قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والقصص مع رواية رومانسية جديدة للكاتبة المتألقة ميمى عوالى و التى سبق أن قدمنا لها العديد من الروايات علي موقعنا قصص 26 وموعدنا اليوم مع الفصل الثامن عشر من رواية فؤادة بقلم ميمى عوالى .

رواية فؤادة بقلم ميمى عوالى - الفصل الثامن عشر

إقرأ أيضا: حدوتة رومانسية

رواية فؤادة بقلم ميمى عوالى - الفصل الثامن عشر

 خرج المحامى من سيارته ، وقام بالاتجاه حيث جلال و عارف ، و لكن جلال قال وهو يتركهم : اهلا يا متر نورتنا ، معلش هسيبك لعارف يحكيلك التطورات ، و انا هرجعلكم على طول ان شاء الله

و تركهم ثم دلف الى الداخل مسرعا وهو يحاول السيطرة على خطواته و عصاه ، ثم نادى على فؤادة التى ذهبت اليه على الفور و همس إليها قائلا : عاوزك تخلى الولاد الصغيرين جنبك مايفارقوكيش ، و لو النور انطفى ، اوعاكى يفارقوكى

لترد فؤادة همسه بهمس : هو ايه اللى حصل

جلال مسرعا : عارف سمع حد عند البوابة كان بيتكلم فى التليفون انهم ناويبن يعملوا حاجة بس هيقطعوا الكهربا قبلها

فؤادة : النفق ، ممكن يعدوا منه تانى و يعملوا اي مصيبة تانية فى الضلمة

جلال : انا رايح اشوف الحراسة هناك اخبارها ايه

فؤادة : مش هتقدر توصل فى الضلمة بسرعة ، كلم عمى نبيل هو هيعرف يتصرف

جلال وهو يتجه الى الخارج : انا رايح له

لتعود فؤادة للداخل ، و تذهب الى غرفة المكتب لدقيقة واحدة ثم عادت مرة اخرى الى مجلس الجميع و نادت سلوى و ادهم واجلستهم بجوارها من الجانبين

ثم نظرت الى ليلى الغافية باحضان حسنة قائلة : تحبى اخد منك ليلى اطلعها فوق يا امى

و قبل ان تجيبها حسنة تفاجئوا بانقطاع الكهرباء لتقول فؤادة بجمود كل واحد يفضل مكانه وخدى بالك من ليلى يا امى ، وياريت يا دكتور حسين انت ومحمد تفضلوا هنا ، و ماتقلقيش يا امى على سلوى و ادهم انا هاخد بالى منهم

و عندما اضاء حسين المكان بهاتفه لم يجد فؤادة والصغار بمكانهم

نهاد : هو مش المفروض فى مولد كهربا بيشتغل فى الطوارئ ، ليه اتأخر كده و ما اشتغلش

عايشة : والله الجو هيك حلو و شاعرى

سلمى : وهى فؤادة راحت فين بالعيال فى الضلمة دى

و ماهى الا ثوانى واستمعوا الى طلقات نارية و نباح كلاب عالي يأتى من المزرعة ، لينهض حسين باصطراب قائلا : فؤادة خرجت بالولاد برة ، وبعد ثوانى سمع حسين صوت هاتفه ليجد ان المتصل جلال الذى قال له : حسين اوعاك تسيب الحريم عندك لوحدهم ، و ماحدش يخرج برة البيت

حسين باضطراب : فؤادة مش هنا ، و معاها ادهم وسلوى

جلال بغضب : راحوا فين

حسين : ما اعرفش ، فجأة مالاقيناهاش قدامنا لا هى ولا الولاد ، بعد ماقالت لامى ان الولاد معاها وما تقلقش عليهم

جلال بغضب اكبر : مافيش فايدة فى جنانها وعدم مسئوليتها ، انا جايلكم حالا

حسين : هو عارف معاك

جلال وهو يلهث ويبدو المجهود على صوته : لا ، انا سايبه عند الباب من برة

حسين : طب انا هخرج اشوفه

جلال بثورة : ماحدش يتحرك من البيت ولا يخرج منه

حسين : طب مش تفهمنى الاول ايه اللى حصل

جلال : بعدين ياحسين ، المهم ماحدش يتحرك منكم ولا يطلع من الباب

و قبل ان يجيبه حسين كان جلال قد اغلق الخط ليقول محمد فى هدوء : فهمت منه حاجة

حسين : ابدا ، كل اللى طالع عليه ماحدش يطلع برة

حسنة بقلق : طب والولاد ، و عارف وفؤادة ……. وجلال ذات نفسه

حسين بقلة حيلة : مش عارف يا امى ، مش عارف

ليقترب محمد من احدى النوافذ المطلة على ساحة المنزل ، ليجد ان المكان بالخارج غارقا فى الظلام فيقول : ممكن يكون حرامية هجموا على المزرعة و هم اللى فصلوا الكهربا

سلمى : طب ما تيجى نبص على المحول يا محمد ، يمكن نعرف نشغله

حسين : هو انتو عارفين مكانه

وقبل ان يجيب احدهم كانت الاضاءة قد عادت للمنزل ، و لكن الظلام مازال يلف المنزل من الخارج

لتنهض نهاد من مجلسها قائلة بلهفة : اكيد البت فؤادة هى اللى رجعت الكهربا ، طالما الدنيا لسه ضلمة برة ، يبقى اكيد نزلت تحت

حسين باستفهام : تحت فين

سلمى : فى محول بينور البيت بس موجود تحت فى البدروم

حسين بتساؤل : وهو فين مدخل البدروم ده

ليأتيهم صوت فؤادة : من المطبخ يا دكتور

ليجدوا فؤادة و معها الصغار و كل منهم يلبس خوذة على رأسه ملحقة بكشاف للانارة

حسنة بلهفة : فزعتينا عليكم يا بنتى

فؤادة بهدوء : ليه يا امى ، مش انا قلتلك ماتقلقيش

محمد : مانقلقش ازاى بس واحنا مانعرفش انتو فين ، بعد ما سمعنا ضرب النار اللى برة ده

فؤادة وهى تخلع الخوذة من على رأسها : عندكم حق ، انا اسفة ، بس كنت عاوزة ارجعلكم النور بسرعة

حسين : و خدتى الولاد معاكى ليه

فؤادة : جلال قاللى ما اسيبهمش

ليسمعوا طرقات عنيفة على الباب ليجدوا فؤادة قد اخرجت سلاحا صغيرا من ملابسها ووقفت بالقرب من الباب وهى تشير لمحمد قائلة : افتح يامحمد بالراحة

وما ان فتح محمد الباب حتى وجد جلال يقتحم المنزل صائحا : فؤادة فين

فؤادة : انا اهوه

لينظر لها جلال بدهشة ثم يقول لحسين : اومال قلتلى انكم مش لاقيبنها هى و الولاد ليه

حسين باضطراب : اصل ….

لتقاطعه فؤادة قائلة : اصل انا روحت اشغل المحول من غير ما اقول لهم

ليقترب منها جلال ويمسك ذراعها بعنف ويقول غاضبا : هو انتى مش ناوية بقى فى مرة تسمعى الكلام من اول مرة ، هو انا مش قلتلك ماتتحركيش من البيت

لتنتزع فؤادة يدها بعنف وتقول بحدة هى الاخرى : وانا ماخرجتش من البيت اصلا

جلال وهو مازال على غضبه : اومال المحول ده فين ان شاء الله

فؤادة : فى البدروم اللى تحت المطبخ

لينظر لها جلال بغضب وهو ضغط على اسنانه : تانى مرة ماتتحركيش من مكانك الا بعلمى ، مفهوم ، و ايه اللى انتى ماسكاه فى ايدك ده ، انتى فاكراها لعبة واللا ايه

لتبادله النظرات غضبا بغضب ولكنها عندما لمحت محمد يقف متأهبا وكانه كان يخشى ان يتشابكا بالايدى رمته بنظرة غاضبة ثم اعادت السلاح الى جيب تنورتها ، و ذهبت للجلوس بجانب حسنة التى مدت يدها و ربتت على قدمها بهدوء ، وعندما رفعت فؤادة نظرها اليها وجدتها تبتسم لها فى حنان

محمد : طب مش هتقولولنا ايه اللى حصل بالظبط

ليجدوا عارف وهو يدلف اليهم ممسكا بشخص ما و فمه و انفه ينزفان بشدة ويديه مكبلة خلف ظهره و يقول ضاحكا : بصوا جيبتلكم ايه

ليقول جلال بقوة : انت كنت فين انت كمان ، اختفيت مرة واحدة

عارف بمرح : كنت بصطاد بالنبلة ، ما انت عارف انها هواية عندى

لتهدأ ثورة جلال نوعا ما قائلا : و اصطادت ايه بقى

عارف : اهو ، زى ما انت شايف كده ، غراب اسود

فؤادة بفضول : مين ده يا استاذ عارف ، و كان فين

عارف : اول ما حصل ضرب النار ، كل الامن اللى كان على البوابة ، راح ناحية المزرعة من جوة ، بس فى حد ساب الباب الصغير مفتوح ، و لقيت اخينا ده بيتسحب زى الحرامية و معاه واحد تانى وشايلين چركن بنزين و شكلهم كانوا ناوىين يعملوا حفلة باربكيو عندنا

محمد : و راح فين الراجل التانى

عارف بمرح و هو يشرح لهم بيده دقته فى النشان : النشان جه ما بين عينيه بالظبط

فؤادة : ايوة يعنى هو فين دلوقتى

حسين باختصار : غالبا هيبقى مغمى عليه من الخبطة

عارف ضاحكا : بالظبط كده ، و متكتف و مرمى برة ، اما بقى اخينا ده فكان مزاجى اروشه شوية ، فنشنت عليه فى حبة اماكن مختلفة ، كنت عاوز أأسره حى

ليقترب جلال من الرجل و جذبه من ملابسه قائلا بغضب : كنتوا ناويين تعملوا ايه تانى الليلة دى … انطق

الرجل وقد فقد اسنانه الامامية بالكامل : انا هقول كل حاجة ، بس سيبونى

جلال وهو يسحبه من تلابيب ملابسه : احنا لسه هنستناك على ما تقول ، و هتف بقوة : عايز حبل بسرعة

لتنظر له فؤادة قائلة باعتراض : هتعمل ايه بالحبل ، ماهو متكتف قدامك اهوه ، كفاية كده .. حرام

لينظر اليها جلال بغضب قائلا : و لما كان هيولع فينا كلنا ما كانش حرام

فؤادة : البوليس زمانه جاى ، يحقق معاه بمعرفته

جلال بفضول : و عرفتى منين بقى ان البوليس زمانه جاى

عارف : المحامى كلم البوليس ، و جاى فى السكة

جلال وهو يتلفت حوله : هو المتر فين صحيح

عارف : كان معايا برة ولما حصل اللى حصل بلغ البوليس وواقف برة المزرعة منتظرهم

جلال وهو يتوعد لفؤادة : و لما انتى ماخرجتيش من البيت عرفتى منين بقى الكلام ده

فؤادة ببرود : انا بلغت بنفسى اول ما سمعت ضرب النار

لينظر اليها جلال بامتعاض ثم التفت الى عارف قائلا : انت متأكد انهم كانوا اتنين بس

عارف : ايوة متأكد ، و من ساعتها عينى ماغفلتش عن البوابة لحد ما المتر راح اتأكد بنفسه

عارف : و ضرب النار ده ايه اومال

جلال : ماكانش من عندنا كان من برة المزرعة ، الظاهر انه كان بيحاول يشد الانتباه بعيد عن المدخل الرئيسى

لتقترب فؤادة من الرجل المقيد قائلة : طيب وانتو ما طلعتوش من النفق اللى عملتوه ورا ليه ، اشمعنى جايين من المدخل الرئيسى

الرجل بخوف و كلامه بالكاد مفهوم بعد ان فقد اسنانه : عرفنا انكم نشرتوا الكلاب فى المزرعة ، و شوفناها من السور وهى عند النفق

لتومئ برأسها متفهمة ، و عندما سمعوا صوت سارينة الشرطة ، قالت فؤادة لمحمد : خلى البنات يرتاحوا بقى يا محمد ، ما فيش داعى لقعدتهم دى هيتعبوا

محمد : هدخل عايشة و ارجعلكم

نهاد : و انا هعمل سندوتش واطلع اكله فوق

فؤادة وهى تنظر لحسنة : وحضرتك كمان يا امى ، خدى الولاد وروحوا ارتاحوا ، وان شاء الله لما تصحوا الصبح هيكون كل حاجة خلصت

و بالفعل ، ذهب جميع النساء والصغار ، ولم يتبقى سوى فؤادة والرجال من حولها

فاتجهوا الى الخارج و عارف يجر معه الرجل الذى اصابه ، فقابلوا مجموعة من رجال الشرطة يتقدمهم سخص ما قدم نفسه اليهم قائلا : النقيب حمدى .. تحت امركم

وقبل ان تتحدث فؤادة نظر اليها جلال محذرا وقال : انا جلال العشرى ، و زوجتى تبقى صاحبة المزرعة دى

حمدى : احنا جالنا استدعائين ورا بعض ، واحد من المحامى بتاعك ، و التانى من زوجة حضرتك

ليشير جلال الى الداخل قائلا : اتفضل حضرتك جوة ، واحنا هنشرح لك كل حاجة

و بعد ان دلف الجميع الى الداخل و جلسوا جميعهم ، و تعمدت فؤادة الجلوس بجوار محمد ، وكأنها تحتمى به وسط نظرات جلال التى لو كانت تحرق لاحرقتها حية ، و لكن فؤادة تجاهلته تماما ، و قالت وهى تنظر اليه بتحدى ، حضرتك اول حاجة لازم تتعمل ، انى بسجل اتهامى للزينى مالك المزرعة اللى بتحاوط مزرعتى بان رجالته اقتحموا المزرعة بتاعتى النهاردة وحاولوا يغرقوا الزرع بتاعى ، و كمان اعتدوا على عمى نبيل بالضرب لما كان هيمسكهم ، و حفروا نفق من ارضه لارضى بدون وجه حق ، واخيرا محاولته من شوية انه يحرق البيت بتاعى

النقيب حمدى : و ايه دليلك ان هو اللى عمل كل ده

لتشير فؤادة الى الرجل المقيد قائلة : ممكن حضرتك تسأله هو وشريكه اللى برة مين اللى سلطهم يحرقوا بيتى

ليشير النقيب حمدى الى احدى رجاله قائلا : حطوهم فى البوكس

المحامى : متهيألى انى لما مريت على حضرتك العصر قدمتلك بلاغ بخصوص موضوع النفق و غرق الزرع

لينهض المقدم حمدى قائلا : احنا هنعاين كل الكلام ده دلوقتى ، مين هييجى معانا

فؤادة وجلال معا : انا

لينظر جلال لفؤادة بامتعاض قائلا : بقول تخليكى انتى

لتتقدمه فؤادة بعند قائلة : لازم ابقى موجودة ، الكشافات الكبيرة موجودة فى سكن عمى نبيل

النقيب حمدى : و ياترى حالته تسمح اننا نتكلم معاه واللا تعبان

فؤادة : هو الحمدلله بخير … اتفضلوا

لتتفاجئ بجلال يمسك بيدها بقوة ويجبرها على السير بمحازاته ، و على قدر غيظها الشديد من محاولته لفرض سيطرته عليها ، الا ان شعورا جديدا قد تملكها لم تعرفه ولم تدرى عنه شيئا من قبل جعلها تترك يدها بيده و هى تسير الى جواره باطمئنان

اما جلال فكان يعتقد انها ستقاوم يده وكان يعد نفسه لوأد محاولتها ، و لكنه تفاجئ باستسلامها الكامل له و قد زادت برودة يدها الصغيرة بين كفه الضخم الذى ابتلع كفها بسهولة و عندما نظر اليها بجانب عينه ، فوجدها تسير الى جواره باعتداد ، ولكنه وجد عينيه تبحث عن كفها الاخر المعلق ، و الذى كان دائما يتلاعب بملابسها ، و لكنه وجد كفها الاخر ثابتا بمكانه نائما على صدرها فى هدوء ، فرفع وجهه الى وجهها فتلاقت اعينهم فسارعت بالهرب من عيونه وتشاغلت بمتابعة الطريق

و عندما وصلوا الى مسكن نبيل ، اخذوا عددا من الكشافات ، و تابعوا سيرهم الى مكان النفق المحفور ، وتركوا احد الظباط مع العم نبيل يستمع منه عن ما حدث معه

وما ان وصلوا الى مكان النفق ، حتى وجدوا اربعة من الرجال حول النفق ومعهم العديد من الكلاب الشرسة المقيدة حول مدخل النفق

و عند تسليط الكشاف من بين فراغات السور العالى ، قال احد الرجال : الحفر اتردم من يمتهم من حوالى ساعة دلوقتى

و لكن فؤادة قالت : عموما الكاميرات مصورة تعديهم بالكامل

النقيب حمدى : كويس جدا ، احنا طبعا هنتحفظ على الشرايط دى

استمر النقيب حمدى و رجاله فى معاينة المكان لفترة طويلة ، و قاموا بمعاينة بئر المياة و موتور الرى و الصوب التى تعرضت للغرق

و بعد انتهاء المعاينة و استيفاء كل ماقد يحتاجون إليه من بيانات ، عادوا جميعا حتى وصلوا الى مدخل المزرعة ، و عندما وصلت الى غرفة مراقبة الكاميرات اشارت لشخص ما بالداخل طالبة منه ان يتجه اليها ، و عندما وصل اليها قالت للنقيب حمدى : و ياريت كمان حضرتك تاخد الاستاذ عادل معاك ، لانى بتهمه بالتواطؤ مع الزينى وبيشتغل جاسوس لحسابه

عادل بانكار شديد : ايه اللى بتقوليه ده يا استاذة ، الكلام ده ماحصلش

فؤادة بثبات : و بطلب ان حضرتك تصادر تليفونه قبل ما يمسح المكالمات اللى عليه ، و اللى بتثبت تواطئه و تسهيله للناس دى انها تدخل المزرعة عندى

ليأمر حمدى بالقبض على عادل بعد ان تحفظوا على هاتفه ، ثم تساءل جلال قائلا : و حضرتك ناوى تعمل ايه مع الزينى

النقيب حمدى : صدر قرار باستدعاءه وهيتم التحقيق معاه الصبح ان شاء الله

جلال بامتعاض : قرار استدعاء ! ، طب ليه ما اتقبضش عليه

النقيب حمدى : لانه مجرد اتهام من حضراتكم ، ماكانش لسه عليه دلائل ، و لحد دلوقتى ، ممكن بكل سهولة ، ينفى التهمة عنه

جلال : ازاى بقى بعد كل ده ، والكاميرا اللى صورت كل اللى حصل

النقيب حمدى : ما هو للاسف ، مش هو اللى اقتحم بنفسه ، بس عموما ، بلاش نسبق الاحداث

فؤادة : المرة دى فى اتنين من رجالته ممسوكين فى ارضنا فى محاولة التخريب

النقيب حمدى : وعشان كده بقوللكم ماتستعجلوش

المحامى : ياريت لو حضرتك تمنع الزيارة عن العيال دى لحد ماتحقق معاهم ، واكيد حضرتك فاهم انا اقصد ايه

النقيب حمدى : طبعا فاهم ، و عاوزك تتطمن ، التحقيق معاهم هيبتدى اول ما نوصل النقطة ، ما تقلقوش

فؤادة : انا متشكرة جدا يا فندم

النقيب حمدى : يمكن مايكونش اتقابلنا قبل كده يا مدام فؤادة ، لكن الحقيقة والدك خدماته لكل اهالى المنطقة مش قليلة ابدا ، و عشان كده مش عاوزك تقلقى ، ان شاء الله الحق لازم يرجع لأصحابه

بعد انصراف الشرطة ، وجدوا العم نبيل يستند على احد الرجال ، و يوجه بعض التعليمات لرجال الامن ، ووجدوا ان الكهرباء قد عادت الى كل اركان المزرعة لتقول فؤادة له بعتاب : ايه اللى خلاك تقوم دلوقتى بس يا عمى نبيل

العم نبيل : ماينفعش اسيبك لوحدك فى وقت زى ده بابنتى

فؤادة : بس انا مش لوحدى ابدا ، ممكن ترجع بقى تستريح ، اليوم كان طويل اوى ، و الفجر خلاص قرب يأذن

العم نبيل : ماتقلقيش ، هصلى الفجر وهنام

لتلتفت فؤادة لجلال وتقول هامسة : خلى المحامى يدخل يستريح شوية فى الاوضة اللى جنب محمد و مراته ، مايصحش يطلع فوق

ليصطحب جلال المحامى بالفعل الى الغرفة المجاورة لمحمد ، و تذهب فؤادة الى المطبخ فتجد ان ماجدة لازالت مستيقظة فتطلب منها تحضير بعض الطعام وارساله الى المحامى

ثم قالت لعارف وحسين : معلش بقى ، هتضروا تشتركوا مع بعض فى اوضة واحدة بسرير واحد ، لان ما كانش ينفع اخلى المحامى يطلع فوق

حسين : انا شايف اننا نصلى الفجر و نتوكل على الله

فؤادة باصرار : ماينفعش تسافروا من غير حتى ما تنامولكم ساعة واللا اتنين ، اطلعوا بس استريحوا الساعتين دول ، و بعد كده اتوكلوا على الله

عارف : فؤادة بتتكلم صح يا حسين ، عشان حتى تقدر تركز فى شغلك ، و بعدين انا اصلا اجازة بكرة كمان فهفضل هنا على ما اتطمن على الوضع وبعد كده هبقى ارجع مع المحامى بعربيته

حسين بموافقة : ماشى ، فين الاوضة دى

لتشير فؤادة بيدها للاعلى قائلة : اتفضلوا

ليأتى جلال قائلا : على فين

فؤادة : هوصلهم فوق ، عشان يستريحوا شوية

حسين : و ماتنساش تدينى مفاتيح عربيتك يا جلال عشان همشى اول الدنيا ما تنور

جلال : هو ما ينفعش تاخد اجازة يا حسين و تخليك معانا النهاردة

حسين بفضول : انت محتاجنى فى حاجة

جلال : اصل اكيد هيحتاجونا الصبح فى النقطة ، و مش عاوز اسيب الستات لوحدهم ، فكنت عاوزك انت ومحمد تبقوا موجودين معاهم ، خصوصا انهم فى التحقيق اكيد هيحتاجوا ياخدوا اقوال عارف بما ان هو اللى مسك العيال دى فهيبقى معانا هو كمان

عارف وهو يدق بكف يده على مقدمة رأسه : يا خبر ، ده انا كنت ناسى خالص الحكاية دى

جلال : و انا كمان ، لولا المتر هو اللى نبه عليا اقول لك ماتسافرش

حسين بتنهيدة : خلاص ، انا على الساعة تسعة كده هعمللهم تليفون فى المستشفى و اعتذر لهم ، و هفضل معاكم حاضر

جلال : طب طالما كده ، خليها يومين بعد اذنك مش يوم واحد

حسين بمرح : قابل يا عم ، سكتناله دخل بحماره

جلال بتعب : لو كنت قادر كنت دخلت بالكاريته كمان مش بالحمار بس

فؤادة بخجل : معلش حقكم عليا ، انا عارفة انى تعبتكم كلكم معايا النهاردة

عارف بمرح : يا ستى اتعبينا انتى بس و مالكيش دعوة ، ده انتى سليتينا وخرجتينا من الملل اللى كنا فيه و حتى عملتيلنا شوية ساسبينس انما ايه .. عنب

حسين : انتى اختنا يا فؤادة ، ماتقوليش كده

كان جلال ينظر لفؤادة و بداخله حالة من الفوران و الغضب فقال : ياللا كل واحد على مكانه عشان نلحق نستريحلنا شوية ، احنا مش عارفين ايه اللى مستنينا بكرة

لتشير فؤادة بيدها الى حسين وعارف قائلة : اتفضلوا ، وسبقتهم الى الاعلى

و اشارت لهم على غرفة ابيها قائلة : جلال كان بينام هنا ، بس بما انكم هتباتوا سوا ، فانتم اللى هتباتوا فيها لان الاوضة دى سريرها كبير

عارف : طب وجلال هيبات فين

لتشير فؤادة الى غرفتها قائلة بابتسامة : هيبات فى اوضتى

ليتبادل الاخوة النظرات فيما بينهم ثم يدخل عارف الى الغرفة مسرعا وهو يجذب حسين من يده وهو يقول : احنا هننام بقى عشان نصحى بدرى ، تصبحوا على خير ، ويغلق الباب وراءهم بسرعة

لينظر جلال الى فؤادة التى اشارت على غرفتها قائلة ، معلش بقى ، بس الوضع جه كده ، ثوانى بس ، هاخد هدومى واسيبك براحتك

جلال : و انتى هتنامى فين

فؤادة : هنام جنب سلوى ، فى اوضة الولاد ، ماتقلقش

و ما ان دخلت فؤادة الى حجرتها حتى دخل جلال خلفها واغلق الباب و قال : ولو ولاد عمك شافوكى و انتى نايمة معاهم هتقوليلهم ايه

فؤادة : عادى يعنى وفيها ايه ، مش مشكة

جلال : احنا مش اتفقنا ان ما حدش يعرف الحقيقة عشان عمك

فؤادة بتردد : ايوة ، بس ماتقلقش حضرتك ، لو حد شافنى ، انا هعرف اتصرف ، بعد اذنك

و اتجهت الى الخارج وقبل ان تفتح الباب قال لها متسائلا: انتى مداومة على الدهانات والعلاج بتاعك واللا لا

فؤادة : ااه الحمدلله

جلال : و مين بيدهنلك

فؤادة بخجل : ساعات ماجدة ، و ساعات خالتى ام ابراهيم

جلال : المهم انك ماتهمليش ، عشان المفروض تبتدى العلاج الطبيعى بعد كام يوم

فؤادة : ان شاء الله

و تركته ، و خرجت متجههة الى غرفة الصغار ، وقضت ليلتها التى لم تتعدى الثلاث ساعات بجوار سلوى ، و ما ان تعدت الساعة الثامنة ببضع دقائق ، الا و كانت فؤادة بداخل المطبخ بصحبة الصغار ، تضع لهم بعض الطعام ، فمعظم من بالمنزل لم يتناول العشاء رغم اعداده وتجهيزه

*********************

إلي هنا ينتهي الفصل الثامن عشر من رواية فؤادة بقلم ميمى عوالى
تابع من هنا: جميع فصول رواية فؤادة بقلم ميمى عوالى 
تابع أيضا: جميع فصول رواية الفريسة والصياد بقلم منال سالم
تابع من هنا: جميع فصول رواية اماريتا بقلم عمرو عبدالحميد
تابع أيضاً: جميع فصول رواية انتقام اثم بقلم زينب مصطفى
تابعوا صفحتنا على الفيس بوك للمزيد من روايات مصرية كاملة
اقرأ أيضا: رواية شرسة ولكن بقلم لولو طارق