مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة ريناد الشهيرة ب رينوو والتى سبق أن قدمنا لها العديد من الروايات علي موقعنا قصص 26 وموعدنا اليوم مع الفصل الثالث من رواية جمارة الجزء الثاني بقلم ريناد يوسف.
رواية جمارة ج 2 بقلم ريناد يوسف - الفصل الثالث
إقرأ أيضا: قصص قبل النوم
رواية جمارة ج2 بقلم ريناد يوسف - الفصل الثالث
بكر عاود السرايا متكاد من الوقفه ومن الانتظار مرتين بحالهم من غير فايده،
وطلع علي اوضته وغير خلجاته لجلابيه بلدي، ونزل عشان يحضر قعدة فصل مع تميم اللي رن عليه بالتليفون وقله عليها..
وهو فالطريق رايح شاف ابوه كمان رايح على المندره ومد الخطاوي لحدت ماحصله ومسك دراعه.. وحكيم بص بطرف عينه وابتسم لما شافه بكر..
حكيم : خيرك معبط فيا ليه كيف العيل الصغير!
بكر : مسنود عليك يابوي..
حكيم : ولا ساندني؟ ... خايف علي ابوك يقع ياك.. فكرني عجزت ياد انت ولا ايه!
بكر : فشر يابوي مين ديه اللي عجز ولا يقع.. طب داني مسكتي بس فيدك مقوياني...
حكيم ابتسم وهزله دماغه وكمل معاه الطريق للمندره، وهناك قعدو مع الناس اللي وصلت، وباقي الناس ابتدت تهل واحد ورا التاني، وكل ديه وبكر قاعد يتحدت مع ابوه واخوه وسخاوي عادي..
لغاية مادخل عواد من باب المندره وبكر شافه والعفاريت اتنططت قدام وشه وعنيه اتقلبت حمره كيف عيون الغول..
بكر ميل على خاله سخاوي.. ايه اللي جابه البارد ديه؟
سخاوي : اتلم يابكر واوعاك تعمل حاجه تزعل الراجل وتخلي ابوك خلايقه تديق منك وهو مناقصشي.. اقصر الشر واهدي واعقل الناس مناقصاش وانت كبير مش صغير كيف زمان هنقولو عيل وطايش..
كلام سخاوي كتم بكر وقعد ساكت ولما ابوه شاورله عشان يقوم يسلم على عواد قام وراح سلم عليه من سكات..
عواد : يامرحب بالنسيب الغالي..هلا بدكتورنا وميت هلا كيفك ياولدي وكيف احوالك..
بكر : بخير نحمدو ربنا..
عواد : عاتب عليك ياواد الشيخ وعتبي كبير وعلى كد العشم.
بكر بص لابوه اللي شافه باصصله نظرة تحذير وخد نفس ورد علي عواد : معلهش مشاغل وظروف ياحج واكيد الوالد والوالده مفهمينك علي ظروفي وموضحينهالك زين، والا ايه اللي مصبرك كل السنين داي علي واحد مش عيروح لبيتك ولا خطاه ولا مره، ولا شاف بتك ولا طلب يشوفها، غير انك مقدر الظروف...
حكيم ديق عنيه وبص لبكر بوعيد علي تلميحه المبطن بانه مش طايق عواد ولا بته، لكنه حمد ربه ان عواد مش بالفراسه اللي تخليه يفهم تلميح بكر، او يمكن من كتر المحبه برضك ممفترضش فيه سوء النيه لحد دلوك..
عواد : قالي الشيخ ياولدي بصراحه وشرحلي ظروفك، وكمان قالي علي سبب عدم مجيك لخطيبتك وللحق السبب ميطلعش غير من ولاد الشيخ حكيم، اللي متربيين على كتاب الله ومخافة ربهم.. بس برضك ديه مايمنعش انك تشوف خطيبتك وهي كمان حقها تشوفك ياولدي حتي لو مره وحده قبل الجواز داي الرؤيه الشرعيه...
بكر بسخريه : الحق ديه كان مكفول ومعترف بيه لو انطلب قبل الفاتحه والارتباط، مش بعد مالخطوبه تمت هنشوفو دلوك .. هيفيد بأيه الشوف ولا الرؤيه والامر نفذ؟!! ..
خلينا على اكده ماشيين زي مااحنا لحدت مانتجوزو بعد مااخلص كليتي علينا وعالسامعين بخير ...
عواد بكسرة نفس بانت فعنيه اللي نكسهم للارض :
بشوقك ياولدي وبكيفك.. اني كنت عايزك تقرب مننا اكتر.. تدخل بيتي وتاكل عيشي وملحي وتتعرف علي عيالي وتخاويهم وتكونلي ولدي اللي جاني بالنسب مخلفتهوش..
بكر حس بشفقه علي عواد لما شاف كسرته واستغفر ربه وفرك وشه ورد عليه:
بص ياعمي.. اني كل اللي باكي عليه اني لو شفت بتك اتعلق بيها وتشغل بالي وفكري، وتخليني مااركزش زين فدراستي، ومستواي يتأثر ويضيع تعبي، وديه اني مستحيل اقبل ولا ارضي بيه واصل ..
عواد :ولا اني ارضالك بيه ياولدي.. ربنا ينجحك ويديك تعبك.. طيب اني عازمك انت والشيخ حكيم والشيخ تميم بكره تمالحوني الزاد فبيتي.. وان كان علي عروستك ياسيدي متخافش مش هنوروهالك عشان متشغلش فكرك وبالك.. قولت ايه.. بس خصيمك النبي توافق اني اول نوبه اطلب منيك طلب..
بكر : انت اصلا معتعرفش تطلب انت عتدبس طوالي..
عواد : كيف يعني؟
بكر : ميعنيش يابوي ميعنيش..
حكيم : اقعد يابكر.. اقعد ياعواد جار نسيبك واتحدتو براحتكم متقعدوش واقفين قبال بعض اكده وسعو مجال للناس اللي عتدخل وتطلع...
وبالفعل بكر قعد وعواد قعد جاره ومبطلش حديت مع بكر، وبكر كلمه يرد عليها وعشره يهزله دماغه وميردش لما زهق ودماغه ورمت...
شويتين والمندره اتملت بالناس ودخل شاب طول بعرض وراح ناحية بكر وعواد ووقف قبالهم وعينه علي بكر..
-كيفك ياشيخ حكيم.. كيفك ياعمي..
حكيم : بخير ياولدي كيفك انت يامنعم وكيف ابوك؟
منعم : بخير ياشيخ نحمد الله..
عواد : خير يامنعم طمني بعت المحصول؟
منعم : وقبضت حقه ياعمي ووديت نصيبك فالبيت.. عطيته لمليكه فيدها تشيلهولك لغاية ماتعاود... قال كلمته واتكي علي اسم مليكه وزغر لبكر...
عواد :براوه عليك ياسبع يعطيك الف عافيه... اقعد اقعد.. بس سلم فلاول علي بكر خطيب بت عمك..
منعم اتقدم خطوه ووقف قدام بكر ومدله يده... واتكلم من بين سنانه :اهلا اهلا بالداكتور واد الشيخ...
بكر قام وهو مستغرب ومدله يده عشان يسلم عليه ومنعم بحركه سريعه خد يد بكر فيده وعصرها بكل قوته وبكر رفع حواجبه من حركة منعم وقاله : هدي اعصابك ياواد العم شكل فرحتك ببيع محصولك مقويه قلبك وزايده الحماس حداك مالك؟!!!
منعم : ماليش ولا حاجه كل الحكايه اني عسلم عليك كيف مامتعود اسلم عالرجال ولا انت رحت بحري وبقيت كيف اهل بحري مرخي معتتحملش السلام؟ قالها وضغط اكتر على يد بكر فرك صوابعه خلي وشه احمر من الالم لكنه مبينش..
بكر رد عليه من بين سنانه : له مبقيتش كيف اهل بحري بس ديه ميمنعش اني يكون حداي شوية احساس لما حد يطبق علي مراوح يدي بحيله كله وهو عامل حاله عيسلم!!! ..
قالها وفضل يحاول يحرر ايده من يد منعم، لكن منعم كان قافل علي يد بكر بقبضه من حديد.. وبعد محاولات بكر الفاشله منعم ابتسم بسخريه وهو عيفرط ليد بكر عشان يحررها من يده..
وبكر زفر بغيظ بعد ماسحب يده من يد منعم وضمها وفتحها مرتين عشان يرجعلها الدوره الدمويه اللي منعم قطعها عنيها بعصرته ليها خلي اطراقها ازرقت...
بكر قعد وهو عيشاور لمنعم : اقعد يابوي اقعد دانتو كل مالواحد يشوف من عيلتكم واحد غريب ويستعجب عليه يطلعله الاغرب ويشوف منيه الاعجب!!! ..
منعم : عيلتنا مفيش حاجه غريبه جدت عليها ولا حد غريب فيها غيرك ياداكتور.. كل شي عفش شفناه من يوم مااسمك بقي يتذكر فمجالسنا...وبقالك حق فاللي المفروض لينا ومن حقنا ربنا يسامحه عمي عواد عاد..
حكيم خد نفس ورد علي منعم : كل شي قسمه ونصيب يامنعم... هود يابوي علي بكر هبابه لا بكر ولا حد ليه ذنب الرك عالمكتوب..
عواد بغضب : بسك يامنعم حديت ماسخ وهلفطه وقوم عاود علي دارك وشوف مصالحك واللي وراك...
منعم : قايم ياعمي وغاير اهه... جاتنا غوره تريحنا من الدنيا واللي فيها...
قالها وقام نفض جلابيته بغضب وطلع من المجلس بالخطوه السريعه قدام الكل وتحت انظار بكر المستغرب علي وجه الخصوص...
بكر ميل علي عواد : ماله ديه يابوي؟
عواد : تعبان فمخه همله ملكش صالح بيه..
بكر همس لنفسه : يعني هي حاجه جديده عليكم يامعاتيه انتو؟
وميل علي ابوه : ياتري فيه نمر تانيه غريبه فالسيرك القومي اللي اسميه عيلة الزمارتيه؟ ولا هما بس كلب البحر عواد، وبته شيتا، ودكر الغوريلا اللي مشي توه ديه... لو فيه قولي عشان متصدمش بس واكون عامل حسابي!! ...
حكيم زغر لبكر : شششش احترم المجلس ياتقوم تغادر وتبطل فلقه مناقصاشي صغرنه الحكايه...
بكر : هشينا وسكتنا ياعمي...
ابتدا المجلس وجلسه الفصل والعايب والمعيوب عليه، كل واحد حكي اللي عنده وابتدت المناقشات والشد والجذب بين الطرفين، وتحليل الموقف من تميم وبكر ومعاه، وابوهم قاعد ساكت وعيتفرج ويشوف كالعاده حكم ولده،
اللي ولا مره حكم غير باللي عيكون فدماغ حكيم واللي هو عين العقل والناس كلها عترضي بيه بطيب خاطر....
اما في السرايا
تمره قاعده فأوضتها وداخله علي شات الدفعه وعتقرا كاتبين ايه لبعض وفالاثناء دي جاتها رساله من مي صاحبتها..
مي : هلاو تمارا
تمره : وعليكم السلام ورحمة الله وبركاته اخبارك يامي واخبار روميساء وباقي الشله..
مي : اناوالشله والدفعه والدكاتره كلنا بخير ماعدا واحد بس هو اللي مش بخير وحاله يصعب عالكافر..
تمره باستغراب :ياساتر يارب مين دا؟
مي : خالد ياتيما... خالد اللي بيحبك وبيجري وراكي فكل مكان، ويلمح ويتنطط وانتي مصدراله الوش الخشب دايما... دا الولد صعبان عالدفعه كلها وكله متعاطف معاه حتي الدكاتره ياشيخه!! ...
تمره : واني مالي وماله اعمله ايه يعني؟
مي : ياستي متعمليش ولا حاجه غير انك تردي عالغلبان مره وحده بس فحياتك لما يكلمك..
ياعيني يابني دانتي ضيعتي برستيجه وسط الطلبه خالص... مش معقول كل مايوجهلك كلام ولا سؤال تقابليه بالصمت كده!! يابنتي انتي مش واخده بالك ان خالد اللي انتي ممرمطاه دا مز الكليه واشطر واحد فالدفعه، والبنات كلهم يتمنو بس اشاره منه؟
تمره : مي هسألك سؤال.. خالد شاف ايه مني عشان يحبني؟ .. يعني انا وحده منقبه، قليلة الاختلاط، فحالي دايما ومبعملش اي حاجه تلفت نظر اي حد ليا، يكاد صوتي يكون محدش سمعه غيرك انتي والبنات صحابنا بس.. اللي اسمه خالد دا بقي حب فيا ايه او شاف ايه مني يتحب؟
مي : مش لازم عشان يحبك يشوف شكلك ياتمره علي فكره.!
تمره : لأ لازم يامي.. لازم يشوف شكلي او عالاقل يشوف مني مواقف تشده ليا، او عالاقل موقف واحد...وبكده يكون اللي بيعمله دا منطقي وليه مبرر..
طيب هسألك سؤال يامي وجاوبيني عليه بصراحه.. انتي والبنات فيه وحده فيكم وصفتني لخالد ولا وصفتله شكلي؟
مي : لا طبعا انتي بتقولي ايه؟ وهو حد يعني فينا يقدر يعمل كدا مع تنبيهاتك المستمره علينا!!!
دي والله حتي ماما بتقولي عايزه عروسه لاخويا وسالتني لو اعرف وحده بنت ناس ومتدينه وانا رشحتك ليها قالتلي اوصفيلي جيت اوصفك ليها واتراجعت فاخر لحظه، وافتكرت لما حلفتينا انا والبنات واخدتي علينا عهد اننا منوصفكيش لاي حد وامنتينا شوفتك امانه...
تمره : طيب مادام كده يبقي ايه بقي؟ استني اقولك انا التفسير المنطقي للموضوع..
خالد اللي بيعمله دا مش اكتر من فضول.. فضول يشوف ويعرف فيه ايه تحت كتلة السواد اللي دايما قدامه دي..
زي بالظبط واحد فيه لوحه مرسومه قدامه ومتغطيه وهيموت ويكشف الغطى من عليها ويشوفها... صدقيني فالاول وهو بيشوف اللوحه بتتكشف قدامه هيحس بانبهار وفرحه حتي لو اللوحه عاديه.. هيفضل يبصلها بأعجاب.. يوم اتنين تلاته.. وبعدها عنيه هيعتادو عليها، ويشوفو انها حاجه مكنتش تستاهل كل الفضول اللي كان حاسس بيه تجاهها دا،
ويشوفها عاديه جدا.. وممكن مع الوقت يشوفها اقل من العاديه كمان.
اهو خالد كده يامي.. كل اللي حاسس بيه ناحيتي فضول مش اكتر.. وحده مختلفه موضوعا عن كل اللي حواليه، ونفسه يشوفها شكلا عامله ازاي..
وانا مش هكون موضع تجربه لحد او مغامره يخوضها عشان يكتشف حاجه جديده غيره مقدرش يوصلها..
مي : ايه ياتمره كل دا انتي يابنتي ليه شايفاها كده؟
تمره : عشان هي متتشافش غير كده..
تعالي انتي يامي مثلا هقولك فيه واحد فبلدنا اسمه محمد... بيحبك ومجنون بيكي ممكن تحبيه عشان خاطري عشان الولد متشحتف اوي عليكي والحب مبهدله!!!
مي : وانا احبه ازاي وانا لا شفته ولا اعرفه؟!!
تمره : اكزاكلي يامي هي دي النقطه اللي انا بتكلم فيها..
مي : تمره انتي اقنعتيني كالعاده.. شابوه ليكي وربنا مع خالد وحبه وانتي ربنا يعينك عشان بموقفك دا من الناس مش هتتجوزي...
تمره : مي انتي متعرفيش حاجه لا انتي ولا خالد عن الحب..انتو الحب عندكم هديه وفسحه وعزومه وكلام حب يتعاد مليون مره لحد مالاتنين يحسو بالملل.. الحب غير كده خالص ..
انا يامي مولوده وسط حب، وعايشه وسط اكتر ناس فالدنيا بتحب، وطول الوقت متحاوطه بالحب، وصدقيني اللي انا شفته واعرفه وسمعته عن الحب استحاله تفكيركم يقدر يوصله...
ولعلمك انا مش هرضي باقل من المستوي دا من الحب اتحبه او احبه...
مي : دكتوره الحب الافلطوني اللي بتتكلمي عنه مش موجود دلوقتي دا انقرض من زمان!
تمره : لا يامي موجود مانقرضش هو محتاج شوية صبر بس وهييجي..
مي :او ممكن يكون فيه منه بس عندكم فالصعيد مش هنا.. هنا حب عالموضه بالتحديث الجديد..
تمره : ميازمنيش التحديث الجديد دا طالما عارفه ان فيه حب هستني.. ومش مهم حتي لو من الصعيد عادي.. مالهم الصعايده وحبهم احسن ناس واحسن حب واطيب قلوب واخلصها..
ويلا سلام اخدتي من وقتي كتير اوي، وانا المفروض كان زماني مزاكره شابتر كامل دلوقتي...
مي : سلام يادحيحه هانم يابتاعة الحب الافلطوني..
تمره : سلام يختي..
ونهت معاها الكلام وفتحت شات الدفعه ولقت خالد بيتكلم مع رؤوف وكالعاده بيلمح علي انها واحشاه وغصب عنها ابتسمت.. ابتسمت وهي مش عارفه ايه سر ابتسامتها دي.. هل فعلا زي مابتسمع ان البنت لما بتسمع كلام حلو او تشوف اهتمام حد بيها دا بيسعدها فعلا؟؟
اكيد الكلام دا حقيقي والا ايه سر الابتسامه اللي بتتسلل لشفايفها بعد ماتشوف كلامه فالشات او حد يكلمها عنه!!!
اما في وقت سابق من اليوم
سخاوي دخل البيت وشاف ابوه بشندي قاعد عالدكه ومتربع ومقعد يوسف ولده علي رجله وعيوكل فيه بيده،
ابتسم ودخل راح حداهم وقعد جارهم ويوسف اول ماشافه صرخ بفرحه :ابوووي حبيبي ونط عليه قعد فحجره..
سخاوي حبه ومد يده فجيبه طلع الواح الشيكولاته اللي عيحبها ولده يوسف ويستناها منيه كل يوم وادهاله..
يوسف : شقليييطه..
سخاوي.. افتح وكل يابوي بالهنا،وبص لابوه :
كيفك يابوي النهارده وكيف صحتك؟ بشندي : بخير ياولدي نحمدوه.. عوقت فالمدرسه ليه ياولدي لحد دلوك قلقت عليك اني.. مصبرنيش علي بعادك غير الواد الغلبان اللي معارفهوشي واد مين ديه.. شكله تايه ودخل بيتنا بالغلط.. صعب عليا قولت لعيشه تعمله وكل، وقعدت اوكله عشان اخد ثواب وادخل الجنه فيه.. كيف الراجل اللي دخل الجنه لما سقي الكلب فجزمته..
واني وكلته وسقيته، وكان جعان كل لما شبع، وشرب ولق ميه لما بطنه اتعمبجت، كان هيموت من العطش ياولدي كيف الكلب بالظبط...
سخاوي : ياحزني كيف الكلب!!!
بشندي : بالظبط... اني هخش الجنه علي اكده؟
سخاوي: بأذن الله هتدخلها يابوي وتكون من اهلها..
بشندي : بس هو ليه الواد ديه عيقولك يابوي!!!
سخاوي : معلهش خليه يقول مهو كيف ولدي..
يوسف فتح وحدة شكولاته وخد قطمه منها ومدها لجده بشندي، وبشندي خد قطمه منها ومضغها عجبته.. وبحركه سريعه بعدها، قام خاطف كل الشكولاته اللي مع يوسف ودسها تحت رجله مخلاش غير المفتوحه فضل ياكل فيها..
يوسف ببكا : ياجدي ليه خدتهم كلهم هناكلوهم سوا ليه دسيتهم؟
بشندي : له طعمها حلو الشقليطه داي هكلهم كلهم لحالي مهديكش منهم... وبعدين مش ولدي اللي جايبهم يابارد عتبكي عليهم ليه، انت ليك ايه حدانا؟
سخاوي بضحكه : يابوي قلبت عليه ليه مكنت زين دلوك وعتعامله معاملة الكلب وعترأف بيه الشقليطه غيرتك ولا ايه!!!!
يوسف : ياجدي طب هات وحده بس...
بشندي : له
يوسف : طب قطمه
بشندي : قلت له يعني له.. ولو مسكتش هقوم احبسك فالاوضه جوا من غير وكل ولا شرب ولا شقليطه، واعمل فيك كيف المره اللي حبست القطه ودخلت فيها النار.. اصل انت عيل شحات وبارد..
سخاوي ميل علي يوسف حبه وطلعله فلوس من جيبه.. معلهش خد وروح اشتري من الدكان لحالك، وهمل دول لسيدك ياكلهم،
وبعد عنيه عشان النهارده متجليه معاه وايمانه زايد وعيعاملك من القرآن احسن النوبه الجايه يعاملك معاملة حيوان اندبح ونزلت فيه أيه ياحزني..
يوسف رمح علي بره يشتري، وسخاوي نادم علي مرته تحضرله الغدا، وامه اللي كانت عتصلي العصر جوا جات علي حسه من ..
عيشه : يديك العافيه ياولدي حمداله علي سلامتك ياحبيبي ..
سخاوي : يعافيكي يارب .. كيفك ياغاليه؟
عيشه : بخير طول مانفسك فالدنيا ياحبة القلب.. قوم غير خلجاتك واتشطف علي مامرتك تكون حطتلك الوكل..
سخاوي اتغديتي انتي وابوي؟
عيشه : من الصووووبح
بشندي بسرعه : كدابه اني مدوقتش حاجه، من الصبح علي لحم بطني، ولا جابتلي لقمه حاف حتي امشي جوعي بيها..
عيشه :يشندلك يابشندي امال مين اللي جبتله ديك بحاله فصصتهوله وكلو كله!! وكل تاني لما جبت ليوسف وكل؟
بشندي : بطلي كهن شفتش من وشك ديوك ولا بناني ولا كلت شربة لسان عصفور حتي..
عيشه: ايا راجل يالئيم اديك وقعت بلسانك عرفت كيف اني كنت عامله شربة لسان عصفور لما انك مكلتش؟
بشندي : انتي عتعمليلي غيرها شربة لسان العصفور ومعيشاني عليها لما كرهتيني فالوكل كله!!!
عيشه : طب احلف اكده.. احلف اني عوكلكش غير لسان عصفور واحلف انك مكلتش الديك..
سخاوي : يمه!!!
عيشه : له متفكر النهارده كل حاجه ياسخاوي بس عيتلائم عليا والله.. استني بس هخليه يحلف دلوك وشوف..
بشندي : طب كلت ياعيشه.. وكلتني ياسخاوي.. وكلتني لسان عصفور بس، والديك اللي عتتحدت عليه هي اللي كلته مني .. كانت تاكل اللحم وتديني العضم من وراها امصمصه،.
وكمل وهو عيمثل البكا.. واني عيان ياولدي ولازملي غذا، وهقع من طولي من مصمصة العضم ..
سايبني معاها لحالي وهي كبرت وسعرت وعتاكل نايبي وتوكلني الطبيخ حاف لما سقطت من خلجاتي ومبقتش عقدر اقوم علي حيلي..
وشوف هي عتروح وتاجي ورجليها كيف عجلات الكارته اللي جاررها بغل عفي....
عيشه : يابوووووي منك يابوي.. بوريه منك راجل ومن بلقنتك.. بقي اني عاكل نايبك ورجليا كيف عجلات الكارته؟.. ياراجل حرام عليك داني اللي عوكلك نايبي وعمشي اوقع!!!
بشندي : اسكتي ياعيشه ياكدابه... ياسعرانة اللحمه... الا علي سيرة الكارته ياسخاوي متجيبلي الكارته اروح اقعد جار ولدي حكيم هبابه متوحشه ليا كتير شفتهوشي؟
سخاوي : حاضر يابوي هجيبهالك بس شويه اكده عشان لساتني معاود من الشغل وتعبان..
بشندي : براحتك ياولدي اني اديني قاعد مستني لما ترتاح وتوديني...
سخاوي قام وعيشه قربت وقعدت جار بشندي :عتاكل ايه هات حته..
بشندي : عاكل شقليطه ومش هديكي كفايه عليكي الديك اللي نبجتيه لحالك وتهمتيه فيا..
عيشه : يشندلك يابعيد صدقت حالك ولا ايه؟ ديك ايه اللي كلته لحالي ياراجل!!!
بشندي : الديك بتاع بدري.. وقومي من جاري يامره ياسعرانه اني بقيت عخاف منك تاكليني ني ..
عيشه : يشندلك يابشندي يشندلك يشندلك!!!
وهملته وقامت من جاره تشيل فالوكل اللي موطرح يوسف...
سخاوي بعد ماغير خلجاته دخل لخديجه الموطبخ : الجميل طابخ ايه النهاردة؟
خديجه : سبانخ علي لحمه ضاني كيف ماعتحبها ياقلب خديجه..
سخاوي :الله عليكي يابت يام يوسف.. اغرفي طيب وهاتي المخلل هموت من الجوع، همي يلا عشان فيه مجلس فدوار الشيخ عايز اروح الحقه..
خديجه : طيب حاضر اهه.. الا هو يوسف فين مسمعاشي حسه عيتري مع جده يعني؟!!
سخاوي :بعته يجيب شقولاطه من الدكان غير اللي خدهم منيه جده..
خديجه : يييه خدهم منيه ليه، ديه حتي النهارده كان ربنا هاديه عليه طول النهار ومقعده علي رجله وعمال يوكل ويشرب فيه فرحني، قولت قلبه حاسس بواد ولده النهارده واتفكره وحن عليه ...
سخاوي : له متفكرهوش دا كان عيعامله معاملة الكلب بس.
خديجه : كلب ايه يامرى؟
سخاوي : له تخديش فبالك انتي بس، حطي الوكل حطي يلا الوكت راح..
خديجه وهي عتحط الوكل لسخاوي...بس اني برضك مستعجبه ياسخاوي ليه ابوك من وكت للتاني يفتكرك ويفتكر امي عيشه، واني ويوسف ولدي عمره ماعيفتكرنا ولا فيوم عرفنا حتي؟
سخاوي : عشان ابوي ياخديجه عقله جه عند سن معين ووقف.. بالظبط فالسن اللي قبل مااتجوز فيه وكنت فالثانويه... عقله وقف حدا الفتره دي واتحبس فيها، مقدرش يعديها،
ولا قادر يعيش اللي جه بعديها... مخه عيتمرجح بس بين ايام صباه وشبابه ولحد مااتجوز امي وخلفني وبس علي اكده..
كل اللي جه بعد اكده كأنه معداش على عقله.. مريض الزهايمر عقله معيرجعش غير للماضي بس ياخديجه..
يعني حتي لو عاش يوم فالحاضر وفرح وزعل فيه وحصله فيه اللي استحاله بشر ينساه .. تاني يوم عيصبح ناسيه..
وانتي ويوسف وحتي العيل اللي جاي مع انه عايش معاكم لكن عمركم مهتكونو من ضمن ذكرياته ولا تتسجلو فذاكرته ابداا.
خديجه اتنهدت : ربنا يشفيه ويعفو عنه يارب..
سخاوي : لا هو الزهايمر ممنوشي شفا بس تقدري تدعيله ربنا يخفف عنه... اصلك متعرفيش احساس ان الواحد يصحي الصبح معارفشي هو مين، ولا فين، ولا مين اللي حواليه، ويقعد تايه كيف عيل صغير عيتعرف علي الدنيا اللي حواليه لأول مره.. احساس صعب ياخديجه عيخليني اتقطع واني واعي ابوي كل يوم فالحاله داي..
بس من رحمة ربنا بيه ان امي جاره ومطوله بالها عليه علي كد ماتقدر، ومتحملاه كيف ماانتي شايفه...
وهمل اللقمه من يده وبص لخديجه : ولعلمك ياخديجه المرض ديه عيتورث.. يعني بصي لحال ابوي وحطي فبالك اني ممكن اكون مكانه لما تتقدم بيا السنين ويمر العمر..
خديجه وهي عتقرب عليه ووقفت وراه وحاوطت رقابته بأديها وميلت علي راسه حبتها : وانت حدا خديجه مش ارخص من ابوك حدا امك..
ولا عيشه عتحب جوزها اكتر ماني عحب جوزي.. اني يابو يوسف سترك، وغطاك، وسندك، وعكازك، وانيستك، وجليستك، لحد آخر يوم فعمري..
ولحد الروح ماتروح لبارئها هتفضل متشعبطه فضِلك..
سخاوي رفع رقابته عليها لفوق وبصلها بحب : طب الواحد يقول ايه بعد كلامك ديه يابت زبيده واني خلصت فيكي كل الكلام، وشهادتي فيكي يابت الاصول مجروحه..
قولتها وهقولها واعيش العمر كله ارددهالك.. تسلم البطن اللي جابتك ياخديجه.. ويابخت بختي بيكي ياتؤأم الروح والقلب، يانور العيون.
خديجه : تسلملي العيون وصاحبها.. وميلت عليه حبته فجبينه... ومره وحده التنين سمعو زعيق بشندي :
ايه اللي جابك تاني يابارد مش غورت علي بيتكم؟
سخاوي : ولدك عاود بالسلامه..
خديجه بضحكه: ايوه سمعت التشريفه بتاعته...
************'******
في الوقت الحالي..
الفصل خلص والكل روح وعواد اكد علي بكر وتميم والشيخ حكيم علي عزومة بكره والكل وعده انه هيروح، وحتي بكر ملقيش مفر غير انه يروح معاهم..
حكيم عاود السرايا واول حاجه عملها بعد ماطلع اوضته انه اتصل علي مليكه..
مليكه اول ماسمعت الرنه وبصت لقت الشيخ حكيم هو المتصل ردت بسرعه وفرحه : ابوي الغالي .. التلفون نور.. كيفك وكيف امسيت؟
حكيم : اطلعي يابكاشه...
مليكه : ورب الكعبه مانه بكش وربنا العالم بمحبتك فقلبي عامله كيف..
حكيم: عارف يابتي عارف.. وانتي غلاكي من غلا تمره بتي العالم الله ... المهم هملينا من الصبغ ديه واسمعيني زين.. بكر بكره جاي حداكم ا
مليكه قطعت كلامه : غصبته برضك يابوي مش قلتلك له؟!!!
حكيم : يبت اسمعيني متبقيش لهافه فالحديت امال.. همليني اكمل كلامي.. ابوكي هو اللي اصر عليه وعزمه وعزمني معاه اني واخوه تميم كمان...
مليكه : اني مش هطلعله ولا اخليه يشوف زوالي حتي.. مهريحش قلبه واصل..
حكيم : بس خلي بالك بكر لو شافك كل حاجه هتتغير.. وبدال ماكان عيبعد ويهرب هو اللي هيرمح وراكي ويطلب القرب والود.. والكوره هتكون فملعبك وساعتها يحقلك تتغلي وتتمنعي علي كيف كيفك، وتخلصي منيه القديم والجديد وتربيه بالهداوه..
مليكه : هيتحمل كل حاجه عشان هيكون قلبه مطمن ان اللي خايف منيه طلع وهم..
ولو حصل وقرب وطلب الود كيف ماعتقول يابوي هيكون عشان شكلي بس.. واني اللي يحبني بعينه.. وعلي اساس الشوف يقرب او يبعدي ميلزمنيش، لا هو ولا وده...
حكيم : طب ولو طلب يشوفك ولا ابوكي نده عليكي ومليون فالميه عواد هيعملها.. هتعملي ايه وكتها؟
مليكه : الحته داي عاد عليا و عليك يابوي..
اني هعمل حالي مكسوفه ادخل عليكم وانت تراعي خجلي وتطلب من ابوي نقعدو لحالنا اني وبكر فالمندره الصغيره عشان محدش فينا يختشي من التاني..
حكيم : اعتبريه حصل وبعدين؟
مليكه بضحكه : بس ..هنقعدو مع بعض واخليه يقابل مليكه عاد..
حكيم : هتعملي ايه يابت عواد؟
مليكه : هدخل عليه جمالات بت عمتي علي انها اني، واخليه يشوفها ويملي عينه ويشبع شوف...
حكيم : انهي جمالات؟
مليكه : البت اللي جات حداكم مع امي فرح تميم ولدك يابوي، وامي جماره شافتها وفكرتها اني..
حكيم بضحكه: له يامليكه عاد اني قولتلك ربيه مش جننيه.. الواد ممكن يروح فيها داي ياقزينه!!
مليكه : تخافش عليه اخره هيبربط روحه طين كيف ماعيمل زمان ويرمحله هبابه فالبلد وخلاص..
حكيم اتنهد : بصي اعملي اللي تعمليه، وبصراحه بكر حلال فيه عشان معيجيش بالحسنى، وعشان من ساعة ماعاود البلد واني علبي عليه عشان يروح لنسايبه ويشوف خطيبته مراضيش..
هو اللي مختار وجع القلب وممتبعش كبيره.. واللي ميتبعش كبيره ياكتر تعاتيره..
ربيه يامليكه واديه اكبر درس فعمره، يستاهله وقليل عليه كمان.
مليكه: حبيبي يابوي، ربنا يخليك ليا ياناصفني ورافع راسي وواخد حمايا من يوم يومك..
حكيم : طب يلا تصبحي علي خير ياعفريتة بكر..
مليكه : وانت من اهل الخير يابوي..وكملت بضحكه.. يادوبك من دلوك اجهز فجمالات اصخم فيها بهباب حلل البيت كلها.. السلام امانه لامي جماره..
حكيم بضحكه : يوصل السلام.. بس خفي يدك علي بكر هبابه الواد مهيتحملش كتير..
مليكه : تقلقشي هينشف علي يدي ويتحمل حمول كد راسه اليابس اللي حاطه فالسما ديه...
قفل حكيم مع مليكه وبص جاره لجماره اللي كانت مسنوده علي دراعها وبصاله بطرف عينها ومرسوم علي وشها الضيق..
حكيم وهو عيقرب منها : مال بت قلبي ؟
جماره : بت قلبك زعلانه علي واد بطنها اللي مراضيشي تريحه، وسلمته فيد بت عواد تمرمطه، وانت راضيلها على ولدك، وعتشجعها وفرحان بيها كمان، لما خليتها هتشيخ عليه ومهيعرفش يكلمها بعد اكده ؟
حكيم مسك مناخير جماره بين صوابعه وهزها بمداعبه :اولا مليكه عتسلم عليكي والسلام امانه.. ثانيا افهمي يام مخ صغير انتي، متعمليش حالك حما وعايزه ولدك يحكم ويسيطر وخلاص..
اني مش عشجع مليكه ولا عخليها تشيخ على ولدي، له ياجماره.. اني ععدها عشان تنفع تكون مرت بكر..
بكر ليه دماغ لحاله وفيه من الغرور والكبر والعنطزه اللي ميخليهش يرضي بأي مره...
بكر غير ياجماره ولازمن مرته تكون غير..
تكون كده، ونده، وفقوته، وعناده.. وفنفس الوكت تكون فطيبته ومحبته وقلبها كيف قلبه.. تكسر بس تعرف تجبر.. تجرح بس تعرف كيف تداوي... تاخد بتارها وتربي بس بالادب واللين...
صدقيني بكر لو اتجوز وحده مفهاش الصفات داي هيعفص عليها برجليه ومهيتفكرهاش..
وهيدور علي غيرها.. وخصوصي انه مرغم عليها..
وديه هيخليه متعجبوشي فيها غير الحاجه اللي هيتوكد انها مش عند حد غيرها ..
مليكه فيها الجمال صوح بس ديه مش كفايه لبكر عشان الجمال والحلا بكر ممكن يقابله ويلقاه فكل حته .. فلازمن جار الجمال تكون فيه حجات تانيه كتيره تضاهي الجمال وتفوقه..
انتي اكتر وحده خابره ان بكر عيحبش غير الحاجه الواعره، البعيده، المستحيله اللي يتعب عليها عشان يطولها..
وطول عمره الحاجه الساهله معتحظهوش...
بكر لازمن هو اللي يشتهي مليكه ويطلب رضاها عليه ،ويتمناه ويشتريه بالغالي عشان يحس بقيمتها ..
مليكه لازمن تكون اهم حاجه فحياة بكر ياجماره و يكون معترف ان حياته بيها بقت احلي...
جماره اتنهدت : بس خايفه تزودها معاه وتجرحه وتخليه يدوس علي كرامته عشان اللي عتقول عليه ديه ياحكيم..
حكيم : بكر ميعملهاش داي.. ولا تجرا منيه..
بكر يدوس علي قلبه وروحه ولا يدوس علي كرامته ويخلي حد ياجي عليها..
بكر ولدي راجل حر ياجماره تخافيش عليه، هو بس كل اللي فيها انه هيعرف انه غلطان ويعترف بغلطه وموازين الامور بعدها تتعدل..
جماره : انشاله ديه اللي يكون ويحصول..
حكيم : طب هملينا من بكر ومليكه وبذيادانه منيهم وتعالي فحضن حكيمك مشتاق لجمارته وعايز يغفي علي ريحة الجنه عاد..
جماره ابتسمت وقربت منيه وهو سمعها كلام الغزل اللي اطرب قلبها وهدهد روحها، ونومته فحضنها ونامت معاه علي ريحة مسكه وطيبه.. والتنين رمو حمولهم فحضن بعض ونعسو...
********************
عدى الليل والصبح صبح..
وفبيت عواد الكل داخل انذار، والطبخ شغال، وعواد بنفسه كل هبابه يدخل يطمن ان كل حاجه تمام، ويشوف الحريم وصلو لوين،
ومن الموطبخ للمندره يشوف البنات وضبوها زين ولا فيها حاجه اكده ولا اكده..
ومتحمس وفرحان ان نسيبه اخيرا هيخطي عتبة داره وهياكل معاه عيش وملح ويمكن بعده تنولد محبه وقرب، وخصوصي بعد ما بكر يشوف مليكه اللي متوكد انه لما يشوفها هو اللي هيعجل فالجواز، ومهيصبرش بعد اكده...
عواد :مليكه.. بت يامليكه
مليكه طلت لابوها من علي بسطة السلم فوق وردت عليه : ايوه يابوي اني فوق اهنه عايز حاجه مني؟
عواد : عتعملي ايه فوق حداكي؟
مليكه بمكر :هستعد واشوفلي حاجه زينه البسها يابوي خطيبي اول نوبه يشوفني..
عواد شاورلها وهي نزلتله : مليكه يابنيتي.. معاوزشي تكسفيني قدام الناس بطولة لسانك ولا جلعك الماصخ خطيبك معيتحملشي وطبعه زنق واني ذات نفسي عخاف من زرابينه.. وبعدين مش عايزه يعرف انك قليلة ربايه من دلوك خليها بعد مايتجوزك..
مليكه : حاضر يابوي متخافش، والله داني بس عتحدت واطول لساني قدامكم اهنه، لكن قدام خطيبي اللي او نوبه اشوفه ويشوفني مقدرشي اعمل اكده واصل، ولاافتح خاشمي بكلمه..
وبعدين اتهوست يعني هاجي من طريق الله ونص واشتم ولا اتعارك؟
عواد : جدعه يامليكه ربنا يكملك بعقلك يابنيتي ويعديها علي خير يارب ..
اهو اني مخايفشي وحاطط يدي علي قلبيغير منك انتي ومنعم البو اللي عايز ياكل بكر وكل من الغيظ والغل، وخصوصي من وكت ماعرف بالعزومه وهو مهمل دارهم وقاعد مرابط على عتبة دارنا بره مستنيهم كيف كلب الحراسه..
مليكه بغضب : وايه اللي جايب هباب البرك ديه ومين اللي قاله علي العزومه من اصله..
عواد : وهو ديه عيستني حد يقوله؟!!
ديه عايش معانا، وكل هبابه ناطط فالبيت ويسأل ايه اللي جرا دلوك وايه اللي حوصول من شويه.. ديه حتي وكلنا مدخل روحه فيه ولازمن يعرف طابخين ايه كل يوم..
مليكه : عيل غتت زي امه.. اهو اني متحمله بكر وراضيه بيه عشان متوكده اني لو سبته مقداميشي غير منعم هيقع فقرابيزي..
عواد : له كوليها داي عشان حتي لو مفيش منعم مفيش غير بكر..
يلا همي على فوق شوفي كنتي عتعملي ايه كمليه..
مليكه : خابره انه مفيش غير بكر نصيبي ونصيبتي يابوي خابره.. وطالعه اهه بعد اذنك..
عواد : اذنك معاكي يختي..
مليكه ركبت سلمتين ونزلت لابوها تاني مبتسمه بسماجه.. ابوي..
عواد : خيييير نزلتي ليه فيه ايه تاااااني؟
مليكه بخجل مصطنع : كنت عقول.. عقول يعني.. اني هخجل اقعد مع خطيبي قدام الكل اكده... وحتي لا هو هيقدر يبصلي ويشوفني ولا اني هقدر ارفع عيني ابصله..
عواد : والمطلوب؟
مليكه : نقعدو لحالنا فالمندره الصغيره اني وبكر.. يعني متنادمشي عليا قدامهم، قوله مليكه فالمندره الصغيره وخليه هو يقوم من جاركم ويروح هناك.. واني هكون مستنيه فيها.. قولت ايه؟
عواد بعد شوية تفكير : ماشي.. بس خلي حد من العيال يقعد معاكم..
مليكه : ايوه لازم امال ايه يابوي امال يعني هقعد معاه لحالنا؟
عواد : طيب روحي انتي ولما ياجي وكت القعاد يحلها الحلال..
مليكه بفرحه: حاضر يابوي... وطلعت بسرعه علي السلم جري وعاودت لجمالات اللي قاعده مستنياها تعاود تكمل خربطه فوشها من تاني.. قربت منيها مليكه ووقفت قدامها ومسكت الفرشه ورجعت تغمسها فالفاونديشن وتطمس بيها حواجب جمالات لما مخلتلهاش حواجب خالص، وكل شويه جمالات تبص فالمرايه بعد مامليكه تعمل فوشها حاجه جديده وتتخرع من شكلها وبعدها تضحك مع مليكه بفرحه وحماس..
مليكه خلصت وبصت لجمالات وللشكل النهائي واتخيلت رد فعل بكر لما يشوفها ووقعت من الضحك وجمالات فضلت تتنطط وهى باصه فالمرايه وتضحك بفرحه زي ماتكون دخلت مدينة الالعاب..
مليكه بعد ماخلصت وصلة الضحك قعدت جمالات قدامها وفهمتها تعمل ايه وتقول لبكر ايه، وهى لبست نقاب وقالتلها انها هتكون جمبها على طول وحتي وهما قاعدين مع بعض مليكه هتقعد معاهم، بس مش هتتكلم ولا هتقول حاجه اكنها خرسه....
خلصت كل الاستعدادت وصوت عواد علي بالسلامات والترحيب لما وصل الشيخ واولاده اللي دخل هو اول واحد ووراه علي طول تميم، واخر واحد بكر اللي كان داخل يقدم رجل ويأخر رجل ومدخلش غير لما منعم زقه من ضهره يحثه علي الدخول بسرعه..
بكر دخل وهو عيتلفت حواليه بخوف وكانه داخل بيت رعب ومستني الوحش يطلعله من اي مكان وفاي لحظه..
دخلو المندره وبعد السلامات والطيبات، منعم ووولاد عمه رصو الوكل وكانت سفره فيها كل مالذ وطاب من اصناف الوكل الجميل، والكل نزل ياكل واللي كان يشبع كان يطلع يغسل يده فالحوض اللي بره المندره واللي كان قصاد المطبخ ويعاود تاني للمندره...
بكر فضل للاخر وطلع يغسل اديه وغسلهم وخلص.. وخليل واد عواد لفاه بشكير عشان ينشف بيه، وبكر ابتدا ينشف وفالاثناء دي رفع عنيه فالمرايه وشاف وش بدماغ باصص من الموطبخ بكر اول ماوعيه برق عنيه واترجف ولف بخضه يتأكد من اللي شافه لكن كان الوش اختفي..
بكر همس لنفسه وهو عيدي البشكير لخليل.. بسم الله الرحمن الرحيم.. اعوذ بالله من الخبث والخبائث.. ايوه يابوي ماهو لازمن بيت عواد يكون مسكون امال ايه..
مش زمارتيه والشياطين عتحب الحجات داي وتتلم على اصحابها!!!
عاود بكر للمندره وقعد هبابه وجابو الشاي والفاكهه والحلو بعد مالعيال شالو الوكل وابتدو يشربو فالشاي...
عواد : احمم... عقول ايه يابكر ياولدي نفسكشي تشوف عروستك؟
بكر رد بدون وعي :له.
عواد سمع رد بكر ورفع حواجبه وبرق عنيه وتميم دكم بكر بكوعه خلاه انتبه وعدل كلامه.. أاا قصدي له مش دلوك يعني خليها نوبه تانيه هي يعني هتطير لو مشفتهاشي؟
عواد : طيب هي عايزه تشوفك..
بكر بصوت واطي مسمعهوش غير ابوه واخوه : والله ماكان نفع غير جدي بشندي يرد عليك وعليها فالحته داي..
حكيم وتميم كتمو ضحكتهم، وحكيم ضرب عكازه فالارض... متفض وبطل تتعزز ياد انت، وقوم طل علي خطيبتك.. صوح عزموه اتمنع عاود بيت ابوه وشيع؟
نادم عليها ياحج عواد يابوي خليهم يطلو فوش بعض ويفضونا..
منعم : متسيبوه علي راحته يابوي هو مليهش مداز يشوفها هو بالغصب؟
عواد : بس انت يامنعم نقطنا بسكاتك..
منعم وهو بينفض جلابيته بغيظ : سكتنا..
عواد : بص للشيخ حكيم.. بعد اذنكم يابوي البت هتستحي انها تقعد وسطينا بكر هيروح يقعد معاها فالمندره الصغيره هبابه ويشوفو بعض ويعاود.. واد ياخليل.. ادي حس لاختك خليها تندلي من فوق وتروح ع المندره وتشوف خطيبها ويشوفها..
خليل هز دماغه لابوه بموافقه وطلع نده علي اخته اللي كانت فالموطبخ وطلعتله وهو وصلها للمندره وخد معاها اخوه الصغير صاحب الخمس سنين وهو مستغرب من النقاب اللي لابساه ومنزلاه تحت دقنها ديه..
خليل : متبشنقه ليه اكده ومتلفحه بالاسود كيف غراب البين؟
مليكه : ادب واحترام ياولد ابوي..
خليل : ادب ادب بس ياكشي العريس يخيل عليه ويصدق...
دخلها خليل المندره ونبه عليها تقعد بعيد عنه وتخلي مسافه بينهم كبيره، والاهم انها تتحدت معاه زين، وهملها
وراح ينادي بكر..
ومليكه اول ما دخلت طلعت اخوها وادته فلوس يروح يشتري بيها من الدكان وراحت علي جمالات اللي كانت مدسوسه ورا الباب وطلعتها، وقعدتها فالزاويه وهي نزلت النقاب وقعدت فالوش..
خليل راح عشان يجيب بكر،
وبكر قام معاه بالعافيه يجر فرجليه جر كيف اللي واخدينه للاعدام وبص لابوه واخوه تميم وهو علي باب المندره باستنجاد ومثل البكا بملامحه وحكيم برقله وشاورله بدماغه عشان يمشي، وبكر مشي وسلم امره لله...
وصلو المندره اللي كانت تقريبا علي مسافة كذا متر من المندره الكبيره وبكر وقف علي باب المندره وخليل زقه بالراحه : خش يابوي خش شوف خطيبتك متستحيش..
بكر دخل واول مادخل عينه وقعت علي اللي قاعده بنقابها وموطيه للارض ومفيش حاجه باينه منها...
بكر فسره : ايوه ياحظي مهو النقاب ياعتلبسه الحلوه بهبل عشان تدراي جمالها عن عيون الناس.. يالعفشه بهبل عشان تداري عفاشتها من عيون الناس.. وانتي طبعا معروفه مين فيهم ياكومي الكبير..
بكر اتقدم وقعد جار مليكه وجلي صوته واتكلم : ايه الدنيا.. متكشفي وتورينا المدسوس ومستخبي.. اكشفي عن وجهك ياخيتي اكشفي..
مليكه قعدت ساكته ومردتش عليه وعينها فالارض وبكر زفر بقلة صبر.. يعني اشوف ايه من وش اهلك اني وانتي متغمغمه اكده!! مكان بلاها الشوف من اصله؟
ارفعي ديه وخلصيني وقوع البلا ولا انتظاره.. ومد يده يشيل النقاب لكن مليكه بعدت عنه بوشها وجاله صوت من زواية الاوضه: ارفع يدك عن امي عتشيل نقابها ليه اني عروستك اديني اهه..
بكر لف رقابته بالراحه واول ماشاف جمالات وقف مصدوم وبرق عنيه وهمس : سلاما قولا من رب رحيم.. مين انتي ولا انتي وطلعتي من وين؟
جمالات : اني مليكه عروستك..
بكر قلبه وقع فرجليه وهو باصصلها وهمس بصوت مسموع... ياوقعتك السوده يابكر... ياسوادك ياحزين.. ومكنتش راضي وخايف تطلع شكل ابوها؟ .. ديه ابوها مكتمل الانوثه جارها يامري...
مليكه بعدت وهي كاتمه ضحكتها بالعافيه وجمالات اتقدمت من بكر ووقفت قدامه وابتسمت وهي عتقوله :
الله انت حلو قوي قوي.. بصي يمه مش خطيبي حلو؟
مليكه هزتلها دماغها وبكر همس بصوت يادوب طالع... ابووووي.. تميييم..
جمالات : عتنادم عالناس ليه تعالا اقعد جاري اهنه.. وشدته من طرف كمه ناحية الكنبه..
بكر نتر ايده منها وبعد عنيها وهي راحت وراه.. مالك يابوي مستحي مني ياك.. تستحيش انت راجل.. الرجاله متستحيش عيب.. وبصت لمليكه.. مش صوح يمه..
مليكه هزتلها دماغها وبكر زقها من قدامه وبصلها بقرف وبص لمليكه :
انتي امها؟
مليكه هزتله دماغها
بكر بصوت باكي : ربنا ياخدك انتي وخلوفتك يابعيده..
مليكه مقدراش تمسك نفسها وابتدت تتهز من كتر ماكاتمه الضحك
جمالات قربت لبكر تني بسرعه ومدت يدها علي على وشه وهو رجع وشه لورا وبحركه مفاجئه نقرته فعينه بصباعها وهي عتقوله : عينك زرقه وحلوه...
بكر وهو عيمسك عينه وعيتحرك من
قدامها عشان يبعد : غوري فقعتيلي عيني جاكي الطين... ولسه هيتحرك ويمشي جمالات مسكت فجلابيته منعته وهي عتقوله : رايح علي وين ومهملني لساتني مشبعتش منك ياحلو يابيض انته.. ولعبتله حواجبها..
بكر : عتلاعبي فأيه محداكيش ياحزني.. محداكيش حواجب.. انتي محداكيش وش اصلا .. محداكيش حاجه تدل علي انك بني آدمه من اساسه..
جمالات رمتله بوسه فالهوا وهو نفسه غمت عليه وبالعافيه رد عليها : غوري من وشي هستفرغ كل الوكل اللي كلته دلوكيت فوشك غوري.. وبص لمليكه وزعق وهو عيزق فيها ويبعدها عنه ويحاول يفلت من اديها :
متقوليلها تسيبني ساكته ليه ياواكله بتك انتي؟
جمالات : امي خرسه معتتحدتش
بكر : الله يكون فعونها تلقاها اتخرست من يوم ماولدتك وشافت وشك المقندل ديه..
جمالات : ربنا يسامحك عتعيب علي خلقة ربنا دلوك ربنا هيجازيك..
بكر : اوعي غوري اكده همليني انا وربنا نتخالصوا.. واتعصب ولساته عيحاول يفلت من ادين جمالات اللي مسكاه بقبضه من حديد ولما ملقيش فايده وطي قلع فردة جزمته وابتدا يضرب فأدين جمالات عشان تسيبه وهو عيتحدت من بين سنانه مع كل ضربه .. منك لله ياعواد الكلب.. منك لله يابوي.. منك لله يمه.. كله منه لله.. ومنك لله انتي وامك غوري... قالها وكانت جمالات سابت جلابيته من كتر الضرب فيها وبعدت عنيه وهو كل ماتبعد يروح وراها ويضرب فيها بغل وغيظ وهي تئن بصوت مكتوم ومقادراش تصرخ ومليكه لما شافت جمالات انتهت من الضرب راحت عليها وابتدت تحوش عنها وتحميها وبكر لما شافها عملت اكده نزل فيها هي كمان ضرب وهو عيقولها :
خدي انتي كمان نايبك عشان انتي تخلفي وبكر يتبلي..
خدي عشان مقعدتيش عليها بططتيها بعد ماشفتي شكلها اكده.. خدي عشان انتي علي قول جدي بشندي فاجر وخلفتي البت داي من جن عاشق.. الشيئ اللي خلفتيه ديه ميتحسبش عالبشر واصل..
جمالات وهي عتصد الضرب عنها وعن مليكه : اخص عليك يابكر يامودرم فيه حد يعمل فمليكه خطيبته وحبيبته اكده!!
بكر : طب تعالي يابت الكلب خدي عشان الكلمتين دول... وانتي خدي معاها عشان سميتيها مليكه بدال ماكنتي تسميها عفركوشه.. وبقا يضرب فيهم لما سواهم وفالاخر هملهم وطلع من بيت عواد خالص بعد ما تعب من الضرب وهو عينهج ولابس فردة جزمه والتانيه فيده، وطلع طوالي وكل مايتفكر شكل بت عواد يبقي عايز يجيب اللي فبطنه وهاين عليه يبكي وسند علي عمود نور لما شاف الناس عتبص عليه وابتدا يلبس فردة جزمته التانيه وبص وراه علي بيت عواد واتجدد الغيظ والكره القديم جواه اضعاف ولو حكموه دلوك عليهم كلهم يربطهم فبعض ويولع فيهم كيف حزمة الحطب ويشويهم شوي جماعي..
إلي هنا ينتهي الفصل الثالث من رواية جمارة ج2 بقلم ريناد
إرسال تعليق
يسعدنا تلقي اقتراحاتك أو تعليقك هنا