قصص رومانسية جريئة ممنوع دخول الأطفال

مرحباً بكم أصدقائي وأحبابي عاشقي القراءة والقصص مع رواية رومانسية جديدة للكاتبة المتألقة ميمى عوالى و التى سبق أن قدمنا لها العديد من الروايات علي موقعنا قصص 26 وموعدنا اليوم مع الفصل الثالث والعشرون من رواية فؤادة بقلم ميمى عوالى .

رواية فؤادة بقلم ميمى عوالى - الفصل الثالث والعشرون

إقرأ أيضا: حدوتة رومانسية

رواية فؤادة بقلم ميمى عوالى - الفصل الثالث والعشرون

 جلال : اللى فهمته من كلامك معاها ان موضوع قفشتها فى هدومها و هى بتتكلم دى ليها سبب ، و انا عاوز اعرف السبب ده

محمد : الحقيقة يا جوز اختى انا كنت عاوز برضة اتكلم معاك فى الحكاية دى

جوز اختى …. لقد كان للوصف وقع خاص على قلب جلال ، فقد احس بالانتشاء من تلك العبارة القصيرة فالتفت الى محمد يوليه كامل انتباهه باهتمام شديد قائلا : و انا سامعك ، اتكلم

محمد : الحقيقة الموضوع مش مجرد كلمتين يتقالوا فى خمس دقايق ، احنا محتاجين قاعدة طويلة مع بعض ، عشان نحاول نلاقى حل سوا فى الموضوع ده لانى حاسس انه اتطور عن وقت ما سافرت

جلال بلهفة : تحب نقعد مع بعض امتى ، شوف الوقت اللى يناسبك ، و انا تحت امرك

محمد بمرح : عفوا يا جوز اختى ، ده احنا كلنا اللى تحت امرك

اما بالداخل ، فكانت نهاد تجدل اصابعها باصابعها تارة ، و تنفضهم تارة ، و تصفق بخفة و توتر تارة اخرى ، و هى تنظر للارض

و كان عارف يراقبها بتسلية و حب شديدين فى صمت شديد ولكنه عندما وجد ان الوقت يكاد يسرقهم تنحنح قائلا : هى السجادة فعلا شيك و شكلها حلو بس ما اعتقدش انها احلى منى للدرجة دى

لترفع نهاد عينيها و تنظر اليه بتوتر جعل عارف يشفق عليها فقال مرة اخرى : المفروض اننا اتكلمنا مع بعض قبل كده كذا مرة يا نهاد ، و فى كذا مناسبة يعنى مش لسه هنتعرف على بعض من اول و جديد ، و اكيد انتى عرفتى طبعا انا جاى هنا النهاردة ليه

فتخفض نهاد عينيها مرة اخرى بينما يقول عارف بمكر : انا طلبت من والدك انه يسمحلى اركب معاكى خيل

فترفع نهاد وجهها سريعا و تنظر اليه بعدم فهم قائلة : خيل ايه

عارف و هو يتصنع الجدية : اصلى عرفت انك بتخافى تركبى خيل لوحدك ، و الحقيقة فكرة انك تركبى خيل مع حد على نفس الحصان فى حد ذاتها دى فكرة كده تحسيها تجنن ، ففكرت انى اركب معاكى عشان ما تخافيش

نهاد : و هو انا لما احب اركب خيل هركب معاك او مع اى حد كده .. لا طبعا

عارف و هو يرسم ملامح الحزن و الاحراج على وجهه : يعنى بترفضى .. ده انا كنت همسكك كويس و الله عشان ما تقعيش

نهاد بحدة : انت عبيط

عارف و هو يضحك بشدة : لا … بستعبط ، خلاص يا ستى ما تزعليش ، وافقى انك تتجوزينى ، و اهو لما هتركبى معايا مش هبقى اى حد

لتبتسم نهاد بمشاغبة و تقول : و تخلينى امسك اللجام و احنا راكبين

عارف بمرح : اللجام و صاحب اللجام تحت امرك

لتنهض نهاد قائلة بخبث : افكر

و تركته و ذهبت مسرعة الى الخارج ، و لم تعطى احد اى فرصة للتحدث معها ، فقد اتجهت الى غرفتها رأسا ، و اغلقت الباب خلفها فورا

و عندما عاد الجميع الى عارف بالداخل ، وجدوه يجلس مبتسما بسعادة ، فطلب جلال من سالم قراءة الفاتحة و تحديد موعد للزواج

فقاموا باستدعاء نهاد من غرفتها مرة اخرى و قاموا بقراءة الفاتحة ، و صدعت الزغاريد من سلمى و حسنة و ام نهاد

و فى وسط الزغاريد كانت هناك صرخة عالية تصدر من عايشة و هى تحاول الحفاظ على انتظام انفاسها و تستنجد بمحمد قائلة بارتعاش : غيتنى محمد … بولد

محمد برهبة : ما انا قلتلك من بدرى و انتى فضلتى تقاوحى

عايشة : غيتنى ها الحين … بسرعة

ليسرع عارف الى الباب قائلا : هاتها بسرعة يا محمد على ما ادور العربية

حسين و هو يسرع معه : وديها على المستشفى عندى يا عارف ، و انا هبقى هناك قبلكم و فى استقبالكم

ليتجه الجميع الى المشفى فى سرعة كبيرة وسط صرخات عايشة المتألمة ، و كانت تتعرق بشدة رغم برودة الجو ، و كان محمد يحتضنها و يواسيها ببعض الكلمات

عارف : خلاص يا مدام عايشة ، احنا نعتبر وصلنا ، خلاص دقيقة واحدة و تبقى جوة المستشفى و ان شاء الله تقومى بالسلامة

و بالفعل ، قبل ان تمر الدقيقة كانوا قد وصلوا بالفعل امام باب الحالات الطارئة ، و كان يوجد هناك من استقبلهم بالفعل مع حسين كما و عدهم ، و اوصل عائشة مباشرة الى الطبيب المختص ، و الذى حولها على الفور الى غرفة العمليات

كان الجميع ينتظر امام غرفة العمليات بترقب ، و هناك من يحفز محمد على الصبر و الجلد و من يدعو لعايشة و من يقرأ القرآن

و لكن كان هناك ايضا جلال ، الذى تذكر على الفور يوم ولادة ابنته و موت حبيبته ، فقد كان المشهد مقاربا مع اختلاف الاشخاص ، عندما رفض ان يسعفه احد قبل الاطمئنان على حبيبته ، و لكن القدر لم يمهله لفعل ذلك ،

و لكن تذكره هذه المرة للمشهد لم يكن بنفس درجة الالم ككل مرة ، كان متألما و بشدة و لكن المه تلك المرة لم يكن مميتا ككل مرة سبقت تلك المرة

و لاول مرة كان هو من يبادر بالخروج من تلك الذكرى فاخرج هاتفه و قام بمهاتفتها …. مهاتفة فؤادة

فؤادة : السلام عليكم

جلال : و عليكم السلام .. ازيك

فؤادة : احنا كلنا بخير الحمدلله … طمننى عملتوا ايه ، عمى وافق

جلال بتنهيدة عميقة : ايوة .. الحمدلله ، و قرينا الفاتحة كمان

فؤادة بارتياح : مبرووووك ، الف مبروك ربنا يتمم لهم بكل خير

جلال و بقايا الحزن تغلف صوته : يا رب

فؤادة بتردد : مااال صوتك ، حصل حاجة

جلال : بابتسامة سخرية : ابدا ، بس احنا فى المستشفى

فؤادة برهبة و صوت مرتعش : ليه … ايه اللى حصل ، طمننى يا جلال ارجوك

ليبتسم جلال على مخاطبته باسمه مجرد من اى القاب و يقول : ما تقلقيش ، بس عايشة مراة محمد بتولد

ليستمع جلال الى زفرة ارتياح حارة تصدر من صدر فؤادة فيقول مداعبا : ما يبقاش قلبك خفيف و تتخضى اوى بالشكل كده

فؤادة و ما زال الارتعاش يغلف صوتها : ربنا يقومهاله بالسلامة هى و اللى فى بطنها ، و ما يحرمهمش منها ابدا

ليسود الصمت برهة فتقول فؤادة بفضول : تحب تكلم سلوى

لينتبه جلال انه لم يحادث سلوى منذ تركها فقال : هى لسه صاحية

فؤادة : الحقيقة كانت نايمة بس صحيت على صوتنا و احنا بنتكلم ، هى معاك اهى ، كلمها عشان تطمنها احسن شكلها كده اتخضت من صوتى

ليسمعها جلال و هى تقبل سلوى بمرح قائلة : حقك عليا يا لولو ، ده بابا يا حبيبتى ، خدى كلميه احسن انتى وحشتيه اوى

سلوى بنعاس : بابا

جلال : ازيك يا لولو

سلوى ضاحكة : انت هتقول لى لولو زى ماما

جلال بانتباه : ماما !!!!

سلوى : ما انا اتفقت مع طنط فؤادة انى اقول لها يا ماما

جلال بارتباك : و الاتفاق ده كان امتى

سلوى : النهاردة الصبح ، و هى بتعمل لى شعرى الضفاير اللى بحبها ، هو انت هتيجى امتى

جلال بانتباه : عاوزة ترجعى عند تيتا

سلوى بلهفة : انا عاوزة افضل مع ماما

جلال بقليل من العتاب : يعنى مش عاوزة تيجى عند بابا و تيتا خالص

سلوى : لا عاوزة ، بس ماما تيجى معايا

جلال بحنان : عموما نبقى نشوف الحكاية دى بعدين ، المهم ما تتعبيش طنط معاكى

سلوى : ماما … اسمها ماما يا بابا

جلال بابتسامة : ماشى يا ستى ، ما تتعبيش .. ماما معاكى

و كان جلال يستمع الى سلوى و هى تتثائب مرة بعد الأخرى اثناء حديثهما معا فاشفق عليها و قال: ياللا يا حبيبتى ، كملى نومك

سلوى : طب هو انت مش هتيجى هنا تانى

جلال : هاجى يا حبيبتى … ان شاء الله هاجى

لتلتقط فؤادة الهاتف من سلوى لتجد ان جلال مازال على الخط ، فتقول : ما فيش جديد عن عايشة ، لسه ما ولدتش

ججل و هو ينظر من على بعد الى التجمع امام غرفة العمليات : لسه ، ما حدش خرج قال اى حاجة لحد دلوقتى

فؤادة بحرج : ممكن من فضلك تبقى تطمنى ، انا هفضل صاحية لحد ما اتطمن عليها

جلال و هو يومئ برأسه و كأنها تراه : ان شاء الله حاضر اول ما تخرج بالسلامة هكلمك على طول

فؤادة : متشكرة .. مع السلامة

ليقول جلال بلهفة و هو يحاول اللحاق بها قبل ان تغلق الخط : فؤادة

فؤادة : ايوة يا استاذ جلال

جلال : و انا جايلكم ان شاء الله ، هجيب معايا الدكتور بتاع العلاج الطبيعى ، عشان يبص على دراعك و يطمننا

فؤادة بلهفة : هو انت جاى

جلال : ايوة .. هظبط بس كام حاجة كده و هجيلكم على طول

ليرى جلال اثناء حديثهم من على بعد احدى طاقم التمريض تخرج من غرفة العمليات و هى تحتضن مولود صغير و قد تجمع حولها كل الوجود بسعادة فيقول جلال بابتسامة : واضح ان عايشة ولدت خلاص الحمدلله … روحى نامى بقى و هبقى اكلمك الصبح ان شاء الله . تصبحى على خير

فؤادة : و حضرتك من اهله

كان جلال يشعر بالارتياح لمهاتفة فؤادة، و لكنه كلما سمعها و هى تحيط اسمه بالالقاب يشعر باحباط دفين لا يستطيع فهم اسبابه

اما فؤادة فبعد ان اغلقت الهاتف تركته فى يدها و هى تنظر للهاتف بامعان ، و كأنها تتخيل به وجه جلال ، و الهواجس تكاد تطل من رأسها لتقتلها

و كان هاجسها الاكبر ان زيارة جلال القادمة قد تكون لاصطحاب ابنته و العودة بها و للابد الى منزله ، لتبيت ليلتها اشد تشبثا بنفسها ، و وجهها تغسله دموع الترقب و الرهبة

فى غرفة عايشة كان يلتف حولها زوجها و اسرته بعد ان استأذن جلال و امه فى الانصراف ، بينما بقى حسين لاستدعائه لكشف على احدى الحالات ، بينما عارف .. فقد بقى مع اسرة خطيبته ، فلربما قد يحتاجون الى اى شئ يستطيع القيام به ، و ظل جالسا بالخارج فى الانتظار

اما بالداخل ، فكان محمد سعيدا للغاية ، فقد رزقه الله بطفلة جميلة .. رقيقة الملامح و المحيا ، سعد بها الجميع ، خاصة سالم الذى جلس على احد المقاعد و هو يحتويها بين ذراعيه و ينظر اليها بحنان بالغ جعل عينا زوجته اغرورقت بالدموع و قالت بحنان : تعيش و تتربى فى عزك و عز ابوها ، و تعيش و تجوزها يا سالم

ليبتسم سالم و يقرب الصغيرة من وجهه و هو يتأملها جليا و يقول : ربنا يحفظها و يبارك فيها

ثم نظر الى عايشة و قال : حمدلله على سلامتك يابنتى

عايشة بارهاق : تسلم لى عمو

سلمى : وهتسموها ايه

محمد و هو ينظر الى ابيه بحب : بابا يسميها

سالم بدهشة : انا ، ازاى ، امها تسميها

عايشة : انت مقدارك و قيمتك على راسى عمو

نهاد بلهفة و محايلة : انا عاوزة انا اللى اسميها

محمد بمرح : و يا ترى هتسميها على اسم انهى اكلة ، ما انتى على طول يا جعانة يا بتاكلى

نهاد : عشان خاطرى يا محمد اسميها انا

ام نهاد : و عاوزة تسميها ايه بقى يا ست نهاد

نهاد : عاوزة اسميها زهرة ، بالذمة مش اسم حلو

سالم بابتسامة : و الله فعلا اسم حلو ، بس برضة لازم يعجب امها الاول

عايشة بابتسامة مرهقة : و الله حلو يا نهاد ، خلاص تبقى زهرة

محمد بابتسامة مرحة : اخيرا الواحد خد منك حاجة عدلة

نهاد بسماجة : يا عم اجرى كده ، هو حد فيكم يعرف يعمل حاجة من غيرى

سلمى بفرحة : مبروك يا ام زهرة

ام نهاد موجهة حديثها لعايشة : بس يا بنتى طالما انك تعبانة من بدرى ليه ما قلتيش الا على الاخر كده

عايشة : بالله ماما ، ماحبيت اعمل طق حنك ع الفاضى ، و كان بدى نخلص فرحة نهاد الاول

نهاد بمرح : تخلصى فرحتى ، و اللا كان عينك من الجاتوة يا طفسة و كنتى عاوزة تاكلى الاول قبل ما تولدى

و من وسط ضحكاتهم تشهق ام نهاد و تقول : يا خبر ، ده احنا قاعدين هنا كلنا و سايبن عارف لوحده برة ، اخرجى يا نهاد اقعدى معاه ، ما يصحش يا بنتى ، الجدع يقول علينا ايه

لتنظر نهاد الى والدها بفضول ، لترى رد فعله ، فيقول لها : اخرجى اقعدى معاه و احنا شوية و هنمشى كلنا عشان نسيب عايشة تستريح شوية

لتخرج نهاد من الغرفة مغلقة الباب خلفها ، لتجد عارف وقف فى استقبالها بابتسامة جميلة قائلا : ها .. ايه الاخبار ، كله تمام

نهاد و هى تومئ برأسها علامة الايجاب : الحمدلله ، و بابا قال اننا شوية و هنمشى ، بس انت مذنب نفسك معانا ليه ، كنت روح مع جلال و طنط

عارف بمشاكسة : امشى يعنى ، مش عاوزانى معاكم

نهاد بخجل : انا ماقلتش كده ، انا قصدى عشان ما تتعبش

عارف بغزل : لو فضلت معاكى العمر كله عمرى ما اتعب ابدا

و عندما لاحظ تورد وجهها خجلا قال : مش هتقعدى ، اقعدى معايا شوية على ما يستعدوا و يخرجوا

لتجلس نهاد بجانبه فى صمت شديد و هى تنظر ارضا كعادتها معه ، فيقول عارف : ها سميتوا المولودة ايه

نهاد بفرحة و هى تصفق بيديها كالصغار : سميناها زهرة ، و انا اللى اختارت لها اسمها

عارف : عاشت الاسامى ، عقبال ما تنورى بيتى و تبقى زهرة دنيتى كلها

لتعود نهاد سريعا بنظرها ارضا فيقول عارف بدعابة : طب فى بيتكم قلت السجادة عجباكى ، لكن هنا مافيش غير السيراميك ، يا ستى اعتبرينى انا كمان حتة موكيت و بصيلى شوية

لتبتسم نهاد بشدة و هى تقاوم ضحكاتها ، و ما ان رفعت عينيها الى عينيه حتى قال لها : تعرفى انى حبيتك من اول مرة شفتك فيها

و قبل ان تعيد نظراتها الى الاسفل ، مد عارف اصابعه ليمنعها عن الافلات بنظراتها منه و اكمل قائلا : يومها لما روحت البيت و حكيتلهم على اللى حصل ، كلهم عرفوا على طول انى اخيرا لقيت اللى خطفت قلبى

و عندما لم يجد منها ردا اكمل قائلا : انا بحبك اوى يا نهاد ، حصل امتى و ازاى بالسرعة دى .. ما اعرفش ، لكن كل امنينى انى اقدر اسعدك و احافظ عليكى ، زى ما بتمنى انك تبادلينى نفس مشاعرى ناحيتك

و فى تلك اللحظة ، فتحت سلمى الباب و كان والداها خلفها استعدادا للرحيل ، فنهض عارف و نهاد على الفور و قال عارف موجها حديثه لسالم : حضرتك مش محتاج منى اى خدمة يا عمى

سالم بامتنان : تسلم يا ابنى ، عقبال ما افرح بيك انت و نهاد ان شاء الله

لينظر عارف الى نهاد بابتسامة حالمة ، الا ان سلمى سحبت نهاد من يدها و اتجهت بها الى الخارج و هى تقول : هنسبق احنا على العربية يا بابا

سالم و هو يربت على كتف عارف : احنا تعبناك معانا النهاردة و سهرناك معانا

عارف : تعب ايه يا عمى ، احنا خلاص بقينا اهل ، و محمد بقى اخويا و مراته مراة اخويا

ام نهاد بحب : من يوم ما عرفتكم يا بنى و انا بقول عليكم ولاد اصول ، ربنا يخفظكم يارب

سلمى بمرح وهى تسحب نهاد للخارج : الحب ولع فى الدرة يا جدعان ….. هييح ، عقبال كده اما الاقى حد يتطس فى معاميعه و يحبنى

نهاد بغيظ : الهى يطسك عجلاتى اعمى يا شيخة ، لازم تسحبينى كده من غير حتى ما تدينى فرصة اسلم عليه قبل ما نمشى

سلمى : الحق عليا انى لحقتك قبل ما ابوكى ياخد باله و هو بيكشف على سنانك

نهاد بعدم فهم : سنان ايه اللى كان بيكشف عليها يا زفته انتى

سلمى و هى تلاعب حاجبيها بخبث : اومال كان ماسكك من دقنك ليه يا حيلتها ، كان بيقيسلك النظر

لتخبطها نهاد بحنق على راسها من الخلف و هى تقول : لا يا خفيفة ، كان بيقرالى البخت ، و قال لى انى هتسحبنى بلوة من قدامه

انصرف الجميع و بقى محمد بصحبة زوجته و صغيرته ، و هو قائم على رعاية زوجته رعاية كاملة ، و قد بات حسين ليلته بالمشفى ، باستراحة الاطباء بعد ان ابلغ محمد ببقائه بالقرب ، حال ان احتاج لاى مساعدة من اى نوع ، و قد شكره محمد بشدة على ذلك

و فى اليوم التالى ذهب جلال الى المشفى للاطمئنان على محمد و زوجته ، و اصطحب معه هدية ذهبية قيمة باسمه و اسم فؤادة كما اقترحت عليه حسنة ، بأنه من المستحسن ان يقدم هديته باسمه و زوجته و يهاتف فؤادة من المشفى لتقوم بتهنئة اخاها

و عندما هاتف جلال فؤادة قال لها : ازيك ياحبيبتى عاملة ايه

لتذهل فؤادة من سماعها لتلك الكلمة منه دون اى مقدمات ، و لم تستطع الرد عليه ببنت شفة ، و لكنها استوعبت الموقف عندما اكمل قائلا : انا عند محمد و مدام عايشة و قلت اتصل بيكى عشان تباركيلهم بنفسك ، محمد معاكى اهوه ، و اعطى الهاتف لمحمد دون ان ينتظر منها اى رد

محمد : حبيبة اخوكى ، ليه كلفتوا نفسكم كده ، احنا المفروض مافيش بيننا و بين بعض الكلام ده

فؤادة بعدم فهم : كلفنا نفسنا فى ايه

محمد بامتنان : السلسلة الحلوة اللى جيبتوها لزهرة يسلم ذوقك و ذوق جوزك الحقيقة

لتفهم فؤادة ما حدث على الفور و تقول : مبروك ما جالك يا ابو زهرة ، عقبال ما تخاووها ان شاء الله

محمد و هو ينظر لجلال بابتسامة : و نفرح بيكى يا حبيبتى على القريب ان شاء الله

و قامت فؤادة بمحادثة عايشة و تهنئتها على السلامة ، و على مولودتها الجميلة ، و وعدتها بزيارة قريبة

و بعدها امتدت يد عايشة بالهاتف ليلتقطه جلال مرة اخرى قائلا بهدوء : ايوة يا حبيبتى ، انتو بخير … مش محتاجين حاجة

فؤادة بلجلجة شديدة اثرت على نبرة صوتها بوضوح : انا متشكرة جدا لحضرتك ، مش عارفة ارد جمايلك عليا ازاى

جلال بابتسامة : عموما انا ان شاء الله مش هتأخر عليكم و لو احتاجتوا حاجة كلمينى على طول

و عندما انهى جلال المكالمة ، ارتمت فؤادة جالسة فى موضعها ، و هى تحدث نفسها قائلا : لو تعرف كلمة حبيبتى اللى انت قلتهالى تمثيل دى اد ايه بتمنى اسمعها منك بس تكون قاصدها بجد و انت بتقولهالى

لتدخل عليها سلوى لتجدها فى تلك الحالة فقالت باستغراب : مالك يا ماما ، انتى فى حاجة بتوجعك

فؤادة بابتسامة و هى تحتضنها بحب : ابدا يا لولو ، ده انا بس مبسوطة عشان عمو محمد و طنط عايشة جالهم بيبى صغننة زى القمر زيك كده

سلوى : هنروح نلعب معاها

فؤادة : اكيد يا حبيبتى ان شاء الله .. اكيد

اما جلال فعندما اراد الاسئذان من محمد بالانصراف كانت عايشة على وشك الذهاب فى النوم ، فأخذه محمد الى الخارج و بعد ان جلسا معا فى الاستراحة قال : انا عاوز اديك نبذة عن موضوع فؤادة ، لانى عارف انى هبقى مشغول بعايشة و زهرة الفترة اللى جاية

جلال بفضول : ياريت .. لو ما كنتش هعطلك

محمد : فؤادة طول عمرها كان عمى الله يرحمه فى ضهرها ، و كان دايما بيشجعها انها تبقى قوية و ما تخافش من حد و ما تسيبش حقها ابدا و لو حتى كان مع مين ، لانه كان عارف هى اد ايه قلبها رقيق

و فعلا ، ماكانتش بتسيب حقها ابدا ، لكن كانت بتحس بقوة فوق قوتها ان عمى على طول فى ضهرها بيشدها و بيدعمها فى كل موقف بتاخده ، عمره ما خذلها ابدا

لكن زى ما كان بيعلمها ما تسيبش حقها ، كان بيعلمها تحترم الكبير و صلة الرحم ، و عشان كده برغم كل اللى حصل من بابا ، فؤادة عمرها ما وقفت قدامه و لا عارضته بقوة زى ما كانت دايما بتعمل مع اى حد

لما عمى مات ، بابا صمم انها تيجى معانا تعيش هنا ، و اجبرها تسيب اسكندرية و المزرعة ، و هى عشان كانت شايلة جميل امى و اخواتى و ما قدرتش تنكر ابدا يوم واحد ان بابا كان له مواقف كتير حلوة معاها ، و لانها كانت عارفة ان ما عدلهاش اى حد فى الدنيا غير بابا .. ما قدرتش تعارضه

لكن ابتدت تحس بالضعف ، حست ان العمود المتين اللى كانت مسنودة عليه راح ، و مع الوقت ابتدت حركة ايدها دى لما تكون بتتكلم و هى بتدافع عن حاجة شايفة انها من حقها ، تحسها بتدور على حاجة تتشبث بيها تساعدها على انها تتقوى بيها زى زمان

كون ان بابا عمها ، و ما هواش اى حد غريب عنها ، خلاها تحس بعجز كبير ، و المرة الوحيدة اللى واجهته فيها ، كان مصيرها الحبس فى البيت على حسب ما نهاد و سلمى ما كانوا بيحكوا لى

حاولت اتكلم معاها و اعالجها من المتلازمة دى ، لكن خلافاتى المستمرة مع بابا ، و اللى كلها تقريبا كانت بسبب تعامله معاها ، سيبت البيت و البلد كلها ، و اللى فؤادة اعتبرته وقتها انى هربت و سيبتها لوحدها

عرفت من نهاد ان كل ما الوقت بيعدى كل ما الحالة بتبقى اوضح ، لكن اللى انا مستغربله انى لما رجعت كنت حاسس انها شبه بقت طبيعية ، لحد قبل ما نسيبكم بيومين بس ، لقيتها زى ما يكون حصل لها انتكاسة ، و ده مالوش غير تفسير واحد و عاوزك تساعدنى فى انى اعرف تفسيرى ده صح و اللا غلط

جلال بفضول : و ايه هو التفسير ده

محمد و هو ينظر لجلال بتركيز شديد : ان فؤادة لقت حماية بديلة زى حماية عمى الله يرحمه ، بس ممكن تكون راحت منها تانى مثلا ، او حست انها هتروح منها .. مش عارف بالظبط

لكن اللى انا متأكد منه ان فؤادة مخبية عنى حاجة ، و حاجة مهمة او كبيرة ، مش عارف .. انت ايه رايك ، انت قضيت مع فؤادة فترة مش قليلة ، هل حكتلك حاجة ، او لاحظت حاجة من اللى انا قلتها دى

ليشرد جلال قليلا و هو يفكر فى كل ما قصه عليه محمد ، و هو يتمنى من داخله ان يكون تخمينه صحيحا ، فلو كان تفسير محمد حقيقيا لاصبح هو نفسه الحماية البديلة التى وجدتها فؤادة

و لكن لو كان ذلك حقيقة ، فلما تشعر بضياع تلك الحماية ، فهو لم يتخلى عنها لحظة واحدة ، و عندما طال شرود جلال قال محمد : روحت فين

جلال بانتباه : ابدا … بفكر فى كلامك

محمد : و يا ترى وصلت لحاجة

جلال و هو يمعن النظر بعينا محمد : الاول عاوز اسالك سؤال ، و ترد عليا بصراحة و بصدق و امانة

محمد ضاحكا : كل ده ، ايه يا عم حيلك عليا ، انت هتقوللى سر حربى و اللا ايه

جلال بجدية : هو فعلا حاجة زى كده

محمد : اسأل يا سيدى

جلال : لو قلت لك ان فى سر فى حياتى انا و فؤادة ، و ممكن يكون السر ده هو اللى ورا حالتها دى فى الفترة الاخيرة ، هتصون السر اللى هحكيهولك

محمد بانتباه : اكيد يا جلال ، بغض النظر ان فؤادة تبقى اختى ، لكن كمان مريضة محتاجة علاج و اى كلمة هعرفها تعتبر سر مهنى ممنوع انى ابوح بيه لاى مخلوق

جلال : انا هحكيلك على كل حاجة من لحظة ما شفت فؤادة اول مرة لحد دلوقتى

و بدأ جلال فى قص كل ما حدث منذ رآها اول مرة و هى تحتمى من الامطار تحت شجرة البرتقال ، حتى تلك اللحظة

كان محمد يستمع اليه فى ذهول شديد حتى انتهى جلال من حديثه فقال محمد : يعنى لحد دلوقتى جوازكم ده تمثيلية

جلال : ايوة ، و اللى مدينا عمرها على ما نتطمن على جواز اخويا و اختك ، خوف من ان باباك يقف قدامهم لو عرف الحقيقة دلوقتى

محمد بفضول : و انت

جلال : انا ايه

محمد : مشاعرك ما اتحركتش ناحيتها فى اى لحظة

جلال بصدق : مش عارف ، و حاسس انى خايف اعرف ، و لما اتكلمت معاك بصراحة .. اتمنيت انك تقدر تساعدنى ان انا كمان اعرف اللى جوايا

*********************

إلي هنا ينتهي الفصل الثالث والعشرون من رواية فؤادة بقلم ميمى عوالى
تابع من هنا: جميع فصول رواية فؤادة بقلم ميمى عوالى 
تابع أيضا: جميع فصول رواية الفريسة والصياد بقلم منال سالم
تابع من هنا: جميع فصول رواية اماريتا بقلم عمرو عبدالحميد
تابع أيضاً: جميع فصول رواية انتقام اثم بقلم زينب مصطفى
تابعوا صفحتنا على الفيس بوك للمزيد من روايات مصرية كاملة
اقرأ أيضا: رواية شرسة ولكن بقلم لولو طارق