلت عشان نطلع نمشط المنطقه من الجو ...
قاسم : فرعون فرعون يبنى مفيش كلام ...
لسه بيتكلمو شافو العسكري ايوب جاى عليهم بصينيه عليها فطار وشاى اكلو لقمتين عالسريع وقبل مايكملو الشاى سمعو صوت الطياره الهليوكوبتر ..لبس غريب ..وقاسم لبس ستره واقيه واخدو اسلحه وطلعو الطياره وابتدت رحلة التمشيط ....
طول ماهما فالجو بيمشطو قاسم طول الوقت فاتح بوقه من جمال المناطق السياحيه والمناظر الطبيعيه الخلابه ...
غريب شاف حالة قاسم وضحك بخفه .
قاسم :انا عرفت ليه دلوقتى كل اما كنت اقول على سينا صحراء جرداء كنت تضحك عليا ...دى سينا طلعت جنه على الارض يبنى ...هو فيه كده ؟ الجمال دا كله فبلدنا واحنا مش عارفين ؟
غريب :عشان سطحى وبتحكم على الحاجه من بره وبتعتمد على السمع ..
شايف اللى احنا فوقها دى ..دى طابا وانتا فيها يعنى بتوقف على حدود اربع دول .
وعدو فوق منطقه تانيه وتالته ورابعه وكل مايطيرو فوق منطقه غريب يعرف قاسم عليها ويشرحله جمالها
دى حمامات فرعون ..ساونه طبيعيه وميتها لها قدره عجيبه على الشفاء وتوصيل الانسان لاقصى مراحل الاسترخاء والهدوء النفسى ..
اما دى فمنطقة دهب ارض الاحلام
ودى سانت كاترين الجبال والطبيعه الخلابه
ودى بقا نويبع اكبر واجمل واحات سينا
ودى منطقة راس شيطان لهواة الطبيعه والاستجمام
قاسم :لا دنا كده فاقرب فرصه بعد ماتولد البت جوجو اجيبها ونقضى شهر هنا فالهدوء والطبيعه دى ونجرب الاستقرار النفسى اللى انتا بتقول عليه دا ....
بس المشكله فالولا اركان اللى مش هيهنينا على الاجازه خالص ...بس يلا ابقى اسيبه معاك منتا عمه برضو ..
غريب :اوعى تخلينى اشوف الواد النحس دا اللى يوم ماتولد مصايب الدنيا كلها حصلتلى ...قدمه اخضر مشاء الله .
قاسم بغضب :غريب اوعى تقول على ابنى كده احسن وربنا احدفك من الطياره ...الا اركان باشا العو انا بقولك اهو ...
غريب بص بعيد واتنهد وقاسم رجع يبص من الطياره واتكلم بحسره ...
يابختك ياغريب يبن المحظوظه قاعد هنا وبتتمتع بكل الجمال دا لوحدك ..
قاسم يادوبك خلص الكلمه وغريب ميعرفش ايه اللى حصل وهو بيبص لتحت وبيدقق فبقعه معينه ولقى نفسه توازنه بيختل وبيسقط من الطياره وقاسم حاول يمسكه مقدرش ..
ولحسن الحظ غريب المرادى اول مره يلبس مظله وفتحها قبل مايوصل على الارض ونجى منها بقدرة قادر ...
سواق الطياره مراقب الموقف ومن غير مايبص لقاسم قال بصوت عالى ...الست دى عجوزه بس صحتها كده 🖒ومات على روحه من الضحك
قاسم بصله بغضب :طب سوق وانتا ساكت وانتا سواق محترف كده ومفيش منك اتنين فبر مصر .
السواق بخوف :اشهد ان لا اله الا الله واشهد ان محمدا رسول الله
قاسم والسواق نزلو بالطياره لاقل مستوى ونزل سلم لغريب عشان يطلع عليه غريب وقاسم مراقب تعابير وشه وبيبلع فريقه بخوف وهو حاسس ان غريب اتحول لأسد وطالع عشان يفترسه
**********
اما فالاسماعيليه .
راضى :انتى بتقولى ايه يامريم ؟
مريم :اللى سمعته ياراضى انا هكلم غريب يطلق اميره ...
راضى :واميره موافقه ؟
مريم :لا
راضى : وانتى ازاى تقررى حاجه مصيريه بالشكل دا بالنيابه عن صاحبة الشأن ؟
مريم :انا امها وعارفه مصلحتها فين ...ومش هقف اتفرج من بعيد اكتر من كده وانا شايفه بنتى السنين بتسرقها وهى قاعده محلك سر من غير استقرار او طفل يملا عليها حياتها ..
إلي هنا ينتهي الفصل الرابع من رواية فرعون ج 3 بقلم ريناد
إرسال تعليق
يسعدنا تلقي اقتراحاتك أو تعليقك هنا